শ্রীমদ্বাল্মীকীয রামাযণে বালকাংডম্ ।
অথ সপ্তত্রিংশস্সর্গঃ ।
তপ্যমানে তপো দেবে দেবাঃ সর্ষিগণাঃ পুরা ।
সেনাপতিমভীপ্সংতঃ পিতামহমুপাগমন্ ॥ 1 ॥
ততোঽব্রুবন্ সুরাস্সর্বে ভগবংতং পিতামহম্ ।
প্রণিপত্য সুরাস্সর্বে সেংদ্রাস্সাগ্নিপুরোগমাঃ ॥ 2 ॥
যো ন স্সেনাপতির্দেব দত্তো ভগবতা পুরা ।
তপঃ পরমমাস্থায তপ্যতে স্ম সহোমযা ॥ 3 ॥
যদত্রানংতরং কার্যং লোকানাং হিতকাম্যযা ।
সংবিধত্স্ব বিধানজ্ঞ ত্বং হি নঃ পরমা গতিঃ ॥ 4 ॥
দেবতানাং বচশ্শ্রুত্বা সর্বলোকপিতামহঃ ।
সাংত্বযন্মধুরৈর্বাক্যৈস্ত্রিদশানিদমব্রবীত্ ॥ 5 ॥
শৈল পুত্র্যা যদুক্তং তন্ন প্রজাস্যথ পত্নিষু ।
তস্যা বচনমক্লিষ্টং সত্যমেতন্ন সংশযঃ ॥ 6 ॥
ইযমাকাশগা গংগা যস্যাং পুত্রং হুতাশনঃ ।
জনযিষ্যতি দেবানাং সেনাপতিমরিংদমম্ ॥ 7 ॥
জ্যেষ্ঠা শৈলেংদ্রদুহিতা মানযিষ্যতি তত্সুতম্ ।
উমাযাস্তদ্বহুমতং ভবিষ্যতি ন সংশযঃ ॥ 8 ॥
তচ্ছ্রুত্বা বচনং তস্য কৃতার্থা রঘুনংদন ।
প্রণিপত্য সুরাস্সর্বে পিতামহমপূজযন্ ॥ 9 ॥
তে গত্বা পর্বতং রাম কৈলাসং ধাতুমংডিতম্ ।
অগ্নিং নিযোজযামাসুঃ পুত্রার্থং সর্বদেবতাঃ ॥ 10 ॥
দেবকার্যমিদং দেব সংবিধত্স্ব হুতাশন ।
শৈলপুত্র্যাং মহাতেজো গংগাযাং তেজ উত্সৃজ ॥ 11 ॥
দেবতানাং প্রতিজ্ঞায গংগামভ্যেত্য পাবকঃ ।
গর্ভং ধারয বৈ দেবি দেবতানামিদং প্রিযম্ ॥ 12 ॥
তস্য তদ্বচনং শ্রুত্বা দিব্যং রূপমধারযত্ ।
দৃষ্ট্বা তন্মহিমানং স সমংতাদবকীর্যত ॥ 13 ॥
সমংততস্তদা দেবীমভ্যষিংচত পাবকঃ ।
সর্বস্রোতাংসি পূর্ণানি গংগাযা রঘুনংদন ॥ 14 ॥
তমুবাচ ততো গংগা সর্বদেবপুরোহিতম্ ।
অশক্তা ধারণে দেব তব তেজ স্সমুদ্ধতম্ ।
দহ্যমানাগ্নিনা তেন সংপ্রব্যথিতচেতনা ॥ 15 ॥
অথাব্রবীদিদং গংগাং সর্বদেবহুতাশনঃ ।
ইহ হৈমবতী পাদে গর্ভোঽযং সন্নিবেশ্যতাম্ ॥ 16 ॥
শ্রুত্বা ত্বগ্নিবচো গঙগা তং গর্ভমতিভাস্বরম্ ।
উত্সসর্জ মহাতেজ স্স্রোতোভ্যো হি তদানঘ ॥ 17 ॥
যদস্যা নির্গতং তস্মাত্তপ্তজাংবূনদপ্রভম্ ।
কাংচনং ধরণীং প্রাপ্তং হিরণ্যমমলং শুভম্ ॥ 18 ॥
তাম্রং কার্ষ্ণাযসং চৈব তৈক্ষ্ণ্যাদেবাভ্যজাযত ॥ 19 ॥
মলং তস্যাভবত্তত্র ত্রপু সীসকমেব চ ।
তদেতদ্ধরণীং প্রাপ্য নানাধাতুরবর্ধত ॥ 20 ॥
নিক্ষিপ্তমাত্রে গর্ভে তু তেজোভিরভিরংজিতম্ ।
সর্বং পর্বতসন্নদ্ধং সৌবর্ণমভবদ্বনম্ ॥ 21 ॥
জাতরূপমিতি খ্যাতং তদা প্রভৃতি রাঘব ।
সুবর্ণং পুরুষব্যাঘ্র হুতাশনসমপ্রভম্ ॥ 22 ॥
তৃণবৃক্ষলতাগুল্মং সর্বং ভবতি কাংচনম্ ।
তং কুমারং ততো জাতং সেংদ্রাস্সহ মরুদ্গণাঃ ॥ 23 ॥
ক্ষীরসংভাবনার্থায কৃত্তিকাস্সমযোজন্ ।
তাঃ ক্ষীরং জাতমাত্রস্য কৃত্বা সমযমুত্তমম্ ॥ 24 ॥
দদুঃ পুত্রোঽযমস্মাকং সর্বাসামিতি নিশ্চিতাঃ ।
ততস্তু দেবতা স্সর্বাঃ কার্তিকেয ইতি ব্রুবন্ ॥ 25 ॥
পুত্রস্ত্রৈলোক্যবিখ্যাতো ভবিষ্যতি ন সংশযঃ ।
4 তেষাং তদ্বচনং শ্রুত্বা স্কন্নং গর্ভপরিস্রবে ॥ 26 ॥
স্নাপযন্ পরযা লক্ষ্ম্যা দীপ্যমানং যথানলম্ ।
স্কংদ ইত্যব্রুবন্ দেবাঃ স্কন্নং গর্ভপরিস্রবাত্ ॥ 27 ॥
কার্তিকেযং মহাভাগং কাকুত্স্থ জ্বলনোপমম্ ।
প্রাদুর্ভূতং ততঃ ক্ষীরং কৃত্তিকানামনুত্তমম্ ॥ 28 ॥
ষণ্ণাং ষডাননো ভূত্বা জগ্রাহ স্তনজং পযঃ ।
গৃহীত্বা ক্ষীরমেকাহ্না সুকুমারবপুস্তদা ॥ 29 ॥
অজযত্স্বেন বীর্যেণ দৈত্যসেনাগণান্ বিভুঃ ।
সুরসেনাগণপতিং ততস্তমতুলদ্যুতিম্ ॥ 30 ॥
অভ্যষিংচন্ সুরগণা স্সমেত্যাগ্নিপুরোগমাঃ ।
এষ তে রাম গংগাযা বিস্তরোঽভিহিতো মযা ॥ 31 ॥
কুমারসংভবশ্চৈব ধন্যঃ পুণ্যস্তথৈব চ ।
ভক্তশ্চ যঃ কার্তিকেযে কাকুত্স্থ ভুবি মানবঃ ।
আযুষ্মান্ পুত্রপৌত্রৈশ্চ স্কংদসালোক্যতাং ব্রজেত্ ॥ 32 ॥
ইত্যার্ষে শ্রীমদ্রামাযণে বাল্মীকীয আদিকাব্যে বালকাংডে সপ্তত্রিংশস্সর্গঃ ॥
