𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌯𑍁𑌦𑍍𑌧𑌕𑌾𑌂𑌡𑌮𑍍 ।
𑌅𑌥 𑌪𑍍𑌰𑌥𑌮𑌸𑍍𑌸𑌰𑍍𑌗𑌃 ।
𑌶𑍍𑌰𑍁𑌤𑍍𑌵𑌾 𑌹𑌨𑍁𑌮𑌤𑍋 𑌵𑌾𑌕𑍍𑌯𑌂 𑌯𑌥𑌾𑌵𑌦𑌭𑌿𑌭𑌾𑌷𑌿𑌤𑌮𑍍 ।
𑌰𑌾𑌮𑌃 𑌪𑍍𑌰𑍀𑌤𑌿𑌸𑌮𑌾𑌯𑍁𑌕𑍍𑌤𑍋 𑌵𑌾𑌕𑍍𑌯𑌮𑍁𑌤𑍍𑌤𑌰𑌮𑌬𑍍𑌰𑌵𑍀𑌤𑍍 ॥ 1 ॥
𑌕𑍃𑌤𑌂 𑌹𑌨𑍁𑌮𑌤𑌾 𑌕𑌾𑌰𑍍𑌯𑌂 𑌸𑍁𑌮𑌹𑌦𑍍𑌭𑍁𑌵𑌿 𑌦𑍁𑌰𑍍𑌲𑌭𑌮𑍍 ।
𑌮𑌨𑌸𑌾𑌪𑌿 𑌯𑌦𑌨𑍍𑌯𑍇𑌨 𑌨 𑌶𑌕𑍍𑌯𑌂 𑌧𑌰𑌣𑍀𑌤𑌲𑍇 ॥ 2 ॥
𑌨 𑌹𑌿 𑌤𑌂 𑌪𑌰𑌿𑌪𑌶𑍍𑌯𑌾𑌮𑌿 𑌯𑌸𑍍𑌤𑌰𑍇𑌤 𑌮𑌹𑌾𑌰𑍍𑌣𑌵𑌮𑍍 ।
𑌅𑌨𑍍𑌯𑌤𑍍𑌰 𑌗𑌰𑍁𑌡𑌾𑌦𑍍𑌵𑌾𑌯𑍋𑌰𑌨𑍍𑌯𑌤𑍍𑌰 𑌚 𑌹𑌨𑍂𑌮𑌤𑌃 ॥ 3 ॥
𑌦𑍇𑌵𑌦𑌾𑌨𑌵𑌯𑌕𑍍𑌷𑌾𑌣𑌾𑌂 𑌗𑌂𑌧𑌰𑍍𑌵𑍋𑌰𑌗𑌰𑌕𑍍𑌷𑌸𑌾𑌮𑍍 ।
𑌅𑌪𑍍𑌰𑌧𑍃𑌷𑍍𑌯𑌾𑌂 𑌪𑍁𑌰𑍀𑌂 𑌲𑌂𑌕𑌾𑌂 𑌰𑌾𑌵𑌣𑍇𑌨 𑌸𑍁𑌰𑌕𑍍𑌷𑌿𑌤𑌾𑌮𑍍 ।
𑌪𑍍𑌰𑌵𑌷𑍍𑌟 𑌸𑍍𑌸𑌤𑍍𑌤𑍍𑌵𑌮𑌾𑌶𑍍𑌰𑌿𑌤𑍍𑌯𑌶𑍍𑌵𑌸𑌨𑍍𑌕𑍋 𑌨𑌾𑌮 𑌨𑌿𑌷𑍍𑌕𑍍𑌰𑌮𑍇𑌤𑍍 ॥ 4 ॥
𑌕𑍋 𑌵𑌿𑌶𑍇𑌤𑍍𑌸𑍁𑌦𑍁𑌰𑌾𑌧𑌰𑍍𑌷𑌾𑌂 𑌰𑌾𑌕𑍍𑌷𑌸𑍈𑌶𑍍𑌚 𑌸𑍁𑌰𑌕𑍍𑌷𑌿𑌤𑌾𑌮𑍍 ।
𑌯𑍋 𑌵𑍀𑌰𑍍𑌯𑌬𑌲𑌸𑌂𑌪𑌨𑍍𑌨𑍋 𑌨 𑌸𑌮𑌸𑍍𑌯𑌾𑌦𑍍𑌧𑌨𑍂𑌮𑌤𑌃 ॥ 5 ॥
𑌭𑍃𑌤𑍍𑌯𑌕𑌾𑌰𑍍𑌯𑌂 𑌹𑌨𑍁𑌮𑌤𑌾 𑌸𑍁𑌗𑍍𑌰𑍀𑌵𑌸𑍍𑌯 𑌕𑍃𑌤𑌂𑌮𑌹𑌤𑍍 ।
𑌸𑍍𑌵𑌯𑌂 𑌵𑌿𑌧𑌾𑌯 𑌸𑍍𑌵𑌬𑌲𑌂 𑌸𑌦𑍃𑌶𑌂 𑌵𑌿𑌕𑍍𑌰𑌮𑌸𑍍𑌯 𑌚 ॥ 6 ॥
𑌯𑍋 𑌹𑌿 𑌭𑍃𑌤𑍍𑌯𑍋 𑌨𑌿𑌯𑍁𑌕𑍍𑌤𑌸𑍍𑌸𑌨𑍍𑌭𑌰𑍍𑌤𑍍𑌰𑌾 𑌕𑌰𑍍𑌮𑌣𑌿 𑌦𑍁𑌷𑍍𑌕𑌰𑍇 ।
𑌕𑍁𑌰𑍍𑌯𑌾𑌤𑍍𑌤𑌦𑌨𑍁𑌰𑌾𑌗𑍇𑌣 𑌤𑌮𑌾𑌹𑍁𑌃 𑌪𑍁𑌰𑍁𑌷𑍋𑌤𑍍𑌤𑌮𑌮𑍍 ॥ ॥
𑌨𑌿𑌯𑍁𑌕𑍍𑌤𑍋𑌯𑌃 𑌪𑌰𑌂 𑌕𑌾𑌰𑍍𑌯𑌂 𑌨 𑌕𑍁𑌰𑍍𑌯𑌾𑌨𑍍𑌨𑍃𑌪𑌤𑍇𑌃 𑌪𑍍𑌰𑌿𑌯𑌮𑍍 ।
𑌭𑍃𑌤𑍍𑌯𑍋𑌽𑌭𑍃𑌤𑍍𑌯𑌸𑍍𑌸𑌮𑌰𑍍𑌥𑍋𑌽𑌪𑌿 𑌤𑌮𑌾𑌹𑍁𑌰𑍍𑌮𑌧𑍍𑌯𑌮𑌂 𑌨𑌰𑌮𑍍 ॥ ॥
𑌨𑌿𑌯𑍁𑌕𑍍𑌤𑍋 𑌨𑍃𑌪𑌤𑍇𑌃 𑌕𑌾𑌰𑍍𑌯𑌂 𑌨 𑌕𑍁𑌰𑍍𑌯𑌾𑌦𑍍𑌯𑌸𑍍𑌸𑌮𑌾𑌹𑌿𑌤𑌃 ।
𑌭𑍃𑌤𑍍𑌯𑍋 𑌯𑍁𑌕𑍍𑌤𑌸𑍍𑌸𑌮𑌰𑍍𑌥𑌶𑍍𑌚 𑌤𑌮𑌾𑌹𑍁𑌃 𑌪𑍁𑌰𑍁𑌷𑌾𑌧𑌮𑌮𑍍 ॥ ॥
𑌤𑌨𑍍𑌨𑌿𑌯𑍋𑌗𑍇 𑌨𑌿𑌯𑍁𑌕𑍍𑌤𑍇𑌨 𑌕𑍃𑌤𑌂 𑌕𑍃𑌤𑍍𑌯𑌂 𑌹𑌨𑍂𑌮𑌤𑌾 ।
𑌨 𑌚𑌾𑌤𑍍𑌮𑌾 𑌲𑌘𑍁𑌤𑌾𑌂 𑌨𑍀𑌤𑌸𑍍𑌸𑍁𑌗𑍍𑌰𑍀𑌵𑌶𑍍𑌚𑌾𑌪𑌿 𑌤𑍋𑌷𑌿𑌤𑌃 ॥ 10 ॥
𑌅𑌹𑌂 𑌚 𑌰𑌘𑍁𑌵𑌂𑌶𑌶𑍍𑌚 𑌲𑌕𑍍𑌷𑍍𑌮𑌣𑌶𑍍𑌚 𑌮𑌹𑌾𑌬𑌲𑌃 ।
𑌵𑍈𑌦𑍇𑌹𑍍𑌯𑌾 𑌦𑌰𑍍𑌶𑌨𑍇𑌨𑌾𑌦𑍍𑌯 𑌧𑌰𑍍𑌮𑌤𑌃 𑌪𑌰𑌿𑌰𑌕𑍍𑌷𑌿𑌤𑌾𑌃 ॥ 11 ॥
𑌇𑌦𑌂 𑌤𑍁 𑌮𑌮 𑌦𑍀𑌨𑌸𑍍𑌯 𑌮𑌨𑍋 𑌭𑍂𑌯𑌃 𑌪𑍍𑌰𑌕𑌰𑍍𑌷𑌤𑌿 ।
𑌯𑌦𑌿𑌹𑌾𑌸𑍍𑌯 𑌪𑍍𑌰𑌿𑌯𑌾𑌖𑍍𑌯𑌾𑌤𑍁𑌰𑍍𑌨 𑌕𑍁𑌰𑍍𑌮𑌿 𑌸𑌦𑍃𑌶𑌂 𑌪𑍍𑌰𑌿𑌯𑌮𑍍 ॥ 12 ॥
𑌏𑌷 𑌸𑌰𑍍𑌵𑌸𑍍𑌵𑌭𑍂𑌤𑍇 𑌪𑌰𑌿𑌷𑍍𑌵𑌂𑌗𑍋 𑌹𑌨𑍂𑌮𑌤𑌃 ।
𑌮𑌯𑌾 𑌕𑌾𑌲𑌮𑌿𑌮𑌂 𑌪𑍍𑌰𑌾𑌪𑍍𑌯 𑌦𑌤𑍍𑌤𑌸𑍍𑌤𑌸𑍍𑌯 𑌮𑌹𑌾𑌤𑍍𑌮𑌨𑌃 ॥ 13 ॥
𑌇𑌤𑍍𑌯𑍁𑌕𑍍𑌤𑍍𑌵𑌾 𑌪𑍍𑌰𑍀𑌤𑌿𑌹𑍃𑌷𑍍𑌟𑌾𑌂𑌗𑍋 𑌰𑌾𑌮𑌸𑍍𑌤𑌂 𑌪𑌰𑌿𑌷𑌸𑍍𑌵𑌜𑍇 ।
𑌹𑌨𑍂𑌮𑌂𑌤𑌂 𑌕𑍃𑌤𑌾𑌤𑍍𑌮𑌾𑌨𑌂 𑌕𑍃𑌤𑌕𑌾𑌰𑍍𑌯𑌮𑍁𑌪𑌾𑌗𑌤𑌮𑍍 ॥ 14 ॥
𑌧𑍍𑌯𑌾𑌤𑍍𑌵𑌾 𑌪𑍁𑌨𑌰𑍁𑌵𑌾𑌚𑍇𑌦𑌂 𑌵𑌚𑌨𑌂 𑌰𑌘𑍁𑌨𑌂𑌦𑌨𑌃 ।
𑌹𑌰𑍀𑌣𑌾𑌮𑍀𑌶𑍍𑌵𑌰𑌸𑍍𑌯𑌾𑌪𑌿 𑌸𑍁𑌗𑍍𑌰𑍀𑌵𑌸𑍍𑌯𑍋𑌪𑌶𑍃𑌣𑍍𑌵𑌤𑌃 ॥ 15 ॥
𑌸𑌰𑍍𑌵𑌥𑌾 𑌸𑍁𑌕𑍃𑌤𑌂 𑌤𑌾𑌵𑌤𑍍𑌸𑍀𑌤𑌾𑌯𑌾𑌃 𑌪𑌰𑌿𑌮𑌾𑌰𑍍𑌗𑌣𑌮𑍍 ।
𑌸𑌾𑌗𑌰𑌂 𑌤𑍁 𑌸𑌮𑌾𑌸𑌾𑌦𑍍𑌯 𑌪𑍁𑌨𑌰𑍍𑌨𑌷𑍍𑌟𑌂 𑌮𑌨𑍋 𑌮𑌮 ॥ 16 ॥
𑌕𑌥𑌂 𑌨𑌾𑌮 𑌸𑌮𑍁𑌦𑍍𑌰𑌸𑍍𑌯 𑌦𑍁𑌷𑍍𑌪𑌾𑌰𑌸𑍍𑌯 𑌮𑌹𑌾𑌂𑌭𑌸𑌃 ।
𑌹𑌰𑌯𑍋 𑌦𑌕𑍍𑌷𑌿𑌣𑌂 𑌪𑌾𑌰𑌂 𑌗𑌮𑌿𑌷𑍍𑌯𑌂𑌤𑌿 𑌸𑌮𑌾𑌗𑌤𑌾𑌃 ॥ 1 ॥
𑌯𑌦𑍍𑌯𑌪𑍍𑌯𑍇𑌷 𑌤𑍁 𑌵𑍃𑌤𑍍𑌤𑌾𑌂𑌤𑍋 𑌵𑍈𑌦𑍇𑌹𑍍𑌯𑌾 𑌗𑌦𑌿𑌤𑍋 𑌮𑌮 ।
𑌸𑌮𑍁𑌦𑍍𑌰𑌪𑌾𑌰𑌗𑌮𑌨𑍇 𑌹𑌰𑍀𑌣𑌾𑌂 𑌕𑌿𑌮𑌿𑌹𑍋𑌤𑍍𑌤𑌰𑌮𑍍 ॥ 1 ॥
𑌇𑌤𑍍𑌯𑍁𑌕𑍍𑌤𑌵𑌾 𑌶𑍋𑌕𑌸𑌂𑌭𑍍𑌰𑌾𑌂𑌤𑍋 𑌰𑌾𑌮 𑌶𑍍𑌶𑌤𑍍𑌰𑍁𑌨𑌿𑌬𑌰𑍍𑌹𑌣𑌃 ।
𑌹𑌨𑍂𑌮𑌂𑌤𑌂 𑌮𑌹𑌾𑌬𑌾𑌹𑍁𑌸𑍍𑌤𑌤𑍋 𑌧𑍍𑌯𑌾𑌨𑌮𑍁𑌪𑌾𑌗𑌮𑌤𑍍 ॥ 1 ॥
𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌯𑍁𑌦𑍍𑌧𑌕𑌾𑌂𑌡𑍇 𑌪𑍍𑌰𑌥𑌮𑌸𑍍𑌸𑌰𑍍𑌗𑌃 ॥
