ଶ୍ରୀମଦ୍ଵାଲ୍ମୀକୀୟ ରାମାୟଣେ ସୁଂଦରକାଂଡମ୍ ।
ଅଥ ସପ୍ତପଂଚାଶସ୍ସର୍ଗଃ ।
ସ ଚଂଦ୍ରକୁମୁଦଂ ରମ୍ୟଂ ସାର୍କକାରଂଡଵଂ ଶୁଭମ୍ ।
ତିଷ୍ୟଶ୍ରଵଣକାଦଂବମଭ୍ରଶୈଵାଲଶାଦ୍ଵଲମ୍ ॥ 1 ॥
ପୁନର୍ଵସୁମହାମୀନଂ ଲୋହିତାଂଗମହାଗ୍ରହମ୍ ।
ଐରାଵତମହାଦ୍ଵୀପଂ ସ୍ଵାତିହଂସଵିଲୋଲିତମ୍ ॥ 2 ॥
ଵାତସଂଘାତଜାତୋର୍ମି ଚଂଦ୍ରାଂଶୁଶିଶିରାଂବୁମତ୍ ।
ଭୁଜଂଗୟକ୍ଷଗଂଧର୍ଵପ୍ରବୁଦ୍ଧକମଲୋତ୍ପଲମ୍ ॥ 3 ॥
ହନୁମାନ୍ମାରୁତଗତିର୍ମହାନୌରିଵ ସାଗରମ୍ ।
ଅପାରମପରିଶ୍ରାଂତଃ ପୁପ୍ଲୁଵେ ଗଗନାର୍ଣଵମ୍ ॥ 4 ॥
ଗ୍ରସମାନ ଇଵାକାଶଂ ତାରାଧିପମିଵୋଲ୍ଲିଖନ୍ ।
ହରନ୍ନିଵ ସନକ୍ଷତ୍ରଂ ଗଗନଂ ସାର୍କମଂଡଲମ୍ ॥ 5 ॥
ମାରୁତସ୍ୟାତ୍ମଜଃ ଶ୍ରୀମାନ୍କପିର୍ଵ୍ୟୋମଚରୋ ମହାନ୍ ।
ହନୁମାନ୍ମେଘଜାଲାନି ଵିକର୍ଷନ୍ନିଵ ଗଚ୍ଛତି ॥ 6 ॥
ପାଂଡୁରାରୁଣଵର୍ଣାନି ନୀଲମାଂଜିଷ୍ଠକାନି ଚ ।
ହରିତାରୁଣଵର୍ଣାନି ମହାଭ୍ରାଣି ଚକାଶିରେ ॥ 7 ॥
ପ୍ରଵିଶନ୍ନଭ୍ରଜାଲାନି ନିଷ୍ପତଂଶ୍ଚ ପୁନଃ ପୁନଃ ।
ପ୍ରଚ୍ଛନ୍ନଶ୍ଚ ପ୍ରକାଶଶ୍ଚ ଚଂଦ୍ରମା ଇଵ ଲକ୍ଷ୍ୟତେ ॥ 8 ॥
ଵିଵିଧାଭ୍ରଘନାପନ୍ନଗୋଚରୋ ଧଵଲାଂବରଃ ।
ଦୃଶ୍ୟାଦୃଶ୍ୟତନୁର୍ଵୀରସ୍ତଦା ଚଂଦ୍ରାୟତେଽଂବରେ ॥ 9 ॥
ତାର୍କ୍ଷ୍ୟାୟମାଣୋ ଗଗନେ ବଭାସେ ଵାୟୁନଂଦନଃ ।
ଦାରୟନ୍ମେଘବୃଂଦାନି ନିଷ୍ପତଂଶ୍ଚ ପୁନଃ ପୁନଃ ॥ 10 ॥
ନଦନ୍ନାଦେନ ମହତା ମେଘସ୍ଵନମହାସ୍ଵନଃ ।
ପ୍ରଵରାନ୍ରାକ୍ଷସାନ୍ ହତ୍ଵା ନାମ ଵିଶ୍ରାଵ୍ୟ ଚାତ୍ମନଃ ॥ 11 ॥
ଆକୁଲାଂ ନଗରୀଂ କୃତ୍ଵା ଵ୍ୟଥୟିତ୍ଵା ଚ ରାଵଣମ୍ ।
ଅର୍ଦୟିତ୍ଵା ବଲଂ ଘୋରଂ ଵୈଦେହୀମଭିଵାଦ୍ୟ ଚ ॥ 12 ॥
ଆଜଗାମ ମହାତେଜାଃ ପୁନର୍ମଧ୍ୟେନ ସାଗରମ୍ ।
ପର୍ଵତେଂଦ୍ରଂ ସୁନାଭଂ ଚ ସମୁପସ୍ପୃଶ୍ୟ ଵୀର୍ୟଵାନ୍ ॥ 13 ॥
ଜ୍ୟାମୁକ୍ତ ଇଵ ନାରାଚୋ ମହାଵେଗୋଽଭ୍ୟୁପାଗତଃ ।
ସ କିଂଚିଦନୁସଂପ୍ରାପ୍ତଃ ସମାଲୋକ୍ୟ ମହାଗିରିମ୍ ॥ 14 ॥
ମହେଂଦ୍ରଂ ମେଘସଂକାଶଂ ନନାଦ ହରିପୁଂଗଵଃ ।
ସ ପୂରୟାମାସ କପିର୍ଦିଶୋ ଦଶ ସମଂତତଃ ॥ 15 ॥
ନଦନ୍ନାଦେନ ମହତା ମେଘସ୍ଵନମହାସ୍ଵନଃ ।
ସ ତଂ ଦେଶମନୁପ୍ରାପ୍ତଃ ସୁହୃଦ୍ଧର୍ଶନଲାଲସଃ ॥ 16 ॥
ନନାଦ ହରିଶାର୍ଦୂଲୋ ଲାଂଗୂଲଂ ଚାପ୍ୟକଂପୟତ୍ ।
ତସ୍ୟ ନାନଦ୍ୟମାନସ୍ୟ ସୁପର୍ଣଚରିତେ ପଥି ॥ 17 ॥
ଫଲତୀଵାସ୍ୟ ଘୋଷେଣ ଗଗନଂ ସାର୍କମଂଡଲମ୍ ।
ୟେ ତୁ ତତ୍ରୋତ୍ତରେ ତୀରେ ସମୁଦ୍ରସ୍ୟ ମହାବଲାଃ ॥ 18 ॥
ପୂର୍ଵଂ ସଂଵିଷ୍ଠିତାଶ୍ଶୂରା ଵାୟୁପୁତ୍ରଦିଦୃକ୍ଷଵଃ ।
ମହତୋ ଵାତନୁନ୍ନସ୍ୟ ତୋୟଦସ୍ୟେଵ ଗର୍ଜିତମ୍ ॥ 19 ॥
ଶୁଶ୍ରୁଵୁସ୍ତେ ତଦା ଘୋଷମୂରୁଵେଗଂ ହନୂମତଃ ।
ତେ ଦୀନମନସସ୍ସର୍ଵେ ଶୁଶ୍ରୁଵୁଃ କାନନୌକସଃ ॥ 20 ॥
ଵାନରେଂଦ୍ରସ୍ୟ ନିର୍ଘୋଷଂ ପର୍ଜନ୍ୟନିନଦୋପମମ୍ ।
ନିଶମ୍ୟ ନଦତୋ ନାଦଂ ଵାନରାସ୍ତେ ସମଂତତଃ ॥ 21 ॥
ବଭୂଵୁରୁତ୍ସୁକାସ୍ସର୍ଵେ ସୁହୃଦ୍ଧର୍ଶନକାଂକ୍ଷିଣଃ ।
ଜାଂବଵାନ୍ ସ ହରିଶ୍ରେଷ୍ଠଃ ପ୍ରୀତିସଂହୃଷ୍ଟମାନସଃ ॥ 22 ॥
ଉପାମଂତ୍ର୍ୟ ହରୀନ୍ ସର୍ଵାନିଦଂ ଵଚନମବ୍ରଵୀତ୍ ।
ସର୍ଵଥା କୃତକାର୍ୟୋଽସୌ ହନୁମାନ୍ନାତ୍ର ସଂଶୟଃ ॥ 23 ॥
ନ ହ୍ୟସ୍ୟାକୃତକାର୍ୟସ୍ୟ ନାଦ ଏଵଂଵିଧୋ ଭଵେତ୍ ।
ତସ୍ୟ ବାହୂରୁଵେଗଂ ଚ ନିନାଦଂ ଚ ମହାତ୍ମନଃ ॥ 24 ॥
ନିଶମ୍ୟ ହରୟୋ ହୃଷ୍ଟାଃ ସମୁତ୍ପେତୁସ୍ତତସ୍ତତଃ ।
ତେ ନଗାଗ୍ରାନ୍ନଗାଗ୍ରାଣି ଶିଖରାଚ୍ଛିଖରାଣି ଚ ॥ 25 ॥
ପ୍ରହୃଷ୍ଟାଃ ସମପଦ୍ୟଂତ ହନୂମଂତଂ ଦିଦୃକ୍ଷଵଃ ।
ତେ ପ୍ରୀତାଃ ପାଦପାଗ୍ରେଷୁ ଗୃହ୍ୟ ଶାଖାଃ ସୁଵିଷ୍ଠିତାଃ ॥ 26 ॥
ଵାସାଂସୀଵ ପ୍ରଶାଖାଶ୍ଚ ସମାଵିଧ୍ୟଂତ ଵାନରାଃ ।
ଗିରିଗହ୍ଵରସଂଲୀନୋ ୟଥା ଗର୍ଜତି ମାରୁତଃ ॥ 27 ॥
ଏଵଂ ଜଗର୍ଜ ବଲଵାନ୍ ହନୁମାନ୍ମାରୁତାତ୍ମଜଃ ।
ତମଭ୍ରଘନସଂକାଶମାପତଂତଂ ମହାକପିମ୍ ॥ 28 ॥
ଦୃଷ୍ଟ୍ଵା ତେ ଵାନରାସ୍ସର୍ଵେ ତସ୍ଥୁଃ ପ୍ରାଂଜଲୟସ୍ତଦା ।
ତତସ୍ତୁ ଵେଗଵାଂସ୍ତସ୍ୟ ଗିରେର୍ଗିରିନିଭଃ କପିଃ ॥ 29 ॥
ନିପପାତ ମହେଂଦ୍ରସ୍ୟ ଶିଖରେ ପାଦପାକୁଲେ ।
ହର୍ଷେଣାପୂର୍ୟମାଣୋଽସୌ ରମ୍ୟେ ପର୍ଵତନିର୍ଝରେ ॥ 30 ॥
ଛିନ୍ନପକ୍ଷ ଇଵାଽକାଶାତ୍ପପାତ ଧରଣୀଧରଃ ।
ତତସ୍ତେ ପ୍ରୀତମନସସ୍ସର୍ଵେ ଵାନରପୁଂଗଵାଃ ॥ 31 ॥
ହନୁମଂତଂ ମହାତ୍ମାନଂ ପରିଵାର୍ୟୋପତସ୍ଥିରେ ।
ପରିଵାର୍ୟ ଚ ତେ ସର୍ଵେ ପରାଂ ପ୍ରୀତିମୁପାଗତାଃ ॥ 32 ॥
ପ୍ରହୃଷ୍ଟଵଦନା ସ୍ସର୍ଵେ ତମରୋଗମୁପାଗତମ୍ ।
ଉପାୟନାନି ଚାଦାୟ ମୂଲାନି ଚ ଫଲାନି ଚ ॥ 33 ॥
ପ୍ରତ୍ୟର୍ଚୟନ୍ ହରିଶ୍ରେଷ୍ଠଂ ହରୟୋ ମାରୁତାତ୍ମଜମ୍ ।
ହନୁମାଂସ୍ତୁ ଗୁରୂନ୍ ଵୃଦ୍ଧାଂଜାଂବଵତ୍ପ୍ରମୁଖାଂସ୍ତଦା ॥ 34 ॥
କୁମାରମଂଗଦଂ ଚୈଵ ସୋଽଵଂଦତ ମହାକପିଃ ।
ସ ତାଭ୍ୟାଂ ପୂଜିତଃ ପୂଜ୍ୟଃ କପିଭିଶ୍ଚ ପ୍ରସାଦିତଃ ॥ 35 ॥
ଦୃଷ୍ଟା ସୀତେତି ଵିକ୍ରାଂତ ସ୍ସଂକ୍ଷେପେଣ ନ୍ୟଵେଦୟତ୍ ।
ନିଷସାଦ ଚ ହସ୍ତେନ ଗୃହୀତ୍ଵା ଵାଲିନସ୍ସୁତମ୍ ॥ 36 ॥
ରମଣୀୟେ ଵନୋଦ୍ଦେଶେ ମହେଂଦ୍ରସ୍ୟ ଗିରେସ୍ତଦା ।
ହନୁମାନବ୍ରଵୀଦ୍ଧୃଷ୍ଟସ୍ତଦା ତାନ୍ଵାନରର୍ଷଭାନ୍ ॥ 37 ॥
ଅଶୋକଵନିକାସଂସ୍ଥା ଦୃଷ୍ଟା ସା ଜନକାତ୍ମଜା ।
ରକ୍ଷମାଣା ସୁଘୋରାଭୀ ରାକ୍ଷସୀଭିରନିଂଦିତା ॥ 38 ॥
ଏକଵେଣୀଧରା ବାଲା ରାମଦର୍ଶନଲାଲସା ।
ଉପଵାସପରିଶ୍ରାଂତା ଜଟିଲା ମଲିନା କୃଶା ॥ 39 ॥
ତତୋ ଦୃଷ୍ଟେତି ଵଚନଂ ମହାର୍ଥମମୃତୋପମମ୍ ।
ନିଶମ୍ୟ ମାରୁତେସ୍ସର୍ଵେ ମୁଦିତା ଵାନରାଭଵନ୍ ॥ 40 ॥
କ୍ଷ୍ଵେଲଂତ୍ୟନ୍ୟେ ନଦଂତ୍ୟନ୍ୟେ ଗର୍ଜଂତ୍ୟନ୍ୟେ ମହାବଲାଃ ।
ଚକ୍ରୁଃ କିଲକିଲାମନ୍ୟେ ପ୍ରତିଗର୍ଜଂତି ଚାପରେ ॥ 41 ॥
କେଚିଦୁଚ୍ଛ୍ରିତଲାଂଗୂଲାଃ ପ୍ରହୃଷ୍ଟାଃ କପିକୁଂଜରାଃ ।
ଆୟତାଂଚିତଦୀର୍ଘାଣି ଲାଂଗୂଲାନି ପ୍ରଵିଵ୍ୟଧୁଃ ॥ 42 ॥
ଅପରେ ଚ ହନୂମଂତଂ ଵାନରା ଵାରଣୋପମମ୍ ।
ଆପ୍ଲୁତ୍ୟ ଗିରିଶୃଂଗେଭ୍ୟସ୍ସଂସ୍ପୃଶଂତି ସ୍ମ ହର୍ଷିତାଃ ॥ 43 ॥
ଉକ୍ତଵାକ୍ୟଂ ହନୂମଂତମଂଗଦସ୍ତମଥାବ୍ରଵୀତ୍ ।
ସର୍ଵେଷାଂ ହରିଵୀରାଣାଂ ମଧ୍ୟେ ଵଚନମୁତ୍ତମମ୍ ॥ 44 ॥
ସତ୍ତ୍ଵେ ଵୀର୍ୟେ ନ ତେ କଶ୍ଚିତ୍ସମୋ ଵାନର ଵିଦ୍ୟତେ ।
ୟଦଵପ୍ଲୁତ୍ୟ ଵିସ୍ତୀର୍ଣଂ ସାଗରଂ ପୁନରାଗତଃ ॥ 45 ॥
ଅହୋ ସ୍ଵାମିନି ତେ ଭକ୍ତିରହୋ ଵୀର୍ୟମହୋ ଧୃତିଃ ।
ଦିଷ୍ଟ୍ୟା ଦୃଷ୍ଟା ତ୍ଵୟା ଦେଵୀ ରାମପତ୍ନୀ ୟଶସ୍ଵିନୀ ॥ 46 ॥
ଦିଷ୍ଟ୍ୟା ତ୍ୟକ୍ଷ୍ୟତି କାକୁତ୍ସ୍ଥ ଶ୍ଶୋକଂ ସୀତାଵିୟୋଗଜମ୍ ।
ତତୋଽଂଗଦଂ ହନୂମଂତଂ ଜାଂବଵଂତଂ ଚ ଵାନରାଃ ॥ 47 ॥
ପରିଵାର୍ୟ ପ୍ରମୁଦିତା ଭେଜିରେ ଵିପୁଲାଶ୍ଶିଲାଃ ।
ଶ୍ରୋତୁକାମାସ୍ସମୁଦ୍ରସ୍ୟ ଲଂଘନଂ ଵାନରୋତ୍ତମାଃ ॥ 48 ॥
ଦର୍ଶନଂ ଚାପି ଲଂକାୟାସ୍ସୀତାୟା ରାଵଣସ୍ୟ ଚ ।
ତସ୍ଥୁଃ ପ୍ରାଂଜଲୟସ୍ସର୍ଵେ ହନୁମଦ୍ଵଚନୋନ୍ମୁଖାଃ ॥ 49 ॥
ତସ୍ଥୌ ତତ୍ରାଂଗଦଃ ଶ୍ରୀମାନ୍ ଵାନରୈର୍ବହୁଭିର୍ଵୃତଃ ।
ଉପାସ୍ୟମାନୋ ଵିବୁଧୈର୍ଦିଵି ଦେଵପତିର୍ୟଥା ॥ 50 ॥
ହନୂମତା କୀର୍ତିମତା ୟଶସ୍ଵିନା ତଥାଂଗଦେନାଂଗଦବଦ୍ଧବାହୁନା ।
ମୁଦା ତଦାଽଧ୍ୟାସିତମୁନ୍ନତଂ ମହନ୍ମହୀଧରାଗ୍ରଂ ଜ୍ଵଲିତଂ ଶ୍ରିୟାଭଵତ୍ ॥ 51 ॥
ଇତ୍ୟାର୍ଷେ ଶ୍ରୀମଦ୍ରାମାୟଣେ ଵାଲ୍ମୀକୀୟ ଆଦିକାଵ୍ୟେ ସୁଂଦରକାଂଡେ ସପ୍ତପଂଚାଶସ୍ସର୍ଗଃ ॥
