śrīmadvālmīkīya rāmāyaṇē sundarakāṇḍam ।
atha saptapañchāśassargaḥ ।
sa chandrakumudaṃ ramyaṃ sārkakāraṇḍavaṃ śubham ।
tiṣyaśravaṇakādambamabhraśaivālaśādvalam ॥ 1 ॥
punarvasumahāmīnaṃ lōhitāṅgamahāgraham ।
airāvatamahādvīpaṃ svātihaṃsavilōlitam ॥ 2 ॥
vātasaṅghātajātōrmi chandrāṃśuśiśirāmbumat ।
bhujaṅgayakṣagandharvaprabuddhakamalōtpalam ॥ 3 ॥
hanumānmārutagatirmahānauriva sāgaram ।
apāramapariśrāntaḥ pupluvē gaganārṇavam ॥ 4 ॥
grasamāna ivākāśaṃ tārādhipamivōllikhan ।
haranniva sanakṣatraṃ gaganaṃ sārkamaṇḍalam ॥ 5 ॥
mārutasyātmajaḥ śrīmānkapirvyōmacharō mahān ।
hanumānmēghajālāni vikarṣanniva gachChati ॥ 6 ॥
pāṇḍurāruṇavarṇāni nīlamāñjiṣṭhakāni cha ।
haritāruṇavarṇāni mahābhrāṇi chakāśirē ॥ 7 ॥
praviśannabhrajālāni niṣpataṃścha punaḥ punaḥ ।
prachChannaścha prakāśaścha chandramā iva lakṣyatē ॥ 8 ॥
vividhābhraghanāpannagōcharō dhavalāmbaraḥ ।
dṛśyādṛśyatanurvīrastadā chandrāyatē'mbarē ॥ 9 ॥
tārkṣyāyamāṇō gaganē babhāsē vāyunandanaḥ ।
dārayanmēghabṛndāni niṣpataṃścha punaḥ punaḥ ॥ 10 ॥
nadannādēna mahatā mēghasvanamahāsvanaḥ ।
pravarānrākṣasān hatvā nāma viśrāvya chātmanaḥ ॥ 11 ॥
ākulāṃ nagarīṃ kṛtvā vyathayitvā cha rāvaṇam ।
ardayitvā balaṃ ghōraṃ vaidēhīmabhivādya cha ॥ 12 ॥
ājagāma mahātējāḥ punarmadhyēna sāgaram ।
parvatēndraṃ sunābhaṃ cha samupaspṛśya vīryavān ॥ 13 ॥
jyāmukta iva nārāchō mahāvēgō'bhyupāgataḥ ।
sa kiñchidanusamprāptaḥ samālōkya mahāgirim ॥ 14 ॥
mahēndraṃ mēghasaṅkāśaṃ nanāda haripuṅgavaḥ ।
sa pūrayāmāsa kapirdiśō daśa samantataḥ ॥ 15 ॥
nadannādēna mahatā mēghasvanamahāsvanaḥ ।
sa taṃ dēśamanuprāptaḥ suhṛddharśanalālasaḥ ॥ 16 ॥
nanāda hariśārdūlō lāṅgūlaṃ chāpyakampayat ।
tasya nānadyamānasya suparṇacharitē pathi ॥ 17 ॥
phalatīvāsya ghōṣēṇa gaganaṃ sārkamaṇḍalam ।
yē tu tatrōttarē tīrē samudrasya mahābalāḥ ॥ 18 ॥
pūrvaṃ saṃviṣṭhitāśśūrā vāyuputradidṛkṣavaḥ ।
mahatō vātanunnasya tōyadasyēva garjitam ॥ 19 ॥
śuśruvustē tadā ghōṣamūruvēgaṃ hanūmataḥ ।
tē dīnamanasassarvē śuśruvuḥ kānanaukasaḥ ॥ 20 ॥
vānarēndrasya nirghōṣaṃ parjanyaninadōpamam ।
niśamya nadatō nādaṃ vānarāstē samantataḥ ॥ 21 ॥
babhūvurutsukāssarvē suhṛddharśanakāṅkṣiṇaḥ ।
jāmbavān sa hariśrēṣṭhaḥ prītisaṃhṛṣṭamānasaḥ ॥ 22 ॥
upāmantrya harīn sarvānidaṃ vachanamabravīt ।
sarvathā kṛtakāryō'sau hanumānnātra saṃśayaḥ ॥ 23 ॥
na hyasyākṛtakāryasya nāda ēvaṃvidhō bhavēt ।
tasya bāhūruvēgaṃ cha ninādaṃ cha mahātmanaḥ ॥ 24 ॥
niśamya harayō hṛṣṭāḥ samutpētustatastataḥ ।
tē nagāgrānnagāgrāṇi śikharāchChikharāṇi cha ॥ 25 ॥
prahṛṣṭāḥ samapadyanta hanūmantaṃ didṛkṣavaḥ ।
tē prītāḥ pādapāgrēṣu gṛhya śākhāḥ suviṣṭhitāḥ ॥ 26 ॥
vāsāṃsīva praśākhāścha samāvidhyanta vānarāḥ ।
girigahvarasaṃlīnō yathā garjati mārutaḥ ॥ 27 ॥
ēvaṃ jagarja balavān hanumānmārutātmajaḥ ।
tamabhraghanasaṅkāśamāpatantaṃ mahākapim ॥ 28 ॥
dṛṣṭvā tē vānarāssarvē tasthuḥ prāñjalayastadā ।
tatastu vēgavāṃstasya girērgirinibhaḥ kapiḥ ॥ 29 ॥
nipapāta mahēndrasya śikharē pādapākulē ।
harṣēṇāpūryamāṇō'sau ramyē parvatanirjharē ॥ 30 ॥
Chinnapakṣa ivā'kāśātpapāta dharaṇīdharaḥ ।
tatastē prītamanasassarvē vānarapuṅgavāḥ ॥ 31 ॥
hanumantaṃ mahātmānaṃ parivāryōpatasthirē ।
parivārya cha tē sarvē parāṃ prītimupāgatāḥ ॥ 32 ॥
prahṛṣṭavadanā ssarvē tamarōgamupāgatam ।
upāyanāni chādāya mūlāni cha phalāni cha ॥ 33 ॥
pratyarchayan hariśrēṣṭhaṃ harayō mārutātmajam ।
hanumāṃstu gurūn vṛddhāñjāmbavatpramukhāṃstadā ॥ 34 ॥
kumāramaṅgadaṃ chaiva sō'vandata mahākapiḥ ।
sa tābhyāṃ pūjitaḥ pūjyaḥ kapibhiścha prasāditaḥ ॥ 35 ॥
dṛṣṭā sītēti vikrānta ssaṅkṣēpēṇa nyavēdayat ।
niṣasāda cha hastēna gṛhītvā vālinassutam ॥ 36 ॥
ramaṇīyē vanōddēśē mahēndrasya girēstadā ।
hanumānabravīddhṛṣṭastadā tānvānararṣabhān ॥ 37 ॥
aśōkavanikāsaṃsthā dṛṣṭā sā janakātmajā ।
rakṣamāṇā sughōrābhī rākṣasībhiraninditā ॥ 38 ॥
ēkavēṇīdharā bālā rāmadarśanalālasā ।
upavāsapariśrāntā jaṭilā malinā kṛśā ॥ 39 ॥
tatō dṛṣṭēti vachanaṃ mahārthamamṛtōpamam ।
niśamya mārutēssarvē muditā vānarābhavan ॥ 40 ॥
kṣvēlantyanyē nadantyanyē garjantyanyē mahābalāḥ ।
chakruḥ kilakilāmanyē pratigarjanti chāparē ॥ 41 ॥
kēchiduchChritalāṅgūlāḥ prahṛṣṭāḥ kapikuñjarāḥ ।
āyatāñchitadīrghāṇi lāṅgūlāni pravivyadhuḥ ॥ 42 ॥
aparē cha hanūmantaṃ vānarā vāraṇōpamam ।
āplutya giriśṛṅgēbhyassaṃspṛśanti sma harṣitāḥ ॥ 43 ॥
uktavākyaṃ hanūmantamaṅgadastamathābravīt ।
sarvēṣāṃ harivīrāṇāṃ madhyē vachanamuttamam ॥ 44 ॥
sattvē vīryē na tē kaśchitsamō vānara vidyatē ।
yadavaplutya vistīrṇaṃ sāgaraṃ punarāgataḥ ॥ 45 ॥
ahō svāmini tē bhaktirahō vīryamahō dhṛtiḥ ।
diṣṭyā dṛṣṭā tvayā dēvī rāmapatnī yaśasvinī ॥ 46 ॥
diṣṭyā tyakṣyati kākutstha śśōkaṃ sītāviyōgajam ।
tatō'ṅgadaṃ hanūmantaṃ jāmbavantaṃ cha vānarāḥ ॥ 47 ॥
parivārya pramuditā bhējirē vipulāśśilāḥ ।
śrōtukāmāssamudrasya laṅghanaṃ vānarōttamāḥ ॥ 48 ॥
darśanaṃ chāpi laṅkāyāssītāyā rāvaṇasya cha ।
tasthuḥ prāñjalayassarvē hanumadvachanōnmukhāḥ ॥ 49 ॥
tasthau tatrāṅgadaḥ śrīmān vānarairbahubhirvṛtaḥ ।
upāsyamānō vibudhairdivi dēvapatiryathā ॥ 50 ॥
hanūmatā kīrtimatā yaśasvinā tathāṅgadēnāṅgadabaddhabāhunā ।
mudā tadā'dhyāsitamunnataṃ mahanmahīdharāgraṃ jvalitaṃ śriyābhavat ॥ 51 ॥
ityārṣē śrīmadrāmāyaṇē vālmīkīya ādikāvyē sundarakāṇḍē saptapañchāśassargaḥ ॥
