śrīmadvālmīkīya rāmāyaṇē yuddhakāṇḍam ।
atha prathamassargaḥ ।
śrutvā hanumatō vākyaṃ yathāvadabhibhāṣitam ।
rāmaḥ prītisamāyuktō vākyamuttaramabravīt ॥ 1 ॥
kṛtaṃ hanumatā kāryaṃ sumahadbhuvi durlabham ।
manasāpi yadanyēna na śakyaṃ dharaṇītalē ॥ 2 ॥
na hi taṃ paripaśyāmi yastarēta mahārṇavam ।
anyatra garuḍādvāyōranyatra cha hanūmataḥ ॥ 3 ॥
dēvadānavayakṣāṇāṃ gandharvōragarakṣasām ।
apradhṛṣyāṃ purīṃ laṅkāṃ rāvaṇēna surakṣitām ।
pravaṣṭa ssattvamāśrityaśvasankō nāma niṣkramēt ॥ 4 ॥
kō viśētsudurādharṣāṃ rākṣasaiścha surakṣitām ।
yō vīryabalasampannō na samasyāddhanūmataḥ ॥ 5 ॥
bhṛtyakāryaṃ hanumatā sugrīvasya kṛtammahat ।
svayaṃ vidhāya svabalaṃ sadṛśaṃ vikramasya cha ॥ 6 ॥
yō hi bhṛtyō niyuktassanbhartrā karmaṇi duṣkarē ।
kuryāttadanurāgēṇa tamāhuḥ puruṣōttamam ॥ 7 ॥
niyuktōyaḥ paraṃ kāryaṃ na kuryānnṛpatēḥ priyam ।
bhṛtyō'bhṛtyassamarthō'pi tamāhurmadhyamaṃ naram ॥ 8 ॥
niyuktō nṛpatēḥ kāryaṃ na kuryādyassamāhitaḥ ।
bhṛtyō yuktassamarthaścha tamāhuḥ puruṣādhamam ॥ 9 ॥
tanniyōgē niyuktēna kṛtaṃ kṛtyaṃ hanūmatā ।
na chātmā laghutāṃ nītassugrīvaśchāpi tōṣitaḥ ॥ 10 ॥
ahaṃ cha raghuvaṃśaścha lakṣmaṇaścha mahābalaḥ ।
vaidēhyā darśanēnādya dharmataḥ parirakṣitāḥ ॥ 11 ॥
idaṃ tu mama dīnasya manō bhūyaḥ prakarṣati ।
yadihāsya priyākhyāturna kurmi sadṛśaṃ priyam ॥ 12 ॥
ēṣa sarvasvabhūtē pariṣvaṅgō hanūmataḥ ।
mayā kālamimaṃ prāpya dattastasya mahātmanaḥ ॥ 13 ॥
ityuktvā prītihṛṣṭāṅgō rāmastaṃ pariṣasvajē ।
hanūmantaṃ kṛtātmānaṃ kṛtakāryamupāgatam ॥ 14 ॥
dhyātvā punaruvāchēdaṃ vachanaṃ raghunandanaḥ ।
harīṇāmīśvarasyāpi sugrīvasyōpaśṛṇvataḥ ॥ 15 ॥
sarvathā sukṛtaṃ tāvatsītāyāḥ parimārgaṇam ।
sāgaraṃ tu samāsādya punarnaṣṭaṃ manō mama ॥ 16 ॥
kathaṃ nāma samudrasya duṣpārasya mahāmbhasaḥ ।
harayō dakṣiṇaṃ pāraṃ gamiṣyanti samāgatāḥ ॥ 17 ॥
yadyapyēṣa tu vṛttāntō vaidēhyā gaditō mama ।
samudrapāragamanē harīṇāṃ kimihōttaram ॥ 18 ॥
ityuktavā śōkasambhrāntō rāma śśatrunibarhaṇaḥ ।
hanūmantaṃ mahābāhustatō dhyānamupāgamat ॥ 19 ॥
ityārṣē śrīmadrāmāyaṇē vālmīkīya ādikāvyē yuddhakāṇḍē prathamassargaḥ ॥
