శ్రీమద్వాల్మీకీయ రామాయణే సుందరకాండమ్ ।
అథ సప్తపంచాశస్సర్గః ।
స చంద్రకుముదం రమ్యం సార్కకారండవం శుభమ్ ।
తిష్యశ్రవణకాదంబమభ్రశైవాలశాద్వలమ్ ॥ 1 ॥
పునర్వసుమహామీనం లోహితాంగమహాగ్రహమ్ ।
ఐరావతమహాద్వీపం స్వాతిహంసవిలోలితమ్ ॥ 2 ॥
వాతసంఘాతజాతోర్మి చంద్రాంశుశిశిరాంబుమత్ ।
భుజంగయక్షగంధర్వప్రబుద్ధకమలోత్పలమ్ ॥ 3 ॥
హనుమాన్మారుతగతిర్మహానౌరివ సాగరమ్ ।
అపారమపరిశ్రాంతః పుప్లువే గగనార్ణవమ్ ॥ 4 ॥
గ్రసమాన ఇవాకాశం తారాధిపమివోల్లిఖన్ ।
హరన్నివ సనక్షత్రం గగనం సార్కమండలమ్ ॥ 5 ॥
మారుతస్యాత్మజః శ్రీమాన్కపిర్వ్యోమచరో మహాన్ ।
హనుమాన్మేఘజాలాని వికర్షన్నివ గచ్ఛతి ॥ 6 ॥
పాండురారుణవర్ణాని నీలమాంజిష్ఠకాని చ ।
హరితారుణవర్ణాని మహాభ్రాణి చకాశిరే ॥ 7 ॥
ప్రవిశన్నభ్రజాలాని నిష్పతంశ్చ పునః పునః ।
ప్రచ్ఛన్నశ్చ ప్రకాశశ్చ చంద్రమా ఇవ లక్ష్యతే ॥ 8 ॥
వివిధాభ్రఘనాపన్నగోచరో ధవలాంబరః ।
దృశ్యాదృశ్యతనుర్వీరస్తదా చంద్రాయతేఽంబరే ॥ 9 ॥
తార్క్ష్యాయమాణో గగనే బభాసే వాయునందనః ।
దారయన్మేఘబృందాని నిష్పతంశ్చ పునః పునః ॥ 10 ॥
నదన్నాదేన మహతా మేఘస్వనమహాస్వనః ।
ప్రవరాన్రాక్షసాన్ హత్వా నామ విశ్రావ్య చాత్మనః ॥ 11 ॥
ఆకులాం నగరీం కృత్వా వ్యథయిత్వా చ రావణమ్ ।
అర్దయిత్వా బలం ఘోరం వైదేహీమభివాద్య చ ॥ 12 ॥
ఆజగామ మహాతేజాః పునర్మధ్యేన సాగరమ్ ।
పర్వతేంద్రం సునాభం చ సముపస్పృశ్య వీర్యవాన్ ॥ 13 ॥
జ్యాముక్త ఇవ నారాచో మహావేగోఽభ్యుపాగతః ।
స కించిదనుసంప్రాప్తః సమాలోక్య మహాగిరిమ్ ॥ 14 ॥
మహేంద్రం మేఘసంకాశం ననాద హరిపుంగవః ।
స పూరయామాస కపిర్దిశో దశ సమంతతః ॥ 15 ॥
నదన్నాదేన మహతా మేఘస్వనమహాస్వనః ।
స తం దేశమనుప్రాప్తః సుహృద్ధర్శనలాలసః ॥ 16 ॥
ననాద హరిశార్దూలో లాంగూలం చాప్యకంపయత్ ।
తస్య నానద్యమానస్య సుపర్ణచరితే పథి ॥ 17 ॥
ఫలతీవాస్య ఘోషేణ గగనం సార్కమండలమ్ ।
యే తు తత్రోత్తరే తీరే సముద్రస్య మహాబలాః ॥ 18 ॥
పూర్వం సంవిష్ఠితాశ్శూరా వాయుపుత్రదిదృక్షవః ।
మహతో వాతనున్నస్య తోయదస్యేవ గర్జితమ్ ॥ 19 ॥
శుశ్రువుస్తే తదా ఘోషమూరువేగం హనూమతః ।
తే దీనమనసస్సర్వే శుశ్రువుః కాననౌకసః ॥ 20 ॥
వానరేంద్రస్య నిర్ఘోషం పర్జన్యనినదోపమమ్ ।
నిశమ్య నదతో నాదం వానరాస్తే సమంతతః ॥ 21 ॥
బభూవురుత్సుకాస్సర్వే సుహృద్ధర్శనకాంక్షిణః ।
జాంబవాన్ స హరిశ్రేష్ఠః ప్రీతిసంహృష్టమానసః ॥ 22 ॥
ఉపామంత్ర్య హరీన్ సర్వానిదం వచనమబ్రవీత్ ।
సర్వథా కృతకార్యోఽసౌ హనుమాన్నాత్ర సంశయః ॥ 23 ॥
న హ్యస్యాకృతకార్యస్య నాద ఏవంవిధో భవేత్ ।
తస్య బాహూరువేగం చ నినాదం చ మహాత్మనః ॥ 24 ॥
నిశమ్య హరయో హృష్టాః సముత్పేతుస్తతస్తతః ।
తే నగాగ్రాన్నగాగ్రాణి శిఖరాచ్ఛిఖరాణి చ ॥ 25 ॥
ప్రహృష్టాః సమపద్యంత హనూమంతం దిదృక్షవః ।
తే ప్రీతాః పాదపాగ్రేషు గృహ్య శాఖాః సువిష్ఠితాః ॥ 26 ॥
వాసాంసీవ ప్రశాఖాశ్చ సమావిధ్యంత వానరాః ।
గిరిగహ్వరసంలీనో యథా గర్జతి మారుతః ॥ 27 ॥
ఏవం జగర్జ బలవాన్ హనుమాన్మారుతాత్మజః ।
తమభ్రఘనసంకాశమాపతంతం మహాకపిమ్ ॥ 28 ॥
దృష్ట్వా తే వానరాస్సర్వే తస్థుః ప్రాంజలయస్తదా ।
తతస్తు వేగవాంస్తస్య గిరేర్గిరినిభః కపిః ॥ 29 ॥
నిపపాత మహేంద్రస్య శిఖరే పాదపాకులే ।
హర్షేణాపూర్యమాణోఽసౌ రమ్యే పర్వతనిర్ఝరే ॥ 30 ॥
ఛిన్నపక్ష ఇవాఽకాశాత్పపాత ధరణీధరః ।
తతస్తే ప్రీతమనసస్సర్వే వానరపుంగవాః ॥ 31 ॥
హనుమంతం మహాత్మానం పరివార్యోపతస్థిరే ।
పరివార్య చ తే సర్వే పరాం ప్రీతిముపాగతాః ॥ 32 ॥
ప్రహృష్టవదనా స్సర్వే తమరోగముపాగతమ్ ।
ఉపాయనాని చాదాయ మూలాని చ ఫలాని చ ॥ 33 ॥
ప్రత్యర్చయన్ హరిశ్రేష్ఠం హరయో మారుతాత్మజమ్ ।
హనుమాంస్తు గురూన్ వృద్ధాంజాంబవత్ప్రముఖాంస్తదా ॥ 34 ॥
కుమారమంగదం చైవ సోఽవందత మహాకపిః ।
స తాభ్యాం పూజితః పూజ్యః కపిభిశ్చ ప్రసాదితః ॥ 35 ॥
దృష్టా సీతేతి విక్రాంత స్సంక్షేపేణ న్యవేదయత్ ।
నిషసాద చ హస్తేన గృహీత్వా వాలినస్సుతమ్ ॥ 36 ॥
రమణీయే వనోద్దేశే మహేంద్రస్య గిరేస్తదా ।
హనుమానబ్రవీద్ధృష్టస్తదా తాన్వానరర్షభాన్ ॥ 37 ॥
అశోకవనికాసంస్థా దృష్టా సా జనకాత్మజా ।
రక్షమాణా సుఘోరాభీ రాక్షసీభిరనిందితా ॥ 38 ॥
ఏకవేణీధరా బాలా రామదర్శనలాలసా ।
ఉపవాసపరిశ్రాంతా జటిలా మలినా కృశా ॥ 39 ॥
తతో దృష్టేతి వచనం మహార్థమమృతోపమమ్ ।
నిశమ్య మారుతేస్సర్వే ముదితా వానరాభవన్ ॥ 40 ॥
క్ష్వేలంత్యన్యే నదంత్యన్యే గర్జంత్యన్యే మహాబలాః ।
చక్రుః కిలకిలామన్యే ప్రతిగర్జంతి చాపరే ॥ 41 ॥
కేచిదుచ్ఛ్రితలాంగూలాః ప్రహృష్టాః కపికుంజరాః ।
ఆయతాంచితదీర్ఘాణి లాంగూలాని ప్రవివ్యధుః ॥ 42 ॥
అపరే చ హనూమంతం వానరా వారణోపమమ్ ।
ఆప్లుత్య గిరిశృంగేభ్యస్సంస్పృశంతి స్మ హర్షితాః ॥ 43 ॥
ఉక్తవాక్యం హనూమంతమంగదస్తమథాబ్రవీత్ ।
సర్వేషాం హరివీరాణాం మధ్యే వచనముత్తమమ్ ॥ 44 ॥
సత్త్వే వీర్యే న తే కశ్చిత్సమో వానర విద్యతే ।
యదవప్లుత్య విస్తీర్ణం సాగరం పునరాగతః ॥ 45 ॥
అహో స్వామిని తే భక్తిరహో వీర్యమహో ధృతిః ।
దిష్ట్యా దృష్టా త్వయా దేవీ రామపత్నీ యశస్వినీ ॥ 46 ॥
దిష్ట్యా త్యక్ష్యతి కాకుత్స్థ శ్శోకం సీతావియోగజమ్ ।
తతోఽంగదం హనూమంతం జాంబవంతం చ వానరాః ॥ 47 ॥
పరివార్య ప్రముదితా భేజిరే విపులాశ్శిలాః ।
శ్రోతుకామాస్సముద్రస్య లంఘనం వానరోత్తమాః ॥ 48 ॥
దర్శనం చాపి లంకాయాస్సీతాయా రావణస్య చ ।
తస్థుః ప్రాంజలయస్సర్వే హనుమద్వచనోన్ముఖాః ॥ 49 ॥
తస్థౌ తత్రాంగదః శ్రీమాన్ వానరైర్బహుభిర్వృతః ।
ఉపాస్యమానో విబుధైర్దివి దేవపతిర్యథా ॥ 50 ॥
హనూమతా కీర్తిమతా యశస్వినా తథాంగదేనాంగదబద్ధబాహునా ।
ముదా తదాఽధ్యాసితమున్నతం మహన్మహీధరాగ్రం జ్వలితం శ్రియాభవత్ ॥ 51 ॥
ఇత్యార్షే శ్రీమద్రామాయణే వాల్మీకీయ ఆదికావ్యే సుందరకాండే సప్తపంచాశస్సర్గః ॥
