ශ්රීමද්වාල්මීකීය රාමායණේ බාලකාංඩම් ।
අථ තෘතීයස්සර්ගඃ ।
ශ්රුත්වා වස්තු සමග්රං තද්ධර්මාත්මා ධර්මසංහිතම් ।
ව්යක්තමන්වේෂතේ භූයෝ යද්වෘත්තං තස්ය ධීමතඃ ॥ 1 ॥
උපස්පෘශ්යෝදකං සම්යග්මුනිස්ස්ථිත්වා කෘතාංජලිඃ ।
ප්රාචීනාග්රේෂු දර්භේෂු ධර්මේණාන්වේෂතේ ගතිම් ॥ 2 ॥
රාමලක්ෂ්මණසීතාභී රාජ්ඤා දශරථේන ච ।
සභාර්යේණ සරාෂ්ට්රේණ යත්ප්රාප්තං තත්ර තත්ත්වතඃ ॥ 3 ॥
හසිතං භාෂිතං චෛව ගතිර්යා යච්ච චේෂ්ටිතම් ।
තත්සර්වං ධර්මවීර්යේණ යථාවත්සංප්රපශ්යති ॥ 4 ॥
ස්ත්රීතෘතීයේන ච තදා යත්ප්රාප්තං චරතා වනේ ।
සත්යසංධේන රාමේණ තත්සර්වං චාන්වවේක්ෂිතම් ॥ 5 ॥
තතඃ පශ්යති ධර්මාත්මා තත්සර්වං යෝගමාස්ථිතඃ ।
පුරා යත්තත්ර නිර්වෘත්තං පාණාවාමලකං යථා ॥ 6 ॥
තත්සර්වං තත්ත්වතෝ දෘෂ්ට්වා ධර්මේණ ස මහාද්යුතිඃ ।
අභිරාමස්ය රාමස්ය චරිතං කර්තුමුද්යතඃ ॥ 7 ॥
කාමාර්ථගුණසංයුක්තං ධර්මාර්ථගුණවිස්තරම් ।
සමුද්රමිව රත්නාඪ්යං සර්වශ්රුතිමනෝහරම් ॥ 8 ॥
ස යථා කථිතං පූර්වං නාරදේන මහර්ෂිණා ।
රඝුවංශස්ය චරිතං චකාර භගවානෘෂිඃ ॥ 9 ॥
ජන්ම රාමස්ය සුමහද්වීර්යං සර්වානුකූලතාම් ।
ලෝකස්ය ප්රියතාං ක්ෂාංතිං සෞම්යතාං සත්යශීලතාම් ॥ 10 ॥
නානාචිත්රකථාශ්චාන්යා විශ්වාමිත්රසමාගමේ ।
ජානක්යාශ්ච විවාහං ච ධනුෂශ්ච විභේදනම් ॥ 11 ॥
රාමරාමවිවාදං ච ගුණාංදාශරථේස්තථා ।
තථාऽභිෂේකං රාමස්ය කෛකේය්යා දුෂ්ටභාවතාම් ॥ 12 ॥
විඝාතං චාභිෂේකස්ය රාඝවස්ය විවාසනම් ।
රාජ්ඤශ්ශෝකවිලාපං ච පරලෝකස්ය චාශ්රයම් ॥ 13 ॥
ප්රකෘතීනාං විෂාදං ච ප්රකෘතීනාං විසර්ජනම් ।
නිෂාදාධිපසංවාදං සූතෝපාවර්තනං තථා ॥ 14 ॥
ගංගායාශ්චාපි සංතාරං භරද්වාජස්ය දර්ශනම් ।
භරද්වාජාභ්යනුජ්ඤානාච්චිත්රකූටස්ය දර්ශනම් ॥ 15 ॥
වාස්තුකර්ම නිවේශං ච භරතාගමනං තථා ।
ප්රසාදනං ච රාමස්ය පිතුශ්ච සලිලක්රියාම් ॥ 16 ॥
පාදුකාග්ර්යාභිෂේකං ච නංදිග්රාමනිවාසනම් ।
දංඩකාරණ්යගමනං විරාධස්ය වධං තථා ॥ 17 ॥
දර්ශනං ශරභංගස්ය සුතීක්ෂ්ණේන සමාගමම් ।
අනසූයාසහාස්යාමප්යංගරාගස්ය චාර්පණම් ॥ 18 ॥
අගස්ත්යදර්ශනං චෛව ජටායෝරභිසංගමම් ।
පංචවට්යාශ්ච ගමනං ශූර්පණඛ්යාශ්ච දර්ශනම් ॥ 19 ॥
ශූර්පණඛ්යාශ්ච සංවාදං විරූපකරණං තථා ।
වධං ඛරත්රිශිරසෝරුත්ථානං රාවණස්ය ච ॥ 20 ॥
මාරීචස්ය වධං චෛව වෛදේහ්යා හරණං තථා ।
රාඝවස්ය විලාපං ච ගෘධ්රරාජනිබර්හණම් ॥ 21 ॥
කබංධදර්ශනං චාපි පංපායාශ්චාපි දර්ශනම් ।
ශබර්යාඃ දර්ශනං චෛව හනූමද්දර්ශනං තථා ॥ 22 ॥
ඍශ්යමූකස්ය ගමනං සුග්රීවේණ සමාගමම් ।
ප්රත්යයෝත්පාදනං සඛ්යං වාලිසුග්රීවවිග්රහම් ॥ 23 ॥
වාලිප්රමථනං චෛව සුග්රීවප්රතිපාදනම් ।
තාරාවිලාපං සමයං වර්ෂරාත්රනිවාසනම් ॥ 24 ॥
කෝපං රාඝවසිංහස්ය බලානාමුපසංග්රහම් ।
දිශඃ ප්රස්ථාපනං චෛව පෘථිව්යාශ්ච නිවේදනම් ॥ 25 ॥
අංගුලීයකදානං ච ඍක්ෂස්ය බිලදර්ශනම් ।
ප්රායෝපවේශනං චාපි සංපාතේශ්චාපි දර්ශනම් ॥ 26 ॥
පර්වතාරෝහණං චාපි සාගරස්යාපි ලංඝනම් ।
සමුද්රවචනාච්චෛව මෛනාකස්ය ච දර්ශනම් ॥ 27 ॥
සිංහිකායාශ්ච නිධනං ලංකාමලයදර්ශනම් ।
රාත්රෞ ලංකාප්රවේශං ච ඒකස්යාථ විචිංතනම් ॥ 28 ॥
දර්ශනං රාවණස්යාපි පුෂ්පකස්ය ච දර්ශනම් ।
ආපානභූමිගමනමවරෝධස්ය දර්ශනම් ॥ 29 ॥
අශෝකවනිකායානං සීතායාශ්චපි දර්ශනම් ।
අභිජ්ඤානප්රදානං ච රාවණස්ය ච දර්ශනම් ॥ 30 ॥
රාක්ෂසීතර්ජනං චෛව ත්රිජටාස්වප්නදර්ශනම් ।
මණිප්රදානං සීතායා වෘක්ෂභංගං තථෛව ච ॥ 31 ॥
රාක්ෂසීවිද්රවං චෛව කිංකරාණාං නිබර්හණම් ।
ග්රහණං වායුසූනෝශ්ච ලංකාදාහාභිගර්ජනම් ॥ 32 ॥
ප්රතිප්ලවනමේවාථ මධූනාං හරණං තථා ।
රාඝවාශ්වාසනං චාපි මණිනිර්යාතනං තථා ॥ 33 ॥
සංගමං ච සමුද්රේණ නලසේතෝශ්ච බංධනම් ।
ප්රතාරං ච සමුද්රස්ය රාත්රෞ ලංකාවරෝධනම් ॥ 34 ॥
විභීෂණේන සංසර්ගං වධෝපායනිවේදනම් ।
කුංභකර්ණස්ය නිධනං මේඝනාදනිබර්හණම් ॥ 35 ॥
රාවණස්ය විනාශං ච සීතාවාප්තිමරේඃ පුරේ ।
විභීෂණාභිෂේකං ච පුෂ්පකස්ය ච දර්ශනම් ॥ 36 ॥
අයෝධ්යායාශ්ච ගමනං භරතේන සමාගමම් ।
රාමාභිෂේකාභ්යුදයං සර්වසෛන්යවිසර්ජනම් ।
ස්වරාෂ්ට්රරංජනං චෛව වෛදේහ්යාශ්ච විසර්ජනම් ॥ 37 ॥
අනාගතං ච යත්කිංචිද්රාමස්ය වසුධාතලේ ।
තච්චකාරෝත්තරේ කාව්යේ වාල්මීකිර්භගවානෘෂිඃ ॥ 38 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ බාලකාංඩේ තෘතීයස්සර්ගඃ ॥
