𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌕𑌿𑌷𑍍𑌕𑌿𑌂𑌧𑌾𑌕𑌾𑌂𑌡𑌮𑍍 ।
𑌅𑌥 𑌤𑍍𑌰𑌯𑍋𑌦𑌶𑌸𑍍𑌸𑌰𑍍𑌗𑌃 ।
𑌋𑌷𑍍𑌯𑌮𑍂𑌕𑌾𑌤𑍍𑌸 𑌧𑌰𑍍𑌮𑌾𑌤𑍍𑌮𑌾 𑌕𑌿𑌷𑍍𑌕𑌿𑌂𑌧𑌾𑌂 𑌲𑌕𑍍𑌷𑍍𑌮𑌣𑌾𑌗𑍍𑌰𑌜𑌃 ।
𑌜𑌗𑌾𑌮 𑌸𑌹𑌸𑍁𑌗𑍍𑌰𑍀𑌵𑍋 𑌵𑌾𑌲𑌿𑌵𑌿𑌕𑍍𑌰𑌮𑌪𑌾𑌲𑌿𑌤𑌾𑌮𑍍 ॥ 1 ॥
𑌸𑌮𑍁𑌦𑍍𑌯𑌮𑍍𑌯 𑌮𑌹𑌚𑍍𑌚𑌾𑌪𑌂 𑌰𑌾𑌮𑌃 𑌕𑌾𑌂𑌚𑌨𑌭𑍂𑌷𑌿𑌤𑌮𑍍 ।
𑌶𑌰𑌾𑌂𑌶𑍍𑌚𑌾𑌦𑌿𑌤𑍍𑌯𑌸𑌂𑌕𑌾𑌶𑌾𑌨𑍍𑌗𑍃𑌹𑍀𑌤𑍍𑌵𑌾 𑌰𑌣𑌸𑌾𑌧𑌕𑌾𑌨𑍍 ॥ 2 ॥
𑌅𑌗𑍍𑌰𑌤𑌸𑍍𑌤𑍁 𑌯𑌯𑍌 𑌤𑌸𑍍𑌯 𑌰𑌾𑌘𑌵𑌸𑍍𑌯 𑌮𑌹𑌾𑌤𑍍𑌮𑌨𑌃 ।
𑌸𑍁𑌗𑍍𑌰𑍀𑌵𑌃 𑌸𑌂𑌹𑌤𑌗𑍍𑌰𑍀𑌵𑍋 𑌲𑌕𑍍𑌷𑍍𑌮𑌣𑌶𑍍𑌚 𑌮𑌹𑌾𑌬𑌲𑌃 ॥ 3 ॥
𑌪𑍃𑌷𑍍𑌠𑌤𑍋 𑌹𑌨𑍁𑌮𑌾𑌨𑍍𑌵𑍀𑌰𑍋 𑌨𑌲𑍋 𑌨𑍀𑌲𑌶𑍍𑌚 𑌵𑌾𑌨𑌰𑌃 ।
𑌤𑌾𑌰𑌶𑍍𑌚𑍈𑌵 𑌮𑌹𑌾𑌤𑍇𑌜𑌾 𑌹𑌰𑌿𑌯𑍂𑌥𑌪𑌯𑍂𑌥𑌪𑌃 ॥ 4 ॥
𑌤𑍇 𑌵𑍀𑌕𑍍𑌷𑌮𑌾𑌣𑌾 𑌵𑍃𑌕𑍍𑌷𑌾𑌂𑌶𑍍𑌚 𑌪𑍁𑌷𑍍𑌪𑌭𑌾𑌰𑌾𑌵𑌲𑌂𑌬𑌿𑌨𑌃 ।
𑌪𑍍𑌰𑌸𑌨𑍍𑌨𑌾𑌂𑌬𑍁𑌵𑌹𑌾𑌶𑍍𑌚𑍈𑌵 𑌸𑌰𑌿𑌤𑌸𑍍𑌸𑌾𑌗𑌰𑌂𑌗𑌮𑌾𑌃 ॥ 5 ॥
𑌕𑌂𑌦𑌰𑌾𑌣𑌿 𑌚 𑌶𑍈𑌲𑌾𑌂𑌶𑍍𑌚 𑌨𑌿𑌰𑍍𑌦𑌰𑌾𑌣𑌿 𑌗𑍁𑌹𑌾𑌸𑍍𑌤𑌥𑌾 ।
𑌶𑌿𑌖𑌰𑌾𑌣𑌿 𑌚 𑌮𑍁𑌖𑍍𑌯𑌾𑌨𑌿 𑌦𑌰𑍀𑌶𑍍𑌚 𑌪𑍍𑌰𑌿𑌯𑌦𑌰𑍍𑌶𑌨𑌾𑌃 ॥ 6 ॥
𑌵𑍈𑌢𑍂𑌰𑍍𑌯𑌵𑌿𑌮𑌲𑍈𑌃𑌪𑌰𑍍𑌣𑍈 𑌪𑌦𑍍𑌮𑍈𑌶𑍍𑌚𑌾𑌕𑍋𑌶𑌕𑍁𑌟𑍍𑌮𑌲𑍈𑌃 ।
𑌶𑍋𑌭𑌿𑌤𑌾𑌂𑌤𑍍𑌸𑌜𑌲𑌾𑌨𑍍𑌮𑌾𑌰𑍍𑌗𑍇 𑌤𑌟𑌾𑌕𑌾𑌂𑌶𑍍𑌚 𑌵𑍍𑌯𑌲𑍋𑌕𑌯𑌨𑍍 ॥ ॥
𑌕𑌾𑌰𑌂𑌡𑍈𑌸𑍍𑌸𑌾𑌰𑌸𑍈𑌰𑍍𑌹𑌂𑌸𑍈𑌰𑍍𑌵𑌂𑌜𑍁𑌲𑍈𑌰𑍍𑌜𑌲𑌕𑍁𑌕𑍍𑌕𑍁𑌟𑍈𑌃 ।
𑌚𑌕𑍍𑌰𑌵𑌾𑌕𑍈 𑌸𑍍𑌤𑌥𑌾 𑌚𑌾𑌨𑍍𑌯𑍈𑌶𑍍𑌶𑌕𑍁𑌨𑍈𑌃 𑌰𑍁𑌪𑌨𑌾𑌦𑌿𑌤𑌾𑌨𑍍 ॥ ॥
𑌮𑍃𑌦𑍁𑌶𑌷𑍍𑌪𑌾𑌂𑌕𑍁𑌰𑌾𑌹𑌾𑌰𑌾𑌨𑍍𑌨𑌿𑌰𑍍𑌭𑌯𑌾𑌨𑍍𑌵𑌨𑌗𑍋𑌚𑌰𑌾𑌨𑍍 ।
𑌚𑌰𑌤𑌸𑍍𑌸𑌰𑍍𑌵𑌤𑍌𑌽𑌪𑌶𑍍𑌯𑌨𑍍 𑌸𑍍𑌥𑌲𑍀𑌷𑍁 𑌹𑌰𑌿𑌣𑌾𑌨𑍍 𑌸𑍍𑌥𑌿𑌤𑌾𑌨𑍍 ॥ ॥
𑌤𑌟𑌾𑌕𑌵𑍈𑌰𑌿𑌣𑌶𑍍𑌚𑌾𑌪𑌿 𑌶𑍁𑌕𑍍𑌲𑌦𑌂𑌤𑌵𑌿𑌭𑍂𑌷𑌿𑌤𑌾𑌨𑍍 ।
𑌘𑍋𑌰𑌾𑌨𑍇𑌕𑌚𑌰𑌾𑌨𑍍𑌵𑌨𑍍𑌯𑌾𑌂𑌦𑍍𑌵𑌿𑌰𑌦𑌾𑌨𑍍𑌕𑍂𑌲𑌘𑌾𑌤𑌿𑌨𑌃 ॥ 10 ॥
𑌮𑌤𑍍𑌤𑌾𑌨𑍍𑌗𑌿𑌰𑌿𑌤𑌟𑍋𑌤𑍍𑌕𑍃𑌷𑍍𑌟𑌾𑌨𑍍𑌪𑌰𑍍𑌵𑌤𑌾𑌨𑌿𑌵 𑌜𑌂𑌗𑌮𑌾𑌨𑍍 ।
𑌵𑌾𑌰𑌣𑌾𑌨𑍍𑌵𑌾𑌰𑌿𑌦𑌪𑍍𑌰𑌖𑍍𑌯𑌾𑌨𑍍𑌮𑌹𑍀𑌰𑍇𑌣𑍁𑌸𑌮𑍁𑌕𑍍𑌷𑌿𑌤𑌾𑌨𑍍 ॥ 11 ॥
𑌵𑌨𑍇 𑌵𑌨𑌚𑌰𑌾𑌂𑌶𑍍𑌚𑌾𑌨𑍍𑌯𑌾𑌨𑍍𑌖𑍇𑌚𑌰𑌾𑌂𑌶𑍍𑌚 𑌵𑌿𑌹𑌂𑌗𑌮𑌾𑌨𑍍 ।
𑌪𑌶𑍍𑌯𑌂𑌤𑌸𑍍𑌤𑍍𑌵𑌰𑌿𑌤𑌾 𑌜𑌗𑍍𑌮𑍁𑌸𑍍𑌸𑍁𑌗𑍍𑌰𑍀𑌵𑌵𑌶𑌵𑌰𑍍𑌤𑌿𑌨𑌃 ॥ 12 ॥
𑌤𑍇𑌷𑌾𑌂 𑌤𑍁 𑌗𑌚𑍍𑌛𑌤𑌾𑌂 𑌤𑌤𑍍𑌰 𑌤𑍍𑌵𑌰𑌿𑌤𑌂 𑌰𑌘𑍁𑌨𑌂𑌦𑌨𑌃 ।
𑌦𑍍𑌰𑍁𑌮𑌷𑌂𑌡𑌂 𑌵𑌨𑌂 𑌦𑍃𑌷𑍍𑌟𑍍𑌵𑌾 𑌰𑌾𑌮𑌸𑍍𑌸𑍁𑌗𑍍𑌰𑍀𑌵𑌮𑌬𑍍𑌰𑌵𑍀𑌤𑍍 ॥ 13 ॥
𑌏𑌷 𑌮𑍇𑌘 𑌇𑌵𑌾𑌕𑌾𑌶𑍇 𑌵𑍃𑌕𑍍𑌷𑌷𑌂𑌡𑌃 𑌪𑍍𑌰𑌕𑌾𑌶𑌤𑍇 ।
𑌮𑍇𑌘𑌸𑌂𑌘𑌾𑌤𑌵𑌿𑌪𑍁𑌲𑌃 𑌪𑌰𑍍𑌯𑌂𑌤𑌕𑌦𑌲𑍀𑌵𑍃𑌤𑌃 ॥ 14 ॥
𑌕𑌿𑌮𑍇𑌤𑌤𑍍 𑌜𑍍𑌞𑌾𑌤𑍁𑌮𑌿𑌚𑍍𑌛𑌾𑌮𑌿 𑌸𑌖𑍇 𑌕𑍌𑌤𑍂𑌹𑌲𑌂 𑌹𑌿 𑌮𑍇 ।
𑌕𑍌𑌤𑍂𑌹𑌲𑌾𑌪𑌨𑌯𑌨𑌂 𑌕𑌰𑍍𑌤𑍁𑌮𑌿𑌚𑍍𑌛𑌾𑌮𑍍𑌯𑌹𑌂 𑌤𑍍𑌵𑌯𑌾 ॥ 15 ॥
𑌤𑌸𑍍𑌯 𑌤𑌦𑍍𑌵𑌚𑌨𑌂 𑌶𑍍𑌰𑍁𑌤𑍍𑌵𑌾 𑌰𑌾𑌘𑌵𑌸𑍍𑌯 𑌮𑌹𑌾𑌤𑍍𑌮𑌨𑌃 ।
𑌗𑌚𑍍𑌛𑌨𑍍𑌨𑍇𑌵𑌾𑌚𑌚𑌕𑍍𑌷𑍇𑌽𑌥 𑌸𑍁𑌗𑍍𑌰𑍀𑌵𑌸𑍍𑌤𑌨𑍍𑌮𑌹𑌦𑍍𑌵𑌨𑌮𑍍 ॥ 16 ॥
𑌏𑌤𑌦𑍍𑌰𑌾𑌘𑌵 𑌵𑌿𑌸𑍍𑌤𑍀𑌰𑍍𑌣𑌮𑌾𑌶𑍍𑌰𑌮𑌂 𑌶𑍍𑌰𑌮𑌨𑌾𑌶𑌨𑌮𑍍 ।
𑌉𑌦𑍍𑌯𑌾𑌨𑌵𑌨𑌸𑌂𑌪𑌨𑍍𑌨𑌂 𑌸𑍍𑌵𑌾𑌦𑍁𑌮𑍂𑌲𑌫𑌲𑍋𑌦𑌕𑌮𑍍 ॥ 1 ॥
𑌅𑌤𑍍𑌰 𑌸𑌪𑍍𑌤𑌜𑌨𑌾 𑌨𑌾𑌮 𑌮𑍁𑌨𑌯 𑌸𑍍𑌸𑌂𑌶𑍍𑌰𑌿𑌤𑌵𑍍𑌰𑌤𑌾𑌃 ।
𑌸𑌪𑍍𑌤𑍈𑌵𑌾𑌸𑌨𑍍𑌨𑌧𑌶𑌶𑍀𑌰𑍍𑌷𑌾 𑌨𑌿𑌯𑌤𑌂 𑌜𑌲𑌶𑌾𑌯𑌿𑌨𑌃 ॥ 1 ॥
𑌸𑌪𑍍𑌤𑌰𑌾𑌤𑍍𑌰𑌕𑍃𑌤𑌾𑌹𑌾𑌰𑌾 𑌵𑌾𑌯𑍁𑌨𑌾𑌚𑌲𑌵𑌾𑌸𑌿𑌨𑌃 ।
𑌦𑌿𑌵𑌂 𑌵𑌰𑍍𑌷𑌶𑌤𑍈𑌰𑍍𑌯𑌾𑌤𑌾𑌃 𑌸𑌪𑍍𑌤𑌭𑌿𑌃 𑌸𑌕𑌲𑍇𑌬𑌰𑌾𑌃 ॥ 1 ॥
𑌤𑍇𑌷𑌾𑌮𑍇𑌵𑌂 𑌪𑍍𑌰𑌭𑌾𑌵𑌾𑌨𑌾𑌂 𑌦𑍍𑌰𑍁𑌮𑌪𑍍𑌰𑌾𑌕𑌾𑌰𑌸𑌂𑌵𑍃𑌤𑌮𑍍 ।
𑌆𑌶𑍍𑌰𑌮𑌸𑍍𑌸𑍁𑌦𑍁𑌰𑌾𑌧𑌰𑍍𑌷 𑌅𑌪𑌿 𑌸𑍇𑌂𑌦𑍍𑌰𑍈𑌸𑍍𑌸𑍁𑌰𑌾𑌸𑍁𑌰𑍈𑌃 ॥ 20 ॥
𑌪𑌕𑍍𑌷𑌿𑌣𑍋 𑌵𑌰𑍍𑌜𑌯𑌂𑌤𑍍𑌯𑍇𑌤𑌤𑍍𑌤𑌥𑌾𑌽𑌨𑍍𑌯𑍇 𑌵𑌨𑌚𑌾𑌰𑌿𑌣𑌃 ।
𑌵𑌿𑌶𑌂𑌤𑌿 𑌮𑍋𑌹𑌾𑌦𑍍𑌯𑍇𑌽𑌪𑍍𑌯𑌤𑍍𑌰 𑌨𑌿𑌵𑌰𑍍𑌤𑌂𑌤𑍇 𑌨 𑌤𑍇 𑌪𑍁𑌨𑌃 ॥ 21 ॥
𑌵𑌿𑌭𑍂𑌷𑌣𑌰𑌵𑌾𑌸𑍍𑌤𑌤𑍍𑌰 𑌶𑍍𑌰𑍂𑌯𑌂𑌤𑍇 𑌸𑌕𑌲𑌾𑌕𑍍𑌷𑌰𑌾𑌃 ।
𑌤𑍂𑌰𑍍𑌯𑌗𑍀𑌤𑌸𑍍𑌵𑌨𑌾𑌶𑍍𑌚𑌾𑌤𑍍𑌰 𑌗𑌂𑌧𑍋 𑌦𑌿𑌵𑍍𑌯𑌶𑍍𑌚 𑌰𑌾𑌘𑌵 ॥ 22 ॥
𑌤𑍍𑌰𑍇𑌤𑌾𑌗𑍍𑌨𑌯𑍋𑌽𑌪𑌿 𑌦𑍀𑌪𑍍𑌯𑌂𑌤𑍇 𑌦𑍂𑌮𑍋 𑌹𑍍𑌯𑌤𑍍𑌰 𑌪𑍍𑌰𑌕𑌾𑌶𑌤𑍇 ।
𑌵𑍇𑌷𑍍𑌟𑌯𑌨𑍍𑌨𑌿𑌵 𑌵𑍃𑌕𑍍𑌷𑌾𑌗𑍍𑌰𑌾𑌨𑍍𑌕𑌪𑍋𑌤𑌾𑌂𑌗𑌾𑌰𑍁𑌣𑍋 𑌘𑌨𑌃 ॥ 23 ॥
𑌏𑌤𑍇 𑌵𑍃𑌕𑍍𑌷𑌾𑌃 𑌪𑍍𑌰𑌕𑌾𑌶𑌂𑌤𑍇 𑌧𑍂𑌮𑌸𑌂𑌸𑌕𑍍𑌤𑌮𑌸𑍍𑌤𑌕𑌾𑌃 ।
𑌮𑍇𑌘𑌜𑌾𑌲𑌪𑍍𑌰𑌤𑌿𑌚𑍍𑌛𑌨𑍍𑌨𑌾 𑌵𑍈𑌢𑍂𑌰𑍍𑌯𑌗𑌿𑌰𑌯𑍋 𑌯𑌥𑌾 ॥ 24 ॥
𑌕𑍁𑌰𑍁 𑌪𑍍𑌰𑌣𑌾𑌮𑌂 𑌧𑌰𑍍𑌮𑌾𑌤𑍍𑌮𑌂𑌸𑍍𑌤𑍇𑌷𑌾𑌮𑍁𑌦𑍍𑌦𑌿𑌶𑍍𑌯 𑌰𑌾𑌘𑌵 ।
𑌲𑌕𑍍𑌷𑍍𑌮𑌣𑍇𑌵 𑌸𑌹 𑌭𑍍𑌰𑌾𑌤𑍍𑌰𑌾 𑌪𑍍𑌰𑌯𑌂𑌤𑌸𑍍𑌸𑌯𑌤𑌾𑌂𑌜𑌲𑌿𑌃 ॥ 25 ॥
𑌪𑍍𑌰𑌣𑌮𑌂𑌤𑌿 𑌹𑌿 𑌯𑍇 𑌤𑍇𑌷𑌾𑌂 𑌮𑍁𑌨𑍀𑌨𑌾𑌂 𑌭𑌾𑌵𑌿𑌤𑌾𑌤𑍍𑌮𑌨𑌾𑌮𑍍 ।
𑌨 𑌤𑍇𑌷𑌾𑌮𑌶𑍁𑌭𑌂 𑌕𑌿𑌂𑌚𑌿𑌚𑍍𑌛𑌰𑍀𑌰𑍇 𑌰𑌾𑌮 𑌦𑍃𑌶𑍍𑌯𑌤𑍇 ॥ 26 ॥
𑌤𑌤𑍋 𑌰𑌾𑌮𑌸𑍍𑌸𑌹 𑌭𑍍𑌰𑌾𑌤𑍍𑌰𑌾 𑌲𑌕𑍍𑌷𑍍𑌮𑌣𑍇𑌨 𑌕𑍃𑌤𑌾𑌂𑌜𑌲𑌿𑌃 ।
𑌸𑌮𑍁𑌦𑍍𑌦𑌿𑌶𑍍𑌯 𑌮𑌹𑌾𑌤𑍍𑌮𑌾𑌨𑌸𑍍𑌤𑌾𑌨𑍃𑌷𑍀𑌨𑌭𑍍𑌯𑌵𑌾𑌦𑌯𑌤𑍍 ॥ 2 ॥
𑌅𑌭𑌿𑌵𑌾𑌦𑍍𑌯 𑌤𑍁 𑌧𑌰𑍍𑌮𑌾𑌤𑍍𑌮𑌾 𑌰𑌾𑌮𑍋 𑌭𑍍𑌰𑌾𑌤𑌾 𑌚 𑌲𑌕𑍍𑌷𑍍𑌮𑌣𑌃 ।
𑌸𑍁𑌗𑍍𑌰𑍀𑌵𑍋 𑌵𑌾𑌨𑌰𑌾𑌶𑍍𑌚𑍈𑌵 𑌜𑌗𑍍𑌮𑍁𑌸𑌂𑌹𑍃𑌷𑍍𑌟𑌮𑌾𑌨𑌸𑌾𑌃 ॥ 2 ॥
𑌤𑍇 𑌗𑌤𑍍𑌵𑌾 𑌦𑍂𑌰𑌮𑌧𑍍𑌵𑌾𑌨𑌂 𑌤𑌸𑍍𑌮𑌾𑌤𑍍𑌸𑌪𑍍𑌤𑌜𑌨𑌾𑌶𑍍𑌰𑌮𑌾𑌤𑍍 ।
𑌦𑌦𑍃𑌶𑍁𑌸𑍍𑌤𑌾𑌂 𑌦𑍁𑌰𑌾𑌧𑌰𑍍𑌷𑌾𑌂 𑌕𑌿𑌷𑍍𑌕𑌿𑌂𑌧𑌾𑌂 𑌵𑌾𑌲𑌿𑌪𑌾𑌲𑌿𑌤𑌾𑌮𑍍 ॥ 2 ॥
𑌤𑌤𑌸𑍍𑌤𑍁 𑌰𑌾𑌮𑌾𑌨𑍁𑌜𑌰𑌾𑌮𑌵𑌾𑌨𑌰𑌾𑌃 𑌪𑍍𑌰𑌗𑍃𑌹𑍍𑌯 𑌶𑌸𑍍𑌤𑍍𑌰𑌾𑌣𑍍𑌯𑍁𑌦𑌿𑌤𑌾𑌗𑍍𑌰𑍍𑌯𑌤𑍇𑌜𑌸𑌃 ।
𑌪𑍁𑌰𑍀𑌂 𑌸𑍁𑌰𑍇𑌶𑌾𑌤𑍍𑌮𑌜𑌵𑍀𑌰𑍍𑌯𑌪𑌾𑌲𑌿𑌤𑌾𑌂 𑌵𑌧𑌾𑌯 𑌶𑌤𑍍𑌰𑍋𑌃 𑌪𑍁𑌨𑌰𑌾𑌗𑌤𑌾𑌸𑍍𑌸𑌹 ॥ 30 ॥
𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌕𑌿𑌷𑍍𑌕𑌿𑌂𑌧𑌾𑌕𑌾𑌂𑌡𑍇 𑌤𑍍𑌰𑌯𑍋𑌦𑌶𑌸𑍍𑌸𑌰𑍍𑌗𑌃 ॥
