ଶ୍ରୀମଦ୍ଵାଲ୍ମୀକୀୟ ରାମାୟଣେ ୟୁଦ୍ଧକାଂଡମ୍ ।
ଅଥ ପ୍ରଥମସ୍ସର୍ଗଃ ।
ଶ୍ରୁତ୍ଵା ହନୁମତୋ ଵାକ୍ୟଂ ୟଥାଵଦଭିଭାଷିତମ୍ ।
ରାମଃ ପ୍ରୀତିସମାୟୁକ୍ତୋ ଵାକ୍ୟମୁତ୍ତରମବ୍ରଵୀତ୍ ॥ 1 ॥
କୃତଂ ହନୁମତା କାର୍ୟଂ ସୁମହଦ୍ଭୁଵି ଦୁର୍ଲଭମ୍ ।
ମନସାପି ୟଦନ୍ୟେନ ନ ଶକ୍ୟଂ ଧରଣୀତଲେ ॥ 2 ॥
ନ ହି ତଂ ପରିପଶ୍ୟାମି ୟସ୍ତରେତ ମହାର୍ଣଵମ୍ ।
ଅନ୍ୟତ୍ର ଗରୁଡାଦ୍ଵାୟୋରନ୍ୟତ୍ର ଚ ହନୂମତଃ ॥ 3 ॥
ଦେଵଦାନଵୟକ୍ଷାଣାଂ ଗଂଧର୍ଵୋରଗରକ୍ଷସାମ୍ ।
ଅପ୍ରଧୃଷ୍ୟାଂ ପୁରୀଂ ଲଂକାଂ ରାଵଣେନ ସୁରକ୍ଷିତାମ୍ ।
ପ୍ରଵଷ୍ଟ ସ୍ସତ୍ତ୍ଵମାଶ୍ରିତ୍ୟଶ୍ଵସନ୍କୋ ନାମ ନିଷ୍କ୍ରମେତ୍ ॥ 4 ॥
କୋ ଵିଶେତ୍ସୁଦୁରାଧର୍ଷାଂ ରାକ୍ଷସୈଶ୍ଚ ସୁରକ୍ଷିତାମ୍ ।
ୟୋ ଵୀର୍ୟବଲସଂପନ୍ନୋ ନ ସମସ୍ୟାଦ୍ଧନୂମତଃ ॥ 5 ॥
ଭୃତ୍ୟକାର୍ୟଂ ହନୁମତା ସୁଗ୍ରୀଵସ୍ୟ କୃତଂମହତ୍ ।
ସ୍ଵୟଂ ଵିଧାୟ ସ୍ଵବଲଂ ସଦୃଶଂ ଵିକ୍ରମସ୍ୟ ଚ ॥ 6 ॥
ୟୋ ହି ଭୃତ୍ୟୋ ନିୟୁକ୍ତସ୍ସନ୍ଭର୍ତ୍ରା କର୍ମଣି ଦୁଷ୍କରେ ।
କୁର୍ୟାତ୍ତଦନୁରାଗେଣ ତମାହୁଃ ପୁରୁଷୋତ୍ତମମ୍ ॥ 7 ॥
ନିୟୁକ୍ତୋୟଃ ପରଂ କାର୍ୟଂ ନ କୁର୍ୟାନ୍ନୃପତେଃ ପ୍ରିୟମ୍ ।
ଭୃତ୍ୟୋଽଭୃତ୍ୟସ୍ସମର୍ଥୋଽପି ତମାହୁର୍ମଧ୍ୟମଂ ନରମ୍ ॥ 8 ॥
ନିୟୁକ୍ତୋ ନୃପତେଃ କାର୍ୟଂ ନ କୁର୍ୟାଦ୍ୟସ୍ସମାହିତଃ ।
ଭୃତ୍ୟୋ ୟୁକ୍ତସ୍ସମର୍ଥଶ୍ଚ ତମାହୁଃ ପୁରୁଷାଧମମ୍ ॥ 9 ॥
ତନ୍ନିୟୋଗେ ନିୟୁକ୍ତେନ କୃତଂ କୃତ୍ୟଂ ହନୂମତା ।
ନ ଚାତ୍ମା ଲଘୁତାଂ ନୀତସ୍ସୁଗ୍ରୀଵଶ୍ଚାପି ତୋଷିତଃ ॥ 10 ॥
ଅହଂ ଚ ରଘୁଵଂଶଶ୍ଚ ଲକ୍ଷ୍ମଣଶ୍ଚ ମହାବଲଃ ।
ଵୈଦେହ୍ୟା ଦର୍ଶନେନାଦ୍ୟ ଧର୍ମତଃ ପରିରକ୍ଷିତାଃ ॥ 11 ॥
ଇଦଂ ତୁ ମମ ଦୀନସ୍ୟ ମନୋ ଭୂୟଃ ପ୍ରକର୍ଷତି ।
ୟଦିହାସ୍ୟ ପ୍ରିୟାଖ୍ୟାତୁର୍ନ କୁର୍ମି ସଦୃଶଂ ପ୍ରିୟମ୍ ॥ 12 ॥
ଏଷ ସର୍ଵସ୍ଵଭୂତେ ପରିଷ୍ଵଂଗୋ ହନୂମତଃ ।
ମୟା କାଲମିମଂ ପ୍ରାପ୍ୟ ଦତ୍ତସ୍ତସ୍ୟ ମହାତ୍ମନଃ ॥ 13 ॥
ଇତ୍ୟୁକ୍ତ୍ଵା ପ୍ରୀତିହୃଷ୍ଟାଂଗୋ ରାମସ୍ତଂ ପରିଷସ୍ଵଜେ ।
ହନୂମଂତଂ କୃତାତ୍ମାନଂ କୃତକାର୍ୟମୁପାଗତମ୍ ॥ 14 ॥
ଧ୍ୟାତ୍ଵା ପୁନରୁଵାଚେଦଂ ଵଚନଂ ରଘୁନଂଦନଃ ।
ହରୀଣାମୀଶ୍ଵରସ୍ୟାପି ସୁଗ୍ରୀଵସ୍ୟୋପଶୃଣ୍ଵତଃ ॥ 15 ॥
ସର୍ଵଥା ସୁକୃତଂ ତାଵତ୍ସୀତାୟାଃ ପରିମାର୍ଗଣମ୍ ।
ସାଗରଂ ତୁ ସମାସାଦ୍ୟ ପୁନର୍ନଷ୍ଟଂ ମନୋ ମମ ॥ 16 ॥
କଥଂ ନାମ ସମୁଦ୍ରସ୍ୟ ଦୁଷ୍ପାରସ୍ୟ ମହାଂଭସଃ ।
ହରୟୋ ଦକ୍ଷିଣଂ ପାରଂ ଗମିଷ୍ୟଂତି ସମାଗତାଃ ॥ 17 ॥
ୟଦ୍ୟପ୍ୟେଷ ତୁ ଵୃତ୍ତାଂତୋ ଵୈଦେହ୍ୟା ଗଦିତୋ ମମ ।
ସମୁଦ୍ରପାରଗମନେ ହରୀଣାଂ କିମିହୋତ୍ତରମ୍ ॥ 18 ॥
ଇତ୍ୟୁକ୍ତଵା ଶୋକସଂଭ୍ରାଂତୋ ରାମ ଶ୍ଶତ୍ରୁନିବର୍ହଣଃ ।
ହନୂମଂତଂ ମହାବାହୁସ୍ତତୋ ଧ୍ୟାନମୁପାଗମତ୍ ॥ 19 ॥
ଇତ୍ୟାର୍ଷେ ଶ୍ରୀମଦ୍ରାମାୟଣେ ଵାଲ୍ମୀକୀୟ ଆଦିକାଵ୍ୟେ ୟୁଦ୍ଧକାଂଡେ ପ୍ରଥମସ୍ସର୍ଗଃ ॥
