શ્રીમદ્વાલ્મીકીય રામાયણે યુદ્ધકાંડમ્ ।
અથ પ્રથમસ્સર્ગઃ ।
શ્રુત્વા હનુમતો વાક્યં યથાવદભિભાષિતમ્ ।
રામઃ પ્રીતિસમાયુક્તો વાક્યમુત્તરમબ્રવીત્ ॥ 1 ॥
કૃતં હનુમતા કાર્યં સુમહદ્ભુવિ દુર્લભમ્ ।
મનસાપિ યદન્યેન ન શક્યં ધરણીતલે ॥ 2 ॥
ન હિ તં પરિપશ્યામિ યસ્તરેત મહાર્ણવમ્ ।
અન્યત્ર ગરુડાદ્વાયોરન્યત્ર ચ હનૂમતઃ ॥ 3 ॥
દેવદાનવયક્ષાણાં ગંધર્વોરગરક્ષસામ્ ।
અપ્રધૃષ્યાં પુરીં લંકાં રાવણેન સુરક્ષિતામ્ ।
પ્રવષ્ટ સ્સત્ત્વમાશ્રિત્યશ્વસન્કો નામ નિષ્ક્રમેત્ ॥ 4 ॥
કો વિશેત્સુદુરાધર્ષાં રાક્ષસૈશ્ચ સુરક્ષિતામ્ ।
યો વીર્યબલસંપન્નો ન સમસ્યાદ્ધનૂમતઃ ॥ 5 ॥
ભૃત્યકાર્યં હનુમતા સુગ્રીવસ્ય કૃતંમહત્ ।
સ્વયં વિધાય સ્વબલં સદૃશં વિક્રમસ્ય ચ ॥ 6 ॥
યો હિ ભૃત્યો નિયુક્તસ્સન્ભર્ત્રા કર્મણિ દુષ્કરે ।
કુર્યાત્તદનુરાગેણ તમાહુઃ પુરુષોત્તમમ્ ॥ 7 ॥
નિયુક્તોયઃ પરં કાર્યં ન કુર્યાન્નૃપતેઃ પ્રિયમ્ ।
ભૃત્યોઽભૃત્યસ્સમર્થોઽપિ તમાહુર્મધ્યમં નરમ્ ॥ 8 ॥
નિયુક્તો નૃપતેઃ કાર્યં ન કુર્યાદ્યસ્સમાહિતઃ ।
ભૃત્યો યુક્તસ્સમર્થશ્ચ તમાહુઃ પુરુષાધમમ્ ॥ 9 ॥
તન્નિયોગે નિયુક્તેન કૃતં કૃત્યં હનૂમતા ।
ન ચાત્મા લઘુતાં નીતસ્સુગ્રીવશ્ચાપિ તોષિતઃ ॥ 10 ॥
અહં ચ રઘુવંશશ્ચ લક્ષ્મણશ્ચ મહાબલઃ ।
વૈદેહ્યા દર્શનેનાદ્ય ધર્મતઃ પરિરક્ષિતાઃ ॥ 11 ॥
ઇદં તુ મમ દીનસ્ય મનો ભૂયઃ પ્રકર્ષતિ ।
યદિહાસ્ય પ્રિયાખ્યાતુર્ન કુર્મિ સદૃશં પ્રિયમ્ ॥ 12 ॥
એષ સર્વસ્વભૂતે પરિષ્વંગો હનૂમતઃ ।
મયા કાલમિમં પ્રાપ્ય દત્તસ્તસ્ય મહાત્મનઃ ॥ 13 ॥
ઇત્યુક્ત્વા પ્રીતિહૃષ્ટાંગો રામસ્તં પરિષસ્વજે ।
હનૂમંતં કૃતાત્માનં કૃતકાર્યમુપાગતમ્ ॥ 14 ॥
ધ્યાત્વા પુનરુવાચેદં વચનં રઘુનંદનઃ ।
હરીણામીશ્વરસ્યાપિ સુગ્રીવસ્યોપશૃણ્વતઃ ॥ 15 ॥
સર્વથા સુકૃતં તાવત્સીતાયાઃ પરિમાર્ગણમ્ ।
સાગરં તુ સમાસાદ્ય પુનર્નષ્ટં મનો મમ ॥ 16 ॥
કથં નામ સમુદ્રસ્ય દુષ્પારસ્ય મહાંભસઃ ।
હરયો દક્ષિણં પારં ગમિષ્યંતિ સમાગતાઃ ॥ 17 ॥
યદ્યપ્યેષ તુ વૃત્તાંતો વૈદેહ્યા ગદિતો મમ ।
સમુદ્રપારગમને હરીણાં કિમિહોત્તરમ્ ॥ 18 ॥
ઇત્યુક્તવા શોકસંભ્રાંતો રામ શ્શત્રુનિબર્હણઃ ।
હનૂમંતં મહાબાહુસ્તતો ધ્યાનમુપાગમત્ ॥ 19 ॥
ઇત્યાર્ષે શ્રીમદ્રામાયણે વાલ્મીકીય આદિકાવ્યે યુદ્ધકાંડે પ્રથમસ્સર્ગઃ ॥
