ശ്രീമദ്വാല്മീകീയ രാമായണേ യുദ്ധകാംഡമ് ।
അഥ പ്രഥമസ്സര്ഗഃ ।
ശ്രുത്വാ ഹനുമതോ വാക്യം യഥാവദഭിഭാഷിതമ് ।
രാമഃ പ്രീതിസമായുക്തോ വാക്യമുത്തരമബ്രവീത് ॥ 1 ॥
കൃതം ഹനുമതാ കാര്യം സുമഹദ്ഭുവി ദുര്ലഭമ് ।
മനസാപി യദന്യേന ന ശക്യം ധരണീതലേ ॥ 2 ॥
ന ഹി തം പരിപശ്യാമി യസ്തരേത മഹാര്ണവമ് ।
അന്യത്ര ഗരുഡാദ്വായോരന്യത്ര ച ഹനൂമതഃ ॥ 3 ॥
ദേവദാനവയക്ഷാണാം ഗംധർവോരഗരക്ഷസാമ് ।
അപ്രധൃഷ്യാം പുരീം ലംകാം രാവണേന സുരക്ഷിതാമ് ।
പ്രവഷ്ട സ്സത്ത്വമാശ്രിത്യശ്വസന്കോ നാമ നിഷ്ക്രമേത് ॥ 4 ॥
കോ വിശേത്സുദുരാധര്ഷാം രാക്ഷസൈശ്ച സുരക്ഷിതാമ് ।
യോ വീര്യബലസംപന്നോ ന സമസ്യാദ്ധനൂമതഃ ॥ 5 ॥
ഭൃത്യകാര്യം ഹനുമതാ സുഗ്രീവസ്യ കൃതംമഹത് ।
സ്വയം വിധായ സ്വബലം സദൃശം വിക്രമസ്യ ച ॥ 6 ॥
യോ ഹി ഭൃത്യോ നിയുക്തസ്സന്ഭര്ത്രാ കര്മണി ദുഷ്കരേ ।
കുര്യാത്തദനുരാഗേണ തമാഹുഃ പുരുഷോത്തമമ് ॥ 7 ॥
നിയുക്തോയഃ പരം കാര്യം ന കുര്യാന്നൃപതേഃ പ്രിയമ് ।
ഭൃത്യോഽഭൃത്യസ്സമര്ഥോഽപി തമാഹുര്മധ്യമം നരമ് ॥ 8 ॥
നിയുക്തോ നൃപതേഃ കാര്യം ന കുര്യാദ്യസ്സമാഹിതഃ ।
ഭൃത്യോ യുക്തസ്സമര്ഥശ്ച തമാഹുഃ പുരുഷാധമമ് ॥ 9 ॥
തന്നിയോഗേ നിയുക്തേന കൃതം കൃത്യം ഹനൂമതാ ।
ന ചാത്മാ ലഘുതാം നീതസ്സുഗ്രീവശ്ചാപി തോഷിതഃ ॥ 10 ॥
അഹം ച രഘുവംശശ്ച ലക്ഷ്മണശ്ച മഹാബലഃ ।
വൈദേഹ്യാ ദര്ശനേനാദ്യ ധര്മതഃ പരിരക്ഷിതാഃ ॥ 11 ॥
ഇദം തു മമ ദീനസ്യ മനോ ഭൂയഃ പ്രകര്ഷതി ।
യദിഹാസ്യ പ്രിയാഖ്യാതുര്ന കുര്മി സദൃശം പ്രിയമ് ॥ 12 ॥
ഏഷ സർവസ്വഭൂതേ പരിഷ്വംഗോ ഹനൂമതഃ ।
മയാ കാലമിമം പ്രാപ്യ ദത്തസ്തസ്യ മഹാത്മനഃ ॥ 13 ॥
ഇത്യുക്ത്വാ പ്രീതിഹൃഷ്ടാംഗോ രാമസ്തം പരിഷസ്വജേ ।
ഹനൂമംതം കൃതാത്മാനം കൃതകാര്യമുപാഗതമ് ॥ 14 ॥
ധ്യാത്വാ പുനരുവാചേദം വചനം രഘുനംദനഃ ।
ഹരീണാമീശ്വരസ്യാപി സുഗ്രീവസ്യോപശൃണ്വതഃ ॥ 15 ॥
സർവഥാ സുകൃതം താവത്സീതായാഃ പരിമാര്ഗണമ് ।
സാഗരം തു സമാസാദ്യ പുനര്നഷ്ടം മനോ മമ ॥ 16 ॥
കഥം നാമ സമുദ്രസ്യ ദുഷ്പാരസ്യ മഹാംഭസഃ ।
ഹരയോ ദക്ഷിണം പാരം ഗമിഷ്യംതി സമാഗതാഃ ॥ 17 ॥
യദ്യപ്യേഷ തു വൃത്താംതോ വൈദേഹ്യാ ഗദിതോ മമ ।
സമുദ്രപാരഗമനേ ഹരീണാം കിമിഹോത്തരമ് ॥ 18 ॥
ഇത്യുക്തവാ ശോകസംഭ്രാംതോ രാമ ശ്ശത്രുനിബര്ഹണഃ ।
ഹനൂമംതം മഹാബാഹുസ്തതോ ധ്യാനമുപാഗമത് ॥ 19 ॥
ഇത്യാര്ഷേ ശ്രീമദ്രാമായണേ വാല്മീകീയ ആദികാവ്യേ യുദ്ധകാംഡേ പ്രഥമസ്സര്ഗഃ ॥
