ශ්රීමද්වාල්මීකීය රාමායණේ යුද්ධකාංඩම් ।
අථ ප්රථමස්සර්ගඃ ।
ශ්රුත්වා හනුමතෝ වාක්යං යථාවදභිභාෂිතම් ।
රාමඃ ප්රීතිසමායුක්තෝ වාක්යමුත්තරමබ්රවීත් ॥ 1 ॥
කෘතං හනුමතා කාර්යං සුමහද්භුවි දුර්ලභම් ।
මනසාපි යදන්යේන න ශක්යං ධරණීතලේ ॥ 2 ॥
න හි තං පරිපශ්යාමි යස්තරේත මහාර්ණවම් ।
අන්යත්ර ගරුඩාද්වායෝරන්යත්ර ච හනූමතඃ ॥ 3 ॥
දේවදානවයක්ෂාණාං ගංධර්වෝරගරක්ෂසාම් ।
අප්රධෘෂ්යාං පුරීං ලංකාං රාවණේන සුරක්ෂිතාම් ।
ප්රවෂ්ට ස්සත්ත්වමාශ්රිත්යශ්වසන්කෝ නාම නිෂ්ක්රමේත් ॥ 4 ॥
කෝ විශේත්සුදුරාධර්ෂාං රාක්ෂසෛශ්ච සුරක්ෂිතාම් ।
යෝ වීර්යබලසංපන්නෝ න සමස්යාද්ධනූමතඃ ॥ 5 ॥
භෘත්යකාර්යං හනුමතා සුග්රීවස්ය කෘතංමහත් ।
ස්වයං විධාය ස්වබලං සදෘශං වික්රමස්ය ච ॥ 6 ॥
යෝ හි භෘත්යෝ නියුක්තස්සන්භර්ත්රා කර්මණි දුෂ්කරේ ।
කුර්යාත්තදනුරාගේණ තමාහුඃ පුරුෂෝත්තමම් ॥ 7 ॥
නියුක්තෝයඃ පරං කාර්යං න කුර්යාන්නෘපතේඃ ප්රියම් ।
භෘත්යෝऽභෘත්යස්සමර්ථෝऽපි තමාහුර්මධ්යමං නරම් ॥ 8 ॥
නියුක්තෝ නෘපතේඃ කාර්යං න කුර්යාද්යස්සමාහිතඃ ।
භෘත්යෝ යුක්තස්සමර්ථශ්ච තමාහුඃ පුරුෂාධමම් ॥ 9 ॥
තන්නියෝගේ නියුක්තේන කෘතං කෘත්යං හනූමතා ।
න චාත්මා ලඝුතාං නීතස්සුග්රීවශ්චාපි තෝෂිතඃ ॥ 10 ॥
අහං ච රඝුවංශශ්ච ලක්ෂ්මණශ්ච මහාබලඃ ।
වෛදේහ්යා දර්ශනේනාද්ය ධර්මතඃ පරිරක්ෂිතාඃ ॥ 11 ॥
ඉදං තු මම දීනස්ය මනෝ භූයඃ ප්රකර්ෂති ।
යදිහාස්ය ප්රියාඛ්යාතුර්න කුර්මි සදෘශං ප්රියම් ॥ 12 ॥
ඒෂ සර්වස්වභූතේ පරිෂ්වංගෝ හනූමතඃ ।
මයා කාලමිමං ප්රාප්ය දත්තස්තස්ය මහාත්මනඃ ॥ 13 ॥
ඉත්යුක්ත්වා ප්රීතිහෘෂ්ටාංගෝ රාමස්තං පරිෂස්වජේ ।
හනූමංතං කෘතාත්මානං කෘතකාර්යමුපාගතම් ॥ 14 ॥
ධ්යාත්වා පුනරුවාචේදං වචනං රඝුනංදනඃ ।
හරීණාමීශ්වරස්යාපි සුග්රීවස්යෝපශෘණ්වතඃ ॥ 15 ॥
සර්වථා සුකෘතං තාවත්සීතායාඃ පරිමාර්ගණම් ।
සාගරං තු සමාසාද්ය පුනර්නෂ්ටං මනෝ මම ॥ 16 ॥
කථං නාම සමුද්රස්ය දුෂ්පාරස්ය මහාංභසඃ ।
හරයෝ දක්ෂිණං පාරං ගමිෂ්යංති සමාගතාඃ ॥ 17 ॥
යද්යප්යේෂ තු වෘත්තාංතෝ වෛදේහ්යා ගදිතෝ මම ।
සමුද්රපාරගමනේ හරීණාං කිමිහෝත්තරම් ॥ 18 ॥
ඉත්යුක්තවා ශෝකසංභ්රාංතෝ රාම ශ්ශත්රුනිබර්හණඃ ।
හනූමංතං මහාබාහුස්තතෝ ධ්යානමුපාගමත් ॥ 19 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ යුද්ධකාංඩේ ප්රථමස්සර්ගඃ ॥
