ശ്രീമദ്വാല്മീകീയ രാമായണേ സുംദരകാംഡമ് ।
അഥ സപ്തപംചാശസ്സര്ഗഃ ।
സ ചംദ്രകുമുദം രമ്യം സാര്കകാരംഡവം ശുഭമ് ।
തിഷ്യശ്രവണകാദംബമഭ്രശൈവാലശാദ്വലമ് ॥ 1 ॥
പുനർവസുമഹാമീനം ലോഹിതാംഗമഹാഗ്രഹമ് ।
ഐരാവതമഹാദ്വീപം സ്വാതിഹംസവിലോലിതമ് ॥ 2 ॥
വാതസംഘാതജാതോര്മി ചംദ്രാംശുശിശിരാംബുമത് ।
ഭുജംഗയക്ഷഗംധർവപ്രബുദ്ധകമലോത്പലമ് ॥ 3 ॥
ഹനുമാന്മാരുതഗതിര്മഹാനൌരിവ സാഗരമ് ।
അപാരമപരിശ്രാംതഃ പുപ്ലുവേ ഗഗനാര്ണവമ് ॥ 4 ॥
ഗ്രസമാന ഇവാകാശം താരാധിപമിവോല്ലിഖന് ।
ഹരന്നിവ സനക്ഷത്രം ഗഗനം സാര്കമംഡലമ് ॥ 5 ॥
മാരുതസ്യാത്മജഃ ശ്രീമാന്കപിർവ്യോമചരോ മഹാന് ।
ഹനുമാന്മേഘജാലാനി വികര്ഷന്നിവ ഗച്ഛതി ॥ 6 ॥
പാംഡുരാരുണവര്ണാനി നീലമാംജിഷ്ഠകാനി ച ।
ഹരിതാരുണവര്ണാനി മഹാഭ്രാണി ചകാശിരേ ॥ 7 ॥
പ്രവിശന്നഭ്രജാലാനി നിഷ്പതംശ്ച പുനഃ പുനഃ ।
പ്രച്ഛന്നശ്ച പ്രകാശശ്ച ചംദ്രമാ ഇവ ലക്ഷ്യതേ ॥ 8 ॥
വിവിധാഭ്രഘനാപന്നഗോചരോ ധവലാംബരഃ ।
ദൃശ്യാദൃശ്യതനുർവീരസ്തദാ ചംദ്രായതേഽംബരേ ॥ 9 ॥
താര്ക്ഷ്യായമാണോ ഗഗനേ ബഭാസേ വായുനംദനഃ ।
ദാരയന്മേഘബൃംദാനി നിഷ്പതംശ്ച പുനഃ പുനഃ ॥ 10 ॥
നദന്നാദേന മഹതാ മേഘസ്വനമഹാസ്വനഃ ।
പ്രവരാന്രാക്ഷസാന് ഹത്വാ നാമ വിശ്രാവ്യ ചാത്മനഃ ॥ 11 ॥
ആകുലാം നഗരീം കൃത്വാ വ്യഥയിത്വാ ച രാവണമ് ।
അര്ദയിത്വാ ബലം ഘോരം വൈദേഹീമഭിവാദ്യ ച ॥ 12 ॥
ആജഗാമ മഹാതേജാഃ പുനര്മധ്യേന സാഗരമ് ।
പർവതേംദ്രം സുനാഭം ച സമുപസ്പൃശ്യ വീര്യവാന് ॥ 13 ॥
ജ്യാമുക്ത ഇവ നാരാചോ മഹാവേഗോഽഭ്യുപാഗതഃ ।
സ കിംചിദനുസംപ്രാപ്തഃ സമാലോക്യ മഹാഗിരിമ് ॥ 14 ॥
മഹേംദ്രം മേഘസംകാശം നനാദ ഹരിപുംഗവഃ ।
സ പൂരയാമാസ കപിര്ദിശോ ദശ സമംതതഃ ॥ 15 ॥
നദന്നാദേന മഹതാ മേഘസ്വനമഹാസ്വനഃ ।
സ തം ദേശമനുപ്രാപ്തഃ സുഹൃദ്ധര്ശനലാലസഃ ॥ 16 ॥
നനാദ ഹരിശാര്ദൂലോ ലാംഗൂലം ചാപ്യകംപയത് ।
തസ്യ നാനദ്യമാനസ്യ സുപര്ണചരിതേ പഥി ॥ 17 ॥
ഫലതീവാസ്യ ഘോഷേണ ഗഗനം സാര്കമംഡലമ് ।
യേ തു തത്രോത്തരേ തീരേ സമുദ്രസ്യ മഹാബലാഃ ॥ 18 ॥
പൂർവം സംവിഷ്ഠിതാശ്ശൂരാ വായുപുത്രദിദൃക്ഷവഃ ।
മഹതോ വാതനുന്നസ്യ തോയദസ്യേവ ഗര്ജിതമ് ॥ 19 ॥
ശുശ്രുവുസ്തേ തദാ ഘോഷമൂരുവേഗം ഹനൂമതഃ ।
തേ ദീനമനസസ്സർവേ ശുശ്രുവുഃ കാനനൌകസഃ ॥ 20 ॥
വാനരേംദ്രസ്യ നിര്ഘോഷം പര്ജന്യനിനദോപമമ് ।
നിശമ്യ നദതോ നാദം വാനരാസ്തേ സമംതതഃ ॥ 21 ॥
ബഭൂവുരുത്സുകാസ്സർവേ സുഹൃദ്ധര്ശനകാംക്ഷിണഃ ।
ജാംബവാന് സ ഹരിശ്രേഷ്ഠഃ പ്രീതിസംഹൃഷ്ടമാനസഃ ॥ 22 ॥
ഉപാമംത്ര്യ ഹരീന് സർവാനിദം വചനമബ്രവീത് ।
സർവഥാ കൃതകാര്യോഽസൌ ഹനുമാന്നാത്ര സംശയഃ ॥ 23 ॥
ന ഹ്യസ്യാകൃതകാര്യസ്യ നാദ ഏവംവിധോ ഭവേത് ।
തസ്യ ബാഹൂരുവേഗം ച നിനാദം ച മഹാത്മനഃ ॥ 24 ॥
നിശമ്യ ഹരയോ ഹൃഷ്ടാഃ സമുത്പേതുസ്തതസ്തതഃ ।
തേ നഗാഗ്രാന്നഗാഗ്രാണി ശിഖരാച്ഛിഖരാണി ച ॥ 25 ॥
പ്രഹൃഷ്ടാഃ സമപദ്യംത ഹനൂമംതം ദിദൃക്ഷവഃ ।
തേ പ്രീതാഃ പാദപാഗ്രേഷു ഗൃഹ്യ ശാഖാഃ സുവിഷ്ഠിതാഃ ॥ 26 ॥
വാസാംസീവ പ്രശാഖാശ്ച സമാവിധ്യംത വാനരാഃ ।
ഗിരിഗഹ്വരസംലീനോ യഥാ ഗര്ജതി മാരുതഃ ॥ 27 ॥
ഏവം ജഗര്ജ ബലവാന് ഹനുമാന്മാരുതാത്മജഃ ।
തമഭ്രഘനസംകാശമാപതംതം മഹാകപിമ് ॥ 28 ॥
ദൃഷ്ട്വാ തേ വാനരാസ്സർവേ തസ്ഥുഃ പ്രാംജലയസ്തദാ ।
തതസ്തു വേഗവാംസ്തസ്യ ഗിരേര്ഗിരിനിഭഃ കപിഃ ॥ 29 ॥
നിപപാത മഹേംദ്രസ്യ ശിഖരേ പാദപാകുലേ ।
ഹര്ഷേണാപൂര്യമാണോഽസൌ രമ്യേ പർവതനിര്ഝരേ ॥ 30 ॥
ഛിന്നപക്ഷ ഇവാഽകാശാത്പപാത ധരണീധരഃ ।
തതസ്തേ പ്രീതമനസസ്സർവേ വാനരപുംഗവാഃ ॥ 31 ॥
ഹനുമംതം മഹാത്മാനം പരിവാര്യോപതസ്ഥിരേ ।
പരിവാര്യ ച തേ സർവേ പരാം പ്രീതിമുപാഗതാഃ ॥ 32 ॥
പ്രഹൃഷ്ടവദനാ സ്സർവേ തമരോഗമുപാഗതമ് ।
ഉപായനാനി ചാദായ മൂലാനി ച ഫലാനി ച ॥ 33 ॥
പ്രത്യര്ചയന് ഹരിശ്രേഷ്ഠം ഹരയോ മാരുതാത്മജമ് ।
ഹനുമാംസ്തു ഗുരൂന് വൃദ്ധാംജാംബവത്പ്രമുഖാംസ്തദാ ॥ 34 ॥
കുമാരമംഗദം ചൈവ സോഽവംദത മഹാകപിഃ ।
സ താഭ്യാം പൂജിതഃ പൂജ്യഃ കപിഭിശ്ച പ്രസാദിതഃ ॥ 35 ॥
ദൃഷ്ടാ സീതേതി വിക്രാംത സ്സംക്ഷേപേണ ന്യവേദയത് ।
നിഷസാദ ച ഹസ്തേന ഗൃഹീത്വാ വാലിനസ്സുതമ് ॥ 36 ॥
രമണീയേ വനോദ്ദേശേ മഹേംദ്രസ്യ ഗിരേസ്തദാ ।
ഹനുമാനബ്രവീദ്ധൃഷ്ടസ്തദാ താന്വാനരര്ഷഭാന് ॥ 37 ॥
അശോകവനികാസംസ്ഥാ ദൃഷ്ടാ സാ ജനകാത്മജാ ।
രക്ഷമാണാ സുഘോരാഭീ രാക്ഷസീഭിരനിംദിതാ ॥ 38 ॥
ഏകവേണീധരാ ബാലാ രാമദര്ശനലാലസാ ।
ഉപവാസപരിശ്രാംതാ ജടിലാ മലിനാ കൃശാ ॥ 39 ॥
തതോ ദൃഷ്ടേതി വചനം മഹാര്ഥമമൃതോപമമ് ।
നിശമ്യ മാരുതേസ്സർവേ മുദിതാ വാനരാഭവന് ॥ 40 ॥
ക്ഷ്വേലംത്യന്യേ നദംത്യന്യേ ഗര്ജംത്യന്യേ മഹാബലാഃ ।
ചക്രുഃ കിലകിലാമന്യേ പ്രതിഗര്ജംതി ചാപരേ ॥ 41 ॥
കേചിദുച്ഛ്രിതലാംഗൂലാഃ പ്രഹൃഷ്ടാഃ കപികുംജരാഃ ।
ആയതാംചിതദീര്ഘാണി ലാംഗൂലാനി പ്രവിവ്യധുഃ ॥ 42 ॥
അപരേ ച ഹനൂമംതം വാനരാ വാരണോപമമ് ।
ആപ്ലുത്യ ഗിരിശൃംഗേഭ്യസ്സംസ്പൃശംതി സ്മ ഹര്ഷിതാഃ ॥ 43 ॥
ഉക്തവാക്യം ഹനൂമംതമംഗദസ്തമഥാബ്രവീത് ।
സർവേഷാം ഹരിവീരാണാം മധ്യേ വചനമുത്തമമ് ॥ 44 ॥
സത്ത്വേ വീര്യേ ന തേ കശ്ചിത്സമോ വാനര വിദ്യതേ ।
യദവപ്ലുത്യ വിസ്തീര്ണം സാഗരം പുനരാഗതഃ ॥ 45 ॥
അഹോ സ്വാമിനി തേ ഭക്തിരഹോ വീര്യമഹോ ധൃതിഃ ।
ദിഷ്ട്യാ ദൃഷ്ടാ ത്വയാ ദേവീ രാമപത്നീ യശസ്വിനീ ॥ 46 ॥
ദിഷ്ട്യാ ത്യക്ഷ്യതി കാകുത്സ്ഥ ശ്ശോകം സീതാവിയോഗജമ് ।
തതോഽംഗദം ഹനൂമംതം ജാംബവംതം ച വാനരാഃ ॥ 47 ॥
പരിവാര്യ പ്രമുദിതാ ഭേജിരേ വിപുലാശ്ശിലാഃ ।
ശ്രോതുകാമാസ്സമുദ്രസ്യ ലംഘനം വാനരോത്തമാഃ ॥ 48 ॥
ദര്ശനം ചാപി ലംകായാസ്സീതായാ രാവണസ്യ ച ।
തസ്ഥുഃ പ്രാംജലയസ്സർവേ ഹനുമദ്വചനോന്മുഖാഃ ॥ 49 ॥
തസ്ഥൌ തത്രാംഗദഃ ശ്രീമാന് വാനരൈര്ബഹുഭിർവൃതഃ ।
ഉപാസ്യമാനോ വിബുധൈര്ദിവി ദേവപതിര്യഥാ ॥ 50 ॥
ഹനൂമതാ കീര്തിമതാ യശസ്വിനാ തഥാംഗദേനാംഗദബദ്ധബാഹുനാ ।
മുദാ തദാഽധ്യാസിതമുന്നതം മഹന്മഹീധരാഗ്രം ജ്വലിതം ശ്രിയാഭവത് ॥ 51 ॥
ഇത്യാര്ഷേ ശ്രീമദ്രാമായണേ വാല്മീകീയ ആദികാവ്യേ സുംദരകാംഡേ സപ്തപംചാശസ്സര്ഗഃ ॥
