ශ්රීමද්වාල්මීකීය රාමායණේ සුංදරකාංඩම් ।
අථ සප්තපංචාශස්සර්ගඃ ।
ස චංද්රකුමුදං රම්යං සාර්කකාරංඩවං ශුභම් ।
තිෂ්යශ්රවණකාදංබමභ්රශෛවාලශාද්වලම් ॥ 1 ॥
පුනර්වසුමහාමීනං ලෝහිතාංගමහාග්රහම් ।
ඓරාවතමහාද්වීපං ස්වාතිහංසවිලෝලිතම් ॥ 2 ॥
වාතසංඝාතජාතෝර්මි චංද්රාංශුශිශිරාංබුමත් ।
භුජංගයක්ෂගංධර්වප්රබුද්ධකමලෝත්පලම් ॥ 3 ॥
හනුමාන්මාරුතගතිර්මහානෞරිව සාගරම් ।
අපාරමපරිශ්රාංතඃ පුප්ලුවේ ගගනාර්ණවම් ॥ 4 ॥
ග්රසමාන ඉවාකාශං තාරාධිපමිවෝල්ලිඛන් ।
හරන්නිව සනක්ෂත්රං ගගනං සාර්කමංඩලම් ॥ 5 ॥
මාරුතස්යාත්මජඃ ශ්රීමාන්කපිර්ව්යෝමචරෝ මහාන් ।
හනුමාන්මේඝජාලානි විකර්ෂන්නිව ගච්ඡති ॥ 6 ॥
පාංඩුරාරුණවර්ණානි නීලමාංජිෂ්ඨකානි ච ।
හරිතාරුණවර්ණානි මහාභ්රාණි චකාශිරේ ॥ 7 ॥
ප්රවිශන්නභ්රජාලානි නිෂ්පතංශ්ච පුනඃ පුනඃ ।
ප්රච්ඡන්නශ්ච ප්රකාශශ්ච චංද්රමා ඉව ලක්ෂ්යතේ ॥ 8 ॥
විවිධාභ්රඝනාපන්නගෝචරෝ ධවලාංබරඃ ।
දෘශ්යාදෘශ්යතනුර්වීරස්තදා චංද්රායතේऽංබරේ ॥ 9 ॥
තාර්ක්ෂ්යායමාණෝ ගගනේ බභාසේ වායුනංදනඃ ।
දාරයන්මේඝබෘංදානි නිෂ්පතංශ්ච පුනඃ පුනඃ ॥ 10 ॥
නදන්නාදේන මහතා මේඝස්වනමහාස්වනඃ ।
ප්රවරාන්රාක්ෂසාන් හත්වා නාම විශ්රාව්ය චාත්මනඃ ॥ 11 ॥
ආකුලාං නගරීං කෘත්වා ව්යථයිත්වා ච රාවණම් ।
අර්දයිත්වා බලං ඝෝරං වෛදේහීමභිවාද්ය ච ॥ 12 ॥
ආජගාම මහාතේජාඃ පුනර්මධ්යේන සාගරම් ।
පර්වතේංද්රං සුනාභං ච සමුපස්පෘශ්ය වීර්යවාන් ॥ 13 ॥
ජ්යාමුක්ත ඉව නාරාචෝ මහාවේගෝऽභ්යුපාගතඃ ।
ස කිංචිදනුසංප්රාප්තඃ සමාලෝක්ය මහාගිරිම් ॥ 14 ॥
මහේංද්රං මේඝසංකාශං නනාද හරිපුංගවඃ ।
ස පූරයාමාස කපිර්දිශෝ දශ සමංතතඃ ॥ 15 ॥
නදන්නාදේන මහතා මේඝස්වනමහාස්වනඃ ।
ස තං දේශමනුප්රාප්තඃ සුහෘද්ධර්ශනලාලසඃ ॥ 16 ॥
නනාද හරිශාර්දූලෝ ලාංගූලං චාප්යකංපයත් ।
තස්ය නානද්යමානස්ය සුපර්ණචරිතේ පථි ॥ 17 ॥
ඵලතීවාස්ය ඝෝෂේණ ගගනං සාර්කමංඩලම් ।
යේ තු තත්රෝත්තරේ තීරේ සමුද්රස්ය මහාබලාඃ ॥ 18 ॥
පූර්වං සංවිෂ්ඨිතාශ්ශූරා වායුපුත්රදිදෘක්ෂවඃ ।
මහතෝ වාතනුන්නස්ය තෝයදස්යේව ගර්ජිතම් ॥ 19 ॥
ශුශ්රුවුස්තේ තදා ඝෝෂමූරුවේගං හනූමතඃ ।
තේ දීනමනසස්සර්වේ ශුශ්රුවුඃ කානනෞකසඃ ॥ 20 ॥
වානරේංද්රස්ය නිර්ඝෝෂං පර්ජන්යනිනදෝපමම් ।
නිශම්ය නදතෝ නාදං වානරාස්තේ සමංතතඃ ॥ 21 ॥
බභූවුරුත්සුකාස්සර්වේ සුහෘද්ධර්ශනකාංක්ෂිණඃ ।
ජාංබවාන් ස හරිශ්රේෂ්ඨඃ ප්රීතිසංහෘෂ්ටමානසඃ ॥ 22 ॥
උපාමංත්ර්ය හරීන් සර්වානිදං වචනමබ්රවීත් ।
සර්වථා කෘතකාර්යෝऽසෞ හනුමාන්නාත්ර සංශයඃ ॥ 23 ॥
න හ්යස්යාකෘතකාර්යස්ය නාද ඒවංවිධෝ භවේත් ।
තස්ය බාහූරුවේගං ච නිනාදං ච මහාත්මනඃ ॥ 24 ॥
නිශම්ය හරයෝ හෘෂ්ටාඃ සමුත්පේතුස්තතස්තතඃ ।
තේ නගාග්රාන්නගාග්රාණි ශිඛරාච්ඡිඛරාණි ච ॥ 25 ॥
ප්රහෘෂ්ටාඃ සමපද්යංත හනූමංතං දිදෘක්ෂවඃ ।
තේ ප්රීතාඃ පාදපාග්රේෂු ගෘහ්ය ශාඛාඃ සුවිෂ්ඨිතාඃ ॥ 26 ॥
වාසාංසීව ප්රශාඛාශ්ච සමාවිධ්යංත වානරාඃ ।
ගිරිගහ්වරසංලීනෝ යථා ගර්ජති මාරුතඃ ॥ 27 ॥
ඒවං ජගර්ජ බලවාන් හනුමාන්මාරුතාත්මජඃ ।
තමභ්රඝනසංකාශමාපතංතං මහාකපිම් ॥ 28 ॥
දෘෂ්ට්වා තේ වානරාස්සර්වේ තස්ථුඃ ප්රාංජලයස්තදා ।
තතස්තු වේගවාංස්තස්ය ගිරේර්ගිරිනිභඃ කපිඃ ॥ 29 ॥
නිපපාත මහේංද්රස්ය ශිඛරේ පාදපාකුලේ ।
හර්ෂේණාපූර්යමාණෝऽසෞ රම්යේ පර්වතනිර්ඣරේ ॥ 30 ॥
ඡින්නපක්ෂ ඉවාऽකාශාත්පපාත ධරණීධරඃ ।
තතස්තේ ප්රීතමනසස්සර්වේ වානරපුංගවාඃ ॥ 31 ॥
හනුමංතං මහාත්මානං පරිවාර්යෝපතස්ථිරේ ।
පරිවාර්ය ච තේ සර්වේ පරාං ප්රීතිමුපාගතාඃ ॥ 32 ॥
ප්රහෘෂ්ටවදනා ස්සර්වේ තමරෝගමුපාගතම් ।
උපායනානි චාදාය මූලානි ච ඵලානි ච ॥ 33 ॥
ප්රත්යර්චයන් හරිශ්රේෂ්ඨං හරයෝ මාරුතාත්මජම් ।
හනුමාංස්තු ගුරූන් වෘද්ධාංජාංබවත්ප්රමුඛාංස්තදා ॥ 34 ॥
කුමාරමංගදං චෛව සෝऽවංදත මහාකපිඃ ।
ස තාභ්යාං පූජිතඃ පූජ්යඃ කපිභිශ්ච ප්රසාදිතඃ ॥ 35 ॥
දෘෂ්ටා සීතේති වික්රාංත ස්සංක්ෂේපේණ න්යවේදයත් ।
නිෂසාද ච හස්තේන ගෘහීත්වා වාලිනස්සුතම් ॥ 36 ॥
රමණීයේ වනෝද්දේශේ මහේංද්රස්ය ගිරේස්තදා ।
හනුමානබ්රවීද්ධෘෂ්ටස්තදා තාන්වානරර්ෂභාන් ॥ 37 ॥
අශෝකවනිකාසංස්ථා දෘෂ්ටා සා ජනකාත්මජා ।
රක්ෂමාණා සුඝෝරාභී රාක්ෂසීභිරනිංදිතා ॥ 38 ॥
ඒකවේණීධරා බාලා රාමදර්ශනලාලසා ।
උපවාසපරිශ්රාංතා ජටිලා මලිනා කෘශා ॥ 39 ॥
තතෝ දෘෂ්ටේති වචනං මහාර්ථමමෘතෝපමම් ।
නිශම්ය මාරුතේස්සර්වේ මුදිතා වානරාභවන් ॥ 40 ॥
ක්ෂ්වේලංත්යන්යේ නදංත්යන්යේ ගර්ජංත්යන්යේ මහාබලාඃ ।
චක්රුඃ කිලකිලාමන්යේ ප්රතිගර්ජංති චාපරේ ॥ 41 ॥
කේචිදුච්ඡ්රිතලාංගූලාඃ ප්රහෘෂ්ටාඃ කපිකුංජරාඃ ।
ආයතාංචිතදීර්ඝාණි ලාංගූලානි ප්රවිව්යධුඃ ॥ 42 ॥
අපරේ ච හනූමංතං වානරා වාරණෝපමම් ।
ආප්ලුත්ය ගිරිශෘංගේභ්යස්සංස්පෘශංති ස්ම හර්ෂිතාඃ ॥ 43 ॥
උක්තවාක්යං හනූමංතමංගදස්තමථාබ්රවීත් ।
සර්වේෂාං හරිවීරාණාං මධ්යේ වචනමුත්තමම් ॥ 44 ॥
සත්ත්වේ වීර්යේ න තේ කශ්චිත්සමෝ වානර විද්යතේ ।
යදවප්ලුත්ය විස්තීර්ණං සාගරං පුනරාගතඃ ॥ 45 ॥
අහෝ ස්වාමිනි තේ භක්තිරහෝ වීර්යමහෝ ධෘතිඃ ।
දිෂ්ට්යා දෘෂ්ටා ත්වයා දේවී රාමපත්නී යශස්විනී ॥ 46 ॥
දිෂ්ට්යා ත්යක්ෂ්යති කාකුත්ස්ථ ශ්ශෝකං සීතාවියෝගජම් ।
තතෝऽංගදං හනූමංතං ජාංබවංතං ච වානරාඃ ॥ 47 ॥
පරිවාර්ය ප්රමුදිතා භේජිරේ විපුලාශ්ශිලාඃ ।
ශ්රෝතුකාමාස්සමුද්රස්ය ලංඝනං වානරෝත්තමාඃ ॥ 48 ॥
දර්ශනං චාපි ලංකායාස්සීතායා රාවණස්ය ච ।
තස්ථුඃ ප්රාංජලයස්සර්වේ හනුමද්වචනෝන්මුඛාඃ ॥ 49 ॥
තස්ථෞ තත්රාංගදඃ ශ්රීමාන් වානරෛර්බහුභිර්වෘතඃ ।
උපාස්යමානෝ විබුධෛර්දිවි දේවපතිර්යථා ॥ 50 ॥
හනූමතා කීර්තිමතා යශස්විනා තථාංගදේනාංගදබද්ධබාහුනා ।
මුදා තදාऽධ්යාසිතමුන්නතං මහන්මහීධරාග්රං ජ්වලිතං ශ්රියාභවත් ॥ 51 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ සුංදරකාංඩේ සප්තපංචාශස්සර්ගඃ ॥
