ශ්රීමද්වාල්මීකීය රාමායණේ කිෂ්කිංධාකාංඩම් ।
අථ ෂෝඩශස්සර්ගඃ ।
තාමේවං බ්රුවතීං තාරාං තාරාධිපනිභානනාම් ।
වාලී නිර්භර්ත්සයාමාස වචනං චේදමබ්රවීත් ॥ 1 ॥
ගර්ජතෝऽස්ය ච සුසංභ්රශ්ච භ්රාතුඃ ශත්රෝර්විශේෂතඃ ।
මර්ෂයිෂ්යාම්යහං කේන කාරණේන වරානනේ ॥ 2 ॥
අධර්ෂිතානාං ශූරාණාං සමරේෂ්වනිවර්තිනාම් ।
ධර්ෂණාමර්ෂණං භීරු මරණාදතිරිච්යතේ ॥ 3 ॥
සෝඪුං න ච සමර්ථෝऽහං යුද්ධකාමස්ය සංයුගේ ।
සුග්රීවස්ය ච සම්රංභං හීනග්රීවස්ය ගර්ජතඃ ॥ 4 ॥
න ච කාර්යෝ විෂාදස්තේ රාඝවං ප්රති මත්කෘතේ ।
ධර්මජ්ඤශ්ච කෘතජ්ඤශ්ච කථං පාපං කරිෂ්යති ॥ 5 ॥
නිවර්තස්ව සහ ස්ත්රීභිඃ කථං භූයෝऽනුගච්ඡසි ।
සෞහෘදං දර්ශිතං තාරේ මයි භක්තිඃ කෘතා ත්වයා ॥ 6 ॥
ප්රතියෝත්ස්යාම්යහං ගත්වා සුග්රීවං ජහි සංභ්රමම් ।
දර්පමාත්රං විනේෂ්යාමි න ච ප්රාණෛර්විමෝක්ෂ්යතේ ॥ 7 ॥
අහං හ්යාජෞස්ථිතස්යාස්ය කරිෂ්යාමි යථේප්සිතම් ।
වෘක්ෂෛර්මුෂ්ටිප්රහාරෛශ්ච පීඩිතඃ ප්රතියාස්යති ॥ 8 ॥
න මේ ගර්විතමායස්තං සහිෂ්යති දුරාත්මවාන් ।
කෘතං තාරේ සහාංයත්වං සෞහෘදං දර්ශිතං මයි ॥ 9 ॥
ශාපිතාऽපි මම ප්රාණෛර්නිවර්තස්ව ජයේන ච ।
අහං ජිත්වා නිවර්තිෂ්යේ තමහං භ්රාතරං රණේ ॥ 10 ॥
තං තු තාරා පරිෂ්වජ්ය වාලිනං ප්රියවාදිනී ।
චකාර රුදතී මංදං දක්ෂිණා සා ප්රදක්ෂිණම් ॥ 11 ॥
තතඃ ස්වස්ත්යයනං කෘත්වා මංත්රවිද්විජයෛෂිණී ।
අංතඃපුරං සහ ස්ත්රීභිඃ ප්රවිෂ්ටා ශෝකමෝහිතා ॥ 12 ॥
ප්රවිෂ්ටායාං තු තාරායාං සහ ස්ත්රීභිස්ස්වමාලයම් ।
නගරාන්නිර්යයෞ ක්රුද්ධෝ මහාසර්ප ඉව ශ්වසන් ॥ 13 ॥
ස නිශ්ශ්වස්ය මහාතේජා වාලී පරමරෝෂණඃ ।
සර්වතශ්චාරයන් දෘෂ්ටිං ශත්රුදර්ශනකාංක්ෂයා ॥ 14 ॥
ස දදර්ශ තතශ්ශ්රීමාන් සුග්රීවං හේමපිංගලම් ।
සුසංවීතමවෂ්ටබ්ධං දීප්යමානමිවානලම් ॥ 15 ॥
ස තං දෘෂ්ට්වා මහාවීර්යං සුග්රීවං පර්යවස්ථිතම් ।
ගාඪං පරිදධේ වාසෝ වාලී පරමරෝෂණඃ ॥ 16 ॥
ස වාලී ගාඪසංවීතෝ මුෂ්ටිමුද්යම්ය වීර්යවාන් ।
සුග්රීවමේවාභිමුඛෝ යයෞ යෝද්ධුං කෘතක්ෂණඃ ॥ 17 ॥
ශ්ලිෂ්ටං මුෂ්ටිං සමුද්යම්ය සංරබ්ධතරමාගතඃ ।
සුග්රීවෝऽපි සමුද්දිශ්ය වාලිනං හේමමාලිනම් ॥ 18 ॥
තං වාලී ක්රෝධතාම්රාක්ෂස්සුග්රීවං රණපංඩිතම් ।
ආපතංතං මහාවේගමිදං වචනමබ්රවීත් ॥ 19 ॥
ඒෂ මුෂ්ටිර්මයාබද්ධෝ ගාඪස්සන්නිහිතාංගුලිඃ ।
මයා වේගවිමුක්තස්තේ ප්රාණානාදාය යාස්යති ॥ 20 ॥
ඒවමුක්තස්තු සුග්රීවඃ ක්රුද්ධෝ වාලිනමබ්රවීත් ।
තවෛව චා හරන්ප්රාණාන්මුෂ්ටිඃ පතතු මූර්ධනි ॥ 21 ॥
තාඩිතස්තේන සංකෘද්ධස්සමභික්රම්ය වේගිතඃ ।
අභවච්ඡෝණිතෝද්ගාරී සෝත්පීඩ ඉව පර්වතඃ ॥ 22 ॥
සුග්රීවේණ තු නිස්සංගං සාලමුත්පාට්ය තේජසා ।
ගාත්රේෂ්වභිහතෝ වාලී වජ්රේණේව මහාගිරිඃ ॥ 23 ॥
ස තු වාලී ප්රචලිතස්සාලතාඩනවිහ්වලඃ ।
ගුරුභාරසමාක්රාංතෝ නෞ සාර්ථ ඉව සාගරේ ॥ 24 ॥
තෞ භීමබලවික්රාංතෞ සුපර්ණසමවේගිනෞ ।
ප්රවෘද්ධෞ ඝෝරවපුෂෞ චංද්රසූර්යාවිවාංබරේ ।
පරස්පරමමිත්රඝ්නෞ ච්ඡිද්රාන්වේෂණතත්පරෞ ॥ 25 ॥
තතෝऽවර්ධත වාලී තු බලවීර්යසමන්විතඃ ।
සූර්යපුත්රෝ මහාවීර්යස්සුග්රීවඃ පරිහීයතේ ॥ 26 ॥
වාලිනා භග්නදර්පස්තු සුග්රීවෝ මංදවික්රමඃ ।
වාලිනං ප්රති සාමර්ෂෝ දර්ශයාමාස ලාඝවම් ॥ 27 ॥
වෘක්ෂෛඃ ස්සශාඛෛ ස්සශිඛෛර්වජ්රකෝටිනිභෛර්නඛෛඃ ॥ 28 ॥
මුෂ්ටිභිර්ජානුභිඃ පද්භිර්බාහුභිශ්ච පුනඃ පුනඃ ।
තයෝර්යුද්ධමභූද්ඝෝරං වෘත්රවාසවයෝරිව ॥ 29 ॥
තෞ ශෝණිතාක්තෞ යුධ්යේතාං වානරෞ වනචාරිණෞ ।
මේඝාවිව මහාශබ්දෛ ස්තර්ජමානෞ පරස්පරම් ॥ 30 ॥
හීයමානමථෝऽපශ්යත්සුග්රීවං වානරේශ්වරම් ।
වීක්ෂමාණං දිශශ්චෛව රාඝවස්ස මුහුර්මුහුඃ ॥ 31 ॥
තතෝ රාමෝ මහාතේජා ආර්තං දෘෂ්ට්වා හරීශ්වරම් ।
ශරං ච වීක්ෂතේ වීරෝ වාලිනෝ වධකාරණාත් ॥ 32 ॥
තතෝ ධනුෂි සංධාය ශරමාශීවිෂෝපමම් ।
පුරයාමාස තච්චාපං කාලචක්රමිවාංතකඃ ॥ 33 ॥
තස්ය ජ්යාතලඝෝෂේණ ත්රස්තාඃ පත්රරථේශ්වරාඃ ।
ප්රදුද්රුවුර්මෘගාශ්චෛව යුගාංත ඉව මෝහිතාඃ ॥ 34 ॥
මුක්තස්තු වජ්රනිර්ඝෝෂඃ ප්රදීප්තාශනිසන්නිභඃ ।
රාඝවේණ මහාබාණෝ වාලිවක්ෂසි පාතිතඃ ॥ 35 ॥
තතස්තේන මහාතේජා වීයෞටත්සික්තඃ කපීශ්වරඃ ।
වේගේනාභිහතෝ වාලී නිපපාත මහීතලේ ॥ 36 ॥
ඉංද්රධ්වජ ඉවෝද්ධූතඃ පෞර්ණමාස්යාං මහීතලේ ।
ආශ්වයුක්සමයේ මාසි ගතශ්රීකෝ විචේතනඃ ॥ 37 ॥
නරෝත්තමඃ කාලයුගාංතකෝපමං ශරෝත්තමං කාංචනරූප්යභුෂිතම් ।
සසර්ජ දීප්තං තමමිත්රමර්දනං සධූමමග්නිං මුඛතෝ යථා හරඃ ॥ 38 ॥
අථෝක්ෂිතශ්ශෝණිතතෝයවිස්රවෛ ස්සුපුෂ්පිතාශෝක ඉවානිලෝද්ධතඃ ।
විචේතනෝ වාසවසූනුරාහවේ විභ්රංශිතේංද්රධ්වජවත්ක්ෂිතිං ගතඃ ॥ 39 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ කිෂ්කිංධාකාංඩේ ෂෝඩශස්සර්ගඃ ॥
