శ్రీమద్వాల్మీకీయ రామాయణే బాలకాండమ్ ।
అథ సప్తత్రింశస్సర్గః ।
తప్యమానే తపో దేవే దేవాః సర్షిగణాః పురా ।
సేనాపతిమభీప్సంతః పితామహముపాగమన్ ॥ 1 ॥
తతోఽబ్రువన్ సురాస్సర్వే భగవంతం పితామహమ్ ।
ప్రణిపత్య సురాస్సర్వే సేంద్రాస్సాగ్నిపురోగమాః ॥ 2 ॥
యో న స్సేనాపతిర్దేవ దత్తో భగవతా పురా ।
తపః పరమమాస్థాయ తప్యతే స్మ సహోమయా ॥ 3 ॥
యదత్రానంతరం కార్యం లోకానాం హితకామ్యయా ।
సంవిధత్స్వ విధానజ్ఞ త్వం హి నః పరమా గతిః ॥ 4 ॥
దేవతానాం వచశ్శ్రుత్వా సర్వలోకపితామహః ।
సాంత్వయన్మధురైర్వాక్యైస్త్రిదశానిదమబ్రవీత్ ॥ 5 ॥
శైల పుత్ర్యా యదుక్తం తన్న ప్రజాస్యథ పత్నిషు ।
తస్యా వచనమక్లిష్టం సత్యమేతన్న సంశయః ॥ 6 ॥
ఇయమాకాశగా గంగా యస్యాం పుత్రం హుతాశనః ।
జనయిష్యతి దేవానాం సేనాపతిమరిందమమ్ ॥ 7 ॥
జ్యేష్ఠా శైలేంద్రదుహితా మానయిష్యతి తత్సుతమ్ ।
ఉమాయాస్తద్బహుమతం భవిష్యతి న సంశయః ॥ 8 ॥
తచ్ఛ్రుత్వా వచనం తస్య కృతార్థా రఘునందన ।
ప్రణిపత్య సురాస్సర్వే పితామహమపూజయన్ ॥ 9 ॥
తే గత్వా పర్వతం రామ కైలాసం ధాతుమండితమ్ ।
అగ్నిం నియోజయామాసుః పుత్రార్థం సర్వదేవతాః ॥ 10 ॥
దేవకార్యమిదం దేవ సంవిధత్స్వ హుతాశన ।
శైలపుత్ర్యాం మహాతేజో గంగాయాం తేజ ఉత్సృజ ॥ 11 ॥
దేవతానాం ప్రతిజ్ఞాయ గంగామభ్యేత్య పావకః ।
గర్భం ధారయ వై దేవి దేవతానామిదం ప్రియమ్ ॥ 12 ॥
తస్య తద్వచనం శ్రుత్వా దివ్యం రూపమధారయత్ ।
దృష్ట్వా తన్మహిమానం స సమంతాదవకీర్యత ॥ 13 ॥
సమంతతస్తదా దేవీమభ్యషించత పావకః ।
సర్వస్రోతాంసి పూర్ణాని గంగాయా రఘునందన ॥ 14 ॥
తమువాచ తతో గంగా సర్వదేవపురోహితమ్ ।
అశక్తా ధారణే దేవ తవ తేజ స్సముద్ధతమ్ ।
దహ్యమానాగ్నినా తేన సంప్రవ్యథితచేతనా ॥ 15 ॥
అథాబ్రవీదిదం గంగాం సర్వదేవహుతాశనః ।
ఇహ హైమవతీ పాదే గర్భోఽయం సన్నివేశ్యతామ్ ॥ 16 ॥
శ్రుత్వా త్వగ్నివచో గఙగా తం గర్భమతిభాస్వరమ్ ।
ఉత్ససర్జ మహాతేజ స్స్రోతోభ్యో హి తదానఘ ॥ 17 ॥
యదస్యా నిర్గతం తస్మాత్తప్తజాంబూనదప్రభమ్ ।
కాంచనం ధరణీం ప్రాప్తం హిరణ్యమమలం శుభమ్ ॥ 18 ॥
తామ్రం కార్ష్ణాయసం చైవ తైక్ష్ణ్యాదేవాభ్యజాయత ॥ 19 ॥
మలం తస్యాభవత్తత్ర త్రపు సీసకమేవ చ ।
తదేతద్ధరణీం ప్రాప్య నానాధాతురవర్ధత ॥ 20 ॥
నిక్షిప్తమాత్రే గర్భే తు తేజోభిరభిరంజితమ్ ।
సర్వం పర్వతసన్నద్ధం సౌవర్ణమభవద్వనమ్ ॥ 21 ॥
జాతరూపమితి ఖ్యాతం తదా ప్రభృతి రాఘవ ।
సువర్ణం పురుషవ్యాఘ్ర హుతాశనసమప్రభమ్ ॥ 22 ॥
తృణవృక్షలతాగుల్మం సర్వం భవతి కాంచనమ్ ।
తం కుమారం తతో జాతం సేంద్రాస్సహ మరుద్గణాః ॥ 23 ॥
క్షీరసంభావనార్థాయ కృత్తికాస్సమయోజన్ ।
తాః క్షీరం జాతమాత్రస్య కృత్వా సమయముత్తమమ్ ॥ 24 ॥
దదుః పుత్రోఽయమస్మాకం సర్వాసామితి నిశ్చితాః ।
తతస్తు దేవతా స్సర్వాః కార్తికేయ ఇతి బ్రువన్ ॥ 25 ॥
పుత్రస్త్రైలోక్యవిఖ్యాతో భవిష్యతి న సంశయః ।
4 తేషాం తద్వచనం శ్రుత్వా స్కన్నం గర్భపరిస్రవే ॥ 26 ॥
స్నాపయన్ పరయా లక్ష్మ్యా దీప్యమానం యథానలమ్ ।
స్కంద ఇత్యబ్రువన్ దేవాః స్కన్నం గర్భపరిస్రవాత్ ॥ 27 ॥
కార్తికేయం మహాభాగం కాకుత్స్థ జ్వలనోపమమ్ ।
ప్రాదుర్భూతం తతః క్షీరం కృత్తికానామనుత్తమమ్ ॥ 28 ॥
షణ్ణాం షడాననో భూత్వా జగ్రాహ స్తనజం పయః ।
గృహీత్వా క్షీరమేకాహ్నా సుకుమారవపుస్తదా ॥ 29 ॥
అజయత్స్వేన వీర్యేణ దైత్యసేనాగణాన్ విభుః ।
సురసేనాగణపతిం తతస్తమతులద్యుతిమ్ ॥ 30 ॥
అభ్యషించన్ సురగణా స్సమేత్యాగ్నిపురోగమాః ।
ఏష తే రామ గంగాయా విస్తరోఽభిహితో మయా ॥ 31 ॥
కుమారసంభవశ్చైవ ధన్యః పుణ్యస్తథైవ చ ।
భక్తశ్చ యః కార్తికేయే కాకుత్స్థ భువి మానవః ।
ఆయుష్మాన్ పుత్రపౌత్రైశ్చ స్కందసాలోక్యతాం వ్రజేత్ ॥ 32 ॥
ఇత్యార్షే శ్రీమద్రామాయణే వాల్మీకీయ ఆదికావ్యే బాలకాండే సప్తత్రింశస్సర్గః ॥
