𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌅𑌯𑍋𑌧𑍍𑌯𑌾𑌕𑌾𑌂𑌡𑌮𑍍 ।
𑌅𑌥 𑌚𑌤𑍁𑌰𑍍𑌦𑌶𑌸𑍍𑌸𑌰𑍍𑌗𑌃 ।
𑌪𑍁𑌤𑍍𑌰𑌶𑍋𑌕𑌾𑌰𑍍𑌦𑌿𑌤𑌂 𑌪𑌾𑌪𑌾 𑌵𑌿𑌸𑌂𑌜𑍍𑌞𑌂 𑌪𑌤𑌿𑌤𑌂 𑌭𑍁𑌵𑌿 ।
𑌵𑌿𑌵𑍇𑌷𑍍𑌟𑌮𑌾𑌨𑌮𑍁𑌦𑍍𑌵𑍀𑌕𑍍𑌷𑍍𑌯 𑌸𑍈𑌕𑍍𑌷𑍍𑌵𑌾𑌕𑌮𑌿𑌦𑌮𑌬𑍍𑌰𑌵𑍀𑌤𑍍 ॥ 1 ॥
𑌪𑌾𑌪𑌂 𑌕𑍃𑌤𑍍𑌵𑍈𑌵 𑌕𑌿𑌮𑌿𑌦𑌂 𑌮𑌮 𑌸𑌂𑌶𑍍𑌰𑍁𑌤𑍍𑌯 𑌸𑌂𑌶𑍍𑌰𑌵𑌮𑍍 ।
𑌶𑍇𑌷𑍇 𑌕𑍍𑌷𑌿𑌤𑌿𑌤𑌲𑍇 𑌸𑌨𑍍𑌨𑌃 𑌸𑍍𑌥𑌿𑌤𑍍𑌯𑌾𑌂 𑌸𑍍𑌥𑌾𑌤𑍁𑌂 𑌤𑍍𑌵𑌮𑌰𑍍𑌹𑌸𑌿 ॥ 2 ॥
𑌆𑌹𑍁 𑌸𑍍𑌸𑌤𑍍𑌯𑌂 𑌹𑌿 𑌪𑌰𑌮𑌂 𑌧𑌰𑍍𑌮𑌂 𑌧𑌰𑍍𑌮𑌵𑌿𑌦𑍋 𑌜𑌨𑌾𑌃 ।
𑌸𑌤𑍍𑌯𑌮𑌾𑌶𑍍𑌰𑌿𑌤𑍍𑌯 𑌹𑌿 𑌮𑌯𑌾 𑌤𑍍𑌵𑌂 𑌚 𑌧𑌰𑍍𑌮𑌂 𑌪𑍍𑌰𑌬𑍋𑌧𑌿𑌤𑌃 ॥ 3 ॥
𑌸𑌂𑌶𑍍𑌰𑍁𑌤𑍍𑌯 𑌶𑍈𑌬𑍍𑌯𑌶𑍍𑌶𑍍𑌯𑍇𑌨𑌾𑌯 𑌸𑍍𑌵𑌾𑌂 𑌤𑌨𑍁𑌂 𑌜𑌗𑌤𑍀𑌪𑌤𑌿𑌃 ।
𑌪𑍍𑌰𑌦𑌾𑌯 𑌪𑌕𑍍𑌷𑌿𑌣𑍇 𑌰𑌾𑌜 𑌨𑍍𑌜𑌗𑌾𑌮 𑌗𑌤𑌿𑌮𑍁𑌤𑍍𑌤𑌮𑌾𑌮𑍍 ॥ 4 ॥
𑌤𑌥𑌾 𑌹𑍍𑌯𑌲𑌰𑍍𑌕𑌸𑍍𑌤𑍇𑌜𑌸𑍍𑌵𑍀 𑌬𑍍𑌰𑌾𑌹𑍍𑌮𑌣𑍇 𑌵𑍇𑌦𑌪𑌾𑌰𑌗𑍇 ।
𑌯𑌾𑌚𑌮𑌾𑌨𑍇 𑌸𑍍𑌵𑌕𑍇 𑌨𑍇𑌤𑍍𑌰𑍇 𑌉𑌦𑍍𑌧𑍃𑌤𑍍𑌯𑌾𑌵𑌿𑌮𑌨𑌾 𑌦𑌦𑍌 ॥ 5 ॥
𑌸𑌰𑌿𑌤𑌾𑌂 𑌤𑍁 𑌪𑌤𑌿𑌸𑍍𑌸𑍍𑌵𑌲𑍍𑌪𑌾𑌂 𑌮𑌰𑍍𑌯𑌾𑌦𑌾𑌂 𑌸𑌤𑍍𑌯𑌮𑌨𑍍𑌵𑌿𑌤𑌃 ।
𑌸𑌤𑍍𑌯𑌾𑌨𑍁𑌰𑍋𑌧𑌾𑌤𑍍𑌸𑌮𑌯𑍇 𑌸𑍍𑌵𑌾𑌂 𑌵𑍇𑌲𑌾𑌂 𑌨𑌾𑌤𑌿𑌵𑌰𑍍𑌤𑌤𑍇 ॥ 6 ॥
𑌸𑌤𑍍𑌯𑌮𑍇𑌕𑌪𑌦𑌂 𑌬𑍍𑌰𑌹𑍍𑌮 𑌸𑌤𑍍𑌯𑍇 𑌧𑌰𑍍𑌮𑌃 𑌪𑍍𑌰𑌤𑌿𑌷𑍍𑌟𑌿𑌤𑌃 ।
𑌸𑌤𑍍𑌯𑌮𑍇𑌵𑌾𑌕𑍍𑌷𑌯𑌾 𑌵𑍇𑌦𑌾 𑌸𑌤𑍍𑌯𑍇𑌨𑍈𑌵𑌾𑌪𑍍𑌯𑌤𑍇 𑌸𑍍𑌪𑌰𑌮𑍍 ॥ ॥
𑌸𑌤𑍍𑌯𑌂 𑌸𑌮𑌨𑍁𑌵𑌰𑍍𑌤𑌸𑍍𑌵 𑌯𑌦𑌿 𑌧𑌰𑍍𑌮𑍇 𑌧𑍃𑌤𑌾 𑌮𑌤𑌿𑌃 ।
𑌸𑌫𑌲𑌸𑍍𑌸 𑌵𑌰𑍋 𑌮𑍇𑌽𑌸𑍍𑌤𑍁 𑌵𑌰𑌦𑍋 𑌹𑍍𑌯𑌸𑌿 𑌸𑌤𑍍𑌤𑌮 ॥ ॥
𑌧𑌰𑍍𑌮𑌸𑍍𑌯𑍈𑌹𑌾𑌭𑌿𑌕𑌾𑌮𑌾𑌰𑍍𑌥𑌂 𑌮𑌮 𑌚𑍈𑌵𑌾𑌭𑌿𑌚𑍋𑌦𑌨𑌾𑌤𑍍 ।
𑌪𑍍𑌰𑌵𑍍𑌰𑌾𑌜𑌯 𑌸𑍁𑌤𑌂 𑌰𑌾𑌮𑌂 𑌤𑍍𑌰𑌿𑌃𑌖𑌲𑍁 𑌤𑍍𑌵𑌾𑌂 𑌬𑍍𑌰𑌵𑍀𑌮𑍍𑌯𑌹𑌮𑍍 ॥ ॥
𑌸𑌮𑌯𑌂 𑌚 𑌮𑌮𑌾𑌰𑍍𑌯𑍇𑌮𑌂 𑌯𑌦𑌿 𑌤𑍍𑌵𑌂 𑌨 𑌕𑌰𑌿𑌷𑍍𑌯𑌸𑌿 ।
𑌅𑌗𑍍𑌰𑌤𑌸𑍍𑌤𑍇 𑌪𑌰𑌿𑌤𑍍𑌯𑌕𑍍𑌤𑌾 𑌪𑌰𑌿𑌤𑍍𑌯𑌕𑍍𑌷𑍍𑌯𑌾𑌮𑌿 𑌜𑍀𑌵𑌿𑌤𑌮𑍍 ॥ 10 ॥
𑌏𑌵𑌂 𑌪𑍍𑌰𑌚𑍋𑌦𑌿𑌤𑍋 𑌰𑌾𑌜𑌾 𑌕𑍈𑌕𑍇𑌯𑍍𑌯𑌾 𑌨𑌿𑌰𑍍𑌵𑌿𑌶𑌂𑌕𑌯𑌾 ।
𑌨𑌾𑌶𑌕𑌤𑍍𑌪𑌾𑌶𑌮𑍁𑌨𑍍𑌮𑍋𑌕𑍍𑌤𑍁𑌂 𑌬𑌲𑌿𑌰𑌿𑌂𑌦𑍍𑌰𑌕𑍃𑌤𑌂 𑌯𑌥𑌾 ॥ 11 ॥
𑌉𑌦𑍍𑌭𑍍𑌰𑌾𑌂𑌤𑌹𑍃𑌦𑌯𑌶𑍍𑌚𑌾𑌪𑌿 𑌵𑌿𑌵𑌰𑍍𑌣𑌵𑌦𑌨𑍋𑌽𑌭𑌵𑌤𑍍 ।
𑌸 𑌧𑍁𑌰𑍍𑌯𑍋𑌵𑍈𑌪𑌰𑌿𑌸𑍍𑌪𑌂𑌦𑌨𑍍𑌯𑍁𑌗𑌚𑌕𑍍𑌰𑌾𑌂𑌤𑌰𑌂 𑌯𑌥𑌾 ॥ 12 ॥
𑌵𑌿𑌹𑍍𑌵𑌲𑌾𑌭𑍍𑌯𑌾𑌂 𑌚 𑌨𑍇𑌤𑍍𑌰𑌾𑌭𑍍𑌯𑌾𑌮𑌪𑌶𑍍𑌯𑌨𑍍𑌨𑌿𑌵 𑌭𑍂𑌪𑌤𑌿𑌃 ।
𑌕𑍃𑌚𑍍𑌛𑍍𑌰𑌾𑌦𑍍𑌧𑍈𑌰𑍍𑌯𑍇𑌣 𑌸𑌂𑌸𑍍𑌤𑌭𑍍𑌯 𑌕𑍈𑌕𑍇𑌯𑍀𑌮𑌿𑌦𑌮𑌬𑍍𑌰𑌵𑍀𑌤𑍍 ॥ 13 ॥
𑌯𑌸𑍍𑌤𑍇 𑌮𑌂𑌤𑍍𑌰𑌕𑍃𑌤𑌃 𑌪𑌾𑌣𑌿𑌰𑌗𑍍𑌨𑍌 𑌪𑌾𑌪𑍇 𑌮𑌯𑌾 𑌧𑍃𑌤𑌃 ।
𑌤𑌂 𑌤𑍍𑌯𑌜𑌾𑌮𑌿 𑌸𑍍𑌵𑌜𑌂 𑌚𑍈𑌵 𑌤𑌵 𑌪𑍁𑌤𑍍𑌰𑌂 𑌤𑍍𑌵𑌯𑌾 𑌸𑌹 ॥ 14 ॥
𑌪𑍍𑌰𑌯𑌾𑌤𑌾 𑌰𑌜𑌨𑍀 𑌦𑍇𑌵𑌿 𑌸𑍂𑌰𑍍𑌯𑌸𑍍𑌯𑍋𑌦𑌯𑌨𑌂𑌪𑍍𑌰𑌤𑌿 ।
𑌅𑌭𑌿𑌷𑍇𑌕𑌂 𑌗𑍁𑌰𑍁𑌜𑌨𑌸𑍍𑌤𑍍𑌵𑌰𑌯𑌿𑌷𑍍𑌯𑌤𑌿 𑌮𑌾𑌂 𑌧𑍍𑌰𑍁𑌵𑌮𑍍 ॥ 15 ॥
𑌰𑌾𑌮𑌾𑌭𑌿𑌷𑍇𑌕𑌸𑌂𑌭𑌾𑌰𑍈𑌸𑍍𑌤𑌦𑌰𑍍𑌥𑌮𑍁𑌪𑌕𑌲𑍍𑌪𑌿𑌤𑍈𑌃 ।
𑌰𑌾𑌮𑌃 𑌕𑌾𑌰𑌯𑌿𑌤𑌵𑍍𑌯𑍋 𑌮𑍇 𑌮𑍃𑌤𑌸𑍍𑌯 𑌸𑌲𑌿𑌲𑌕𑍍𑌰𑌿𑌯𑌾𑌮𑍍 ॥ 16 ॥
𑌤𑍍𑌵𑌯𑌾 𑌸𑌪𑍁𑌤𑍍𑌰𑌯𑌾 𑌨𑍈𑌵 𑌕𑌰𑍍𑌤𑌵𑍍𑌯𑌾 𑌸𑌲𑌿𑌲𑌕𑍍𑌰𑌿𑌯𑌾 ।
𑌵𑍍𑌯𑌾𑌹𑌂𑌤𑌾𑌽𑌸𑍍𑌯𑌶𑍁𑌭𑌾𑌚𑌾𑌰𑍇 𑌯𑌦𑌿 𑌰𑌾𑌮𑌾𑌭𑌿𑌷𑍇𑌚𑌨𑌮𑍍 ॥ 1 ॥
𑌨 𑌚 𑌶𑌕𑍍𑌤𑍋𑌽𑌸𑍍𑌮𑍍𑌯𑌹𑌂 𑌦𑍍𑌰𑌷𑍍𑌟𑍁𑌂 𑌦𑍃𑌷𑍍𑌟𑍍𑌵𑌾 𑌪𑍂𑌰𑍍𑌵𑌂 𑌤𑌥𑌾𑌸𑍁𑌖𑌮𑍍 ।
𑌹𑌤𑌹𑌰𑍍𑌷𑌂 𑌨𑌿𑌰𑌾𑌨𑌂𑌦𑌂 𑌪𑍁𑌨𑌰𑍍𑌜𑌨𑌮𑌵𑌾𑌙𑍍𑌮𑍁𑌖𑌮𑍍 ॥ 1 ॥
𑌤𑌾𑌂 𑌤𑌥𑌾 𑌬𑍍𑌰𑍁𑌵𑌤𑌸𑍍𑌤𑌸𑍍𑌯 𑌭𑍂𑌮𑌿𑌪𑌸𑍍𑌯 𑌮𑌹𑌾𑌤𑍍𑌮𑌨𑌃 ।
𑌪𑍍𑌰𑌭𑌾𑌤𑌾 𑌶𑌰𑍍𑌵𑌰𑍀 𑌪𑍁𑌣𑍍𑌯𑌾 𑌚𑌂𑌦𑍍𑌰𑌨𑌕𑍍𑌷𑌤𑍍𑌰𑌶𑌾𑌲𑌿𑌨𑍀 ॥ 1 ॥
𑌤𑌤𑌃 𑌪𑌾𑌪𑌸𑌮𑌾𑌚𑌾𑌰𑌾 𑌕𑍈𑌕𑍇𑌯𑍀 𑌪𑌾𑌰𑍍𑌥𑌿𑌵𑌂 𑌪𑍁𑌨𑌃 ।
𑌉𑌵𑌾𑌚 𑌪𑌰𑍁𑌷𑌂 𑌵𑌾𑌕𑍍𑌯𑌂 𑌵𑌾𑌕𑍍𑌯𑌜𑍍𑌞𑌾 𑌰𑍋𑌷𑌮𑍂𑌰𑍍𑌛𑌿𑌤𑌾 ॥ 20 ॥
𑌕𑌿𑌮𑌿𑌦𑌂 𑌭𑌾𑌷𑌸𑍇 𑌰𑌾𑌜𑌨𑍍𑌵𑌾𑌕𑍍𑌯𑌂 𑌗𑌰𑌰𑍁𑌜𑍋𑌪𑌮𑌮𑍍 ।
𑌆𑌨𑌾𑌯𑌯𑌿𑌤𑍁𑌮𑌕𑍍𑌲𑌿𑌷𑍍𑌟𑌂 𑌪𑍁𑌤𑍍𑌰𑌂 𑌰𑌾𑌮𑌮𑌿𑌹𑌾𑌰𑍍𑌹𑌸𑌿 ॥ 21 ॥
𑌸𑍍𑌥𑌾𑌪𑍍𑌯 𑌰𑌾𑌜𑍍𑌯𑍇 𑌮𑌮 𑌸𑍁𑌤𑌂 𑌕𑍃𑌤𑍍𑌵𑌾 𑌰𑌾𑌮𑌂 𑌵𑌨𑍇𑌚𑌰𑌮𑍍 ।
𑌨𑌿𑌸𑍍𑌸𑌪𑌤𑍍𑌨𑌾𑌂 𑌚 𑌮𑌾𑌂 𑌕𑍃𑌤𑍍𑌵𑌾 𑌕𑍃𑌤𑌕𑍃𑌤𑍍𑌯𑍋 𑌭𑌵𑌿𑌷𑍍𑌯𑌸𑌿 ॥ 22 ॥
𑌸 𑌨𑍁𑌨𑍍𑌨 𑌇𑌵 𑌤𑍀𑌕𑍍𑌷𑍍𑌣𑍇𑌨 𑌪𑍍𑌰𑌤𑍋𑌦𑍇𑌨 𑌹𑌯𑍋𑌤𑍍𑌤𑌮𑌃 ।
𑌰𑌾𑌜𑌾 𑌪𑍍𑌰𑌚𑍋𑌦𑌿𑌤𑍋𑌽𑌭𑍀𑌕𑍍𑌷𑍍𑌣𑌂 𑌕𑍈𑌕𑍇𑌯𑍀𑌮𑌿𑌦𑌮𑌬𑍍𑌰𑌵𑍀𑌤𑍍 ॥ 23 ॥
𑌧𑌰𑍍𑌮𑌬𑌂𑌧𑍇𑌨 𑌬𑌧𑍍𑌦𑍋𑌽𑌸𑍍𑌮𑌿 𑌨𑌷𑍍𑌟𑌾 𑌚 𑌮𑌮 𑌚𑍇𑌤𑌨𑌾 ।
𑌜𑍍𑌯𑍇𑌷𑍍𑌠𑌂 𑌪𑍁𑌤𑍍𑌰𑌂 𑌪𑍍𑌰𑌿𑌯𑌂 𑌰𑌾𑌮𑌂 𑌦𑍍𑌰𑌷𑍍𑌟𑍁𑌮𑌿𑌚𑍍𑌛𑌾𑌮𑌿 𑌧𑌾𑌰𑍍𑌮𑌿𑌕𑌮𑍍 ॥ 24 ॥
𑌤𑌤𑌃 𑌪𑍍𑌰𑌭𑌾𑌤𑌾𑌂 𑌰𑌜𑌨𑍀𑌮𑍁𑌦𑌿𑌤𑍇 𑌚 𑌦𑌿𑌵𑌾𑌕𑌰𑍇 ।
𑌪𑍁𑌣𑍍𑌯𑍇 𑌨𑌕𑍍𑌷𑌤𑍍𑌰𑌯𑍋𑌗𑍇 𑌚 𑌮𑍁𑌹𑍂𑌰𑍍𑌤𑍇 𑌚 𑌸𑌮𑌾𑌹𑌿𑌤𑍇 ॥ 25 ॥
𑌵𑌸𑌿𑌷𑍍𑌠𑍋 𑌗𑍁𑌣𑌸𑌂𑌪𑌨𑍍𑌨 𑌶𑍍𑌶𑌿𑌷𑍍𑌯𑍈 𑌪𑌰𑌿𑌵𑍃𑌤𑌸𑍍𑌤𑌦𑌾 ।
𑌉𑌪𑌗𑍃𑌹𑍍𑌯𑌾𑌶𑍁 𑌸𑌂𑌭𑌾𑌰𑌾𑌨𑍍𑌪𑍍𑌰𑌵𑌿𑌵𑍇𑌶 𑌪𑍁𑌰𑍋𑌤𑍍𑌤𑌮𑌮𑍍 ॥ 26 ॥
𑌸𑌿𑌕𑍍𑌤𑌸𑌮𑍍𑌮𑌾𑌰𑍍𑌜𑌿𑌤𑌪𑌥𑌾𑌂 𑌪𑌤𑌾𑌕𑍋𑌤𑍍𑌤𑌮 𑌭𑍂𑌷𑌿𑌤𑌾𑌮𑍍 ।
𑌵𑌿𑌚𑌿𑌤𑍍𑌰𑌕𑍁𑌸𑍁𑌮𑌾𑌕𑍀𑌰𑍍𑌣𑌾𑌂 𑌨𑌾𑌨𑌾𑌸𑍍𑌰𑌗𑍍𑌭𑌿𑌰𑍍𑌵𑌿𑌰𑌾𑌜𑌿𑌤𑌾𑌮𑍍 ॥ 2 ॥
𑌸𑌂𑌹𑍃𑌷𑍍𑌟𑌮𑌨𑍁𑌜𑍋𑌪𑍇𑌤𑌾𑌂 𑌸𑌮𑍃𑌦𑍍𑌧𑌵𑌿𑌪𑌣𑌾𑌪𑌣𑌾𑌮𑍍 ।
𑌮𑌹𑍋𑌤𑍍𑌸𑌵𑌸𑌮𑌾𑌕𑍀𑌰𑍍𑌣𑌾𑌂 𑌰𑌾𑌘𑌵𑌾𑌰𑍍𑌥𑍇 𑌸𑌮𑍁𑌤𑍍𑌸𑍁𑌕𑌾𑌮𑍍 ॥ 2 ॥
𑌚𑌂𑌦𑌨𑌾𑌗𑌰𑍁𑌧𑍂𑌪𑍈𑌶𑍍𑌚 𑌸𑌰𑍍𑌵𑌤𑌃 𑌪𑍍𑌰𑌤𑌿𑌧𑍂𑌪𑌿𑌤𑌾𑌮𑍍 ।
𑌤𑌾𑌂 𑌪𑍁𑌰𑍀𑌂 𑌸𑌮𑌤𑌿𑌕𑍍𑌰𑌮𑍍𑌯 𑌪𑍁𑌰𑌂𑌦𑌰𑌪𑍁𑌰𑍋𑌪𑌮𑌾𑌮𑍍 ॥ 2 ॥
𑌦𑌦𑌰𑍍𑌶𑌾𑌂𑌤𑌃𑌪𑍁𑌰𑌶𑍍𑌰𑍇𑌷𑍍𑌠𑌂 𑌨𑌾𑌨𑌾𑌦𑍍𑌵𑌿𑌜𑌗𑌣𑌾𑌯𑍁𑌤𑌮𑍍 ।
𑌪𑍌𑌰𑌜𑌾𑌨𑌪𑌦𑌾𑌕𑍀𑌰𑍍𑌣𑌂 𑌬𑍍𑌰𑌾𑌹𑍍𑌮𑌣𑍈𑌰𑍁𑌪𑌶𑍋𑌭𑌿𑌤𑌮𑍍 ॥ 30 ॥
𑌯𑌜𑍍𑌞𑌵𑌿𑌦𑍍𑌭𑌿 𑌸𑍍𑌸𑍁𑌸𑌂𑌪𑍂𑌰𑍍𑌣𑌂 𑌸𑌦𑌸𑍍𑌯𑍈𑌃 𑌪𑌰𑌮𑌦𑍍𑌵𑌿𑌜𑍈𑌃 ।
𑌤𑌦𑌂𑌤𑌃𑌪𑍁𑌰𑌮𑌾𑌸𑌾𑌦𑍍𑌯 𑌵𑍍𑌯𑌤𑌿𑌚𑌕𑍍𑌰𑌾𑌮 𑌤𑌂 𑌜𑌨𑌮𑍍 ॥ 31 ॥
𑌵𑌸𑌿𑌷𑍍𑌠𑌃 𑌪𑌰𑌮𑌪𑍍𑌰𑍀𑌤𑌃 𑌪𑌰𑌮𑌰𑍍𑌷𑌿𑌰𑍍𑌵𑌿𑌵𑍇𑌶 𑌚 ।
𑌸𑌤𑍍𑌵𑌪𑌶𑍍𑌯𑌦𑍍𑌵𑌿𑌨𑌿𑌷𑍍𑌕𑍍𑌰𑌾𑌂𑌤𑌂 𑌸𑍁𑌮𑌂𑌤𑍍𑌰𑌂 𑌨𑌾𑌮 𑌸𑌾𑌰𑌥𑌿𑌮𑍍 ॥ 32 ॥
𑌦𑍍𑌵𑌾𑌰𑍇 𑌮𑌨𑍁𑌜𑌸𑌿𑌂𑌹𑌸𑍍𑌯 𑌸𑌚𑌿𑌵𑌂 𑌪𑍍𑌰𑌿𑌯𑌦𑌰𑍍𑌶𑌨𑌮𑍍 ।
𑌤𑌮𑍁𑌵𑌾𑌚 𑌮𑌹𑌾𑌤𑍇𑌜𑌾 𑌸𑍍𑌸𑍂𑌤𑌪𑍁𑌤𑍍𑌰𑌂 𑌵𑌿𑌶𑌾𑌰𑌦𑌮𑍍 ॥ 33 ॥
𑌵𑌸𑌿𑌷𑍍𑌠𑌃 𑌕𑍍𑌷𑌿𑌪𑍍𑌰𑌮𑌾𑌚𑌕𑍍𑌷𑍍𑌵 𑌨𑍃𑌪𑌤𑍇𑌰𑍍𑌮𑌾𑌮𑌿𑌹𑌾𑌗𑌤𑌮𑍍 ।
𑌇𑌮𑍇 𑌗𑌂𑌗𑍋𑌦𑌕𑌘𑌟𑌾 𑌸𑍍𑌸𑌾𑌗𑌰𑍇𑌭𑍍𑌯𑌶𑍍𑌚 𑌕𑌾𑌂𑌚𑌨𑌾𑌃 ॥ 34 ॥
𑌔𑌦𑍁𑌂𑌬𑌰𑌂 𑌭𑌦𑍍𑌰𑌪𑍀𑌠𑌮𑌭𑌿𑌷𑍇𑌕𑌾𑌰𑍍𑌥𑌮𑌾𑌗𑌤𑌮𑍍 ।
𑌸𑌰𑍍𑌵𑌬𑍀𑌜𑌾𑌨𑌿 𑌗𑌂𑌧𑌾𑌶𑍍𑌚 𑌰𑌤𑍍𑌨𑌾𑌨𑌿 𑌵𑌿𑌵𑌿𑌧𑌾𑌨𑌿 𑌚 ॥ 35 ॥
𑌕𑍍𑌷𑍌𑌦𑍍𑌰𑌂 𑌦𑌧𑌿 𑌘𑍃𑌤𑌂 𑌲𑌾𑌜𑌾 𑌦𑌰𑍍𑌭𑌾𑌸𑍍𑌸𑍁𑌮𑌨𑌸𑌃 𑌪𑌯𑌃 ।
𑌅𑌷𑍍𑌟𑍌 𑌚 𑌕𑌨𑍍𑌯𑌾 𑌰𑍁𑌚𑌿𑌰𑌾 𑌮𑌤𑍍𑌤𑌶𑍍𑌚 𑌵𑌰𑌵𑌾𑌰𑌣𑌃 ॥ 36 ॥
𑌚𑌤𑍁𑌰𑌶𑍍𑌵𑍋 𑌰𑌥𑌶𑍍𑌶𑍍𑌰𑍀𑌮𑌾𑌨𑍍𑌨𑌿𑌸𑍍𑌤𑍍𑌰𑌿𑌂𑌶𑍋 𑌧𑌨𑍁𑌰𑍁𑌤𑍍𑌤𑌮𑌮𑍍 ।
𑌵𑌾𑌹𑌨𑌂 𑌨𑌰𑌸𑌂𑌯𑍁𑌕𑍍𑌤𑌂 𑌛𑌤𑍍𑌰𑌂 𑌚 𑌶𑌶𑌿𑌸𑌨𑍍𑌨𑌿𑌭𑌮𑍍 ॥ 3 ॥
𑌶𑍍𑌵𑍇𑌤𑍇 𑌚 𑌵𑌾𑌲𑌵𑍍𑌯𑌜𑌨𑍇 𑌭𑍃𑌂𑌗𑌾𑌰𑍁𑌶𑍍𑌚 𑌹𑌿𑌰𑌣𑍍𑌮𑌯𑌃 ।
𑌹𑍇𑌮𑌦𑌾𑌮𑌪𑌿𑌨𑌧𑍍𑌦𑌶𑍍𑌚 𑌕𑌕𑍁𑌦𑍍𑌮𑌾𑌨𑍍𑌪𑌾𑌂𑌡𑍁𑌰𑍋 𑌵𑍃𑌷𑌃 ॥ 3 ॥
𑌕𑍇𑌸𑌰𑍀 𑌚 𑌚𑌤𑍁𑌰𑍍𑌦𑌂𑌷𑍍𑌟𑍍𑌰𑍋 𑌹𑌰𑌿𑌶𑍍𑌰𑍇𑌷𑍍𑌠𑍋 𑌮𑌹𑌾𑌬𑌲𑌃 ।
𑌸𑌿𑌂𑌹𑌾𑌸𑌨𑌂 𑌵𑍍𑌯𑌾𑌘𑍍𑌰𑌤𑌨𑍁 𑌸𑍍𑌸𑌮𑌿𑌦𑍍𑌧𑌶𑍍𑌚 𑌹𑍁𑌤𑌾𑌶𑌨𑌃 ॥ 3 ॥
𑌸𑌰𑍍𑌵𑌵𑌾𑌦𑌿𑌤𑍍𑌰𑌸𑌂𑌘𑌾𑌶𑍍𑌚 𑌵𑍇𑌶𑍍𑌯𑌾𑌶𑍍𑌚𑌾𑌲𑌂𑌕𑍃𑌤𑌾 𑌸𑍍𑌸𑍍𑌤𑍍𑌰𑌯𑌃 ।
𑌆𑌚𑌾𑌰𑍍𑌯𑌾 𑌬𑍍𑌰𑌾𑌹𑍍𑌮𑌣𑌾 𑌗𑌾𑌵𑌃 𑌪𑍁𑌣𑍍𑌯𑌾𑌶𑍍𑌚 𑌮𑍃𑌗𑌪𑌕𑍍𑌷𑌿𑌣𑌃 ॥ 40 ॥
𑌪𑍌𑌰𑌜𑌾𑌨𑌪𑌦𑌶𑍍𑌰𑍇𑌷𑍍𑌠𑌾 𑌨𑍈𑌗𑌮𑌾𑌶𑍍𑌚 𑌗𑌣𑍈 𑌸𑍍𑌸𑌹 ।
𑌏𑌤𑍇 𑌚𑌾𑌨𑍍𑌯𑍇 𑌚 𑌬𑌹𑌵𑍋 𑌨𑍀𑌯𑌮𑌾𑌨𑌾𑌃 𑌪𑍍𑌰𑌿𑌯𑌂𑌵𑌦𑌾𑌃 ॥ 41 ॥
𑌅𑌭𑌿𑌷𑍇𑌕𑌾𑌯 𑌰𑌾𑌮𑌸𑍍𑌯 𑌸𑌹 𑌤𑌿𑌷𑍍𑌠𑌂𑌤𑌿 𑌪𑌾𑌰𑍍𑌥𑌿𑌵𑍈𑌃 ।
𑌤𑍍𑌵𑌰𑌯𑌸𑍍𑌵 𑌮𑌹𑌾𑌰𑌾𑌜𑌂 𑌯𑌥𑌾 𑌸𑌮𑍁𑌦𑌿𑌤𑍇𑌽𑌹𑌨𑌿 ॥ 42 ॥
𑌪𑍁𑌷𑍍𑌯𑍇 𑌨𑌕𑍍𑌷𑌤𑍍𑌰𑌯𑍋𑌗𑍇 𑌚 𑌰𑌾𑌮𑍋 𑌰𑌾𑌜𑍍𑌯𑌮𑌵𑌾𑌪𑍍𑌨𑍁𑌯𑌾𑌤𑍍 ।
𑌇𑌤𑌿 𑌤𑌸𑍍𑌯 𑌵𑌚 𑌶𑍍𑌶𑍍𑌰𑍁𑌤𑍍𑌵𑌾 𑌸𑍂𑌤𑌪𑍁𑌤𑍍𑌰𑍋 𑌮𑌹𑌾𑌤𑍍𑌮𑌨𑌃 ॥ 43 ॥
𑌸𑍍𑌤𑍁𑌵𑌨𑍍𑌨𑍃𑌪𑌤𑌿𑌶𑌾𑌰𑍍𑌦𑍂𑌲𑌂 𑌪𑍍𑌰𑌵𑌿𑌵𑍇𑌶 𑌨𑌿𑌵𑍇𑌶𑌨𑌮𑍍 ।
𑌤𑌂 𑌤𑍁 𑌪𑍂𑌰𑍍𑌵𑍋𑌦𑌿𑌤𑌂 𑌵𑍃𑌧𑍍𑌦𑌂 𑌦𑍍𑌵𑌾𑌰𑌸𑍍𑌥𑌾 𑌰𑌾𑌜 𑌸𑌮𑍍𑌮𑌤𑌮𑍍 ॥ 44 ॥
𑌨 𑌶𑍇𑌕𑍁𑌰𑌭𑌿𑌸𑌂𑌰𑍋𑌧𑍍𑌦𑍁𑌂 𑌰𑌾𑌜𑍍𑌞𑌃 𑌪𑍍𑌰𑌿𑌯𑌚𑌿𑌕𑍀𑌰𑍍𑌷𑌵𑌃 ।
𑌸 𑌸𑌮𑍀𑌪𑌸𑍍𑌥𑌿𑌤𑍋 𑌰𑌾𑌜𑍍𑌞𑌸𑍍𑌤𑌾𑌮𑌵𑌸𑍍𑌥𑌾𑌮𑌜𑌜𑍍𑌞𑌿𑌵𑌾𑌨𑍍 ॥ 45 ॥
𑌵𑌾𑌗𑍍𑌭𑌿𑌃 𑌪𑌰𑌮𑌤𑍁𑌷𑍍𑌟𑌾𑌭𑌿𑌰𑌭𑌿𑌷𑍍𑌟𑍋𑌤𑍁𑌂 𑌪𑍍𑌰𑌚𑌕𑍍𑌰𑌮𑍇 ।
𑌤𑌤 𑌸𑍍𑌸𑍂𑌤𑍋 𑌯𑌥𑌾𑌕𑌾𑌲𑌂 𑌪𑌾𑌰𑍍𑌥𑌿𑌵𑌸𑍍𑌯 𑌨𑌿𑌵𑍇𑌶𑌨𑍇 ॥ 46 ॥
𑌸𑍁𑌮𑌂𑌤𑍍𑌰𑌃 𑌪𑍍𑌰𑌾𑌂𑌜𑌲𑌿𑌰𑍍𑌭𑍂𑌤𑍍𑌵𑌾 𑌤𑍁𑌷𑍍𑌟𑌾𑌵 𑌜𑌗𑌤𑍀𑌪𑌤𑌿𑌮𑍍 ।
𑌯𑌥𑌾 𑌨𑌂𑌦𑌤𑌿 𑌤𑍇𑌜𑌸𑍍𑌵𑍀 𑌸𑌾𑌗𑌰𑍋 𑌭𑌾𑌸𑍍𑌕𑌰𑍋𑌦𑌯𑍇 ॥ 4 ॥
𑌪𑍍𑌰𑍀𑌤𑌃 𑌪𑍍𑌰𑍀𑌤𑍇𑌨 𑌮𑌨𑌸𑌾 𑌤𑌥𑌾𑌽𑌨𑌂𑌦𑌘𑌨 𑌸𑍍𑌸𑍍𑌵𑌤𑌃 ।
𑌇𑌂𑌦𑍍𑌰𑌮𑌸𑍍𑌯𑌾𑌂 𑌤𑍁 𑌵𑍇𑌲𑌾𑌯𑌾𑌮𑌭𑌿𑌤𑍁𑌷𑍍𑌟𑌾𑌵 𑌮𑌾𑌤𑌲𑌿𑌃 ॥ 4 ॥
𑌸𑍋𑌽𑌜𑌯𑌦𑍍𑌦𑌾𑌨𑌵𑌾𑌨𑍍𑌸𑌰𑍍𑌵𑌾𑌂𑌸𑍍𑌤𑌥𑌾 𑌤𑍍𑌵𑌾𑌂 𑌬𑍋𑌧𑌯𑌾𑌮𑍍𑌯𑌹𑌮𑍍 ।
𑌵𑍇𑌦𑌾𑌸𑍍𑌸𑌹𑌾𑌂𑌗𑌵𑌿𑌦𑍍𑌯𑌾𑌶𑍍𑌚 𑌯𑌥𑌾𑌹𑍍𑌯𑌾𑌤𑍍𑌮𑌭𑍁𑌵𑌂 𑌵𑌿𑌭𑍁𑌮𑍍 ॥ 4 ॥
𑌬𑍍𑌰𑌹𑍍𑌮𑌾𑌣𑌂 𑌬𑍋𑌧𑌯𑌂𑌤𑍍𑌯𑌦𑍍𑌯 𑌤𑌥𑌾 𑌤𑍍𑌵𑌾𑌂 𑌬𑍋𑌧𑌯𑌾𑌮𑍍𑌯𑌹𑌮𑍍 ।
𑌆𑌦𑌿𑌤𑍍𑌯𑌸𑍍𑌸𑌹 𑌚𑌂𑌦𑍍𑌰𑍇𑌣 𑌯𑌥𑌾 𑌭𑍂𑌤𑌧𑌰𑌾𑌂 𑌶𑍁𑌭𑌾𑌮𑍍 ॥ 50 ॥
𑌬𑍋𑌧𑌯𑌤𑍍𑌯𑌦𑍍𑌯 𑌪𑍃𑌥𑌿𑌵𑍀𑌂 𑌤𑌥𑌾 𑌤𑍍𑌵𑌾𑌂 𑌬𑍋𑌧𑌯𑌾𑌮𑍍𑌯𑌹𑌮𑍍 ।
𑌉𑌤𑍍𑌤𑌿𑌷𑍍𑌠𑌾𑌶𑍁 𑌮𑌹𑌾𑌰𑌾𑌜 𑌕𑍃𑌤𑌕𑍌𑌤𑍁𑌕𑌮𑌂𑌗𑌲𑌃 ॥ 51 ॥
𑌵𑌿𑌰𑌾𑌜𑌮𑌾𑌨𑍋 𑌵𑌪𑍁𑌷𑌾 𑌮𑍇𑌰𑍋𑌰𑌿𑌵 𑌦𑌿𑌵𑌾𑌕𑌰𑌃 ।
𑌸𑍋𑌮𑌸𑍂𑌰𑍍𑌯𑍌 𑌚 𑌕𑌾𑌕𑍁𑌤𑍍𑌸𑍍𑌥 𑌶𑌿𑌵𑌵𑍈𑌶𑍍𑌰𑌵𑌣𑌾𑌵𑌪𑌿 ॥ 52 ॥
𑌵𑌰𑍁𑌣𑌶𑍍𑌚𑌾𑌗𑍍𑌨𑌿𑌰𑌿𑌂𑌦𑍍𑌰𑌶𑍍𑌚 𑌵𑌿𑌜𑌯𑌂 𑌪𑍍𑌰𑌦𑌿𑌶𑌂𑌤𑍁 𑌤𑍇 ।
𑌗𑌤𑌾 𑌭𑌗𑌵𑌤𑍀 𑌰𑌾𑌤𑍍𑌰𑌿𑌃 𑌕𑍃𑌤𑌂 𑌕𑍃𑌤𑍍𑌯𑌮𑌿𑌦𑌂 𑌤𑌵 ॥ 53 ॥
𑌬𑍁𑌦𑍍𑌧𑍍𑌯𑌸𑍍𑌵 𑌨𑍃𑌪𑌶𑌾𑌰𑍍𑌦𑍂𑌲 𑌕𑍁𑌰𑍁 𑌕𑌾𑌰𑍍𑌯𑌮𑌨𑌂𑌤𑌰𑌮𑍍 ।
𑌉𑌦𑌤𑌿𑌷𑍍𑌠𑌤 𑌰𑌾𑌮𑌸𑍍𑌯 𑌸𑌮𑌗𑍍𑌰𑌮𑌭𑌿𑌷𑍇𑌚𑌨𑌮𑍍 ॥ 54 ॥
𑌪𑍌𑌰𑌜𑌾𑌨𑌾𑌪𑌦𑍈𑌶𑍍𑌚𑌾𑌪𑌿 𑌨𑍈𑌗𑌮𑍈𑌶𑍍𑌚 𑌕𑍃𑌤𑌾𑌂𑌜𑌲𑌿𑌃 ।
𑌸𑍍𑌵𑌯𑌂 𑌵𑌶𑌿𑌷𑍍𑌠𑍋 𑌭𑌗𑌵𑌾𑌨𑍍𑌬𑍍𑌰𑌾𑌹𑍍𑌮𑌣𑍈 𑌸𑍍𑌸𑌹 𑌤𑌿𑌷𑍍𑌠𑌤𑌿 ॥ 55 ॥
𑌕𑍍𑌷𑌿𑌪𑍍𑌰𑌮𑌾𑌜𑍍𑌞𑌾𑌪𑍍𑌯𑌤𑌾𑌂 𑌰𑌾𑌜𑌨𑍍𑌰𑌾𑌘𑌵𑌸𑍍𑌯𑌾𑌭𑌿𑌷𑍇𑌚𑌨𑌮𑍍 ।
𑌯𑌥𑌾 𑌹𑍍𑌯𑌪𑌾𑌲𑌾𑌃 𑌪𑌶𑌵𑍋 𑌯𑌥𑌾 𑌸𑍇𑌨𑌾 𑌹𑍍𑌯𑌨𑌾𑌯𑌕𑌾 ॥ 56 ॥
𑌯𑌥𑌾 𑌚𑌂𑌦𑍍𑌰𑌂 𑌵𑌿𑌨𑌾 𑌰𑌾𑌤𑍍𑌰𑌿𑌰𑍍𑌯𑌥𑌾 𑌗𑌾𑌵𑍋 𑌵𑌿𑌨𑌾 𑌵𑍃𑌷𑌮𑍍 ।
𑌏𑌵𑌂 𑌹𑌿 𑌭𑌵𑌿𑌤𑌾 𑌰𑌾𑌷𑍍𑌟𑍍𑌰𑌂 𑌯𑌤𑍍𑌰 𑌰𑌾𑌜𑌾 𑌨 𑌦𑍃𑌶𑍍𑌯𑌤𑍇 ॥ 5 ॥
𑌇𑌤𑌿 𑌤𑌸𑍍𑌯 𑌵𑌚 𑌶𑍍𑌶𑍃𑌤𑍍𑌵𑌾 𑌸𑌾𑌂𑌤𑍍𑌵𑌪𑍂𑌰𑍍𑌵𑌮𑌿𑌵𑌾𑌰𑍍𑌥𑌵𑌤𑍍 ।
𑌅𑌭𑍍𑌯𑌕𑍀𑌰𑍍𑌯𑌤 𑌶𑍋𑌕𑍇𑌨 𑌭𑍂𑌯 𑌏𑌵 𑌮𑌹𑍀𑌪𑌤𑌿𑌃 ॥ 5 ॥
𑌤𑌤 𑌸𑍍𑌸𑌰𑌾𑌜𑌾 𑌤𑌂 𑌸𑍂𑌤𑌂 𑌸𑌨𑍍𑌨𑌹𑌰𑍍𑌷 𑌸𑍍𑌸𑍁𑌤𑌂 𑌪𑍍𑌰𑌤𑌿 ।
𑌶𑍋𑌕𑌰𑌕𑍍𑌤𑍇𑌕𑍍𑌷𑌣 𑌶𑍍𑌶𑍍𑌰𑍀𑌮𑌾𑌨𑍁𑌦𑍍𑌵𑍀𑌕𑍍𑌷𑍍𑌯𑍋𑌵𑌾𑌚 𑌧𑌾𑌰𑍍𑌮𑌿𑌕𑌃 ॥ 5 ॥
𑌵𑌾𑌕𑍍𑌯𑍈𑌸𑍍𑌤𑍁 𑌖𑌲𑍁 𑌮𑌰𑍍𑌮𑌾𑌣𑌿 𑌮𑌮 𑌭𑍂𑌯𑍋 𑌨𑌿𑌕𑍃𑌂𑌤𑌸𑌿 ।
𑌸𑍁𑌮𑌂𑌤𑍍𑌰𑌃 𑌕𑌰𑍁𑌣𑌂 𑌶𑍍𑌰𑍁𑌤𑍍𑌵𑌾 𑌦𑍃𑌷𑍍𑌟𑍍𑌵𑌾 𑌦𑍀𑌨𑌂 𑌚 𑌪𑌾𑌰𑍍𑌥𑌿𑌵𑌮𑍍 ।
𑌪𑍍𑌰𑌗𑍃𑌹𑍀𑌤𑌾𑌂𑌜𑌲𑌿𑌃 𑌕𑌿𑌂𑌚𑌿𑌤𑍍𑌤𑌸𑍍𑌮𑌾𑌦𑍍𑌦𑍇𑌶𑌾𑌦𑌪𑌾𑌕𑍍𑌰𑌮𑌤𑍍 ॥ 60 ॥
𑌯𑌦𑌾 𑌵𑌕𑍍𑌤𑍁𑌂 𑌸𑍍𑌵𑌯𑌂 𑌦𑍈𑌨𑍍𑌯𑌾𑌨𑍍𑌨 𑌶𑌶𑌾𑌕 𑌮𑌹𑍀𑌪𑌤𑌿𑌃 ॥ 61 ॥
𑌤𑌦𑌾 𑌸𑍁𑌮𑌂𑌤𑍍𑌰𑌂 𑌮𑌂𑌤𑍍𑌰𑌜𑍍𑌞𑌾 𑌕𑍈𑌕𑍇𑌯𑍀 𑌪𑍍𑌰𑌤𑍍𑌯𑍁𑌵𑌾𑌚 𑌹 ।
𑌸𑍁𑌮𑌂𑌤𑍍𑌰 𑌰𑌾𑌜𑌾 𑌰𑌜𑌨𑍀𑌂 𑌰𑌾𑌮𑌹𑌰𑍍𑌷𑌸𑌮𑍁𑌤𑍍𑌸𑍁𑌕𑌃 ॥ 62 ॥
𑌪𑍍𑌰𑌜𑌾𑌗𑌰𑌪𑌰𑌿𑌶𑍍𑌰𑌾𑌂𑌤𑍋 𑌨𑌿𑌦𑍍𑌰𑌾𑌯𑌾 𑌵𑌶𑌮𑍁𑌪𑍇𑌯𑌿𑌵𑌾𑌨𑍍 ।
𑌤𑌦𑍍𑌗𑌚𑍍𑌛 𑌤𑍍𑌵𑌰𑌿𑌤𑌂 𑌸𑍂𑌤 𑌰𑌾𑌜𑌪𑍁𑌤𑍍𑌰𑌂 𑌯𑌶𑌸𑍍𑌵𑌿𑌨𑌮𑍍 ॥ 63 ॥
𑌰𑌾𑌮𑌮𑌾𑌨𑌯 𑌭𑌦𑍍𑌰𑌂 𑌤𑍇 𑌨𑌾𑌤𑍍𑌰 𑌕𑌾𑌰𑍍𑌯𑌾 𑌵𑌿𑌚𑌾𑌰𑌣𑌾 ।
𑌸 𑌮𑌨𑍍𑌯𑌮𑌾𑌨𑌃 𑌕𑌲𑍍𑌯𑌾𑌣𑌂 𑌹𑍃𑌦𑌯𑍇𑌨 𑌨𑌨𑌂𑌦 𑌚 ॥ 64 ॥
𑌨𑌿𑌰𑍍𑌜𑌗𑌾𑌮 𑌚 𑌸𑌂𑌪𑍍𑌰𑍀𑌤𑍍𑌯𑌾 𑌤𑍍𑌵𑌰𑌿𑌤𑍋 𑌰𑌾𑌜𑌶𑌾𑌸𑌨𑌾𑌤𑍍 ।
𑌸𑍁𑌮𑌂𑌤𑍍𑌰𑌶𑍍𑌚𑌿𑌂𑌤𑌯𑌾𑌮𑌾𑌸 𑌤𑍍𑌵𑌰𑌿𑌤𑌂 𑌚𑍋𑌦𑌿𑌤𑌸𑍍𑌤𑌯𑌾 ॥ 65 ॥
𑌵𑍍𑌯𑌕𑍍𑌤𑌂 𑌰𑌾𑌮𑍋𑌽𑌭𑌿𑌷𑍇𑌕𑌾𑌰𑍍𑌥𑌮𑌿𑌹𑌾𑌯𑌾𑌸𑍍𑌯𑌤𑌿 𑌧𑌰𑍍𑌮𑌵𑌿𑌤𑍍 ।
𑌇𑌤𑌿 𑌸𑍂𑌤𑍋 𑌮𑌤𑌿𑌂 𑌕𑍃𑌤𑍍𑌵𑌾 𑌹𑌰𑍍𑌷𑍇𑌣 𑌮𑌹𑌤𑌾𑌽𑌽𑌵𑍃𑌤𑌃 ॥ 66 ॥
𑌨𑌿𑌰𑍍𑌜𑌗𑌾𑌮 𑌮𑌹𑌾𑌬𑌾𑌹𑍋 𑌰𑌾𑌘𑌵𑌸𑍍𑌯 𑌦𑌿𑌦𑍃𑌕𑍍𑌷𑌯𑌾 ।
𑌸𑌾𑌗𑌰𑌹𑍍𑌰𑌦𑌸𑌂𑌕𑌾𑌶𑌾𑌤𑍍𑌸𑍁𑌮𑌂𑌤𑍍𑌰𑍋𑌽𑌂𑌤𑌃𑌪𑍁𑌰𑌾𑌚𑍍𑌛𑍁𑌭𑌾𑌤𑍍 ॥ 6 ॥
𑌨𑌿𑌷𑍍𑌕𑍍𑌰𑌮𑍍𑌯 𑌜𑌨𑌸𑌂𑌬𑌾𑌧𑌂 𑌦𑌦𑌰𑍍𑌶 𑌦𑍍𑌵𑌾𑌰𑌮𑌗𑍍𑌰𑌤𑌃 ।
𑌤𑌤𑌃 𑌪𑍁𑌰𑌸𑍍𑌤𑌾𑌤𑍍𑌸𑌹𑌸𑌾 𑌵𑌿𑌨𑌿𑌰𑍍𑌗𑌤𑍋 𑌮𑌹𑍀𑌪𑌤𑍀𑌂𑌦𑍍𑌵𑌾𑌰𑌗𑌤𑍋 𑌵𑌿𑌲𑍋𑌕𑌯𑌨𑍍 ।
𑌦𑌦𑌰𑍍𑌶 𑌪𑍌𑌰𑌾𑌨𑍍𑌵𑌿𑌵𑌿𑌧𑌾𑌨𑍍𑌮𑌹𑌾𑌧𑌨𑌾 𑌨𑍁𑌪𑌸𑍍𑌥𑌿𑌤𑌾𑌂𑌦𑍍𑌵𑌾𑌰𑌮𑍁𑌪𑍇𑌤𑍍𑌯 𑌵𑌿𑌷𑍍𑌠𑌿𑌤𑌾𑌨𑍍 ॥ 6 ॥
𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌅𑌯𑍋𑌧𑍍𑌯𑌾𑌕𑌾𑌂𑌡𑍇 𑌚𑌤𑍁𑌰𑍍𑌦𑌶𑌸𑍍𑌸𑌰𑍍𑌗𑌃 ॥
