𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌸𑍁𑌂𑌦𑌰𑌕𑌾𑌂𑌡𑌮𑍍 ।
𑌅𑌥 𑌅𑌷𑍍𑌟𑌪𑌂𑌚𑌾𑌶𑌸𑍍𑌸𑌰𑍍𑌗𑌃 ।
𑌤𑌤𑌸𑍍𑌤𑌸𑍍𑌯 𑌗𑌿𑌰𑍇𑌃 𑌶𑍃𑌂𑌗𑍇 𑌮𑌹𑍇𑌂𑌦𑍍𑌰𑌸𑍍𑌯 𑌮𑌹𑌾𑌬𑌲𑌾𑌃 ।
𑌹𑌨𑍁𑌮𑌤𑍍𑌪𑍍𑌰𑌮𑍁𑌖𑌾𑌃 𑌪𑍍𑌰𑍀𑌤𑌿𑌂 𑌹𑌰𑌯𑍋 𑌜𑌗𑍍𑌮𑍁𑌰𑍁𑌤𑍍𑌤𑌮𑌾𑌮𑍍 ॥ 1 ॥
𑌤𑌂 𑌤𑌤𑌃 𑌪𑍍𑌰𑍀𑌤𑌿𑌸𑌂𑌹𑍃𑌷𑍍𑌟𑌃 𑌪𑍍𑌰𑍀𑌤𑌿𑌮𑌂𑌤𑌂 𑌮𑌹𑌾𑌕𑌪𑌿𑌮𑍍 ।
𑌜𑌾𑌂𑌬𑌵𑌾𑌨𑍍𑌕𑌾𑌰𑍍𑌯𑌵𑍃𑌤𑍍𑌤𑌾𑌂𑌤𑌮𑌪𑍃𑌚𑍍𑌛𑌦𑌨𑌿𑌲𑌾𑌤𑍍𑌮𑌜𑌮𑍍 ॥ 2 ॥
𑌕𑌥𑌂 𑌦𑍃𑌷𑍍𑌟𑌾 𑌤𑍍𑌵𑌯𑌾 𑌦𑍇𑌵𑍀 𑌕𑌥𑌂 𑌵𑌾 𑌤𑌤𑍍𑌰 𑌵𑌰𑍍𑌤𑌤𑍇 ।
𑌤𑌸𑍍𑌯𑌾𑌂 𑌵𑌾 𑌸 𑌕𑌥𑌂𑌵𑍃𑌤𑍍𑌤𑌃 𑌕𑍍𑌰𑍂𑌰𑌕𑌰𑍍𑌮𑌾 𑌦𑌶𑌾𑌨𑌨𑌃 ॥ 3 ॥
𑌤𑌤𑍍𑌤𑍍𑌵𑌤𑌸𑍍𑌸𑌰𑍍𑌵𑌮𑍇𑌤𑌨𑍍𑌨𑌃 𑌪𑍍𑌰𑌬𑍍𑌰𑍂𑌹𑌿 𑌤𑍍𑌵𑌂 𑌮𑌹𑌾𑌕𑌪𑍇 ।
𑌶𑍍𑌰𑍁𑌤𑌾𑌰𑍍𑌥𑌾𑌶𑍍𑌚𑌿𑌂𑌤𑌯𑌿𑌷𑍍𑌯𑌾𑌮𑍋 𑌭𑍂𑌯𑌃 𑌕𑌾𑌰𑍍𑌯𑌵𑌿𑌨𑌿𑌶𑍍𑌚𑌯𑌮𑍍 ॥ 4 ॥
𑌯𑌶𑍍𑌚𑌾𑌰𑍍𑌥𑌸𑍍𑌤𑌤𑍍𑌤𑍍𑌰 𑌵𑌕𑍍𑌤𑌵𑍍𑌯𑍋 𑌗𑌤𑍈𑌰𑌸𑍍𑌮𑌾𑌭𑌿𑌰𑌾𑌤𑍍𑌮𑌵𑌾𑌨𑍍 ।
𑌰𑌕𑍍𑌷𑌿𑌤𑌵𑍍𑌯𑌂 𑌚 𑌯𑌤𑍍𑌤𑌤𑍍𑌰 𑌤𑌦𑍍𑌭𑌵𑌾𑌨𑍍𑌵𑍍𑌯𑌾𑌕𑌰𑍋𑌤𑍁 𑌨𑌃 ॥ 5 ॥
𑌸 𑌨𑌿𑌯𑍁𑌕𑍍𑌤𑌸𑍍𑌤𑌤𑌸𑍍𑌤𑍇𑌨 𑌸𑌂𑌪𑍍𑌰𑌹𑍃𑌷𑍍𑌟𑌤𑌨𑍂𑌰𑍁𑌹𑌃 ।
𑌪𑍍𑌰𑌣𑌮𑍍𑌯 𑌶𑌿𑌰𑌸𑌾 𑌦𑍇𑌵𑍍𑌯𑍈 𑌸𑍀𑌤𑌾𑌯𑍈 𑌪𑍍𑌰𑌤𑍍𑌯𑌭𑌾𑌷𑌤 ॥ 6 ॥
𑌪𑍍𑌰𑌤𑍍𑌯𑌕𑍍𑌷𑌮𑍇𑌵 𑌭𑌵𑌤𑌾𑌂 𑌮𑌹𑍇𑌂𑌦𑍍𑌰𑌾𑌗𑍍𑌰𑌾𑌤𑍍𑌖𑌾𑌮𑌾𑌪𑍍𑌲𑍁𑌤𑌃 ।
𑌉𑌦𑌧𑍇𑌰𑍍𑌦𑌕𑍍𑌷𑌿𑌣𑌂 𑌪𑌾𑌰𑌂 𑌕𑌾𑌂𑌕𑍍𑌷𑌮𑌾𑌣 𑌸𑍍𑌸𑌮𑌾𑌹𑌿𑌤𑌃 ॥ ॥
𑌗𑌚𑍍𑌛𑌤𑌶𑍍𑌚 𑌹𑌿 𑌮𑍇 𑌘𑍋𑌰𑌂 𑌵𑌿𑌘𑍍𑌨𑌰𑍂𑌪𑌮𑌿𑌵𑌾𑌭𑌵𑌤𑍍 ।
𑌕𑌾𑌂𑌚𑌨𑌂 𑌶𑌿𑌖𑌰𑌂 𑌦𑌿𑌵𑍍𑌯𑌂 𑌪𑌶𑍍𑌯𑌾𑌮𑌿 𑌸𑍁𑌮𑌨𑍋𑌹𑌰𑌮𑍍 ॥ ॥
𑌸𑍍𑌥𑌿𑌤𑌂 𑌪𑌂𑌧𑌾𑌨𑌮𑌾𑌵𑍃𑌤𑍍𑌯 𑌮𑍇𑌨𑍇 𑌵𑌿𑌘𑍍𑌨𑌂 𑌚 𑌤𑌂 𑌨𑌗𑌮𑍍 ।
𑌉𑌪𑌸𑌂𑌗𑌮𑍍𑌯 𑌤𑌂 𑌦𑌿𑌵𑍍𑌯𑌂 𑌕𑌾𑌂𑌚𑌨𑌂 𑌨𑌗𑌸𑌤𑍍𑌤𑌮𑌮𑍍 ॥ ॥
𑌕𑍃𑌤𑌾 𑌮𑍇 𑌮𑌨𑌸𑌾 𑌬𑍁𑌦𑍍𑌧𑌿𑌰𑍍𑌭𑍇𑌤𑍍𑌤𑌵𑍍𑌯𑍋𑌽𑌯𑌂 𑌮𑌯𑍇𑌤𑌿 𑌚 ।
𑌪𑍍𑌰𑌹𑌤𑌂 𑌚 𑌮𑌯𑌾 𑌤𑌸𑍍𑌯 𑌲𑌾𑌂𑌗𑍂𑌲𑍇𑌨 𑌮𑌹𑌾𑌗𑌿𑌰𑍇𑌃 ॥ 10 ॥
𑌶𑌿𑌖𑌰𑌂 𑌸𑍂𑌰𑍍𑌯𑌸𑌂𑌕𑌾𑌶𑌂 𑌵𑍍𑌯𑌶𑍀𑌰𑍍𑌯𑌤 𑌸𑌹𑌸𑍍𑌰𑌧𑌾 ।
𑌵𑍍𑌯𑌵𑌸𑌾𑌯𑌂 𑌚 𑌤𑌂 𑌬𑍁𑌦𑍍𑌧𑍍𑌵𑌾 𑌸 𑌹𑍋𑌵𑌾𑌚 𑌮𑌹𑌾𑌗𑌿𑌰𑌿𑌃 ॥ 11 ॥
𑌪𑍁𑌤𑍍𑌤𑍍𑌰𑍇𑌤𑌿 𑌮𑌧𑍁𑌰𑌾𑌂 𑌵𑌾𑌣𑍀𑌂 𑌮𑌨𑌃 𑌪𑍍𑌰𑌹𑍍𑌲𑌾𑌦𑌯𑌨𑍍𑌨𑌿𑌵 ।
𑌪𑌿𑌤𑍃𑌵𑍍𑌯𑌂 𑌚𑌾𑌪𑌿 𑌮𑌾𑌂 𑌵𑌿𑌦𑍍𑌧𑌿 𑌸𑌖𑌾𑌯𑌂 𑌮𑌾𑌤𑌰𑌿𑌶𑍍𑌵𑌨𑌃 ॥ 12 ॥
𑌮𑍈𑌨𑌾𑌕𑌮𑌿𑌤𑌿 𑌵𑌿𑌖𑍍𑌯𑌾𑌤𑌂 𑌨𑌿𑌵𑌸𑌂𑌤𑌂 𑌮𑌹𑍋𑌦𑌧𑍌 ।
𑌪𑌕𑍍𑌷𑌵𑌂𑌤𑌃 𑌪𑍁𑌰𑌾 𑌪𑍁𑌤𑍍𑌤𑍍𑌰 𑌬𑌭𑍂𑌵𑍁𑌃 𑌪𑌰𑍍𑌵𑌤𑍋𑌤𑍍𑌤𑌮𑌾𑌃 ॥ 13 ॥
𑌛𑌂𑌦𑌤𑌃 𑌪𑍃𑌥𑌿𑌵𑍀𑌂 𑌚𑍇𑌰𑍁𑌰𑍍𑌬𑌾𑌧𑌮𑌾𑌨𑌾𑌃 𑌸𑌮𑌂𑌤𑌤𑌃 ।
𑌶𑍍𑌰𑍁𑌤𑍍𑌵𑌾 𑌨𑌗𑌾𑌨𑌾𑌂 𑌚𑌰𑌿𑌤𑌂 𑌮𑌹𑍇𑌂𑌦𑍍𑌰𑌃 𑌪𑌾𑌕𑌶𑌾𑌸𑌨𑌃 ॥ 14 ॥
𑌚𑌿𑌚𑍍𑌛𑍇𑌦 𑌭𑌗𑌵𑌾𑌨𑍍 𑌪𑌕𑍍𑌷𑌾𑌨𑍍𑌵𑌜𑍍𑌰𑍇𑌣𑍈𑌷𑌾𑌂 𑌸𑌹𑌸𑍍𑌰𑌶𑌃 ।
𑌅𑌹𑌂 𑌤𑍁 𑌮𑍋𑌕𑍍𑌷𑌿𑌤𑌸𑍍𑌤𑌸𑍍𑌮𑌾𑌤𑍍𑌤𑌵 𑌪𑌿𑌤𑍍𑌰𑌾 𑌮𑌹𑌾𑌤𑍍𑌮𑌨𑌾 ॥ 15 ॥
𑌮𑌾𑌰𑍁𑌤𑍇𑌨 𑌤𑌦𑌾 𑌵𑌤𑍍𑌸 𑌪𑍍𑌰𑌕𑍍𑌷𑌿𑌪𑍍𑌤𑍋𑌽𑌸𑍍𑌮𑌿 𑌮𑌹𑌾𑌰𑍍𑌣𑌵𑍇 ।
𑌰𑌾𑌮𑌸𑍍𑌯 𑌚 𑌮𑌯𑌾 𑌸𑌾𑌹𑍍𑌯𑍇 𑌵𑌰𑍍𑌤𑌿𑌤𑌵𑍍𑌯𑌮𑌰𑌿𑌂𑌦𑌮 ॥ 16 ॥
𑌰𑌾𑌮𑍋 𑌧𑌰𑍍𑌮𑌭𑍃𑌤𑌾𑌂 𑌶𑍍𑌰𑍇𑌷𑍍𑌠𑍋 𑌮𑌹𑍇𑌂𑌦𑍍𑌰𑌸𑌮𑌵𑌿𑌕𑍍𑌰𑌮𑌃 ।
𑌏𑌤𑌚𑍍𑌛𑍍𑌰𑍁𑌤𑍍𑌵𑌾 𑌵𑌚𑌸𑍍𑌤𑌸𑍍𑌯 𑌮𑍈𑌨𑌾𑌕𑌸𑍍𑌯 𑌮𑌹𑌾𑌤𑍍𑌮𑌨𑌃 ॥ 1 ॥
𑌕𑌾𑌰𑍍𑌯𑌮𑌾𑌵𑍇𑌦𑍍𑌯 𑌤𑍁 𑌗𑌿𑌰𑍇𑌰𑍁𑌦𑍍𑌯𑌤𑌂 𑌚 𑌮𑌨𑍋 𑌮𑌮 ।
𑌤𑍇𑌨 𑌚𑌾𑌹𑌮𑌨𑍁𑌜𑍍𑌞𑌾𑌤𑍋 𑌮𑍈𑌨𑌾𑌕𑍇𑌨 𑌮𑌹𑌾𑌤𑍍𑌮𑌨𑌾 ॥ 1 ॥
𑌸 𑌚𑌾𑌪𑍍𑌯𑌂𑌤𑌰𑍍𑌹𑌿𑌤𑌃 𑌶𑍈𑌲𑍋 𑌮𑌾𑌨𑍁𑌷𑍇𑌣 𑌵𑌪𑍁𑌷𑍍𑌮𑌤𑌾 ।
𑌶𑌰𑍀𑌰𑍇𑌣 𑌮𑌹𑌾𑌶𑍈𑌲𑌃 𑌶𑍈𑌲𑍇𑌨 𑌚 𑌮𑌹𑍋𑌦𑌧𑍌 ॥ 1 ॥
𑌉𑌤𑍍𑌤𑌮𑌂 𑌜𑌵𑌮𑌾𑌸𑍍𑌥𑌾𑌯 𑌶𑍇𑌷𑌂 𑌪𑌂𑌥𑌾𑌨𑌮𑌾𑌸𑍍𑌥𑌿𑌤𑌃 ।
𑌤𑌤𑍋𑌽𑌹𑌂 𑌸𑍁𑌚𑌿𑌰𑌂 𑌕𑌾𑌲𑌂 𑌵𑍇𑌗𑍇𑌨𑌾𑌭𑍍𑌯𑌾𑌗𑌮𑌂 𑌪𑌥𑌿 ॥ 20 ॥
𑌤𑌤𑌃 𑌪𑌶𑍍𑌯𑌾𑌮𑍍𑌯𑌹𑌂 𑌦𑍇𑌵𑍀𑌂 𑌸𑍁𑌰𑌸𑌾𑌂 𑌨𑌾𑌗𑌮𑌾𑌤𑌰𑌮𑍍 ।
𑌸𑌮𑍁𑌦𑍍𑌰𑌮𑌧𑍍𑌯𑍇 𑌸𑌾 𑌦𑍇𑌵𑍀 𑌵𑌚𑌨𑌂 𑌮𑌾𑌮𑌭𑌾𑌷𑌤 ॥ 21 ॥
𑌮𑌮 𑌭𑌕𑍍𑌷𑌃 𑌪𑍍𑌰𑌦𑌿𑌷𑍍𑌟𑌸𑍍𑌤𑍍𑌵𑌮𑌮𑌰𑍈𑌰𑍍𑌹𑌰𑌿𑌸𑌤𑍍𑌤𑌮 ।
𑌅𑌤𑌸𑍍𑌤𑍍𑌵𑌾𑌂 𑌭𑌕𑍍𑌷𑌯𑌿𑌷𑍍𑌯𑌾𑌮𑌿 𑌵𑌿𑌹𑌿𑌤𑌸𑍍𑌤𑍍𑌵𑌂 𑌚𑌿𑌰𑌸𑍍𑌯 𑌮𑍇 ॥ 22 ॥
𑌏𑌵𑌮𑍁𑌕𑍍𑌤 𑌸𑍍𑌸𑍁𑌰𑌸𑌯𑌾 𑌪𑍍𑌰𑌾𑌂𑌜𑌲𑌿𑌃 𑌪𑍍𑌰𑌣𑌤𑌃 𑌸𑍍𑌥𑌿𑌤𑌃 ।
𑌵𑌿𑌵𑌰𑍍𑌣𑌵𑌦𑌨𑍋 𑌭𑍂𑌤𑍍𑌵𑌾 𑌵𑌾𑌕𑍍𑌯𑌂 𑌚𑍇𑌦𑌮𑍁𑌦𑍀𑌰𑌯𑌮𑍍 ॥ 23 ॥
𑌰𑌾𑌮𑍋 𑌦𑌾𑌶𑌰𑌥𑌿𑌃 𑌶𑍍𑌰𑍀𑌮𑌾𑌨𑍍 𑌪𑍍𑌰𑌵𑌿𑌷𑍍𑌟𑍋 𑌦𑌂𑌡𑌕𑌾𑌵𑌨𑌮𑍍 ।
𑌲𑌕𑍍𑌷𑍍𑌮𑌣𑍇𑌨 𑌸𑌹 𑌭𑍍𑌰𑌾𑌤𑍍𑌰𑌾 𑌸𑍀𑌤𑌯𑌾 𑌚 𑌪𑌰𑌂𑌤𑌪𑌃 ॥ 24 ॥
𑌤𑌸𑍍𑌯 𑌸𑍀𑌤𑌾 𑌹𑍃𑌤𑌾 𑌭𑌾𑌰𑍍𑌯𑌾 𑌰𑌾𑌵𑌣𑍇𑌨 𑌦𑍁𑌰𑌾𑌤𑍍𑌮𑌨𑌾 ।
𑌤𑌸𑍍𑌯𑌾 𑌸𑍍𑌸𑌂𑌕𑌾𑌶𑌂 𑌦𑍂𑌤𑍋𑌽𑌹𑌂 𑌗𑌮𑌿𑌷𑍍𑌯𑍇 𑌰𑌾𑌮𑌶𑌾𑌸𑌨𑌾𑌤𑍍 ॥ 25 ॥
𑌕𑌰𑍍𑌤𑍁𑌮𑌰𑍍𑌹𑌸𑌿 𑌰𑌾𑌮𑌸𑍍𑌯 𑌸𑌾𑌹𑌾𑌯𑍍𑌯𑌂 𑌵𑌿𑌷𑌯𑍇 𑌸𑌤𑍀 ।
𑌅𑌥𑌵𑌾 𑌮𑍈𑌥𑌿𑌲𑍀𑌂 𑌦𑍃𑌷𑍍𑌟𑍍𑌵𑌾 𑌰𑌾𑌮𑌂 𑌚𑌾𑌕𑍍𑌲𑌿𑌷𑍍𑌟𑌕𑌾𑌰𑌿𑌣𑌮𑍍 ॥ 26 ॥
𑌆𑌗𑌮𑌿𑌷𑍍𑌯𑌾𑌮𑌿 𑌤𑍇 𑌵𑌕𑍍𑌤𑍍𑌰𑌂 𑌸𑌤𑍍𑌯𑌂 𑌪𑍍𑌰𑌤𑌿𑌶𑍃𑌣𑍋𑌮𑌿 𑌤𑍇 ।
𑌏𑌵𑌮𑍁𑌕𑍍𑌤𑌾 𑌮𑌯𑌾 𑌸𑌾 𑌤𑍁 𑌸𑍁𑌰𑌸𑌾 𑌕𑌾𑌮𑌰𑍂𑌪𑌿𑌣𑍀 ॥ 2 ॥
𑌅𑌬𑍍𑌰𑌵𑍀𑌨𑍍𑌨𑌾𑌤𑌿𑌵𑌰𑍍𑌤𑍇𑌤 𑌕𑌶𑍍𑌚𑌿𑌦𑍇𑌷 𑌵𑌰𑍋 𑌮𑌮 ।
𑌏𑌵𑌮𑍁𑌕𑍍𑌤𑌸𑍍𑌸𑍁𑌰𑌸𑌯𑌾 𑌦𑌶𑌯𑍋𑌜𑌨𑌮𑌾𑌯𑌤𑌃 ॥ 2 ॥
𑌤𑌤𑍋𑌰𑍍𑌥𑌗𑍁𑌣𑌵𑌿𑌸𑍍𑌤𑌾𑌰𑍋 𑌬𑌭𑍂𑌵𑌾𑌹𑌂 𑌕𑍍𑌷𑌣𑍇𑌨 𑌤𑍁 ।
𑌮𑌤𑍍𑌪𑍍𑌰𑌮𑌾𑌣𑌾𑌨𑍁𑌰𑍂𑌪𑌂 𑌚 𑌵𑍍𑌯𑌾𑌦𑌿𑌤𑌂 𑌚 𑌮𑍁𑌖𑌂 𑌤𑌯𑌾 ॥ 2 ॥
𑌤𑌦𑍍𑌦𑍃𑌷𑍍𑌟𑍍𑌵𑌾 𑌵𑍍𑌯𑌾𑌦𑌿𑌤𑌂 𑌚𑌾𑌸𑍍𑌯𑌂 𑌹𑍍𑌰𑌸𑍍𑌵𑌂 𑌹𑍍𑌯𑌕𑌰𑌵𑌂 𑌵𑌪𑍁𑌃 ।
𑌤𑌸𑍍𑌮𑌿𑌨𑍍𑌮𑍁𑌹𑍂𑌰𑍍𑌤𑍇 𑌚 𑌪𑍁𑌨𑌰𑍍𑌬𑌭𑍂𑌵𑌾𑌂𑌗𑍁𑌷𑍍𑌠𑌮𑌾𑌤𑍍𑌰𑌕𑌃 ॥ 30 ॥
𑌅𑌭𑌿𑌪𑌤𑍍𑌯𑌾𑌶𑍁 𑌤𑌦𑍍𑌵𑌕𑍍𑌤𑍍𑌰𑌂 𑌨𑌿𑌰𑍍𑌗𑌤𑍋𑌽𑌹𑌂 𑌤𑌤𑌃 𑌕𑍍𑌷𑌣𑌾𑌤𑍍 ।
𑌅𑌬𑍍𑌰𑌵𑍀𑌤𑍍𑌸𑍁𑌰𑌸𑌾 𑌦𑍇𑌵𑍀 𑌸𑍍𑌵𑍇𑌨 𑌰𑍂𑌪𑍇𑌣 𑌮𑌾𑌂 𑌪𑍁𑌨𑌃 ॥ 31 ॥
𑌅𑌰𑍍𑌥𑌸𑌿𑌦𑍍𑌧𑍍𑌯𑍈 𑌹𑌰𑌿𑌶𑍍𑌰𑍇𑌷𑍍𑌠 𑌗𑌚𑍍𑌛 𑌸𑍌𑌮𑍍𑌯 𑌯𑌥𑌾𑌸𑍁𑌖𑌮𑍍 ।
𑌸𑌮𑌾𑌨𑌯 𑌚 𑌵𑍈𑌦𑍇𑌹𑍀𑌂 𑌰𑌾𑌘𑌵𑍇𑌣 𑌮𑌹𑌾𑌤𑍍𑌮𑌨𑌾 ॥ 32 ॥
𑌸𑍁𑌖𑍀 𑌭𑌵 𑌮𑌹𑌾𑌬𑌾𑌹𑍋 𑌪𑍍𑌰𑍀𑌤𑌾𑌽𑌸𑍍𑌮𑌿 𑌤𑌵 𑌵𑌾𑌨𑌰 ।
𑌤𑌤𑍋𑌽𑌹𑌂 𑌸𑌾𑌧𑍁 𑌸𑌾𑌧𑍍𑌵𑌿𑌤𑌿 𑌸𑌰𑍍𑌵𑌭𑍂𑌤𑍈𑌃 𑌪𑍍𑌰𑌶𑌂𑌸𑌿𑌤𑌃 ॥ 33 ॥
𑌤𑌤𑍋𑌽𑌂𑌤𑌰𑌿𑌕𑍍𑌷𑌂 𑌵𑌿𑌪𑍁𑌲𑌂 𑌪𑍍𑌲𑍁𑌤𑍋𑌽𑌹𑌂 𑌗𑌰𑍁𑌡𑍋 𑌯𑌥𑌾 ।
𑌛𑌾𑌯𑌾 𑌮𑍇 𑌨𑌿𑌗𑍃𑌹𑍀𑌤𑌾 𑌚 𑌨 𑌚 𑌪𑌶𑍍𑌯𑌾𑌮𑌿 𑌕𑌿𑌂𑌚𑌨 ॥ 34 ॥
𑌸𑍋𑌽𑌹𑌂 𑌵𑌿𑌹𑌤𑌵𑍇𑌗𑌸𑍍𑌤𑍁 𑌦𑌿𑌶𑍋 𑌦𑌶 𑌵𑌿𑌲𑍋𑌕𑌯𑌨𑍍 ।
𑌨 𑌕𑌿𑌂𑌚𑌿𑌤𑍍𑌤𑌤𑍍𑌰 𑌪𑌶𑍍𑌯𑌾𑌮𑌿 𑌯𑍇𑌨 𑌮𑍇𑌽𑌪𑌹𑍃𑌤𑌾 𑌗𑌤𑌿𑌃 ॥ 35 ॥
𑌤𑌤𑍋 𑌮𑍇 𑌬𑍁𑌦𑍍𑌧𑌿𑌰𑍁𑌤𑍍𑌪𑌨𑍍𑌨𑌾 𑌕𑌿𑌨𑍍𑌨𑌾𑌮 𑌗𑌗𑌨𑍇 𑌮𑌮 ।
𑌈𑌦𑍃𑌶𑍋 𑌵𑌿𑌘𑍍𑌨 𑌉𑌤𑍍𑌪𑌨𑍍𑌨𑍋 𑌰𑍂𑌪𑌂 𑌯𑌤𑍍𑌰 𑌨 𑌦𑍃𑌶𑍍𑌯𑌤𑍇 ॥ 36 ॥
𑌅𑌧𑍋𑌭𑌾𑌗𑍇𑌨 𑌮𑍇 𑌦𑍃𑌷𑍍𑌟𑌿 𑌶𑍍𑌶𑍋𑌚𑌤𑌾 𑌪𑌾𑌤𑌿𑌤𑌾 𑌮𑌯𑌾 ।
𑌤𑌤𑍋𑌽𑌦𑍍𑌰𑌾𑌕𑍍𑌷𑌮𑌹𑌂 𑌭𑍀𑌮𑌾𑌂 𑌰𑌾𑌕𑍍𑌷𑌸𑍀𑌂 𑌸𑌲𑌿𑌲𑍇𑌶𑌯𑌾𑌮𑍍 ॥ 3 ॥
𑌪𑍍𑌰𑌹𑌸𑍍𑌯 𑌚 𑌮𑌹𑌾𑌨𑌾𑌦𑌮𑍁𑌕𑍍𑌤𑍋𑌽𑌹𑌂 𑌭𑍀𑌮𑌯𑌾 𑌤𑌯𑌾 ।
𑌅𑌵𑌸𑍍𑌥𑌿𑌤𑌮𑌸𑌂𑌭𑍍𑌰𑌾𑌂𑌤𑌮𑌿𑌦𑌂 𑌵𑌾𑌕𑍍𑌯𑌮𑌶𑍋𑌭𑌨𑌮𑍍 ॥ 3 ॥
𑌕𑍍𑌵𑌾𑌸𑌿 𑌗𑌂𑌤𑌾 𑌮𑌹𑌾𑌕𑌾𑌯 𑌕𑍍𑌷𑍁𑌧𑌿𑌤𑌾𑌯𑌾 𑌮𑌮𑍇𑌪𑍍𑌸𑌿𑌤𑌃 ।
𑌭𑌕𑍍𑌷𑌃 𑌪𑍍𑌰𑍀𑌣𑌯 𑌮𑍇 𑌦𑍇𑌹𑌂 𑌚𑌿𑌰𑌮𑌾𑌹𑌾𑌰𑌵𑌰𑍍𑌜𑌿𑌤𑌮𑍍 ॥ 3 ॥
𑌬𑌾𑌢𑌮𑌿𑌤𑍍𑌯𑍇𑌵 𑌤𑌾𑌂 𑌵𑌾𑌣𑍀𑌂 𑌪𑍍𑌰𑌤𑍍𑌯𑌗𑍃𑌹𑍍𑌣𑌾𑌮𑌹𑌂 𑌤𑌤𑌃 ।
𑌅𑌸𑍍𑌯𑌪𑍍𑌰𑌮𑌾𑌣𑌾𑌦𑌧𑌿𑌕𑌂 𑌤𑌸𑍍𑌯𑌾𑌃 𑌕𑌾𑌯𑌮𑌪𑍂𑌰𑌯𑌮𑍍 ॥ 40 ॥
𑌤𑌸𑍍𑌯𑌾𑌶𑍍𑌚𑌾𑌸𑍍𑌯𑌂 𑌮𑌹𑌦𑍍𑌭𑍀𑌮𑌂 𑌵𑌰𑍍𑌧𑌤𑍇 𑌮𑌮 𑌭𑌕𑍍𑌷𑌣𑍇 ।
𑌨 𑌚 𑌮𑌾𑌂 𑌸𑌾𑌧𑍁 𑌬𑍁𑌬𑍁𑌧𑍇 𑌮𑌮 𑌵𑌾 𑌵𑌿𑌕𑍃𑌤𑌂 𑌕𑍃𑌤𑌮𑍍 ॥ 41 ॥
𑌤𑌤𑍋𑌽𑌹𑌂 𑌵𑌿𑌪𑍁𑌲𑌂 𑌰𑍂𑌪𑌂 𑌸𑌂𑌕𑍍𑌷𑌿𑌪𑍍𑌯 𑌨𑌿𑌮𑌿𑌷𑌾𑌂𑌤𑌰𑌾𑌤𑍍 ।
𑌤𑌸𑍍𑌯𑌾 𑌹𑍃𑌦𑌯𑌮𑌾𑌦𑌾𑌯 𑌪𑍍𑌰𑌪𑌤𑌾𑌮𑌿 𑌨𑌭𑌃𑌸𑍍𑌥𑌲𑌮𑍍 ॥ 42 ॥
𑌸𑌾 𑌵𑌿𑌸𑍃𑌷𑍍𑌟𑌭𑍁𑌜𑌾 𑌭𑍀𑌮𑌾 𑌪𑌪𑌾𑌤 𑌲𑌵𑌣𑌾𑌂𑌭𑌸𑌿 ।
𑌮𑌯𑌾 𑌪𑌰𑍍𑌵𑌤𑌸𑌂𑌕𑌾𑌶𑌾 𑌨𑌿𑌕𑍃𑌤𑍍𑌤𑌹𑍃𑌦𑌯𑌾 𑌸𑌤𑍀 ॥ 43 ॥
𑌶𑍃𑌣𑍋𑌮𑌿 𑌖𑌗𑌤𑌾𑌨𑌾𑌂 𑌚 𑌸𑌿𑌦𑍍𑌧𑌾𑌨𑌾𑌂 𑌚𑌾𑌰𑌣𑍈𑌸𑍍𑌸𑌹 ।
𑌰𑌾𑌕𑍍𑌷𑌸𑍀 𑌸𑌿𑌂𑌹𑌿𑌕𑌾 𑌭𑍀𑌮𑌾 𑌕𑍍𑌷𑌿𑌪𑍍𑌰𑌂 𑌹𑌨𑍁𑌮𑌤𑌾 𑌹𑌤𑌾 ॥ 44 ॥
𑌤𑌾𑌂 𑌹𑌤𑍍𑌵𑌾 𑌪𑍁𑌨𑌰𑍇𑌵𑌾𑌹𑌂 𑌕𑍃𑌤𑍍𑌯𑌮𑌾𑌤𑍍𑌯𑌯𑌿𑌕𑌂 𑌸𑍍𑌮𑌰𑌨𑍍 ।
𑌗𑌤𑍍𑌵𑌾 𑌚𑌾𑌹 𑌮𑌹𑌧𑍍𑌵𑌾𑌨𑌂 𑌪𑌶𑍍𑌯𑌾𑌮𑌿 𑌨𑌗𑌮𑌂𑌡𑌿𑌤𑌮𑍍 ॥ 45 ॥
𑌦𑌕𑍍𑌷𑌿𑌣𑌂 𑌤𑍀𑌰𑌮𑍁𑌦𑌧𑍇𑌰𑍍𑌲𑌂𑌕𑌾 𑌯𑌤𑍍𑌰 𑌚 𑌸𑌾 𑌪𑍁𑌰𑍀 ।
𑌅𑌸𑍍𑌤𑌂 𑌦𑌿𑌨𑌕𑌰𑍇 𑌯𑌾𑌤𑍇 𑌰𑌕𑍍𑌷𑌸𑌾𑌂 𑌨𑌿𑌲𑌯𑌂 𑌪𑍁𑌰𑌮𑍍 ॥ 46 ॥
𑌪𑍍𑌰𑌵𑌿𑌷𑍍𑌟𑍋𑌽𑌹𑌮𑌵𑌿𑌜𑍍𑌞𑌾𑌤𑍋 𑌰𑌕𑍍𑌷𑍋𑌭𑌿𑌰𑍍𑌭𑍀𑌮𑌵𑌿𑌕𑍍𑌰𑌮𑍈𑌃 ।
𑌤𑌤𑍍𑌰 𑌪𑍍𑌰𑌵𑌿𑌶𑌤𑌶𑍍𑌚𑌾𑌪𑌿 𑌕𑌲𑍍𑌪𑌾𑌂𑌤𑌘𑌨𑌸𑌨𑍍𑌨𑌿𑌭𑌾 ॥ 4 ॥
𑌅𑌟𑍍𑌟𑌹𑌾𑌸𑌂 𑌵𑌿𑌮𑍁𑌂𑌚𑌂𑌤𑍀 𑌨𑌾𑌰𑍀 𑌕𑌾𑌪𑍍𑌯𑍁𑌤𑍍𑌥𑌿𑌤𑌾 𑌪𑍁𑌰𑌃 ।
𑌜𑌿𑌘𑌾𑌂𑌸𑌂𑌤𑍀𑌂 𑌤𑌤𑌸𑍍𑌤𑌾𑌂 𑌤𑍁 𑌜𑍍𑌵𑌲𑌦𑌗𑍍𑌨𑌿𑌶𑌿𑌰𑍋𑌰𑍁𑌹𑌾𑌮𑍍 ॥ 4 ॥
𑌸𑌵𑍍𑌯𑌮𑍁𑌷𑍍𑌟𑌿𑌪𑍍𑌰𑌹𑌾𑌰𑍇𑌣 𑌪𑌰𑌾𑌜𑌿𑌤𑍍𑌯 𑌸𑍁𑌭𑍈𑌰𑌵𑌾𑌮𑍍 ।
𑌪𑍍𑌰𑌦𑍋𑌷𑌕𑌾𑌲𑍇 𑌪𑍍𑌰𑌵𑌿𑌶𑌂 𑌭𑍀𑌤𑌯𑌾𑌽𑌹𑌂 𑌤𑌯𑍋𑌦𑌿𑌤𑌃 ॥ 4 ॥
𑌅𑌹𑌂 𑌲𑌂𑌕𑌾𑌪𑍁𑌰𑍀 𑌵𑍀𑌰 𑌨𑌿𑌰𑍍𑌜𑌿𑌤𑌾 𑌵𑌿𑌕𑍍𑌰𑌮𑍇𑌣 𑌤𑍇 ।
𑌯𑌸𑍍𑌮𑌾𑌤𑍍𑌤𑌸𑍍𑌮𑌾𑌦𑍍𑌵𑌿𑌜𑍇𑌤𑌾𑌸𑌿 𑌸𑌰𑍍𑌵𑌰𑌕𑍍𑌷𑌾𑌂𑌸𑍍𑌯𑌶𑍇𑌷𑌤𑌃 ॥ 50 ॥
𑌤𑌤𑍍𑌰𑌾𑌹𑌂 𑌸𑌰𑍍𑌵𑌰𑌾𑌤𑍍𑌰𑌂 𑌤𑍁 𑌵𑌿𑌚𑌿𑌨𑍍𑌵𑌨𑍍 𑌜𑌨𑌕𑌾𑌤𑍍𑌮𑌜𑌾𑌮𑍍 ।
𑌰𑌾𑌵𑌣𑌾𑌂𑌤𑌃𑌪𑍁𑌰𑌗𑌤𑍋 𑌨 𑌚𑌾𑌪𑌶𑍍𑌯𑌂 𑌸𑍁𑌮𑌧𑍍𑌯𑌮𑌾𑌮𑍍 ॥ 51 ॥
𑌤𑌤 𑌸𑍍𑌸𑍀𑌤𑌾𑌮𑌪𑌶𑍍𑌯𑌂𑌸𑍍𑌤𑍁 𑌰𑌾𑌵𑌣𑌸𑍍𑌯 𑌨𑌿𑌵𑍇𑌶𑌨𑍇 ।
𑌶𑍋𑌕𑌸𑌾𑌗𑌰𑌮𑌾𑌸𑌾𑌦𑍍𑌯 𑌨 𑌪𑌾𑌰𑌮𑍁𑌪𑌲𑌕𑍍𑌷𑌯𑍇 ॥ 52 ॥
𑌶𑍋𑌚𑌤𑌾 𑌚 𑌮𑌯𑌾 𑌦𑍃𑌷𑍍𑌟𑌂 𑌪𑍍𑌰𑌾𑌕𑌾𑌰𑍇𑌣 𑌸𑌮𑌾𑌵𑍃𑌤𑌮𑍍 ।
𑌕𑌾𑌂𑌚𑌨𑍇𑌨 𑌵𑌿𑌕𑍃𑌷𑍍𑌟𑍇𑌨 𑌗𑍃𑌹𑍋𑌪𑌵𑌨𑌮𑍁𑌤𑍍𑌤𑌮𑌮𑍍 ॥ 53 ॥
𑌸 𑌪𑍍𑌰𑌾𑌕𑌾𑌰𑌮𑌵𑌪𑍍𑌲𑍁𑌤𑍍𑌯 𑌪𑌶𑍍𑌯𑌾𑌮𑌿 𑌬𑌹𑍁𑌪𑌾𑌦𑌪𑌮𑍍 ।
𑌅𑌶𑍋𑌕𑌵𑌨𑌿𑌕𑌾𑌮𑌧𑍍𑌯𑍇 𑌶𑌿𑌂𑌶𑍁𑌪𑌾𑌪𑌾𑌦𑌪𑍋 𑌮𑌹𑌾𑌨𑍍 ॥ 54 ॥
𑌤𑌮𑌾𑌰𑍁𑌹𑍍𑌯 𑌚 𑌪𑌶𑍍𑌯𑌾𑌮𑌿 𑌕𑌾𑌂𑌚𑌨𑌂 𑌕𑌦𑌲𑍀𑌵𑌨𑌮𑍍 ।
𑌅𑌦𑍂𑌰𑍇 𑌶𑌿𑌂𑌶𑍁𑌪𑌾𑌵𑍃𑌕𑍍𑌷𑌾𑌤𑍍𑌪𑌶𑍍𑌯𑌾𑌮𑌿 𑌵𑌰𑌵𑌰𑍍𑌣𑌿𑌨𑍀𑌮𑍍 ॥ 55 ॥
𑌶𑍍𑌯𑌾𑌮𑌾𑌂 𑌕𑌮𑌲𑌪𑌤𑍍𑌰𑌾𑌕𑍍𑌷𑍀𑌮𑍁𑌪𑌵𑌾𑌸𑌕𑍃𑌶𑌾𑌨𑌨𑌾𑌮𑍍 ।
𑌤𑌦𑍇𑌕𑌵𑌾𑌸𑌸𑍍𑌸𑌂𑌵𑍀𑌤𑌾𑌂 𑌰𑌜𑍋𑌧𑍍𑌵𑌸𑍍𑌤𑌶𑌿𑌰𑍋𑌰𑍁𑌹𑌾𑌮𑍍 ॥ 56 ॥
𑌶𑍋𑌕𑌸𑌂𑌤𑌾𑌪𑌦𑍀𑌨𑌾𑌂𑌗𑍀𑌂 𑌸𑍀𑌤𑌾𑌂 𑌭𑌰𑍍𑌤𑍃𑌹𑌿𑌤𑍇 𑌸𑍍𑌥𑌿𑌤𑌾𑌮𑍍 ।
𑌰𑌾𑌕𑍍𑌷𑌸𑍀𑌭𑌿𑌰𑍍𑌵𑌿𑌰𑍂𑌪𑌾𑌭𑌿𑌃 𑌕𑍍𑌰𑍂𑌰𑌾𑌭𑌿𑌰𑌭𑌿𑌸𑌂𑌵𑍃𑌤𑌾𑌮𑍍 ॥ 5 ॥
𑌮𑌾𑌂𑌸𑌶𑍋𑌣𑌿𑌤𑌭𑌕𑍍𑌷𑌾𑌭𑌿𑌰𑍍𑌵𑍍𑌯𑌾𑌘𑍍𑌰𑍀𑌭𑌿𑌰𑍍𑌹𑌰𑌿𑌣𑍀𑌮𑌿𑌵 ।
𑌸𑌾 𑌮𑌯𑌾 𑌰𑌾𑌕𑍍𑌷𑌸𑍀𑌮𑌧𑍍𑌯𑍇 𑌤𑌰𑍍𑌜𑍍𑌯𑌮𑌾𑌨𑌾 𑌮𑍁𑌹𑍁𑌰𑍍𑌮𑍁𑌹𑍁𑌃 ॥ 5 ॥
𑌏𑌕𑌵𑍇𑌣𑍀𑌧𑌰𑌾 𑌦𑍀𑌨𑌾 𑌭𑌰𑍍𑌤𑍃𑌚𑌿𑌂𑌤𑌾𑌪𑌰𑌾𑌯𑌣𑌾 ।
𑌭𑍂𑌮𑌿𑌶𑌯𑍍𑌯𑌾 𑌵𑌿𑌵𑌰𑍍𑌣𑌾𑌂𑌗𑍀 𑌪𑌦𑍍𑌮𑌿𑌨𑍀𑌵 𑌹𑌿𑌮𑌾𑌗𑌮𑍇 ॥ 5 ॥
𑌰𑌾𑌵𑌣𑌾𑌦𑍍𑌵𑌿𑌨𑌿𑌵𑍃𑌤𑍍𑌤𑌾𑌰𑍍𑌥𑌾 𑌮𑌰𑍍𑌤𑌵𑍍𑌯𑌕𑍃𑌤𑌨𑌿𑌶𑍍𑌚𑌯𑌾 ।
𑌕𑌥𑌂𑌚𑌿𑌨𑍍𑌮𑍃𑌗𑌶𑌾𑌬𑌾𑌕𑍍𑌷𑍀 𑌤𑍂𑌰𑍍𑌣𑌮𑌾𑌸𑌾𑌦𑌿𑌤𑌾 𑌮𑌯𑌾 ॥ 60 ॥
𑌤𑌾𑌂 𑌦𑍃𑌷𑍍𑌟𑍍𑌵𑌾 𑌤𑌾𑌦𑍃𑌶𑍀𑌂 𑌨𑌾𑌰𑍀𑌂 𑌰𑌾𑌮𑌪𑌤𑍍𑌨𑍀𑌂 𑌯𑌶𑌸𑍍𑌵𑌿𑌨𑍀𑌮𑍍 ।
𑌤𑌤𑍍𑌰𑍈𑌵 𑌶𑌿𑌂𑌶𑍁𑌪𑌾𑌵𑍃𑌕𑍍𑌷𑍇 𑌪𑌶𑍍𑌯𑌨𑍍𑌨𑌹𑌮𑌵𑌸𑍍𑌥𑌿𑌤𑌃 ॥ 61 ॥
𑌤𑌤𑍋 𑌹𑌲𑌹𑌲𑌾𑌶𑌬𑍍𑌦𑌂 𑌕𑌾𑌂𑌚𑍀𑌨𑍂𑌪𑍁𑌰𑌮𑌿𑌶𑍍𑌰𑌿𑌤𑌮𑍍 ।
𑌶𑍃𑌣𑍋𑌮𑍍𑌯𑌧𑌿𑌕𑌗𑌂𑌭𑍀𑌰𑌂 𑌰𑌾𑌵𑌣𑌸𑍍𑌯 𑌨𑌿𑌵𑍇𑌶𑌨𑍇 ॥ 62 ॥
𑌤𑌤𑍋𑌽𑌹𑌂 𑌪𑌰𑌮𑍋𑌦𑍍𑌵𑌿𑌗𑍍𑌨𑌃 𑌸𑍍𑌵𑌂 𑌰𑍂𑌪𑌂 𑌪𑍍𑌰𑌤𑍍𑌯𑌸𑌂𑌹𑌰𑌮𑍍 ।
𑌅𑌹𑌂 𑌤𑍁 𑌶𑌿𑌂𑌶𑍁𑌪𑌾𑌵𑍃𑌕𑍍𑌷𑍇 𑌪𑌕𑍍𑌷𑍀𑌵 𑌗𑌹𑌨𑍇 𑌸𑍍𑌥𑌿𑌤𑌃 ॥ 63 ॥
𑌤𑌤𑍋 𑌰𑌾𑌵𑌣𑌦𑌾𑌰𑌾𑌶𑍍𑌚 𑌰𑌾𑌵𑌣𑌶𑍍𑌚 𑌮𑌹𑌾𑌬𑌲𑌃 ।
𑌤𑌂 𑌦𑍇𑌶𑌂 𑌸𑌮𑌨𑍁𑌪𑍍𑌰𑌾𑌪𑍍𑌤𑌾 𑌯𑌤𑍍𑌰 𑌸𑍀𑌤𑌾𑌽𑌭𑌵𑌤𑍍 𑌸𑍍𑌥𑌿𑌤𑌾 ॥ 64 ॥
𑌤𑌂 𑌦𑍃𑌷𑍍𑌟𑍍𑌵𑌾𑌥 𑌵𑌰𑌾𑌰𑍋𑌹𑌾 𑌸𑍀𑌤𑌾 𑌰𑌕𑍍𑌷𑍋𑌗𑌣𑍇𑌶𑍍𑌵𑌰𑌮𑍍 ।
𑌸𑌂𑌕𑍁𑌚𑍍𑌯𑍋𑌰𑍂𑌸𑍍𑌤𑌨𑍌 𑌪𑍀𑌨𑍌 𑌬𑌾𑌹𑍁𑌭𑍍𑌯𑌾𑌂 𑌪𑌰𑌿𑌰𑌭𑍍𑌯 𑌚 ॥ 65 ॥
𑌵𑌿𑌤𑍍𑌰𑌸𑍍𑌤𑌾𑌂 𑌪𑌰𑌮𑍋𑌦𑍍𑌵𑌿𑌗𑍍𑌨𑌾𑌂 𑌵𑍀𑌕𑍍𑌷𑌮𑌾𑌣𑌾𑌂 𑌤𑌤𑌸𑍍𑌤𑌤𑌃 ।
𑌤𑍍𑌰𑌾𑌣𑌂 𑌕𑌿𑌂𑌚𑌿𑌦𑌪𑌶𑍍𑌯𑌂𑌤𑍀𑌂 𑌵𑍇𑌪𑌮𑌾𑌨𑌾𑌂 𑌤𑌪𑌸𑍍𑌵𑌿𑌨𑍀𑌮𑍍 ॥ 66 ॥
𑌤𑌾𑌮𑍁𑌵𑌾𑌚 𑌦𑌶𑌗𑍍𑌰𑍀𑌵𑌸𑍍𑌸𑍀𑌤𑌾𑌂 𑌪𑌰𑌮𑌦𑍁𑌃𑌖𑌿𑌤𑌾𑌮𑍍 ।
𑌅𑌵𑌾𑌕𑍍𑌚𑌿𑌰𑌾𑌃 𑌪𑍍𑌰𑌪𑌤𑌿𑌤𑍋 𑌬𑌹𑍁𑌮𑌨𑍍𑌯𑌸𑍍𑌵 𑌮𑌾𑌮𑌿𑌤𑌿 ॥ 6 ॥
𑌯𑌦𑌿 𑌚𑍇𑌤𑍍𑌤𑍍𑌵𑌂 𑌤𑍁 𑌦𑌰𑍍𑌪𑌾𑌨𑍍𑌮𑌾𑌂 𑌨𑌾𑌭𑌿𑌨𑌂𑌦𑌸𑌿 𑌗𑌰𑍍𑌵𑌿𑌤𑍇 ।
𑌦𑍍𑌵𑍌 𑌮𑌾𑌸𑌾𑌵𑌂𑌤𑌰𑌂 𑌸𑍀𑌤𑍇 𑌪𑌾𑌸𑍍𑌯𑌾𑌮𑌿 𑌰𑍁𑌧𑌿𑌰𑌂 𑌤𑌵 ॥ 6 ॥
𑌏𑌤𑌚𑍍𑌛𑍍𑌰𑍁𑌤𑍍𑌵𑌾 𑌵𑌚𑌸𑍍𑌤𑌸𑍍𑌯 𑌰𑌾𑌵𑌣𑌸𑍍𑌯 𑌦𑍁𑌰𑌾𑌤𑍍𑌮𑌨𑌃 ।
𑌉𑌵𑌾𑌚 𑌪𑌰𑌮𑌕𑍍𑌰𑍁𑌦𑍍𑌧𑌾 𑌸𑍀𑌤𑌾 𑌵𑌚𑌨𑌮𑍁𑌤𑍍𑌤𑌮𑌮𑍍 ॥ 6 ॥
𑌰𑌾𑌕𑍍𑌷𑌸𑌾𑌧𑌮 𑌰𑌾𑌮𑌸𑍍𑌯 𑌭𑌾𑌰𑍍𑌯𑌾𑌮𑌮𑌿𑌤𑌤𑍇𑌜𑌸𑌃 ।
𑌇𑌕𑍍𑌷𑍍𑌵𑌾𑌕𑍁𑌕𑍁𑌲𑌨𑌾𑌥𑌸𑍍𑌯 𑌸𑍍𑌨𑍁𑌷𑌾𑌂 𑌦𑌶𑌰𑌥𑌸𑍍𑌯 𑌚 ॥ 0 ॥
𑌅𑌵𑌾𑌚𑍍𑌯𑌂 𑌵𑌦𑌤𑍋 𑌜𑌿𑌹𑍍𑌵𑌾 𑌕𑌥𑌂 𑌨 𑌪𑌤𑌿𑌤𑌾 𑌤𑌵 ।
𑌕𑌿𑌂𑌚𑌿𑌦𑍍𑌵𑍀𑌰𑍍𑌯𑌂 𑌤𑌵𑌾𑌨𑌾𑌰𑍍𑌯 𑌯𑍋 𑌮𑌾𑌂 𑌭𑌰𑍍𑌤𑍁𑌰𑌸𑌨𑍍𑌨𑌿𑌧𑍌 ॥ 1 ॥
𑌅𑌪𑌹𑍃𑌤𑍍𑌯𑌾𑌽𑌽𑌗𑌤𑌃 𑌪𑌾𑌪 𑌤𑍇 𑌨𑌾𑌦𑍃𑌷𑍍𑌟𑍋 𑌮𑌹𑌾𑌤𑍍𑌮𑌨𑌾 ।
𑌨 𑌤𑍍𑌵𑌂 𑌰𑌾𑌮𑌸𑍍𑌯 𑌸𑌦𑍃𑌶𑍋 𑌦𑌾𑌸𑍍𑌯𑍇𑌽𑌪𑍍𑌯𑌸𑍍𑌯 𑌨 𑌯𑍁𑌜𑍍𑌯𑌸𑍇 ॥ 2 ॥
𑌯𑌜𑍍𑌞𑍀𑌯 𑌸𑍍𑌸𑌤𑍍𑌯𑌵𑌾𑌦𑍀 𑌚 𑌰𑌣𑌶𑍍𑌲𑌾𑌘𑍀 𑌚 𑌰𑌾𑌘𑌵𑌃 ।
𑌜𑌾𑌨𑌕𑍍𑌯𑌾 𑌪𑌰𑍁𑌷𑌂 𑌵𑌾𑌕𑍍𑌯𑌮𑍇𑌵𑌮𑍁𑌕𑍍𑌤𑍋 𑌦𑌶𑌾𑌨𑌨𑌃 ॥ 3 ॥
𑌜𑌜𑍍𑌵𑌾𑌲 𑌸𑌹𑌸𑌾 𑌕𑍋𑌪𑌾𑌚𑍍𑌚𑌿𑌤𑌾𑌸𑍍𑌥 𑌇𑌵 𑌪𑌾𑌵𑌕𑌃 ।
𑌵𑌿𑌵𑍃𑌤𑍍𑌯 𑌨𑌯𑌨𑍇 𑌕𑍍𑌰𑍂𑌰𑍇 𑌮𑍁𑌷𑍍𑌟𑌿𑌮𑍁𑌦𑍍𑌯𑌮𑍍𑌯 𑌦𑌕𑍍𑌷𑌿𑌣𑌮𑍍 ॥ 4 ॥
𑌮𑍈𑌥𑌿𑌲𑍀𑌂 𑌹𑌂𑌤𑍁𑌮𑌾𑌰𑌬𑍍𑌧𑌃 𑌸𑍍𑌤𑍍𑌰𑍀𑌭𑌿𑌰𑍍𑌹𑌾𑌹𑌾𑌕𑍃𑌤𑌂 𑌤𑌦𑌾 ।
𑌸𑍍𑌤𑍍𑌰𑍀𑌣𑌾𑌂 𑌮𑌧𑍍𑌯𑌾𑌤𑍍𑌸𑌮𑍁𑌤𑍍𑌪𑌤𑍍𑌯 𑌤𑌸𑍍𑌯 𑌭𑌾𑌰𑍍𑌯𑌾 𑌦𑍁𑌰𑌾𑌤𑍍𑌮𑌨𑌃 ॥ 5 ॥
𑌵𑌰𑌾 𑌮𑌂𑌦𑍋𑌦𑌰𑍀 𑌨𑌾𑌮 𑌤𑌯𑌾 𑌸 𑌪𑍍𑌰𑌤𑌿𑌷𑍇𑌧𑌿𑌤𑌃 ।
𑌉𑌕𑍍𑌤𑌶𑍍𑌚 𑌮𑌧𑍁𑌰𑌾𑌂 𑌵𑌾𑌣𑍀𑌂 𑌤𑌯𑌾 𑌸 𑌮𑌦𑌨𑌾𑌰𑍍𑌦𑌿𑌤𑌃 ॥ 6 ॥
𑌸𑍀𑌤𑌯𑌾 𑌤𑌵 𑌕𑌿𑌂 𑌕𑌾𑌰𑍍𑌯𑌂 𑌮𑌹𑍇𑌂𑌦𑍍𑌰𑌸𑌮𑌵𑌿𑌕𑍍𑌰𑌮𑌃 ।
𑌦𑍇𑌵𑌗𑌂𑌧𑌰𑍍𑌵𑌕𑌨𑍍𑌯𑌾𑌭𑌿𑌰𑍍𑌯𑌕𑍍𑌷𑌕𑌨𑍍𑌯𑌾𑌭𑌿𑌰𑍇𑌵 𑌚 ॥ ॥
𑌸𑌾𑌰𑍍𑌧𑌂 𑌪𑍍𑌰𑌭𑍋 𑌰𑌮𑌸𑍍𑌵𑍇𑌹 𑌸𑍀𑌤𑌯𑌾 𑌕𑌿𑌂 𑌕𑌰𑌿𑌷𑍍𑌯𑌸𑌿 ।
𑌤𑌤𑌸𑍍𑌤𑌾𑌭𑌿𑌸𑍍𑌸𑌮𑍇𑌤𑌾𑌭𑌿𑌰𑍍𑌨𑌾𑌰𑍀𑌭𑌿𑌸𑍍𑌸 𑌮𑌹𑌾𑌬𑌲𑌃 ॥ ॥
𑌪𑍍𑌰𑌸𑌾𑌦𑍍𑌯 𑌸𑌹𑌸𑌾 𑌨𑍀𑌤𑍋 𑌭𑌵𑌨𑌂 𑌸𑍍𑌵𑌂 𑌨𑌿𑌶𑌾𑌚𑌰𑌃 ।
𑌯𑌾𑌤𑍇 𑌤𑌸𑍍𑌮𑌿𑌨𑍍 𑌦𑌶𑌗𑍍𑌰𑍀𑌵𑍇 𑌰𑌾𑌕𑍍𑌷𑌸𑍍𑌯𑍋 𑌵𑌿𑌕𑍃𑌤𑌾𑌨𑌨𑌾𑌃 ॥ ॥
𑌸𑍀𑌤𑌾𑌂 𑌨𑌿𑌰𑍍𑌭𑌰𑍍𑌤𑍍𑌸𑌯𑌾𑌮𑌾𑌸𑍁𑌰𑍍𑌵𑌾𑌕𑍍𑌯𑍈𑌃 𑌕𑍍𑌰𑍂𑌰𑍈𑌸𑍍𑌸𑍁𑌦𑌾𑌰𑍁𑌣𑍈𑌃 ।
𑌤𑍃𑌣𑌵𑌦𑍍𑌭𑌾𑌷𑌿𑌤𑌂 𑌤𑌾𑌸𑌾𑌂 𑌗𑌣𑌯𑌾𑌮𑌾𑌸 𑌜𑌾𑌨𑌕𑍀 ॥ 0 ॥
𑌗𑌰𑍍𑌜𑌿𑌤𑌂 𑌚 𑌤𑌦𑌾 𑌤𑌾𑌸𑌾𑌂 𑌸𑍀𑌤𑌾𑌂 𑌪𑍍𑌰𑌾𑌪𑍍𑌯 𑌨𑌿𑌰𑌰𑍍𑌥𑌕𑌮𑍍 ।
𑌵𑍃𑌥𑌾𑌗𑌰𑍍𑌜𑌿𑌤𑌨𑌿𑌶𑍍𑌚𑍇𑌷𑍍𑌟𑌾 𑌰𑌾𑌕𑍍𑌷𑌸𑍍𑌯𑌃 𑌪𑌿𑌶𑌿𑌤𑌾𑌶𑌨𑌾𑌃 ॥ 1 ॥
𑌰𑌾𑌵𑌣𑌾𑌯 𑌶𑌶𑌂𑌸𑍁𑌸𑍍𑌤𑌾𑌃 𑌸𑍀𑌤𑌾𑌧𑍍𑌯𑌵𑌸𑌿𑌤𑌂 𑌮𑌹𑌤𑍍 ।
𑌤𑌤𑌸𑍍𑌤𑌾𑌸𑍍𑌸𑌹𑌿𑌤𑌾𑌸𑍍𑌸𑌰𑍍𑌵𑌾 𑌨𑌿𑌹𑌤𑌾𑌶𑌾 𑌨𑌿𑌰𑍁𑌦𑍍𑌯𑌮𑌾𑌃 ॥ 2 ॥
𑌪𑌰𑌿𑌕𑍍𑌷𑌿𑌪𑍍𑌯 𑌸𑌮𑌂𑌤𑌾𑌤𑍍𑌤𑌾𑌂 𑌨𑌿𑌦𑍍𑌰𑌾𑌵𑌶𑌮𑍁𑌪𑌾𑌗𑌤𑌾𑌃 ।
𑌤𑌾𑌸𑍁 𑌚𑍈𑌵 𑌪𑍍𑌰𑌸𑍁𑌪𑍍𑌤𑌾𑌸𑍁 𑌸𑍀𑌤𑌾 𑌭𑌰𑍍𑌤𑍃𑌹𑌿𑌤𑍇 𑌰𑌤𑌾 ॥ 3 ॥
𑌵𑌿𑌲𑌪𑍍𑌯 𑌕𑌰𑍁𑌣𑌂 𑌦𑍀𑌨𑌾 𑌪𑍍𑌰𑌶𑍁𑌶𑍋𑌚 𑌸𑍁𑌦𑍁𑌃𑌖𑌿𑌤𑌾 ।
𑌤𑌾𑌸𑌾𑌂 𑌮𑌧𑍍𑌯𑌾𑌤𑍍𑌸𑌮𑍁𑌤𑍍𑌥𑌾𑌯 𑌤𑍍𑌰𑌿𑌜𑌟𑌾 𑌵𑌾𑌕𑍍𑌯𑌮𑌬𑍍𑌰𑌵𑍀𑌤𑍍 ॥ 4 ॥
𑌆𑌤𑍍𑌮𑌾𑌨𑌂 𑌖𑌾𑌦𑌤 𑌕𑍍𑌷𑌿𑌪𑍍𑌰𑌂 𑌨 𑌸𑍀𑌤𑌾 𑌵𑌿𑌨𑌶𑌿𑌷𑍍𑌯𑌤𑌿 ।
𑌜𑌨𑌕𑌸𑍍𑌯𑌾𑌤𑍍𑌮𑌜𑌾 𑌸𑌾𑌧𑍍𑌵𑍀 𑌸𑍍𑌨𑍁𑌷𑌾 𑌦𑌶𑌰𑌥𑌸𑍍𑌯 𑌚 ॥ 5 ॥
𑌸𑍍𑌵𑌪𑍍𑌨𑍋 𑌹𑍍𑌯𑌦𑍍𑌯 𑌮𑌯𑌾 𑌦𑍃𑌷𑍍𑌟𑍋 𑌦𑌾𑌰𑍁𑌣𑍋 𑌰𑍋𑌮𑌹𑌰𑍍𑌷𑌣𑌃 ।
𑌰𑌕𑍍𑌷𑌸𑌾𑌂 𑌚 𑌵𑌿𑌨𑌾𑌶𑌾𑌯 𑌭𑌰𑍍𑌤𑍁𑌰𑌸𑍍𑌯𑌾 𑌜𑌯𑌾𑌯 𑌚 ॥ 6 ॥
𑌅𑌲𑌮𑌸𑍍𑌮𑌾𑌤𑍍𑌪𑌰𑌿𑌤𑍍𑌰𑌾𑌤𑍁𑌂 𑌰𑌾𑌘𑌵𑌾𑌦𑍍𑌰𑌾𑌕𑍍𑌷𑌸𑍀𑌗𑌣𑌮𑍍 ।
𑌅𑌭𑌿𑌯𑌾𑌚𑌾𑌮 𑌵𑍈𑌦𑍇𑌹𑍀𑌮𑍇𑌤𑌦𑍍𑌧𑌿 𑌮𑌮 𑌰𑍋𑌚𑌤𑍇 ॥ ॥
𑌯𑌸𑍍𑌯𑌾 𑌹𑍍𑌯𑍇𑌵𑌂𑌵𑌿𑌧𑌸𑍍𑌸𑍍𑌵𑌪𑍍𑌨𑍋 𑌦𑍁𑌃𑌖𑌿𑌤𑌾𑌯𑌾𑌃 𑌪𑍍𑌰𑌦𑍃𑌶𑍍𑌯𑌤𑍇 ।
𑌸𑌾 𑌦𑍁𑌃𑌖𑍈𑌰𑍍𑌵𑌿𑌵𑌿𑌧𑍈𑌰𑍍𑌮𑍁𑌕𑍍𑌤𑌾 𑌸𑍁𑌖𑌮𑌾𑌪𑍍𑌨𑍋𑌤𑍍𑌯𑌨𑍁𑌤𑍍𑌤𑌮𑌮𑍍 ॥ ॥
𑌪𑍍𑌰𑌣𑌿𑌪𑌾𑌤𑌪𑍍𑌰𑌸𑌨𑍍𑌨𑌾 𑌹𑌿 𑌮𑍈𑌥𑌿𑌲𑍀 𑌜𑌨𑌕𑌾𑌤𑍍𑌮𑌜𑌾 ।
𑌤𑌤𑌸𑍍𑌸𑌾 𑌹𑍍𑌰𑍀𑌮𑌤𑍀 𑌬𑌾𑌲𑌾 𑌭𑌰𑍍𑌤𑍁𑌰𑍍𑌵𑌿𑌜𑌯𑌹𑌰𑍍𑌷𑌿𑌤𑌾 ॥ ॥
𑌅𑌵𑍋𑌚𑌦𑍍𑌯𑌦𑌿 𑌤𑌤𑍍𑌤𑌥𑍍𑌯𑌂 𑌭𑌵𑍇𑌯𑌂 𑌶𑌰𑌣𑌂 𑌹𑌿 𑌵𑌃 ।
𑌤𑌾𑌂 𑌚𑌾𑌹𑌂 𑌤𑌾𑌦𑍃𑌶𑍀𑌂 𑌦𑍃𑌷𑍍𑌟𑍍𑌵𑌾 𑌸𑍀𑌤𑌾𑌯𑌾 𑌦𑌾𑌰𑍁𑌣𑌾𑌂 𑌦𑌶𑌾𑌮𑍍 ।
𑌚𑌿𑌂𑌤𑌯𑌾𑌮𑌾𑌸 𑌵𑌿𑌕𑍍𑌰𑌾𑌂𑌤𑍋 𑌨 𑌚 𑌮𑍇 𑌨𑌿𑌰𑍍𑌵𑍃𑌤𑌂 𑌮𑌨𑌃 ॥ 0 ॥
𑌸𑌂𑌭𑌾𑌷𑌣𑌾𑌰𑍍𑌥𑌂 𑌚 𑌮𑌯𑌾 𑌜𑌾𑌨𑌕𑍍𑌯𑌾𑌶𑍍𑌚𑌿𑌂𑌤𑌿𑌤𑍋 𑌵𑌿𑌧𑌿𑌃 ॥ 1 ॥
𑌇𑌕𑍍𑌷𑍍𑌵𑌾𑌕𑍂𑌣𑌾𑌂 𑌹𑌿 𑌵𑌂𑌶𑌸𑍍𑌤𑍁 𑌤𑌤𑍋 𑌮𑌮 𑌪𑍁𑌰𑌸𑍍𑌕𑍃𑌤𑌃 ।
𑌶𑍍𑌰𑍁𑌤𑍍𑌵𑌾 𑌤𑍁 𑌗𑌦𑌿𑌤𑌾𑌂 𑌵𑌾𑌚𑌂 𑌰𑌾𑌜𑌰𑍍𑌷𑌿𑌗𑌣𑌪𑍂𑌜𑌿𑌤𑌾𑌮𑍍 ॥ 2 ॥
𑌪𑍍𑌰𑌤𑍍𑌯𑌭𑌾𑌷𑌤 𑌮𑌾𑌂 𑌦𑍇𑌵𑍀 𑌬𑌾𑌷𑍍𑌪𑍈𑌃 𑌪𑌿𑌹𑌿𑌤𑌲𑍋𑌚𑌨𑌾 ।
𑌕𑌸𑍍𑌤𑍍𑌵𑌂 𑌕𑍇𑌨 𑌕𑌥𑌂 𑌚𑍇𑌹 𑌪𑍍𑌰𑌾𑌪𑍍𑌤𑍋 𑌵𑌾𑌨𑌰𑌪𑍁𑌂𑌗𑌵𑌃 ॥ 3 ॥
𑌕𑌾 𑌚 𑌰𑌾𑌮𑍇𑌣 𑌤𑍇 𑌪𑍍𑌰𑍀𑌤𑌿𑌸𑍍𑌤𑌨𑍍𑌮𑍇 𑌶𑌂𑌸𑌿𑌤𑍁𑌮𑌰𑍍𑌹𑌸𑌿 ।
𑌤𑌸𑍍𑌯𑌾𑌸𑍍𑌤𑌦𑍍𑌵𑌚𑌨𑌂 𑌶𑍍𑌰𑍁𑌤𑍍𑌵𑌾 𑌹𑍍𑌯𑌹𑌮𑌪𑍍𑌯𑌬𑍍𑌰𑍁𑌵𑌂 𑌵𑌚𑌃 ॥ 4 ॥
𑌦𑍇𑌵𑌿 𑌰𑌾𑌮𑌸𑍍𑌯 𑌭𑌰𑍍𑌤𑍁𑌸𑍍𑌤𑍇 𑌸𑌹𑌾𑌯𑍋 𑌭𑍀𑌮𑌵𑌿𑌕𑍍𑌰𑌮𑌃 ।
𑌸𑍁𑌗𑍍𑌰𑍀𑌵𑍋 𑌨𑌾𑌮 𑌵𑌿𑌕𑍍𑌰𑌾𑌂𑌤𑍋 𑌵𑌾𑌨𑌰𑍇𑌂𑌦𑍍𑌰𑍋 𑌮𑌹𑌾𑌬𑌲𑌃 ॥ 5 ॥
𑌤𑌸𑍍𑌯 𑌮𑌾𑌂 𑌵𑌿𑌦𑍍𑌧𑌿 𑌭𑍃𑌤𑍍𑌯𑌂 𑌤𑍍𑌵𑌂 𑌹𑌨𑍁𑌮𑌂𑌤𑌮𑌿𑌹𑌾𑌗𑌤𑌮𑍍 ।
𑌭𑌰𑍍𑌤𑍍𑌰𑌾𑌹𑌂 𑌪𑍍𑌰𑍇𑌷𑌿𑌤𑌸𑍍𑌤𑍁𑌭𑍍𑌯𑌂 𑌰𑌾𑌮𑍇𑌣𑌾𑌕𑍍𑌲𑌿𑌷𑍍𑌟𑌕𑌰𑍍𑌮𑌣𑌾 ॥ 6 ॥
𑌇𑌦𑌂 𑌚 𑌪𑍁𑌰𑍁𑌷𑌵𑍍𑌯𑌾𑌘𑍍𑌰𑌃 𑌶𑍍𑌰𑍀𑌮𑌾𑌨𑍍 𑌦𑌾𑌶𑌰𑌥𑌿𑌃 𑌸𑍍𑌵𑌯𑌮𑍍 ।
𑌅𑌂𑌗𑍁𑌲𑍀𑌯𑌮𑌭𑌿𑌜𑍍𑌞𑌾𑌨𑌮𑌦𑌾𑌤𑍍𑌤𑍁𑌭𑍍𑌯𑌂 𑌯𑌶𑌸𑍍𑌵𑌿𑌨𑌿 ॥ ॥
𑌤𑌦𑌿𑌚𑍍𑌛𑌾𑌮𑌿 𑌤𑍍𑌵𑌯𑌾𑌽𑌽𑌜𑍍𑌞𑌪𑍍𑌤𑌂 𑌦𑍇𑌵𑌿 𑌕𑌿𑌂 𑌕𑌰𑌵𑌾𑌣𑍍𑌯𑌹𑌮𑍍 ।
𑌰𑌾𑌮𑌲𑌕𑍍𑌷𑍍𑌮𑌣𑌯𑍋𑌃 𑌪𑌾𑌰𑍍𑌶𑍍𑌵𑌂 𑌨𑌯𑌾𑌮𑌿 𑌤𑍍𑌵𑌾𑌂 𑌕𑌿𑌮𑍁𑌤𑍍𑌤𑌰𑌮𑍍 ॥ ॥
𑌏𑌤𑌚𑍍𑌛𑍍𑌰𑍁𑌤𑍍𑌵𑌾 𑌵𑌿𑌦𑌿𑌤𑍍𑌵𑌾 𑌚 𑌸𑍀𑌤𑌾 𑌜𑌨𑌕𑌨𑌂𑌦𑌿𑌨𑍀 ।
𑌆𑌹𑌰𑌾𑌵𑌣𑌮𑍁𑌤𑍍𑌸𑌾𑌦𑍍𑌯 𑌰𑌾𑌘𑌵𑍋 𑌮𑌾𑌂 𑌨𑌯𑌤𑍍𑌵𑌿𑌤𑌿 ॥ ॥
𑌪𑍍𑌰𑌣𑌮𑍍𑌯 𑌶𑌿𑌰𑌸𑌾 𑌦𑍇𑌵𑍀𑌂 𑌮𑌹𑌮𑌾𑌰𑍍𑌯𑌾𑌮𑌨𑌿𑌂𑌦𑌿𑌤𑌾𑌮𑍍 ।
𑌰𑌾𑌘𑌵𑌸𑍍𑌯 𑌮𑌨𑍋𑌹𑍍𑌲𑌾𑌦𑌮𑌭𑌿𑌜𑍍𑌞𑌾𑌨𑌮𑌯𑌾𑌚𑌿𑌷𑌮𑍍 ॥ 100 ॥
𑌅𑌥 𑌮𑌾𑌮𑌬𑍍𑌰𑌵𑍀𑌤𑍍𑌸𑍀𑌤𑌾 𑌗𑍃𑌹𑍍𑌯𑌤𑌾𑌮𑌯𑌮𑍁𑌤𑍍𑌤𑌮𑌃 ।
𑌮𑌣𑌿𑌰𑍍𑌯𑍇𑌨 𑌮𑌹𑌾𑌬𑌾𑌹𑍂 𑌰𑌾𑌮𑌸𑍍𑌤𑍍𑌵𑌾𑌂 𑌬𑌹𑍁𑌮𑌨𑍍𑌯𑌤𑍇 ॥ 101 ॥
𑌇𑌤𑍍𑌯𑍁𑌕𑍍𑌤𑍍𑌵𑌾 𑌤𑍁 𑌵𑌰𑌾𑌰𑍋𑌹𑌾 𑌮𑌣𑌿𑌪𑍍𑌰𑌵𑌰𑌮𑌦𑍍𑌭𑍁𑌤𑌮𑍍 ।
𑌪𑍍𑌰𑌾𑌯𑌚𑍍𑌛𑌤𑍍𑌪𑌰𑌮𑍋𑌦𑍍𑌵𑌿𑌗𑍍𑌨𑌾 𑌵𑌾𑌚𑌾 𑌮𑌾𑌂 𑌸𑌂𑌦𑌿𑌦𑍇𑌶𑌹 ॥ 102 ॥
𑌤𑌤𑌸𑍍𑌤𑌸𑍍𑌯𑍈 𑌪𑍍𑌰𑌣𑌮𑍍𑌯𑌾𑌹𑌂 𑌰𑌾𑌜𑌪𑍁𑌤𑍍𑌰𑍍𑌯𑍈 𑌸𑌮𑌾𑌹𑌿𑌤𑌃 ।
𑌪𑍍𑌰𑌦𑌕𑍍𑌷𑌿𑌣𑌂 𑌪𑌰𑌿𑌕𑍍𑌰𑌾𑌮𑌮𑌿𑌹𑌾𑌭𑍍𑌯𑍁𑌦𑍍𑌗𑌤𑌮𑌾𑌨𑌸𑌃 ॥ 103 ॥
𑌉𑌕𑍍𑌤𑍋𑌽𑌹𑌂 𑌪𑍁𑌨𑌰𑍇𑌵𑍇𑌦𑌂 𑌨𑌿𑌶𑍍𑌚𑌿𑌤𑍍𑌯 𑌮𑌨𑌸𑌾 𑌤𑌯𑌾 ।
𑌹𑌨𑍁𑌮𑌨𑍍𑌮𑌮 𑌵𑍃𑌤𑍍𑌤𑌾𑌂𑌤𑌂 𑌵𑌕𑍍𑌤𑍁𑌮𑌰𑍍𑌹𑌸𑌿 𑌰𑌾𑌘𑌵𑍇 ॥ 104 ॥
𑌯𑌥𑌾 𑌶𑍍𑌰𑍁𑌤𑍍𑌵𑍈𑌵 𑌨 𑌚𑌿𑌰𑌾𑌤𑍍𑌤𑌾𑌵𑍁𑌭𑍌 𑌰𑌾𑌮𑌲𑌕𑍍𑌷𑍍𑌮𑌣𑍌 ।
𑌸𑍁𑌗𑍍𑌰𑍀𑌵𑌸𑌹𑌿𑌤𑍌 𑌵𑍀𑌰𑌾𑌵𑍁𑌪𑍇𑌯𑌾𑌤𑌾𑌂 𑌤𑌥𑌾 𑌕𑍁𑌰𑍁 ॥ 105 ॥
𑌯𑌦𑍍𑌯𑌨𑍍𑌯𑌥𑌾 𑌭𑌵𑍇𑌦𑍇𑌤𑌦𑍍𑌦𑍍𑌵𑍌 𑌮𑌾𑌸𑍌 𑌜𑍀𑌵𑌿𑌤𑌂 𑌮𑌮 ।
𑌨 𑌮𑌾𑌂 𑌦𑍍𑌰𑌕𑍍𑌷𑍍𑌯𑌤𑌿 𑌕𑌾𑌕𑍁𑌤𑍍𑌸𑍍𑌥𑍋 𑌮𑍍𑌰𑌿𑌯𑍇 𑌸𑌾𑌹𑌮𑌨𑌾𑌥𑌵𑌤𑍍 ॥ 106 ॥
𑌤𑌚𑍍𑌛𑍍𑌰𑍁𑌤𑍍𑌵𑌾 𑌕𑌰𑍁𑌣𑌂 𑌵𑌾𑌕𑍍𑌯𑌂 𑌕𑍍𑌰𑍋𑌧𑍋 𑌮𑌾𑌮𑌭𑍍𑌯𑌵𑌰𑍍𑌤𑌤 ।
𑌉𑌤𑍍𑌤𑌰𑌂 𑌚 𑌮𑌯𑌾 𑌦𑍃𑌷𑍍𑌟𑌂 𑌕𑌾𑌰𑍍𑌯𑌶𑍇𑌷𑌮𑌨𑌂𑌤𑌰𑌮𑍍 ॥ 10 ॥
𑌤𑌤𑍋𑌽𑌵𑌰𑍍𑌧𑌤 𑌮𑍇 𑌕𑌾𑌯𑌸𑍍𑌤𑌦𑌾 𑌪𑌰𑍍𑌵𑌤𑌸𑌨𑍍𑌨𑌿𑌭𑌃 ।
𑌯𑍁𑌦𑍍𑌧𑌕𑌾𑌂𑌕𑍍𑌷𑍀 𑌵𑌨𑌂 𑌤𑌚𑍍𑌚 𑌵𑌿𑌨𑌾𑌶𑌯𑌿𑌤𑍁𑌮𑌾𑌰𑌭𑍇 ॥ 10 ॥
𑌤𑌦𑍍𑌭𑌗𑍍𑌨𑌂 𑌵𑌨𑌷𑌂𑌡𑌂 𑌤𑍁 𑌭𑍍𑌰𑌾𑌂𑌤𑌤𑍍𑌰𑌸𑍍𑌤𑌮𑍃𑌗𑌦𑍍𑌵𑌿𑌜𑌮𑍍 ।
𑌪𑍍𑌰𑌤𑌿𑌬𑍁𑌦𑍍𑌧𑌾 𑌨𑌿𑌰𑍀𑌕𑍍𑌷𑌂𑌤𑍇 𑌰𑌾𑌕𑍍𑌷𑌸𑍍𑌯𑍋 𑌵𑌿𑌕𑍃𑌤𑌾𑌨𑌨𑌾𑌃 ॥ 10 ॥
𑌮𑌾𑌂 𑌚 𑌦𑍃𑌷𑍍𑌟𑍍𑌵𑌾 𑌵𑌨𑍇 𑌤𑌸𑍍𑌮𑌿𑌨𑍍 𑌸𑌮𑌾𑌗𑌮𑍍𑌯 𑌤𑌤𑌸𑍍𑌤𑌤𑌃 ।
𑌤𑌾 𑌸𑍍𑌸𑌮𑌭𑍍𑌯𑌾𑌗𑌤𑌾𑌃 𑌕𑍍𑌷𑌿𑌪𑍍𑌰𑌂 𑌰𑌾𑌵𑌣𑌾𑌯𑌾𑌚𑌚𑌕𑍍𑌷𑌿𑌰𑍇 ॥ 110 ॥
𑌰𑌾𑌜𑌸𑍍𑌵𑌨𑌮𑌿𑌦𑌂 𑌦𑍁𑌰𑍍𑌗𑌂 𑌤𑌵 𑌭𑌗𑍍𑌨𑌂 𑌦𑍁𑌰𑌾𑌤𑍍𑌮𑌨𑌾 ।
𑌵𑌾𑌨𑌰𑍇𑌣 𑌹𑍍𑌯𑌵𑌿𑌜𑍍𑌞𑌾𑌯 𑌤𑌵 𑌵𑍀𑌰𑍍𑌯𑌂 𑌮𑌹𑌾𑌬𑌲 ॥ 111 ॥
𑌦𑍁𑌰𑍍𑌬𑍁𑌦𑍍𑌧𑍇𑌸𑍍𑌤𑌸𑍍𑌯 𑌰𑌾𑌜𑍇𑌂𑌦𑍍𑌰 𑌤𑌵 𑌵𑌿𑌪𑍍𑌰𑌿𑌯𑌕𑌾𑌰𑌿𑌣𑌃 ।
𑌵𑌧𑌮𑌾𑌜𑍍𑌞𑌾𑌪𑌯 𑌕𑍍𑌷𑌿𑌪𑍍𑌰𑌂 𑌯𑌥𑌾𑌸𑍌 𑌵𑌿𑌲𑌯𑌂 𑌵𑍍𑌰𑌜𑍇𑌤𑍍 ॥ 112 ॥
𑌤𑌚𑍍𑌛𑍍𑌰𑍁𑌤𑍍𑌵𑌾 𑌰𑌾𑌕𑍍𑌷𑌸𑍇𑌂𑌦𑍍𑌰𑍇𑌣 𑌵𑌿𑌸𑍃𑌷𑍍𑌟𑌾 𑌭𑍃𑌶𑌦𑍁𑌰𑍍𑌜𑌯𑌾𑌃 ।
𑌰𑌾𑌕𑍍𑌷𑌸𑌾𑌃 𑌕𑌿𑌂𑌕𑌰𑌾 𑌨𑌾𑌮 𑌰𑌾𑌵𑌣𑌸𑍍𑌯 𑌮𑌨𑍋𑌨𑍁𑌗𑌾𑌃 ॥ 113 ॥
𑌤𑍇𑌷𑌾𑌮𑌶𑍀𑌤𑌿𑌸𑌾𑌹𑌸𑍍𑌰𑌂 𑌶𑍂𑌲𑌮𑍁𑌦𑍍𑌗𑌰𑌪𑌾𑌣𑌿𑌨𑌾𑌮𑍍 ।
𑌮𑌯𑌾 𑌤𑌸𑍍𑌮𑌿𑌨𑍍𑌵𑌨𑍋𑌦𑍍𑌦𑍇𑌶𑍇 𑌪𑌰𑌿𑌘𑍇𑌣 𑌨𑌿𑌷𑍂𑌦𑌿𑌤𑌮𑍍 ॥ 114 ॥
𑌤𑍇𑌷𑌾𑌂 𑌤𑍁 𑌹𑌤𑌶𑍇𑌷𑌾 𑌯𑍇 𑌤𑍇 𑌗𑌤𑍍𑌵𑌾 𑌲𑌘𑍁𑌵𑌿𑌕𑍍𑌰𑌮𑌾𑌃 ।
𑌨𑌿𑌹𑌤𑌂 𑌚 𑌮𑌹𑌤𑍍𑌸𑍈𑌨𑍍𑌯𑌂 𑌰𑌾𑌵𑌣𑌾𑌯𑌾𑌚𑌚𑌕𑍍𑌷𑌿𑌰𑍇 ॥ 115 ॥
𑌤𑌤𑍋 𑌮𑍇 𑌬𑍁𑌦𑍍𑌧𑌿𑌰𑍁𑌤𑍍𑌪𑌨𑍍𑌨𑌾 𑌚𑍈𑌤𑍍𑌯𑌪𑍍𑌰𑌾𑌸𑌾𑌦𑌮𑌾𑌕𑍍𑌰𑌮𑌮𑍍 ।
𑌤𑌤𑍍𑌰𑌸𑍍𑌥𑌾𑌨𑍍𑌰𑌾𑌕𑍍𑌷𑌸𑌾𑌨𑍍 𑌹𑌤𑍍𑌵𑌾 𑌶𑌤𑌂 𑌸𑍍𑌤𑌂𑌭𑍇𑌨 𑌵𑍈 𑌪𑍁𑌨𑌃 ॥ 116 ॥
𑌲𑌲𑌾𑌮𑌭𑍂𑌤𑍋 𑌲𑌂𑌕𑌾𑌯𑌾𑌸𑍍𑌸 𑌵𑍈 𑌵𑌿𑌧𑍍𑌵𑌂𑌸𑌿𑌤𑍋 𑌮𑌯𑌾 ।
𑌤𑌤𑌃 𑌪𑍍𑌰𑌹𑌸𑍍𑌤𑌸𑍍𑌯 𑌸𑍁𑌤𑌂 𑌜𑌂𑌬𑍁𑌮𑌾𑌲𑌿𑌨𑌮𑌾𑌦𑌿𑌶𑌤𑍍 ॥ 11 ॥
𑌰𑌾𑌕𑍍𑌷𑌸𑍈𑌰𑍍𑌬𑌹𑍁𑌭𑌿𑌸𑍍𑌸𑌾𑌰𑍍𑌧𑌂 𑌘𑍋𑌰𑌰𑍂𑌪𑍈𑌰𑍍𑌭𑌯𑌾𑌨𑌕𑍈𑌃 ।
𑌤𑌂 𑌮𑌹𑌾𑌬𑌲𑌸𑌂𑌪𑌨𑍍𑌨𑌂 𑌰𑌾𑌕𑍍𑌷𑌸𑌂 𑌰𑌣𑌕𑍋𑌵𑌿𑌦𑌮𑍍 ॥ 11 ॥
𑌪𑌰𑌿𑌘𑍇𑌣𑌾𑌤𑌿𑌘𑍋𑌰𑍇𑌣 𑌸𑍂𑌦𑌯𑌾𑌮𑌿 𑌸𑌹𑌾𑌨𑍁𑌗𑌮𑍍 ।
𑌤𑌚𑍍𑌛𑍍𑌰𑍁𑌤𑍍𑌵𑌾 𑌰𑌾𑌕𑍍𑌷𑌸𑍇𑌂𑌦𑍍𑌰𑌸𑍍𑌤𑍁 𑌮𑌂𑌤𑍍𑌰𑌿𑌪𑍁𑌤𑍍𑌤𑍍𑌰𑌾𑌨𑍍𑌮𑌹𑌾𑌬𑌲𑌾𑌨𑍍 ॥ 11 ॥
𑌪𑌦𑌾𑌤𑌿𑌬𑌲𑌸𑌂𑌪𑌨𑍍𑌨𑌾𑌨𑍍 𑌪𑍍𑌰𑍇𑌷𑌯𑌾𑌮𑌾𑌸 𑌰𑌾𑌵𑌣𑌃 ।
𑌪𑌰𑌿𑌘𑍇𑌣𑍈𑌵 𑌤𑌾𑌨𑍍 𑌸𑌰𑍍𑌵𑌾𑌨𑍍𑌨𑌯𑌾𑌮𑌿 𑌯𑌮𑌸𑌾𑌦𑌨𑌮𑍍 ॥ 120 ॥
𑌮𑌂𑌤𑍍𑌰𑌿𑌪𑍁𑌤𑍍𑌤𑍍𑌰𑌾𑌨𑍍𑌹𑌤𑌾𑌨𑍍𑌚𑍍𑌛𑍃𑌤𑍍𑌵𑌾 𑌸𑌮𑌰𑍇𑌽𑌲𑌘𑍁𑌵𑌿𑌕𑍍𑌰𑌮𑌾𑌨𑍍 ।
𑌪𑌂𑌚 𑌸𑍇𑌨𑌾𑌗𑍍𑌰𑌗𑌾𑌚𑍍𑌛𑍍𑌰𑍂𑌰𑌾𑌨𑍍𑌪𑍍𑌰𑍇𑌷𑌯𑌾𑌮𑌾𑌸 𑌰𑌾𑌵𑌣𑌃 ॥ 121 ॥
𑌤𑌾𑌨𑌹𑌂 𑌸𑌹𑌸𑍈𑌨𑍍𑌯𑌾𑌨𑍍𑌵𑍈 𑌸𑌰𑍍𑌵𑌾𑌨𑍇𑌵𑌾𑌭𑍍𑌯𑌸𑍂𑌦𑌯𑌮𑍍 ।
𑌤𑌤𑌃 𑌪𑍁𑌨𑌰𑍍𑌦𑌶𑌗𑍍𑌰𑍀𑌵𑌃 𑌪𑍁𑌤𑍍𑌰𑌮𑌕𑍍𑌷𑌂 𑌮𑌹𑌾𑌬𑌲𑌮𑍍 ॥ 122 ॥
𑌬𑌹𑍁𑌭𑍀 𑌰𑌾𑌕𑍍𑌷𑌸𑍈𑌸𑍍𑌸𑌾𑌰𑍍𑌧𑌂 𑌪𑍍𑌰𑍇𑌷𑌯𑌾𑌮𑌾𑌸 𑌰𑌾𑌵𑌣𑌃 ।
𑌤𑌂 𑌤𑍁 𑌮𑌂𑌦𑍋𑌦𑌰𑍀𑌪𑍁𑌤𑍍𑌤𑍍𑌰𑌂 𑌕𑍁𑌮𑌾𑌰𑌂 𑌰𑌣𑌪𑌂𑌡𑌿𑌤𑌮𑍍 ॥ 123 ॥
𑌸𑌹𑌸𑌾 𑌖𑌂 𑌸𑌮𑍁𑌤𑍍𑌕𑍍𑌰𑌾𑌂𑌤𑌂 𑌪𑌾𑌦𑌯𑍋𑌶𑍍𑌚 𑌗𑍃𑌹𑍀𑌤𑌵𑌾𑌨𑍍 ।
𑌚𑌰𑍍𑌮𑌾𑌸𑌿𑌨𑌂 𑌶𑌤𑌗𑍁𑌣𑌂 𑌭𑍍𑌰𑌾𑌮𑌯𑌿𑌤𑍍𑌵𑌾 𑌵𑍍𑌯𑌪𑍇𑌷𑌯𑌮𑍍 ॥ 124 ॥
𑌤𑌮𑌕𑍍𑌷𑌮𑌾𑌗𑌤𑌂 𑌭𑌗𑍍𑌨𑌂 𑌨𑌿𑌶𑌮𑍍𑌯 𑌸 𑌦𑌶𑌾𑌨𑌨𑌃 ।
𑌤𑌤 𑌇𑌂𑌦𑍍𑌰𑌜𑌿𑌤𑌂 𑌨𑌾𑌮 𑌦𑍍𑌵𑌿𑌤𑍀𑌯𑌂 𑌰𑌾𑌵𑌣𑌸𑍍𑌸𑍁𑌤𑌮𑍍 ॥ 125 ॥
𑌵𑍍𑌯𑌾𑌦𑌿𑌦𑍇𑌶 𑌸𑍁𑌸𑌂𑌕𑍃𑌦𑍍𑌧𑍋 𑌬𑌲𑌿𑌨𑌂 𑌯𑍁𑌦𑍍𑌧𑌦𑍁𑌰𑍍𑌮𑌦𑌮𑍍 ।
𑌤𑌚𑍍𑌚𑌾𑌪𑍍𑌯𑌹𑌂 𑌬𑌲𑌂 𑌸𑌰𑍍𑌵𑌂 𑌤𑌂 𑌚 𑌰𑌾𑌕𑍍𑌷𑌸𑌪𑍁𑌂𑌗𑌵𑌮𑍍 ॥ 126 ॥
𑌨𑌷𑍍𑌟𑍌𑌜𑌸𑌂 𑌰𑌣𑍇 𑌕𑍃𑌤𑍍𑌵𑌾 𑌪𑌰𑌂 𑌹𑌰𑍍𑌷𑌮𑍁𑌪𑌾𑌗𑌮𑌮𑍍 ।
𑌮𑌹𑌤𑌾𑌪𑌿 𑌮𑌹𑌾𑌬𑌾𑌹𑍁𑌃 𑌪𑍍𑌰𑌤𑍍𑌯𑌯𑍇𑌨 𑌮𑌹𑌾𑌬𑌲𑌃 ॥ 12 ॥
𑌪𑍍𑌰𑍇𑌷𑌿𑌤𑍋 𑌰𑌾𑌵𑌣𑍇𑌨𑍈𑌵 𑌸𑌹 𑌵𑍀𑌰𑍈𑌰𑍍𑌮𑌦𑍋𑌤𑍍𑌕𑌟𑍈𑌃 ।
𑌸𑍋𑌽𑌵𑌿𑌷𑌹𑍍𑌯𑌂 𑌹𑌿 𑌮𑌾𑌂 𑌬𑍁𑌦𑍍𑌧𑍍𑌵𑌾 𑌸𑍍𑌵𑌂 𑌬𑌲𑌂 𑌚𑌾𑌵𑌮𑌰𑍍𑌦𑌿𑌤𑌮𑍍 ॥ 12 ॥
𑌬𑍍𑌰𑌾𑌹𑍍𑌮𑌣𑌾𑌸𑍍𑌤𑍍𑌰𑍇𑌣 𑌸 𑌤𑍁 𑌮𑌾𑌂 𑌪𑍍𑌰𑌾𑌬𑌧𑍍𑌨𑌾𑌚𑍍𑌛𑌾𑌤𑌿𑌵𑍇𑌗𑌿𑌤𑌃 ।
𑌰𑌜𑍍𑌜𑍁𑌭𑌿𑌶𑍍𑌚𑌾𑌭𑌿𑌬𑌧𑍍𑌨𑌂𑌤𑌿 𑌤𑌤𑍋 𑌮𑌾𑌂 𑌤𑌤𑍍𑌰 𑌰𑌾𑌕𑍍𑌷𑌸𑌾𑌃 ॥ 12 ॥
𑌰𑌾𑌵𑌣𑌸𑍍𑌯 𑌸𑌮𑍀𑌪𑌂 𑌚 𑌗𑍃𑌹𑍀𑌤𑍍𑌵𑌾 𑌮𑌾𑌮𑍁𑌪𑌾𑌨𑌯𑌨𑍍 ।
𑌦𑍃𑌷𑍍𑌟𑍍𑌵𑌾 𑌸𑌂𑌭𑌾𑌷𑌿𑌤𑌶𑍍𑌚𑌾𑌹𑌂 𑌰𑌾𑌵𑌣𑍇𑌨 𑌦𑍁𑌰𑌾𑌤𑍍𑌮𑌨𑌾 ॥ 130 ॥
𑌪𑍃𑌷𑍍𑌟𑌶𑍍𑌚 𑌲𑌂𑌕𑌾𑌗𑌮𑌨𑌂 𑌰𑌾𑌕𑍍𑌷𑌸𑌾𑌨𑌾𑌂 𑌚 𑌤𑌂 𑌵𑌧𑌮𑍍 ।
𑌤𑌤𑍍𑌸𑌰𑍍𑌵𑌂 𑌚 𑌮𑌯𑌾 𑌤𑌤𑍍𑌰 𑌸𑍀𑌤𑌾𑌰𑍍𑌥𑌮𑌿𑌤𑌿 𑌜𑌲𑍍𑌪𑌿𑌤𑌮𑍍 ॥ 131 ॥
𑌅𑌸𑍍𑌯𑌾𑌹𑌂 𑌦𑌰𑍍𑌶𑌨𑌾𑌕𑌾𑌂𑌕𑍍𑌷𑍀 𑌪𑍍𑌰𑌾𑌪𑍍𑌤𑌸𑍍𑌤𑍍𑌵𑌦𑍍𑌭𑌵𑌨𑌂 𑌵𑌿𑌭𑍋 ।
𑌮𑌾𑌰𑍁𑌤𑌸𑍍𑌯𑍌𑌰𑌸𑌃 𑌪𑍁𑌤𑍍𑌰𑍋 𑌵𑌾𑌨𑌰𑍋 𑌹𑌨𑍁𑌮𑌾𑌨𑌹𑌮𑍍 ॥ 132 ॥
𑌰𑌾𑌮𑌦𑍂𑌤𑌂 𑌚 𑌮𑌾𑌂 𑌵𑌿𑌦𑍍𑌧𑌿 𑌸𑍁𑌗𑍍𑌰𑍀𑌵𑌸𑌚𑌿𑌵𑌂 𑌕𑌪𑌿𑌮𑍍 ।
𑌸𑍋𑌽𑌹𑌂 𑌦𑍂𑌤𑍍𑌯𑍇𑌨 𑌰𑌾𑌮𑌸𑍍𑌯 𑌤𑍍𑌵𑌤𑍍𑌸𑌕𑌾𑌶𑌮𑌿𑌹𑌾𑌗𑌤𑌃 ॥ 133 ॥
𑌸𑍁𑌗𑍍𑌰𑍀𑌵𑌶𑍍𑌚 𑌮𑌹𑌾𑌤𑍇𑌜𑌾𑌸𑍍𑌸𑌤𑍍𑌵𑌾𑌂 𑌕𑍁𑌶𑌲𑌮𑌬𑍍𑌰𑌵𑍀𑌤𑍍 ।
𑌧𑌰𑍍𑌮𑌾𑌰𑍍𑌥𑌕𑌾𑌮𑌸𑌹𑌿𑌤𑌂 𑌹𑌿𑌤𑌂 𑌪𑌥𑍍𑌯𑌮𑍁𑌵𑌾𑌚 𑌚 ॥ 134 ॥
𑌵𑌸𑌤𑍋 𑌋𑌶𑍍𑌯𑌮𑍂𑌕𑍇 𑌮𑍇 𑌪𑌰𑍍𑌵𑌤𑍇 𑌵𑌿𑌪𑍁𑌲𑌦𑍍𑌰𑍁𑌮𑍇 ।
𑌰𑌾𑌘𑌵𑍋 𑌰𑌣𑌵𑌿𑌕𑍍𑌰𑌾𑌂𑌤𑍋 𑌮𑌿𑌤𑍍𑌤𑍍𑌰𑌤𑍍𑌵𑌂 𑌸𑌮𑍁𑌪𑌾𑌗𑌤𑌃 ॥ 135 ॥
𑌤𑍇𑌨 𑌮𑍇 𑌕𑌥𑌿𑌤𑌂 𑌰𑌾𑌜𑍍𑌞𑌾 𑌭𑌾𑌰𑍍𑌯𑌾 𑌮𑍇 𑌰𑌕𑍍𑌷𑌸𑌾 𑌹𑍃𑌤𑌾 ।
𑌤𑌤𑍍𑌰 𑌸𑌾𑌹𑌾𑌯𑍍𑌯𑌮𑌸𑍍𑌮𑌾𑌕𑌂 𑌕𑌾𑌰𑍍𑌯𑌂 𑌸𑌰𑍍𑌵𑌾𑌤𑍍𑌮𑌨𑌾 𑌤𑍍𑌵𑌯𑌾 ॥ 136 ॥
𑌮𑌯𑌾 𑌚 𑌕𑌥𑌿𑌤𑌂 𑌤𑌸𑍍𑌮𑍈 𑌵𑌾𑌲𑌿𑌨𑌶𑍍𑌚 𑌵𑌧𑌂 𑌪𑍍𑌰𑌤𑌿 ।
𑌤𑌤𑍍𑌰 𑌸𑌾𑌹𑌾𑌯𑍍𑌯𑌹𑍇𑌤𑍋𑌰𑍍𑌮𑍇 𑌸𑌮𑌯𑌂 𑌕𑌰𑍍𑌤𑍁𑌮𑌰𑍍𑌹𑌸𑌿 ॥ 13 ॥
𑌵𑌾𑌲𑌿𑌨𑌾 𑌹𑍃𑌤𑌰𑌾𑌜𑍍𑌯𑍇𑌨 𑌸𑍁𑌗𑍍𑌰𑍀𑌵𑍇𑌣 𑌮𑌹𑌾𑌪𑍍𑌰𑌭𑍁𑌃 ।
𑌚𑌕𑍍𑌰𑍇𑌽𑌗𑍍𑌨𑌿𑌸𑌾𑌕𑍍𑌷𑌿𑌕𑌂 𑌸𑌖𑍍𑌯𑌂 𑌰𑌾𑌘𑌵𑌸𑍍𑌸𑌹 𑌲𑌕𑍍𑌷𑍍𑌮𑌣𑌃 ॥ 13 ॥
𑌤𑍇𑌨 𑌵𑌾𑌲𑌿𑌨𑌮𑍁𑌤𑍍𑌪𑌾𑌟𑍍𑌯 𑌶𑌰𑍇𑌣𑍈𑌕𑍇𑌨 𑌸𑌂𑌯𑍁𑌗𑍇 ।
𑌵𑌾𑌨𑌰𑌾𑌣𑌾𑌂 𑌮𑌹𑌾𑌰𑌾𑌜𑌃 𑌕𑍃𑌤𑌸𑍍𑌸 𑌪𑍍𑌲𑌵𑌤𑌾𑌂 𑌪𑍍𑌰𑌭𑍁𑌃 ॥ 13 ॥
𑌤𑌸𑍍𑌯 𑌸𑌾𑌹𑌾𑌯𑍍𑌯𑌮𑌸𑍍𑌮𑌾𑌭𑌿𑌃 𑌕𑌾𑌰𑍍𑌯𑌂 𑌸𑌰𑍍𑌵𑌾𑌤𑍍𑌮𑌨𑌾 𑌤𑍍𑌵𑌿𑌹 ।
𑌤𑍇𑌨 𑌪𑍍𑌰𑌸𑍍𑌥𑌾𑌪𑌿𑌤𑌸𑍍𑌤𑍁𑌭𑍍𑌯𑌂 𑌸𑌮𑍀𑌪𑌮𑌿𑌹 𑌧𑌰𑍍𑌮𑌤𑌃 ॥ 140 ॥
𑌕𑍍𑌷𑌿𑌪𑍍𑌰𑌮𑌾𑌨𑍀𑌯𑌤𑌾𑌂 𑌸𑍀𑌤𑌾 𑌦𑍀𑌯𑌤𑌾𑌂 𑌰𑌾𑌘𑌵𑌾𑌯 𑌚 ।
𑌯𑌾𑌵𑌨𑍍𑌨 𑌹𑌰𑌯𑍋 𑌵𑍀𑌰𑌾 𑌵𑌿𑌧𑌮𑌂𑌤𑌿 𑌬𑌲𑌂 𑌤𑌵 ॥ 141 ॥
𑌵𑌾𑌨𑌰𑌾𑌣𑌾𑌂 𑌪𑍍𑌰𑌭𑌾𑌵𑍋 𑌹𑌿 𑌨 𑌕𑍇𑌨 𑌵𑌿𑌦𑌿𑌤𑌃 𑌪𑍁𑌰𑌾 ।
𑌦𑍇𑌵𑌤𑌾𑌨𑌾𑌂 𑌸𑌂𑌕𑌾𑌶𑌂 𑌚 𑌯𑍇 𑌗𑌚𑍍𑌛𑌂𑌤𑌿 𑌨𑌿𑌮𑌂𑌤𑍍𑌰𑌿𑌤𑌾𑌃 ॥ 142 ॥
𑌇𑌤𑌿 𑌵𑌾𑌨𑌰𑌰𑌾𑌜𑌸𑍍𑌤𑍍𑌵𑌾𑌮𑌾𑌹𑍇𑌤𑍍𑌯𑌭𑌿𑌹𑌿𑌤𑍋 𑌮𑌯𑌾 ।
𑌮𑌾𑌮𑍈𑌕𑍍𑌷𑌤 𑌤𑌤𑌃 𑌕𑍍𑌰𑍁𑌦𑍍𑌧𑌶𑍍𑌚𑌕𑍍𑌷𑍁𑌷𑌾 𑌪𑍍𑌰𑌦𑌹𑌨𑍍𑌨𑌿𑌵 ॥ 143 ॥
𑌤𑍇𑌨 𑌵𑌧𑍍𑌯𑍋𑌽𑌹𑌮𑌾𑌜𑍍𑌞𑌪𑍍𑌤𑍋 𑌰𑌕𑍍𑌷𑌸𑌾 𑌰𑍌𑌦𑍍𑌰𑌕𑌰𑍍𑌮𑌣𑌾 ।
𑌮𑌤𑍍𑌪𑍍𑌰𑌭𑌾𑌵𑌮𑌵𑌿𑌜𑍍𑌞𑌾𑌯 𑌰𑌾𑌵𑌣𑍇𑌨 𑌦𑍁𑌰𑌾𑌤𑍍𑌮𑌨𑌾 ॥ 144 ॥
𑌤𑌤𑍋 𑌵𑌿𑌭𑍀𑌷𑌣𑍋 𑌨𑌾𑌮 𑌤𑌸𑍍𑌯 𑌭𑍍𑌰𑌾𑌤𑌾 𑌮𑌹𑌾𑌮𑌤𑌿𑌃 ।
𑌤𑍇𑌨 𑌰𑌾𑌕𑍍𑌷𑌸𑌰𑌾𑌜𑍋𑌽𑌸𑍌 𑌯𑌾𑌚𑌿𑌤𑍋 𑌮𑌮 𑌕𑌾𑌰𑌣𑌾𑌤𑍍 ॥ 145 ॥
𑌨𑍈𑌵𑌂 𑌰𑌾𑌕𑍍𑌷𑌸𑌶𑌾𑌰𑍍𑌦𑍂𑌲 𑌤𑍍𑌯𑌜𑍍𑌯𑌤𑌾𑌮𑍇𑌷 𑌨𑌿𑌶𑍍𑌚𑌯𑌃 ।
𑌰𑌾𑌜𑌶𑌾𑌸𑍍𑌤𑍍𑌰𑌵𑍍𑌯𑌪𑍇𑌤𑍋 𑌹𑌿 𑌮𑌾𑌰𑍍𑌗𑌃 𑌸𑌂𑌸𑍇𑌵𑍍𑌯𑌤𑍇 𑌤𑍍𑌵𑌯𑌾 ॥ 146 ॥
𑌦𑍂𑌤𑌵𑌧𑍍𑌯𑌾 𑌨 𑌦𑍃𑌷𑍍𑌟𑌾 𑌹𑌿 𑌰𑌾𑌜𑌶𑌾𑌸𑍍𑌤𑍍𑌰𑍇𑌷𑍁 𑌰𑌾𑌕𑍍𑌷𑌸 ।
𑌦𑍂𑌤𑍇𑌨 𑌵𑍇𑌦𑌿𑌤𑌵𑍍𑌯𑌂 𑌚 𑌯𑌥𑌾𑌰𑍍𑌥𑌂 𑌹𑌿𑌤𑌵𑌾𑌦𑌿𑌨𑌾 ॥ 14 ॥
𑌸𑍁𑌮𑌹𑌤𑍍𑌯𑌪𑌰𑌾𑌧𑍇𑌽𑌪𑌿 𑌦𑍂𑌤𑌸𑍍𑌯𑌾𑌤𑍁𑌲𑌵𑌿𑌕𑍍𑌰𑌮𑌃 ।
𑌵𑌿𑌰𑍂𑌪𑌕𑌰𑌣𑌂 𑌦𑍃𑌷𑍍𑌟𑌂 𑌨 𑌵𑌧𑍋𑌽𑌸𑍍𑌤𑍀𑌤𑌿 𑌶𑌾𑌸𑍍𑌤𑍍𑌰𑌤𑌃 ॥ 14 ॥
𑌵𑌿𑌭𑍀𑌷𑌣𑍇𑌨𑍈𑌵𑌮𑍁𑌕𑍍𑌤𑍋 𑌰𑌾𑌵𑌣𑌸𑍍𑌸𑌂𑌦𑌿𑌦𑍇𑌶 𑌤𑌾𑌨𑍍 ।
𑌰𑌾𑌕𑍍𑌷𑌸𑌾𑌨𑍇𑌤𑌦𑍇𑌵𑌾𑌸𑍍𑌯 𑌲𑌾𑌂𑌗𑍂𑌲𑌂 𑌦𑌹𑍍𑌯𑌤𑌾𑌮𑌿𑌤𑌿 ॥ 14 ॥
𑌤𑌤𑌸𑍍𑌤𑌸𑍍𑌯 𑌵𑌚𑌃 𑌶𑍍𑌰𑍁𑌤𑍍𑌵𑌾 𑌮𑌮 𑌪𑍁𑌚𑍍𑌛𑌂 𑌸𑌮𑌂𑌤𑌤𑌃 ।
𑌵𑍇𑌷𑍍𑌟𑌿𑌤𑌂 𑌶𑌣𑌵𑌲𑍍𑌕𑍈𑌶𑍍𑌚 𑌜𑍀𑌰𑍍𑌣𑍈𑌃 𑌕𑌾𑌰𑍍𑌪𑌾𑌸𑌜𑍈𑌃 𑌪𑌟𑍈𑌃 ॥ 150 ॥
𑌰𑌾𑌕𑍍𑌷𑌸𑌾𑌃 𑌸𑌿𑌦𑍍𑌧𑌸𑌨𑍍𑌨𑌾𑌹𑌾𑌸𑍍𑌤𑌤𑌸𑍍𑌤𑍇 𑌚𑌂𑌡𑌵𑌿𑌕𑍍𑌰𑌮𑌾𑌃 ।
𑌤𑌦𑌾𑌽𑌦𑌹𑍍𑌯𑌂𑌤 𑌮𑍇 𑌪𑍁𑌚𑍍𑌛𑌂 𑌨𑌿𑌘𑍍𑌨𑌂𑌤𑌃 𑌕𑌾𑌷𑍍𑌠𑌮𑍁𑌷𑍍𑌟𑌿𑌭𑌿𑌃 ॥ 151 ॥
𑌬𑌦𑍍𑌧𑌸𑍍𑌯 𑌬𑌹𑍁𑌭𑌿𑌃 𑌪𑌾𑌶𑍈𑌰𑍍𑌯𑌂𑌤𑍍𑌰𑌿𑌤𑌸𑍍𑌯 𑌚 𑌰𑌾𑌕𑍍𑌷𑌸𑍈𑌃 ।
𑌤𑌤𑌸𑍍𑌤𑍇 𑌰𑌾𑌕𑍍𑌷𑌸𑌾𑌶𑍍𑌶𑍂𑌰𑌾 𑌬𑌦𑍍𑌧𑌂 𑌮𑌾𑌮𑌗𑍍𑌨𑌿𑌸𑌂𑌵𑍃𑌤𑌮𑍍 ॥ 152 ॥
𑌅𑌘𑍋𑌷𑌯𑌨𑍍𑌰𑌾𑌜𑌮𑌾𑌰𑍍𑌗𑍇 𑌨𑌗𑌰𑌦𑍍𑌵𑌾𑌰𑌮𑌾𑌗𑌤𑌾𑌃 ।
𑌤𑌤𑍋𑌽𑌹𑌂 𑌸𑍁𑌮𑌹𑌦𑍍𑌰𑍂𑌪𑌂 𑌸𑌂𑌕𑍍𑌷𑌿𑌪𑍍𑌯 𑌪𑍁𑌨𑌰𑌾𑌤𑍍𑌮𑌨𑌃 ॥ 153 ॥
𑌵𑌿𑌮𑍋𑌚𑌯𑌿𑌤𑍍𑌵𑌾 𑌤𑌂 𑌬𑌂𑌧𑌂 𑌪𑍍𑌰𑌕𑍃𑌤𑌿𑌸𑍍𑌥𑌃 𑌸𑍍𑌥𑌿𑌤𑌃 𑌪𑍁𑌨𑌃 ।
𑌆𑌯𑌸𑌂 𑌪𑌰𑌿𑌘𑌂 𑌗𑍃𑌹𑍍𑌯 𑌤𑌾𑌨𑌿 𑌰𑌕𑍍𑌷𑌾𑌂𑌸𑍍𑌯𑌸𑍂𑌦𑌯𑌮𑍍 ॥ 154 ॥
𑌤𑌤𑌸𑍍𑌤𑌨𑍍𑌨𑌗𑌰𑌦𑍍𑌵𑌾𑌰𑌂 𑌵𑍇𑌗𑍇𑌨𑌾𑌪𑍍𑌲𑍁𑌤𑌵𑌾𑌨𑌹𑌮𑍍 ।
𑌪𑍁𑌚𑍍𑌛𑍇𑌨 𑌚 𑌪𑍍𑌰𑌦𑍀𑌪𑍍𑌤𑍇𑌨 𑌤𑌾𑌂 𑌪𑍁𑌰𑍀𑌂 𑌸𑌾𑌟𑍍𑌟𑌗𑍋𑌪𑍁𑌰𑌾𑌮𑍍 ॥ 155 ॥
𑌦𑌹𑌾𑌮𑍍𑌯𑌹𑌮𑌸𑌂𑌭𑍍𑌰𑌾𑌂𑌤𑍋 𑌯𑍁𑌗𑌾𑌂𑌤𑌾𑌗𑍍𑌨𑌿𑌰𑌿𑌵 𑌪𑍍𑌰𑌜𑌾𑌃 ।
𑌵𑌿𑌨𑌷𑍍𑌟𑌾 𑌜𑌾𑌨𑌕𑍀 𑌵𑍍𑌯𑌕𑍍𑌤𑌂 𑌨 𑌹𑍍𑌯𑌦𑌗𑍍𑌧𑌃 𑌪𑍍𑌰𑌦𑍃𑌶𑍍𑌯𑌤𑍇 ॥ 156 ॥
𑌲𑌂𑌕𑌾𑌯𑌾𑌂 𑌕𑌶𑍍𑌚𑌿𑌦𑍁𑌦𑍍𑌧𑍇𑌶𑌃 𑌸𑌰𑍍𑌵𑌾 𑌭𑌸𑍍𑌮𑍀𑌕𑍃𑌤𑌾 𑌪𑍁𑌰𑍀 ।
𑌦𑌹𑌤𑌾 𑌚 𑌮𑌯𑌾 𑌲𑌂𑌕𑌾𑌂 𑌦𑌗𑍍𑌧𑌾 𑌸𑍀𑌤𑌾 𑌨 𑌸𑌂𑌶𑌯𑌃 ॥ 15 ॥
𑌰𑌾𑌮𑌸𑍍𑌯 𑌹𑌿 𑌮𑌹𑌤𑍍𑌕𑌾𑌰𑍍𑌯𑌂 𑌮𑌯𑍇𑌦𑌂 𑌵𑌿𑌤𑌥𑍀𑌕𑍃𑌤𑌮𑍍 ।
𑌇𑌤𑌿 𑌶𑍋𑌕𑌸𑌮𑌾𑌵𑌿𑌷𑍍𑌟𑌶𑍍𑌚𑌿𑌂𑌤𑌾𑌮𑌹𑌮𑍁𑌪𑌾𑌗𑌤𑌃 ॥ 15 ॥
𑌅𑌥𑌾𑌹𑌂 𑌵𑌾𑌚𑌮𑌶𑍍𑌰𑍌𑌷𑌂 𑌚𑌾𑌰𑌣𑌾𑌨𑌾𑌂 𑌶𑍁𑌭𑌾𑌕𑍍𑌷𑌰𑌾𑌮𑍍 ।
𑌜𑌾𑌨𑌕𑍀 𑌨 𑌚 𑌦𑌗𑍍𑌧𑍇𑌤𑌿 𑌵𑌿𑌸𑍍𑌮𑌯𑍋𑌦𑌂𑌤𑌭𑌾𑌷𑌿𑌣𑌾𑌮𑍍 ॥ 15 ॥
𑌤𑌤𑍋 𑌮𑍇 𑌬𑍁𑌦𑍍𑌧𑌿𑌰𑍁𑌤𑍍𑌪𑌨𑍍𑌨𑌾 𑌶𑍍𑌰𑍁𑌤𑍍𑌵𑌾 𑌤𑌾𑌮𑌦𑍍𑌭𑍁𑌤𑌾𑌂 𑌗𑌿𑌰𑌮𑍍 ।
𑌅𑌦𑌗𑍍𑌧𑌾 𑌜𑌾𑌨𑌕𑍀𑌤𑍍𑌯𑍇𑌵𑌂 𑌨𑌿𑌮𑌿𑌤𑍍𑌤𑍈𑌶𑍍𑌚𑍋𑌪𑌲𑌕𑍍𑌷𑌿𑌤𑌾 ॥ 160 ॥
𑌦𑍀𑌪𑍍𑌯𑌮𑌾𑌨𑍇 𑌤𑍁 𑌲𑌾𑌂𑌗𑍂𑌲𑍇 𑌨 𑌮𑌾𑌂 𑌦𑌹𑌤𑌿 𑌪𑌾𑌵𑌕𑌃 ।
𑌹𑍃𑌦𑌯𑌂 𑌚 𑌪𑍍𑌰𑌹𑍃𑌷𑍍𑌟𑌂 𑌮𑍇 𑌵𑌾𑌤𑌾𑌸𑍍𑌸𑍁𑌰𑌭𑌿𑌗𑌂𑌧𑌿𑌨𑌃 ॥ 161 ॥
𑌤𑍈𑌰𑍍𑌨𑌿𑌮𑌿𑌤𑍍𑌤𑍈𑌶𑍍𑌚 𑌦𑍃𑌷𑍍𑌟𑌾𑌥𑍈𑌃 𑌕𑌾𑌰𑌣𑍈𑌶𑍍𑌚 𑌮𑌹𑌾𑌗𑍁𑌣𑍈𑌃 ।
𑌋𑌷𑌿𑌵𑌾𑌕𑍍𑌯𑍈𑌶𑍍𑌚 𑌸𑌿𑌦𑍍𑌧𑌾𑌰𑍍𑌥𑍈𑌰𑌭𑌵𑌂 𑌹𑍃𑌷𑍍𑌟𑌮𑌾𑌨𑌸𑌃 ॥ 162 ॥
𑌪𑍁𑌨𑌰𑍍𑌦𑍃𑌷𑍍𑌟𑍍𑌵𑌾 𑌚 𑌵𑍈𑌦𑍇𑌹𑍀𑌂 𑌵𑌿𑌸𑍃𑌷𑍍𑌟𑌶𑍍𑌚 𑌤𑌯𑌾 𑌪𑍁𑌨𑌃 ।
𑌤𑌤𑌃 𑌪𑌰𑍍𑌵𑌤𑌮𑌾𑌸𑌾𑌦𑍍𑌯 𑌤𑌤𑍍𑌰𑌾𑌰𑌿𑌷𑍍𑌟𑌮𑌹𑌂 𑌪𑍁𑌨𑌃 ॥ 163 ॥
𑌪𑍍𑌰𑌤𑌿𑌪𑍍𑌲𑌵𑌨𑌮𑌾𑌰𑍇𑌭𑍇 𑌯𑍁𑌷𑍍𑌮𑌦𑍍𑌧𑌰𑍍𑌶𑌨𑌕𑌾𑌂𑌕𑍍𑌷𑌯𑌾 ।
𑌤𑌤𑌃 𑌪𑌵𑌨𑌚𑌂𑌦𑍍𑌰𑌾𑌰𑍍𑌕𑌸𑌿𑌦𑍍𑌧𑌗𑌂𑌧𑌰𑍍𑌵𑌸𑍇𑌵𑌿𑌤𑌮𑍍 ॥ 164 ॥
𑌪𑌂𑌥𑌾𑌨𑌮𑌹𑌮𑌾𑌕𑍍𑌰𑌮𑍍𑌯 𑌭𑌵𑌤𑍋 𑌦𑍃𑌷𑍍𑌟𑌵𑌾𑌨𑌿𑌹 ।
𑌰𑌾𑌘𑌵𑌸𑍍𑌯 𑌪𑍍𑌰𑌭𑌾𑌵𑍇𑌣 𑌭𑌵𑌤𑌾𑌂 𑌚𑍈𑌵 𑌤𑍇𑌜𑌸𑌾 ॥ 165 ॥
𑌸𑍁𑌗𑍍𑌰𑍀𑌵𑌸𑍍𑌯 𑌚 𑌕𑌾𑌰𑍍𑌯𑌾𑌰𑍍𑌥𑌂 𑌮𑌯𑌾 𑌸𑌰𑍍𑌵𑌮𑌨𑍁𑌷𑍍𑌠𑌿𑌤𑌮𑍍 ।
𑌏𑌤𑌤𑍍𑌸𑌰𑍍𑌵𑌂 𑌮𑌯𑌾 𑌤𑌤𑍍𑌰 𑌯𑌥𑌾𑌵𑌦𑍁𑌪𑌪𑌾𑌦𑌿𑌤𑌮𑍍 ॥ 166 ॥
𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌸𑍁𑌂𑌦𑌰𑌕𑌾𑌂𑌡𑍇 𑌅𑌷𑍍𑌟𑌪𑌂𑌚𑌾𑌶𑌸𑍍𑌸𑌰𑍍𑌗𑌃 ॥
