śrīmadvālmīkīya rāmāyaṇē bālakāṇḍam ।
atha saptatriṃśassargaḥ ।
tapyamānē tapō dēvē dēvāḥ sarṣigaṇāḥ purā ।
sēnāpatimabhīpsantaḥ pitāmahamupāgaman ॥ 1 ॥
tatō'bruvan surāssarvē bhagavantaṃ pitāmaham ।
praṇipatya surāssarvē sēndrāssāgnipurōgamāḥ ॥ 2 ॥
yō na ssēnāpatirdēva dattō bhagavatā purā ।
tapaḥ paramamāsthāya tapyatē sma sahōmayā ॥ 3 ॥
yadatrānantaraṃ kāryaṃ lōkānāṃ hitakāmyayā ।
saṃvidhatsva vidhānajña tvaṃ hi naḥ paramā gatiḥ ॥ 4 ॥
dēvatānāṃ vachaśśrutvā sarvalōkapitāmahaḥ ।
sāntvayanmadhurairvākyaistridaśānidamabravīt ॥ 5 ॥
śaila putryā yaduktaṃ tanna prajāsyatha patniṣu ।
tasyā vachanamakliṣṭaṃ satyamētanna saṃśayaḥ ॥ 6 ॥
iyamākāśagā gaṅgā yasyāṃ putraṃ hutāśanaḥ ।
janayiṣyati dēvānāṃ sēnāpatimarindamam ॥ 7 ॥
jyēṣṭhā śailēndraduhitā mānayiṣyati tatsutam ।
umāyāstadbahumataṃ bhaviṣyati na saṃśayaḥ ॥ 8 ॥
tachChrutvā vachanaṃ tasya kṛtārthā raghunandana ।
praṇipatya surāssarvē pitāmahamapūjayan ॥ 9 ॥
tē gatvā parvataṃ rāma kailāsaṃ dhātumaṇḍitam ।
agniṃ niyōjayāmāsuḥ putrārthaṃ sarvadēvatāḥ ॥ 10 ॥
dēvakāryamidaṃ dēva saṃvidhatsva hutāśana ।
śailaputryāṃ mahātējō gaṅgāyāṃ tēja utsṛja ॥ 11 ॥
dēvatānāṃ pratijñāya gaṅgāmabhyētya pāvakaḥ ।
garbhaṃ dhāraya vai dēvi dēvatānāmidaṃ priyam ॥ 12 ॥
tasya tadvachanaṃ śrutvā divyaṃ rūpamadhārayat ।
dṛṣṭvā tanmahimānaṃ sa samantādavakīryata ॥ 13 ॥
samantatastadā dēvīmabhyaṣiñchata pāvakaḥ ।
sarvasrōtāṃsi pūrṇāni gaṅgāyā raghunandana ॥ 14 ॥
tamuvācha tatō gaṅgā sarvadēvapurōhitam ।
aśaktā dhāraṇē dēva tava tēja ssamuddhatam ।
dahyamānāgninā tēna sampravyathitachētanā ॥ 15 ॥
athābravīdidaṃ gaṅgāṃ sarvadēvahutāśanaḥ ।
iha haimavatī pādē garbhō'yaṃ sannivēśyatām ॥ 16 ॥
śrutvā tvagnivachō gaṅagā taṃ garbhamatibhāsvaram ।
utsasarja mahātēja ssrōtōbhyō hi tadānagha ॥ 17 ॥
yadasyā nirgataṃ tasmāttaptajāmbūnadaprabham ।
kāñchanaṃ dharaṇīṃ prāptaṃ hiraṇyamamalaṃ śubham ॥ 18 ॥
tāmraṃ kārṣṇāyasaṃ chaiva taikṣṇyādēvābhyajāyata ॥ 19 ॥
malaṃ tasyābhavattatra trapu sīsakamēva cha ।
tadētaddharaṇīṃ prāpya nānādhāturavardhata ॥ 20 ॥
nikṣiptamātrē garbhē tu tējōbhirabhirañjitam ।
sarvaṃ parvatasannaddhaṃ sauvarṇamabhavadvanam ॥ 21 ॥
jātarūpamiti khyātaṃ tadā prabhṛti rāghava ।
suvarṇaṃ puruṣavyāghra hutāśanasamaprabham ॥ 22 ॥
tṛṇavṛkṣalatāgulmaṃ sarvaṃ bhavati kāñchanam ।
taṃ kumāraṃ tatō jātaṃ sēndrāssaha marudgaṇāḥ ॥ 23 ॥
kṣīrasambhāvanārthāya kṛttikāssamayōjan ।
tāḥ kṣīraṃ jātamātrasya kṛtvā samayamuttamam ॥ 24 ॥
daduḥ putrō'yamasmākaṃ sarvāsāmiti niśchitāḥ ।
tatastu dēvatā ssarvāḥ kārtikēya iti bruvan ॥ 25 ॥
putrastrailōkyavikhyātō bhaviṣyati na saṃśayaḥ ।
4 tēṣāṃ tadvachanaṃ śrutvā skannaṃ garbhaparisravē ॥ 26 ॥
snāpayan parayā lakṣmyā dīpyamānaṃ yathānalam ।
skanda ityabruvan dēvāḥ skannaṃ garbhaparisravāt ॥ 27 ॥
kārtikēyaṃ mahābhāgaṃ kākutstha jvalanōpamam ।
prādurbhūtaṃ tataḥ kṣīraṃ kṛttikānāmanuttamam ॥ 28 ॥
ṣaṇṇāṃ ṣaḍānanō bhūtvā jagrāha stanajaṃ payaḥ ।
gṛhītvā kṣīramēkāhnā sukumāravapustadā ॥ 29 ॥
ajayatsvēna vīryēṇa daityasēnāgaṇān vibhuḥ ।
surasēnāgaṇapatiṃ tatastamatuladyutim ॥ 30 ॥
abhyaṣiñchan suragaṇā ssamētyāgnipurōgamāḥ ।
ēṣa tē rāma gaṅgāyā vistarō'bhihitō mayā ॥ 31 ॥
kumārasambhavaśchaiva dhanyaḥ puṇyastathaiva cha ।
bhaktaścha yaḥ kārtikēyē kākutstha bhuvi mānavaḥ ।
āyuṣmān putrapautraiścha skandasālōkyatāṃ vrajēt ॥ 32 ॥
ityārṣē śrīmadrāmāyaṇē vālmīkīya ādikāvyē bālakāṇḍē saptatriṃśassargaḥ ॥
