𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌕𑌿𑌷𑍍𑌕𑌿𑌂𑌧𑌾𑌕𑌾𑌂𑌡𑌮𑍍 ।
𑌅𑌥 𑌷𑍋𑌡𑌶𑌸𑍍𑌸𑌰𑍍𑌗𑌃 ।
𑌤𑌾𑌮𑍇𑌵𑌂 𑌬𑍍𑌰𑍁𑌵𑌤𑍀𑌂 𑌤𑌾𑌰𑌾𑌂 𑌤𑌾𑌰𑌾𑌧𑌿𑌪𑌨𑌿𑌭𑌾𑌨𑌨𑌾𑌮𑍍 ।
𑌵𑌾𑌲𑍀 𑌨𑌿𑌰𑍍𑌭𑌰𑍍𑌤𑍍𑌸𑌯𑌾𑌮𑌾𑌸 𑌵𑌚𑌨𑌂 𑌚𑍇𑌦𑌮𑌬𑍍𑌰𑌵𑍀𑌤𑍍 ॥ 1 ॥
𑌗𑌰𑍍𑌜𑌤𑍋𑌽𑌸𑍍𑌯 𑌚 𑌸𑍁𑌸𑌂𑌭𑍍𑌰𑌶𑍍𑌚 𑌭𑍍𑌰𑌾𑌤𑍁𑌃 𑌶𑌤𑍍𑌰𑍋𑌰𑍍𑌵𑌿𑌶𑍇𑌷𑌤𑌃 ।
𑌮𑌰𑍍𑌷𑌯𑌿𑌷𑍍𑌯𑌾𑌮𑍍𑌯𑌹𑌂 𑌕𑍇𑌨 𑌕𑌾𑌰𑌣𑍇𑌨 𑌵𑌰𑌾𑌨𑌨𑍇 ॥ 2 ॥
𑌅𑌧𑌰𑍍𑌷𑌿𑌤𑌾𑌨𑌾𑌂 𑌶𑍂𑌰𑌾𑌣𑌾𑌂 𑌸𑌮𑌰𑍇𑌷𑍍𑌵𑌨𑌿𑌵𑌰𑍍𑌤𑌿𑌨𑌾𑌮𑍍 ।
𑌧𑌰𑍍𑌷𑌣𑌾𑌮𑌰𑍍𑌷𑌣𑌂 𑌭𑍀𑌰𑍁 𑌮𑌰𑌣𑌾𑌦𑌤𑌿𑌰𑌿𑌚𑍍𑌯𑌤𑍇 ॥ 3 ॥
𑌸𑍋𑌢𑍁𑌂 𑌨 𑌚 𑌸𑌮𑌰𑍍𑌥𑍋𑌽𑌹𑌂 𑌯𑍁𑌦𑍍𑌧𑌕𑌾𑌮𑌸𑍍𑌯 𑌸𑌂𑌯𑍁𑌗𑍇 ।
𑌸𑍁𑌗𑍍𑌰𑍀𑌵𑌸𑍍𑌯 𑌚 𑌸𑌮𑍍𑌰𑌂𑌭𑌂 𑌹𑍀𑌨𑌗𑍍𑌰𑍀𑌵𑌸𑍍𑌯 𑌗𑌰𑍍𑌜𑌤𑌃 ॥ 4 ॥
𑌨 𑌚 𑌕𑌾𑌰𑍍𑌯𑍋 𑌵𑌿𑌷𑌾𑌦𑌸𑍍𑌤𑍇 𑌰𑌾𑌘𑌵𑌂 𑌪𑍍𑌰𑌤𑌿 𑌮𑌤𑍍𑌕𑍃𑌤𑍇 ।
𑌧𑌰𑍍𑌮𑌜𑍍𑌞𑌶𑍍𑌚 𑌕𑍃𑌤𑌜𑍍𑌞𑌶𑍍𑌚 𑌕𑌥𑌂 𑌪𑌾𑌪𑌂 𑌕𑌰𑌿𑌷𑍍𑌯𑌤𑌿 ॥ 5 ॥
𑌨𑌿𑌵𑌰𑍍𑌤𑌸𑍍𑌵 𑌸𑌹 𑌸𑍍𑌤𑍍𑌰𑍀𑌭𑌿𑌃 𑌕𑌥𑌂 𑌭𑍂𑌯𑍋𑌽𑌨𑍁𑌗𑌚𑍍𑌛𑌸𑌿 ।
𑌸𑍌𑌹𑍃𑌦𑌂 𑌦𑌰𑍍𑌶𑌿𑌤𑌂 𑌤𑌾𑌰𑍇 𑌮𑌯𑌿 𑌭𑌕𑍍𑌤𑌿𑌃 𑌕𑍃𑌤𑌾 𑌤𑍍𑌵𑌯𑌾 ॥ 6 ॥
𑌪𑍍𑌰𑌤𑌿𑌯𑍋𑌤𑍍𑌸𑍍𑌯𑌾𑌮𑍍𑌯𑌹𑌂 𑌗𑌤𑍍𑌵𑌾 𑌸𑍁𑌗𑍍𑌰𑍀𑌵𑌂 𑌜𑌹𑌿 𑌸𑌂𑌭𑍍𑌰𑌮𑌮𑍍 ।
𑌦𑌰𑍍𑌪𑌮𑌾𑌤𑍍𑌰𑌂 𑌵𑌿𑌨𑍇𑌷𑍍𑌯𑌾𑌮𑌿 𑌨 𑌚 𑌪𑍍𑌰𑌾𑌣𑍈𑌰𑍍𑌵𑌿𑌮𑍋𑌕𑍍𑌷𑍍𑌯𑌤𑍇 ॥ ॥
𑌅𑌹𑌂 𑌹𑍍𑌯𑌾𑌜𑍌𑌸𑍍𑌥𑌿𑌤𑌸𑍍𑌯𑌾𑌸𑍍𑌯 𑌕𑌰𑌿𑌷𑍍𑌯𑌾𑌮𑌿 𑌯𑌥𑍇𑌪𑍍𑌸𑌿𑌤𑌮𑍍 ।
𑌵𑍃𑌕𑍍𑌷𑍈𑌰𑍍𑌮𑍁𑌷𑍍𑌟𑌿𑌪𑍍𑌰𑌹𑌾𑌰𑍈𑌶𑍍𑌚 𑌪𑍀𑌡𑌿𑌤𑌃 𑌪𑍍𑌰𑌤𑌿𑌯𑌾𑌸𑍍𑌯𑌤𑌿 ॥ ॥
𑌨 𑌮𑍇 𑌗𑌰𑍍𑌵𑌿𑌤𑌮𑌾𑌯𑌸𑍍𑌤𑌂 𑌸𑌹𑌿𑌷𑍍𑌯𑌤𑌿 𑌦𑍁𑌰𑌾𑌤𑍍𑌮𑌵𑌾𑌨𑍍 ।
𑌕𑍃𑌤𑌂 𑌤𑌾𑌰𑍇 𑌸𑌹𑌾𑌂𑌯𑌤𑍍𑌵𑌂 𑌸𑍌𑌹𑍃𑌦𑌂 𑌦𑌰𑍍𑌶𑌿𑌤𑌂 𑌮𑌯𑌿 ॥ ॥
𑌶𑌾𑌪𑌿𑌤𑌾𑌽𑌪𑌿 𑌮𑌮 𑌪𑍍𑌰𑌾𑌣𑍈𑌰𑍍𑌨𑌿𑌵𑌰𑍍𑌤𑌸𑍍𑌵 𑌜𑌯𑍇𑌨 𑌚 ।
𑌅𑌹𑌂 𑌜𑌿𑌤𑍍𑌵𑌾 𑌨𑌿𑌵𑌰𑍍𑌤𑌿𑌷𑍍𑌯𑍇 𑌤𑌮𑌹𑌂 𑌭𑍍𑌰𑌾𑌤𑌰𑌂 𑌰𑌣𑍇 ॥ 10 ॥
𑌤𑌂 𑌤𑍁 𑌤𑌾𑌰𑌾 𑌪𑌰𑌿𑌷𑍍𑌵𑌜𑍍𑌯 𑌵𑌾𑌲𑌿𑌨𑌂 𑌪𑍍𑌰𑌿𑌯𑌵𑌾𑌦𑌿𑌨𑍀 ।
𑌚𑌕𑌾𑌰 𑌰𑍁𑌦𑌤𑍀 𑌮𑌂𑌦𑌂 𑌦𑌕𑍍𑌷𑌿𑌣𑌾 𑌸𑌾 𑌪𑍍𑌰𑌦𑌕𑍍𑌷𑌿𑌣𑌮𑍍 ॥ 11 ॥
𑌤𑌤𑌃 𑌸𑍍𑌵𑌸𑍍𑌤𑍍𑌯𑌯𑌨𑌂 𑌕𑍃𑌤𑍍𑌵𑌾 𑌮𑌂𑌤𑍍𑌰𑌵𑌿𑌦𑍍𑌵𑌿𑌜𑌯𑍈𑌷𑌿𑌣𑍀 ।
𑌅𑌂𑌤𑌃𑌪𑍁𑌰𑌂 𑌸𑌹 𑌸𑍍𑌤𑍍𑌰𑍀𑌭𑌿𑌃 𑌪𑍍𑌰𑌵𑌿𑌷𑍍𑌟𑌾 𑌶𑍋𑌕𑌮𑍋𑌹𑌿𑌤𑌾 ॥ 12 ॥
𑌪𑍍𑌰𑌵𑌿𑌷𑍍𑌟𑌾𑌯𑌾𑌂 𑌤𑍁 𑌤𑌾𑌰𑌾𑌯𑌾𑌂 𑌸𑌹 𑌸𑍍𑌤𑍍𑌰𑍀𑌭𑌿𑌸𑍍𑌸𑍍𑌵𑌮𑌾𑌲𑌯𑌮𑍍 ।
𑌨𑌗𑌰𑌾𑌨𑍍𑌨𑌿𑌰𑍍𑌯𑌯𑍌 𑌕𑍍𑌰𑍁𑌦𑍍𑌧𑍋 𑌮𑌹𑌾𑌸𑌰𑍍𑌪 𑌇𑌵 𑌶𑍍𑌵𑌸𑌨𑍍 ॥ 13 ॥
𑌸 𑌨𑌿𑌶𑍍𑌶𑍍𑌵𑌸𑍍𑌯 𑌮𑌹𑌾𑌤𑍇𑌜𑌾 𑌵𑌾𑌲𑍀 𑌪𑌰𑌮𑌰𑍋𑌷𑌣𑌃 ।
𑌸𑌰𑍍𑌵𑌤𑌶𑍍𑌚𑌾𑌰𑌯𑌨𑍍 𑌦𑍃𑌷𑍍𑌟𑌿𑌂 𑌶𑌤𑍍𑌰𑍁𑌦𑌰𑍍𑌶𑌨𑌕𑌾𑌂𑌕𑍍𑌷𑌯𑌾 ॥ 14 ॥
𑌸 𑌦𑌦𑌰𑍍𑌶 𑌤𑌤𑌶𑍍𑌶𑍍𑌰𑍀𑌮𑌾𑌨𑍍 𑌸𑍁𑌗𑍍𑌰𑍀𑌵𑌂 𑌹𑍇𑌮𑌪𑌿𑌂𑌗𑌲𑌮𑍍 ।
𑌸𑍁𑌸𑌂𑌵𑍀𑌤𑌮𑌵𑌷𑍍𑌟𑌬𑍍𑌧𑌂 𑌦𑍀𑌪𑍍𑌯𑌮𑌾𑌨𑌮𑌿𑌵𑌾𑌨𑌲𑌮𑍍 ॥ 15 ॥
𑌸 𑌤𑌂 𑌦𑍃𑌷𑍍𑌟𑍍𑌵𑌾 𑌮𑌹𑌾𑌵𑍀𑌰𑍍𑌯𑌂 𑌸𑍁𑌗𑍍𑌰𑍀𑌵𑌂 𑌪𑌰𑍍𑌯𑌵𑌸𑍍𑌥𑌿𑌤𑌮𑍍 ।
𑌗𑌾𑌢𑌂 𑌪𑌰𑌿𑌦𑌧𑍇 𑌵𑌾𑌸𑍋 𑌵𑌾𑌲𑍀 𑌪𑌰𑌮𑌰𑍋𑌷𑌣𑌃 ॥ 16 ॥
𑌸 𑌵𑌾𑌲𑍀 𑌗𑌾𑌢𑌸𑌂𑌵𑍀𑌤𑍋 𑌮𑍁𑌷𑍍𑌟𑌿𑌮𑍁𑌦𑍍𑌯𑌮𑍍𑌯 𑌵𑍀𑌰𑍍𑌯𑌵𑌾𑌨𑍍 ।
𑌸𑍁𑌗𑍍𑌰𑍀𑌵𑌮𑍇𑌵𑌾𑌭𑌿𑌮𑍁𑌖𑍋 𑌯𑌯𑍌 𑌯𑍋𑌦𑍍𑌧𑍁𑌂 𑌕𑍃𑌤𑌕𑍍𑌷𑌣𑌃 ॥ 1 ॥
𑌶𑍍𑌲𑌿𑌷𑍍𑌟𑌂 𑌮𑍁𑌷𑍍𑌟𑌿𑌂 𑌸𑌮𑍁𑌦𑍍𑌯𑌮𑍍𑌯 𑌸𑌂𑌰𑌬𑍍𑌧𑌤𑌰𑌮𑌾𑌗𑌤𑌃 ।
𑌸𑍁𑌗𑍍𑌰𑍀𑌵𑍋𑌽𑌪𑌿 𑌸𑌮𑍁𑌦𑍍𑌦𑌿𑌶𑍍𑌯 𑌵𑌾𑌲𑌿𑌨𑌂 𑌹𑍇𑌮𑌮𑌾𑌲𑌿𑌨𑌮𑍍 ॥ 1 ॥
𑌤𑌂 𑌵𑌾𑌲𑍀 𑌕𑍍𑌰𑍋𑌧𑌤𑌾𑌮𑍍𑌰𑌾𑌕𑍍𑌷𑌸𑍍𑌸𑍁𑌗𑍍𑌰𑍀𑌵𑌂 𑌰𑌣𑌪𑌂𑌡𑌿𑌤𑌮𑍍 ।
𑌆𑌪𑌤𑌂𑌤𑌂 𑌮𑌹𑌾𑌵𑍇𑌗𑌮𑌿𑌦𑌂 𑌵𑌚𑌨𑌮𑌬𑍍𑌰𑌵𑍀𑌤𑍍 ॥ 1 ॥
𑌏𑌷 𑌮𑍁𑌷𑍍𑌟𑌿𑌰𑍍𑌮𑌯𑌾𑌬𑌦𑍍𑌧𑍋 𑌗𑌾𑌢𑌸𑍍𑌸𑌨𑍍𑌨𑌿𑌹𑌿𑌤𑌾𑌂𑌗𑍁𑌲𑌿𑌃 ।
𑌮𑌯𑌾 𑌵𑍇𑌗𑌵𑌿𑌮𑍁𑌕𑍍𑌤𑌸𑍍𑌤𑍇 𑌪𑍍𑌰𑌾𑌣𑌾𑌨𑌾𑌦𑌾𑌯 𑌯𑌾𑌸𑍍𑌯𑌤𑌿 ॥ 20 ॥
𑌏𑌵𑌮𑍁𑌕𑍍𑌤𑌸𑍍𑌤𑍁 𑌸𑍁𑌗𑍍𑌰𑍀𑌵𑌃 𑌕𑍍𑌰𑍁𑌦𑍍𑌧𑍋 𑌵𑌾𑌲𑌿𑌨𑌮𑌬𑍍𑌰𑌵𑍀𑌤𑍍 ।
𑌤𑌵𑍈𑌵 𑌚𑌾 𑌹𑌰𑌨𑍍𑌪𑍍𑌰𑌾𑌣𑌾𑌨𑍍𑌮𑍁𑌷𑍍𑌟𑌿𑌃 𑌪𑌤𑌤𑍁 𑌮𑍂𑌰𑍍𑌧𑌨𑌿 ॥ 21 ॥
𑌤𑌾𑌡𑌿𑌤𑌸𑍍𑌤𑍇𑌨 𑌸𑌂𑌕𑍃𑌦𑍍𑌧𑌸𑍍𑌸𑌮𑌭𑌿𑌕𑍍𑌰𑌮𑍍𑌯 𑌵𑍇𑌗𑌿𑌤𑌃 ।
𑌅𑌭𑌵𑌚𑍍𑌛𑍋𑌣𑌿𑌤𑍋𑌦𑍍𑌗𑌾𑌰𑍀 𑌸𑍋𑌤𑍍𑌪𑍀𑌡 𑌇𑌵 𑌪𑌰𑍍𑌵𑌤𑌃 ॥ 22 ॥
𑌸𑍁𑌗𑍍𑌰𑍀𑌵𑍇𑌣 𑌤𑍁 𑌨𑌿𑌸𑍍𑌸𑌂𑌗𑌂 𑌸𑌾𑌲𑌮𑍁𑌤𑍍𑌪𑌾𑌟𑍍𑌯 𑌤𑍇𑌜𑌸𑌾 ।
𑌗𑌾𑌤𑍍𑌰𑍇𑌷𑍍𑌵𑌭𑌿𑌹𑌤𑍋 𑌵𑌾𑌲𑍀 𑌵𑌜𑍍𑌰𑍇𑌣𑍇𑌵 𑌮𑌹𑌾𑌗𑌿𑌰𑌿𑌃 ॥ 23 ॥
𑌸 𑌤𑍁 𑌵𑌾𑌲𑍀 𑌪𑍍𑌰𑌚𑌲𑌿𑌤𑌸𑍍𑌸𑌾𑌲𑌤𑌾𑌡𑌨𑌵𑌿𑌹𑍍𑌵𑌲𑌃 ।
𑌗𑍁𑌰𑍁𑌭𑌾𑌰𑌸𑌮𑌾𑌕𑍍𑌰𑌾𑌂𑌤𑍋 𑌨𑍌 𑌸𑌾𑌰𑍍𑌥 𑌇𑌵 𑌸𑌾𑌗𑌰𑍇 ॥ 24 ॥
𑌤𑍌 𑌭𑍀𑌮𑌬𑌲𑌵𑌿𑌕𑍍𑌰𑌾𑌂𑌤𑍌 𑌸𑍁𑌪𑌰𑍍𑌣𑌸𑌮𑌵𑍇𑌗𑌿𑌨𑍌 ।
𑌪𑍍𑌰𑌵𑍃𑌦𑍍𑌧𑍌 𑌘𑍋𑌰𑌵𑌪𑍁𑌷𑍌 𑌚𑌂𑌦𑍍𑌰𑌸𑍂𑌰𑍍𑌯𑌾𑌵𑌿𑌵𑌾𑌂𑌬𑌰𑍇 ।
𑌪𑌰𑌸𑍍𑌪𑌰𑌮𑌮𑌿𑌤𑍍𑌰𑌘𑍍𑌨𑍌 𑌚𑍍𑌛𑌿𑌦𑍍𑌰𑌾𑌨𑍍𑌵𑍇𑌷𑌣𑌤𑌤𑍍𑌪𑌰𑍌 ॥ 25 ॥
𑌤𑌤𑍋𑌽𑌵𑌰𑍍𑌧𑌤 𑌵𑌾𑌲𑍀 𑌤𑍁 𑌬𑌲𑌵𑍀𑌰𑍍𑌯𑌸𑌮𑌨𑍍𑌵𑌿𑌤𑌃 ।
𑌸𑍂𑌰𑍍𑌯𑌪𑍁𑌤𑍍𑌰𑍋 𑌮𑌹𑌾𑌵𑍀𑌰𑍍𑌯𑌸𑍍𑌸𑍁𑌗𑍍𑌰𑍀𑌵𑌃 𑌪𑌰𑌿𑌹𑍀𑌯𑌤𑍇 ॥ 26 ॥
𑌵𑌾𑌲𑌿𑌨𑌾 𑌭𑌗𑍍𑌨𑌦𑌰𑍍𑌪𑌸𑍍𑌤𑍁 𑌸𑍁𑌗𑍍𑌰𑍀𑌵𑍋 𑌮𑌂𑌦𑌵𑌿𑌕𑍍𑌰𑌮𑌃 ।
𑌵𑌾𑌲𑌿𑌨𑌂 𑌪𑍍𑌰𑌤𑌿 𑌸𑌾𑌮𑌰𑍍𑌷𑍋 𑌦𑌰𑍍𑌶𑌯𑌾𑌮𑌾𑌸 𑌲𑌾𑌘𑌵𑌮𑍍 ॥ 2 ॥
𑌵𑍃𑌕𑍍𑌷𑍈𑌃 𑌸𑍍𑌸𑌶𑌾𑌖𑍈 𑌸𑍍𑌸𑌶𑌿𑌖𑍈𑌰𑍍𑌵𑌜𑍍𑌰𑌕𑍋𑌟𑌿𑌨𑌿𑌭𑍈𑌰𑍍𑌨𑌖𑍈𑌃 ॥ 2 ॥
𑌮𑍁𑌷𑍍𑌟𑌿𑌭𑌿𑌰𑍍𑌜𑌾𑌨𑍁𑌭𑌿𑌃 𑌪𑌦𑍍𑌭𑌿𑌰𑍍𑌬𑌾𑌹𑍁𑌭𑌿𑌶𑍍𑌚 𑌪𑍁𑌨𑌃 𑌪𑍁𑌨𑌃 ।
𑌤𑌯𑍋𑌰𑍍𑌯𑍁𑌦𑍍𑌧𑌮𑌭𑍂𑌦𑍍𑌘𑍋𑌰𑌂 𑌵𑍃𑌤𑍍𑌰𑌵𑌾𑌸𑌵𑌯𑍋𑌰𑌿𑌵 ॥ 2 ॥
𑌤𑍌 𑌶𑍋𑌣𑌿𑌤𑌾𑌕𑍍𑌤𑍌 𑌯𑍁𑌧𑍍𑌯𑍇𑌤𑌾𑌂 𑌵𑌾𑌨𑌰𑍌 𑌵𑌨𑌚𑌾𑌰𑌿𑌣𑍌 ।
𑌮𑍇𑌘𑌾𑌵𑌿𑌵 𑌮𑌹𑌾𑌶𑌬𑍍𑌦𑍈 𑌸𑍍𑌤𑌰𑍍𑌜𑌮𑌾𑌨𑍌 𑌪𑌰𑌸𑍍𑌪𑌰𑌮𑍍 ॥ 30 ॥
𑌹𑍀𑌯𑌮𑌾𑌨𑌮𑌥𑍋𑌽𑌪𑌶𑍍𑌯𑌤𑍍𑌸𑍁𑌗𑍍𑌰𑍀𑌵𑌂 𑌵𑌾𑌨𑌰𑍇𑌶𑍍𑌵𑌰𑌮𑍍 ।
𑌵𑍀𑌕𑍍𑌷𑌮𑌾𑌣𑌂 𑌦𑌿𑌶𑌶𑍍𑌚𑍈𑌵 𑌰𑌾𑌘𑌵𑌸𑍍𑌸 𑌮𑍁𑌹𑍁𑌰𑍍𑌮𑍁𑌹𑍁𑌃 ॥ 31 ॥
𑌤𑌤𑍋 𑌰𑌾𑌮𑍋 𑌮𑌹𑌾𑌤𑍇𑌜𑌾 𑌆𑌰𑍍𑌤𑌂 𑌦𑍃𑌷𑍍𑌟𑍍𑌵𑌾 𑌹𑌰𑍀𑌶𑍍𑌵𑌰𑌮𑍍 ।
𑌶𑌰𑌂 𑌚 𑌵𑍀𑌕𑍍𑌷𑌤𑍇 𑌵𑍀𑌰𑍋 𑌵𑌾𑌲𑌿𑌨𑍋 𑌵𑌧𑌕𑌾𑌰𑌣𑌾𑌤𑍍 ॥ 32 ॥
𑌤𑌤𑍋 𑌧𑌨𑍁𑌷𑌿 𑌸𑌂𑌧𑌾𑌯 𑌶𑌰𑌮𑌾𑌶𑍀𑌵𑌿𑌷𑍋𑌪𑌮𑌮𑍍 ।
𑌪𑍁𑌰𑌯𑌾𑌮𑌾𑌸 𑌤𑌚𑍍𑌚𑌾𑌪𑌂 𑌕𑌾𑌲𑌚𑌕𑍍𑌰𑌮𑌿𑌵𑌾𑌂𑌤𑌕𑌃 ॥ 33 ॥
𑌤𑌸𑍍𑌯 𑌜𑍍𑌯𑌾𑌤𑌲𑌘𑍋𑌷𑍇𑌣 𑌤𑍍𑌰𑌸𑍍𑌤𑌾𑌃 𑌪𑌤𑍍𑌰𑌰𑌥𑍇𑌶𑍍𑌵𑌰𑌾𑌃 ।
𑌪𑍍𑌰𑌦𑍁𑌦𑍍𑌰𑍁𑌵𑍁𑌰𑍍𑌮𑍃𑌗𑌾𑌶𑍍𑌚𑍈𑌵 𑌯𑍁𑌗𑌾𑌂𑌤 𑌇𑌵 𑌮𑍋𑌹𑌿𑌤𑌾𑌃 ॥ 34 ॥
𑌮𑍁𑌕𑍍𑌤𑌸𑍍𑌤𑍁 𑌵𑌜𑍍𑌰𑌨𑌿𑌰𑍍𑌘𑍋𑌷𑌃 𑌪𑍍𑌰𑌦𑍀𑌪𑍍𑌤𑌾𑌶𑌨𑌿𑌸𑌨𑍍𑌨𑌿𑌭𑌃 ।
𑌰𑌾𑌘𑌵𑍇𑌣 𑌮𑌹𑌾𑌬𑌾𑌣𑍋 𑌵𑌾𑌲𑌿𑌵𑌕𑍍𑌷𑌸𑌿 𑌪𑌾𑌤𑌿𑌤𑌃 ॥ 35 ॥
𑌤𑌤𑌸𑍍𑌤𑍇𑌨 𑌮𑌹𑌾𑌤𑍇𑌜𑌾 𑌵𑍀𑌯𑍌𑌟𑌤𑍍𑌸𑌿𑌕𑍍𑌤𑌃 𑌕𑌪𑍀𑌶𑍍𑌵𑌰𑌃 ।
𑌵𑍇𑌗𑍇𑌨𑌾𑌭𑌿𑌹𑌤𑍋 𑌵𑌾𑌲𑍀 𑌨𑌿𑌪𑌪𑌾𑌤 𑌮𑌹𑍀𑌤𑌲𑍇 ॥ 36 ॥
𑌇𑌂𑌦𑍍𑌰𑌧𑍍𑌵𑌜 𑌇𑌵𑍋𑌦𑍍𑌧𑍂𑌤𑌃 𑌪𑍌𑌰𑍍𑌣𑌮𑌾𑌸𑍍𑌯𑌾𑌂 𑌮𑌹𑍀𑌤𑌲𑍇 ।
𑌆𑌶𑍍𑌵𑌯𑍁𑌕𑍍𑌸𑌮𑌯𑍇 𑌮𑌾𑌸𑌿 𑌗𑌤𑌶𑍍𑌰𑍀𑌕𑍋 𑌵𑌿𑌚𑍇𑌤𑌨𑌃 ॥ 3 ॥
𑌨𑌰𑍋𑌤𑍍𑌤𑌮𑌃 𑌕𑌾𑌲𑌯𑍁𑌗𑌾𑌂𑌤𑌕𑍋𑌪𑌮𑌂 𑌶𑌰𑍋𑌤𑍍𑌤𑌮𑌂 𑌕𑌾𑌂𑌚𑌨𑌰𑍂𑌪𑍍𑌯𑌭𑍁𑌷𑌿𑌤𑌮𑍍 ।
𑌸𑌸𑌰𑍍𑌜 𑌦𑍀𑌪𑍍𑌤𑌂 𑌤𑌮𑌮𑌿𑌤𑍍𑌰𑌮𑌰𑍍𑌦𑌨𑌂 𑌸𑌧𑍂𑌮𑌮𑌗𑍍𑌨𑌿𑌂 𑌮𑍁𑌖𑌤𑍋 𑌯𑌥𑌾 𑌹𑌰𑌃 ॥ 3 ॥
𑌅𑌥𑍋𑌕𑍍𑌷𑌿𑌤𑌶𑍍𑌶𑍋𑌣𑌿𑌤𑌤𑍋𑌯𑌵𑌿𑌸𑍍𑌰𑌵𑍈 𑌸𑍍𑌸𑍁𑌪𑍁𑌷𑍍𑌪𑌿𑌤𑌾𑌶𑍋𑌕 𑌇𑌵𑌾𑌨𑌿𑌲𑍋𑌦𑍍𑌧𑌤𑌃 ।
𑌵𑌿𑌚𑍇𑌤𑌨𑍋 𑌵𑌾𑌸𑌵𑌸𑍂𑌨𑍁𑌰𑌾𑌹𑌵𑍇 𑌵𑌿𑌭𑍍𑌰𑌂𑌶𑌿𑌤𑍇𑌂𑌦𑍍𑌰𑌧𑍍𑌵𑌜𑌵𑌤𑍍𑌕𑍍𑌷𑌿𑌤𑌿𑌂 𑌗𑌤𑌃 ॥ 3 ॥
𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌕𑌿𑌷𑍍𑌕𑌿𑌂𑌧𑌾𑌕𑌾𑌂𑌡𑍇 𑌷𑍋𑌡𑌶𑌸𑍍𑌸𑌰𑍍𑌗𑌃 ॥
