ශ්රීමද්වාල්මීකීය රාමායණේ කිෂ්කිංධාකාංඩම් ।
අථ ත්රයෝදශස්සර්ගඃ ।
ඍෂ්යමූකාත්ස ධර්මාත්මා කිෂ්කිංධාං ලක්ෂ්මණාග්රජඃ ।
ජගාම සහසුග්රීවෝ වාලිවික්රමපාලිතාම් ॥ 1 ॥
සමුද්යම්ය මහච්චාපං රාමඃ කාංචනභූෂිතම් ।
ශරාංශ්චාදිත්යසංකාශාන්ගෘහීත්වා රණසාධකාන් ॥ 2 ॥
අග්රතස්තු යයෞ තස්ය රාඝවස්ය මහාත්මනඃ ।
සුග්රීවඃ සංහතග්රීවෝ ලක්ෂ්මණශ්ච මහාබලඃ ॥ 3 ॥
පෘෂ්ඨතෝ හනුමාන්වීරෝ නලෝ නීලශ්ච වානරඃ ।
තාරශ්චෛව මහාතේජා හරියූථපයූථපඃ ॥ 4 ॥
තේ වීක්ෂමාණා වෘක්ෂාංශ්ච පුෂ්පභාරාවලංබිනඃ ।
ප්රසන්නාංබුවහාශ්චෛව සරිතස්සාගරංගමාඃ ॥ 5 ॥
කංදරාණි ච ශෛලාංශ්ච නිර්දරාණි ගුහාස්තථා ।
ශිඛරාණි ච මුඛ්යානි දරීශ්ච ප්රියදර්ශනාඃ ॥ 6 ॥
වෛඪූර්යවිමලෛඃපර්ණෛ පද්මෛශ්චාකෝශකුට්මලෛඃ ।
ශෝභිතාංත්සජලාන්මාර්ගේ තටාකාංශ්ච ව්යලෝකයන් ॥ 7 ॥
කාරංඩෛස්සාරසෛර්හංසෛර්වංජුලෛර්ජලකුක්කුටෛඃ ।
චක්රවාකෛ ස්තථා චාන්යෛශ්ශකුනෛඃ රුපනාදිතාන් ॥ 8 ॥
මෘදුශෂ්පාංකුරාහාරාන්නිර්භයාන්වනගෝචරාන් ।
චරතස්සර්වතෞऽපශ්යන් ස්ථලීෂු හරිණාන් ස්ථිතාන් ॥ 9 ॥
තටාකවෛරිණශ්චාපි ශුක්ලදංතවිභූෂිතාන් ।
ඝෝරානේකචරාන්වන්යාංද්විරදාන්කූලඝාතිනඃ ॥ 10 ॥
මත්තාන්ගිරිතටෝත්කෘෂ්ටාන්පර්වතානිව ජංගමාන් ।
වාරණාන්වාරිදප්රඛ්යාන්මහීරේණුසමුක්ෂිතාන් ॥ 11 ॥
වනේ වනචරාංශ්චාන්යාන්ඛේචරාංශ්ච විහංගමාන් ।
පශ්යංතස්ත්වරිතා ජග්මුස්සුග්රීවවශවර්තිනඃ ॥ 12 ॥
තේෂාං තු ගච්ඡතාං තත්ර ත්වරිතං රඝුනංදනඃ ।
ද්රුමෂංඩං වනං දෘෂ්ට්වා රාමස්සුග්රීවමබ්රවීත් ॥ 13 ॥
ඒෂ මේඝ ඉවාකාශේ වෘක්ෂෂංඩඃ ප්රකාශතේ ।
මේඝසංඝාතවිපුලඃ පර්යංතකදලීවෘතඃ ॥ 14 ॥
කිමේතත් ජ්ඤාතුමිච්ඡාමි සඛේ කෞතූහලං හි මේ ।
කෞතූහලාපනයනං කර්තුමිච්ඡාම්යහං ත්වයා ॥ 15 ॥
තස්ය තද්වචනං ශ්රුත්වා රාඝවස්ය මහාත්මනඃ ।
ගච්ඡන්නේවාචචක්ෂේऽථ සුග්රීවස්තන්මහද්වනම් ॥ 16 ॥
ඒතද්රාඝව විස්තීර්ණමාශ්රමං ශ්රමනාශනම් ।
උද්යානවනසංපන්නං ස්වාදුමූලඵලෝදකම් ॥ 17 ॥
අත්ර සප්තජනා නාම මුනය ස්සංශ්රිතව්රතාඃ ।
සප්තෛවාසන්නධශශීර්ෂා නියතං ජලශායිනඃ ॥ 18 ॥
සප්තරාත්රකෘතාහාරා වායුනාචලවාසිනඃ ।
දිවං වර්ෂශතෛර්යාතාඃ සප්තභිඃ සකලේබරාඃ ॥ 19 ॥
තේෂාමේවං ප්රභාවානාං ද්රුමප්රාකාරසංවෘතම් ।
ආශ්රමස්සුදුරාධර්ෂ අපි සේංද්රෛස්සුරාසුරෛඃ ॥ 20 ॥
පක්ෂිණෝ වර්ජයංත්යේතත්තථාऽන්යේ වනචාරිණඃ ।
විශංති මෝහාද්යේऽප්යත්ර නිවර්තංතේ න තේ පුනඃ ॥ 21 ॥
විභූෂණරවාස්තත්ර ශ්රූයංතේ සකලාක්ෂරාඃ ।
තූර්යගීතස්වනාශ්චාත්ර ගංධෝ දිව්යශ්ච රාඝව ॥ 22 ॥
ත්රේතාග්නයෝऽපි දීප්යංතේ දූමෝ හ්යත්ර ප්රකාශතේ ।
වේෂ්ටයන්නිව වෘක්ෂාග්රාන්කපෝතාංගාරුණෝ ඝනඃ ॥ 23 ॥
ඒතේ වෘක්ෂාඃ ප්රකාශංතේ ධූමසංසක්තමස්තකාඃ ।
මේඝජාලප්රතිච්ඡන්නා වෛඪූර්යගිරයෝ යථා ॥ 24 ॥
කුරු ප්රණාමං ධර්මාත්මංස්තේෂාමුද්දිශ්ය රාඝව ।
ලක්ෂ්මණේව සහ භ්රාත්රා ප්රයංතස්සයතාංජලිඃ ॥ 25 ॥
ප්රණමංති හි යේ තේෂාං මුනීනාං භාවිතාත්මනාම් ।
න තේෂාමශුභං කිංචිච්ඡරීරේ රාම දෘශ්යතේ ॥ 26 ॥
තතෝ රාමස්සහ භ්රාත්රා ලක්ෂ්මණේන කෘතාංජලිඃ ।
සමුද්දිශ්ය මහාත්මානස්තානෘෂීනභ්යවාදයත් ॥ 27 ॥
අභිවාද්ය තු ධර්මාත්මා රාමෝ භ්රාතා ච ලක්ෂ්මණඃ ।
සුග්රීවෝ වානරාශ්චෛව ජග්මුසංහෘෂ්ටමානසාඃ ॥ 28 ॥
තේ ගත්වා දූරමධ්වානං තස්මාත්සප්තජනාශ්රමාත් ।
දදෘශුස්තාං දුරාධර්ෂාං කිෂ්කිංධාං වාලිපාලිතාම් ॥ 29 ॥
තතස්තු රාමානුජරාමවානරාඃ ප්රගෘහ්ය ශස්ත්රාණ්යුදිතාග්ර්යතේජසඃ ।
පුරීං සුරේශාත්මජවීර්යපාලිතාං වධාය ශත්රෝඃ පුනරාගතාස්සහ ॥ 30 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ කිෂ්කිංධාකාංඩේ ත්රයෝදශස්සර්ගඃ ॥
