ശ്രീമദ്വാല്മീകീയ രാമായണേ ബാലകാംഡമ് ।
അഥ തൃതീയസ്സര്ഗഃ ।
ശ്രുത്വാ വസ്തു സമഗ്രം തദ്ധര്മാത്മാ ധര്മസംഹിതമ് ।
വ്യക്തമന്വേഷതേ ഭൂയോ യദ്വൃത്തം തസ്യ ധീമതഃ ॥ 1 ॥
ഉപസ്പൃശ്യോദകം സമ്യഗ്മുനിസ്സ്ഥിത്വാ കൃതാംജലിഃ ।
പ്രാചീനാഗ്രേഷു ദര്ഭേഷു ധര്മേണാന്വേഷതേ ഗതിമ് ॥ 2 ॥
രാമലക്ഷ്മണസീതാഭീ രാജ്ഞാ ദശരഥേന ച ।
സഭാര്യേണ സരാഷ്ട്രേണ യത്പ്രാപ്തം തത്ര തത്ത്വതഃ ॥ 3 ॥
ഹസിതം ഭാഷിതം ചൈവ ഗതിര്യാ യച്ച ചേഷ്ടിതമ് ।
തത്സർവം ധര്മവീര്യേണ യഥാവത്സംപ്രപശ്യതി ॥ 4 ॥
സ്ത്രീതൃതീയേന ച തദാ യത്പ്രാപ്തം ചരതാ വനേ ।
സത്യസംധേന രാമേണ തത്സർവം ചാന്വവേക്ഷിതമ് ॥ 5 ॥
തതഃ പശ്യതി ധര്മാത്മാ തത്സർവം യോഗമാസ്ഥിതഃ ।
പുരാ യത്തത്ര നിർവൃത്തം പാണാവാമലകം യഥാ ॥ 6 ॥
തത്സർവം തത്ത്വതോ ദൃഷ്ട്വാ ധര്മേണ സ മഹാദ്യുതിഃ ।
അഭിരാമസ്യ രാമസ്യ ചരിതം കര്തുമുദ്യതഃ ॥ 7 ॥
കാമാര്ഥഗുണസംയുക്തം ധര്മാര്ഥഗുണവിസ്തരമ് ।
സമുദ്രമിവ രത്നാഢ്യം സർവശ്രുതിമനോഹരമ് ॥ 8 ॥
സ യഥാ കഥിതം പൂർവം നാരദേന മഹര്ഷിണാ ।
രഘുവംശസ്യ ചരിതം ചകാര ഭഗവാനൃഷിഃ ॥ 9 ॥
ജന്മ രാമസ്യ സുമഹദ്വീര്യം സർവാനുകൂലതാമ് ।
ലോകസ്യ പ്രിയതാം ക്ഷാംതിം സൌമ്യതാം സത്യശീലതാമ് ॥ 10 ॥
നാനാചിത്രകഥാശ്ചാന്യാ വിശ്വാമിത്രസമാഗമേ ।
ജാനക്യാശ്ച വിവാഹം ച ധനുഷശ്ച വിഭേദനമ് ॥ 11 ॥
രാമരാമവിവാദം ച ഗുണാംദാശരഥേസ്തഥാ ।
തഥാഽഭിഷേകം രാമസ്യ കൈകേയ്യാ ദുഷ്ടഭാവതാമ് ॥ 12 ॥
വിഘാതം ചാഭിഷേകസ്യ രാഘവസ്യ വിവാസനമ് ।
രാജ്ഞശ്ശോകവിലാപം ച പരലോകസ്യ ചാശ്രയമ് ॥ 13 ॥
പ്രകൃതീനാം വിഷാദം ച പ്രകൃതീനാം വിസര്ജനമ് ।
നിഷാദാധിപസംവാദം സൂതോപാവര്തനം തഥാ ॥ 14 ॥
ഗംഗായാശ്ചാപി സംതാരം ഭരദ്വാജസ്യ ദര്ശനമ് ।
ഭരദ്വാജാഭ്യനുജ്ഞാനാച്ചിത്രകൂടസ്യ ദര്ശനമ് ॥ 15 ॥
വാസ്തുകര്മ നിവേശം ച ഭരതാഗമനം തഥാ ।
പ്രസാദനം ച രാമസ്യ പിതുശ്ച സലിലക്രിയാമ് ॥ 16 ॥
പാദുകാഗ്ര്യാഭിഷേകം ച നംദിഗ്രാമനിവാസനമ് ।
ദംഡകാരണ്യഗമനം വിരാധസ്യ വധം തഥാ ॥ 17 ॥
ദര്ശനം ശരഭംഗസ്യ സുതീക്ഷ്ണേന സമാഗമമ് ।
അനസൂയാസഹാസ്യാമപ്യംഗരാഗസ്യ ചാര്പണമ് ॥ 18 ॥
അഗസ്ത്യദര്ശനം ചൈവ ജടായോരഭിസംഗമമ് ।
പംചവട്യാശ്ച ഗമനം ശൂര്പണഖ്യാശ്ച ദര്ശനമ് ॥ 19 ॥
ശൂര്പണഖ്യാശ്ച സംവാദം വിരൂപകരണം തഥാ ।
വധം ഖരത്രിശിരസോരുത്ഥാനം രാവണസ്യ ച ॥ 20 ॥
മാരീചസ്യ വധം ചൈവ വൈദേഹ്യാ ഹരണം തഥാ ।
രാഘവസ്യ വിലാപം ച ഗൃധ്രരാജനിബര്ഹണമ് ॥ 21 ॥
കബംധദര്ശനം ചാപി പംപായാശ്ചാപി ദര്ശനമ് ।
ശബര്യാഃ ദര്ശനം ചൈവ ഹനൂമദ്ദര്ശനം തഥാ ॥ 22 ॥
ഋശ്യമൂകസ്യ ഗമനം സുഗ്രീവേണ സമാഗമമ് ।
പ്രത്യയോത്പാദനം സഖ്യം വാലിസുഗ്രീവവിഗ്രഹമ് ॥ 23 ॥
വാലിപ്രമഥനം ചൈവ സുഗ്രീവപ്രതിപാദനമ് ।
താരാവിലാപം സമയം വര്ഷരാത്രനിവാസനമ് ॥ 24 ॥
കോപം രാഘവസിംഹസ്യ ബലാനാമുപസംഗ്രഹമ് ।
ദിശഃ പ്രസ്ഥാപനം ചൈവ പൃഥിവ്യാശ്ച നിവേദനമ് ॥ 25 ॥
അംഗുലീയകദാനം ച ഋക്ഷസ്യ ബിലദര്ശനമ് ।
പ്രായോപവേശനം ചാപി സംപാതേശ്ചാപി ദര്ശനമ് ॥ 26 ॥
പർവതാരോഹണം ചാപി സാഗരസ്യാപി ലംഘനമ് ।
സമുദ്രവചനാച്ചൈവ മൈനാകസ്യ ച ദര്ശനമ് ॥ 27 ॥
സിംഹികായാശ്ച നിധനം ലംകാമലയദര്ശനമ് ।
രാത്രൌ ലംകാപ്രവേശം ച ഏകസ്യാഥ വിചിംതനമ് ॥ 28 ॥
ദര്ശനം രാവണസ്യാപി പുഷ്പകസ്യ ച ദര്ശനമ് ।
ആപാനഭൂമിഗമനമവരോധസ്യ ദര്ശനമ് ॥ 29 ॥
അശോകവനികായാനം സീതായാശ്ചപി ദര്ശനമ് ।
അഭിജ്ഞാനപ്രദാനം ച രാവണസ്യ ച ദര്ശനമ് ॥ 30 ॥
രാക്ഷസീതര്ജനം ചൈവ ത്രിജടാസ്വപ്നദര്ശനമ് ।
മണിപ്രദാനം സീതായാ വൃക്ഷഭംഗം തഥൈവ ച ॥ 31 ॥
രാക്ഷസീവിദ്രവം ചൈവ കിംകരാണാം നിബര്ഹണമ് ।
ഗ്രഹണം വായുസൂനോശ്ച ലംകാദാഹാഭിഗര്ജനമ് ॥ 32 ॥
പ്രതിപ്ലവനമേവാഥ മധൂനാം ഹരണം തഥാ ।
രാഘവാശ്വാസനം ചാപി മണിനിര്യാതനം തഥാ ॥ 33 ॥
സംഗമം ച സമുദ്രേണ നലസേതോശ്ച ബംധനമ് ।
പ്രതാരം ച സമുദ്രസ്യ രാത്രൌ ലംകാവരോധനമ് ॥ 34 ॥
വിഭീഷണേന സംസര്ഗം വധോപായനിവേദനമ് ।
കുംഭകര്ണസ്യ നിധനം മേഘനാദനിബര്ഹണമ് ॥ 35 ॥
രാവണസ്യ വിനാശം ച സീതാവാപ്തിമരേഃ പുരേ ।
വിഭീഷണാഭിഷേകം ച പുഷ്പകസ്യ ച ദര്ശനമ് ॥ 36 ॥
അയോധ്യായാശ്ച ഗമനം ഭരതേന സമാഗമമ് ।
രാമാഭിഷേകാഭ്യുദയം സർവസൈന്യവിസര്ജനമ് ।
സ്വരാഷ്ട്രരംജനം ചൈവ വൈദേഹ്യാശ്ച വിസര്ജനമ് ॥ 37 ॥
അനാഗതം ച യത്കിംചിദ്രാമസ്യ വസുധാതലേ ।
തച്ചകാരോത്തരേ കാവ്യേ വാല്മീകിര്ഭഗവാനൃഷിഃ ॥ 38 ॥
ഇത്യാര്ഷേ ശ്രീമദ്രാമായണേ വാല്മീകീയ ആദികാവ്യേ ബാലകാംഡേ തൃതീയസ്സര്ഗഃ ॥
