ශ්රීමද්වාල්මීකීය රාමායණේ බාලකාංඩම් ।
අථ සප්තත්රිංශස්සර්ගඃ ।
තප්යමානේ තපෝ දේවේ දේවාඃ සර්ෂිගණාඃ පුරා ।
සේනාපතිමභීප්සංතඃ පිතාමහමුපාගමන් ॥ 1 ॥
තතෝऽබ්රුවන් සුරාස්සර්වේ භගවංතං පිතාමහම් ।
ප්රණිපත්ය සුරාස්සර්වේ සේංද්රාස්සාග්නිපුරෝගමාඃ ॥ 2 ॥
යෝ න ස්සේනාපතිර්දේව දත්තෝ භගවතා පුරා ।
තපඃ පරමමාස්ථාය තප්යතේ ස්ම සහෝමයා ॥ 3 ॥
යදත්රානංතරං කාර්යං ලෝකානාං හිතකාම්යයා ।
සංවිධත්ස්ව විධානජ්ඤ ත්වං හි නඃ පරමා ගතිඃ ॥ 4 ॥
දේවතානාං වචශ්ශ්රුත්වා සර්වලෝකපිතාමහඃ ।
සාංත්වයන්මධුරෛර්වාක්යෛස්ත්රිදශානිදමබ්රවීත් ॥ 5 ॥
ශෛල පුත්ර්යා යදුක්තං තන්න ප්රජාස්යථ පත්නිෂු ।
තස්යා වචනමක්ලිෂ්ටං සත්යමේතන්න සංශයඃ ॥ 6 ॥
ඉයමාකාශගා ගංගා යස්යාං පුත්රං හුතාශනඃ ।
ජනයිෂ්යති දේවානාං සේනාපතිමරිංදමම් ॥ 7 ॥
ජ්යේෂ්ඨා ශෛලේංද්රදුහිතා මානයිෂ්යති තත්සුතම් ।
උමායාස්තද්බහුමතං භවිෂ්යති න සංශයඃ ॥ 8 ॥
තච්ඡ්රුත්වා වචනං තස්ය කෘතාර්ථා රඝුනංදන ।
ප්රණිපත්ය සුරාස්සර්වේ පිතාමහමපූජයන් ॥ 9 ॥
තේ ගත්වා පර්වතං රාම කෛලාසං ධාතුමංඩිතම් ।
අග්නිං නියෝජයාමාසුඃ පුත්රාර්ථං සර්වදේවතාඃ ॥ 10 ॥
දේවකාර්යමිදං දේව සංවිධත්ස්ව හුතාශන ।
ශෛලපුත්ර්යාං මහාතේජෝ ගංගායාං තේජ උත්සෘජ ॥ 11 ॥
දේවතානාං ප්රතිජ්ඤාය ගංගාමභ්යේත්ය පාවකඃ ।
ගර්භං ධාරය වෛ දේවි දේවතානාමිදං ප්රියම් ॥ 12 ॥
තස්ය තද්වචනං ශ්රුත්වා දිව්යං රූපමධාරයත් ।
දෘෂ්ට්වා තන්මහිමානං ස සමංතාදවකීර්යත ॥ 13 ॥
සමංතතස්තදා දේවීමභ්යෂිංචත පාවකඃ ।
සර්වස්රෝතාංසි පූර්ණානි ගංගායා රඝුනංදන ॥ 14 ॥
තමුවාච තතෝ ගංගා සර්වදේවපුරෝහිතම් ।
අශක්තා ධාරණේ දේව තව තේජ ස්සමුද්ධතම් ।
දහ්යමානාග්නිනා තේන සංප්රව්යථිතචේතනා ॥ 15 ॥
අථාබ්රවීදිදං ගංගාං සර්වදේවහුතාශනඃ ।
ඉහ හෛමවතී පාදේ ගර්භෝऽයං සන්නිවේශ්යතාම් ॥ 16 ॥
ශ්රුත්වා ත්වග්නිවචෝ ගඞගා තං ගර්භමතිභාස්වරම් ।
උත්සසර්ජ මහාතේජ ස්ස්රෝතෝභ්යෝ හි තදානඝ ॥ 17 ॥
යදස්යා නිර්ගතං තස්මාත්තප්තජාංබූනදප්රභම් ।
කාංචනං ධරණීං ප්රාප්තං හිරණ්යමමලං ශුභම් ॥ 18 ॥
තාම්රං කාර්ෂ්ණායසං චෛව තෛක්ෂ්ණ්යාදේවාභ්යජායත ॥ 19 ॥
මලං තස්යාභවත්තත්ර ත්රපු සීසකමේව ච ।
තදේතද්ධරණීං ප්රාප්ය නානාධාතුරවර්ධත ॥ 20 ॥
නික්ෂිප්තමාත්රේ ගර්භේ තු තේජෝභිරභිරංජිතම් ।
සර්වං පර්වතසන්නද්ධං සෞවර්ණමභවද්වනම් ॥ 21 ॥
ජාතරූපමිති ඛ්යාතං තදා ප්රභෘති රාඝව ।
සුවර්ණං පුරුෂව්යාඝ්ර හුතාශනසමප්රභම් ॥ 22 ॥
තෘණවෘක්ෂලතාගුල්මං සර්වං භවති කාංචනම් ।
තං කුමාරං තතෝ ජාතං සේංද්රාස්සහ මරුද්ගණාඃ ॥ 23 ॥
ක්ෂීරසංභාවනාර්ථාය කෘත්තිකාස්සමයෝජන් ।
තාඃ ක්ෂීරං ජාතමාත්රස්ය කෘත්වා සමයමුත්තමම් ॥ 24 ॥
දදුඃ පුත්රෝऽයමස්මාකං සර්වාසාමිති නිශ්චිතාඃ ।
තතස්තු දේවතා ස්සර්වාඃ කාර්තිකේය ඉති බ්රුවන් ॥ 25 ॥
පුත්රස්ත්රෛලෝක්යවිඛ්යාතෝ භවිෂ්යති න සංශයඃ ।
4 තේෂාං තද්වචනං ශ්රුත්වා ස්කන්නං ගර්භපරිස්රවේ ॥ 26 ॥
ස්නාපයන් පරයා ලක්ෂ්ම්යා දීප්යමානං යථානලම් ।
ස්කංද ඉත්යබ්රුවන් දේවාඃ ස්කන්නං ගර්භපරිස්රවාත් ॥ 27 ॥
කාර්තිකේයං මහාභාගං කාකුත්ස්ථ ජ්වලනෝපමම් ।
ප්රාදුර්භූතං තතඃ ක්ෂීරං කෘත්තිකානාමනුත්තමම් ॥ 28 ॥
ෂණ්ණාං ෂඩානනෝ භූත්වා ජග්රාහ ස්තනජං පයඃ ।
ගෘහීත්වා ක්ෂීරමේකාහ්නා සුකුමාරවපුස්තදා ॥ 29 ॥
අජයත්ස්වේන වීර්යේණ දෛත්යසේනාගණාන් විභුඃ ।
සුරසේනාගණපතිං තතස්තමතුලද්යුතිම් ॥ 30 ॥
අභ්යෂිංචන් සුරගණා ස්සමේත්යාග්නිපුරෝගමාඃ ।
ඒෂ තේ රාම ගංගායා විස්තරෝऽභිහිතෝ මයා ॥ 31 ॥
කුමාරසංභවශ්චෛව ධන්යඃ පුණ්යස්තථෛව ච ।
භක්තශ්ච යඃ කාර්තිකේයේ කාකුත්ස්ථ භුවි මානවඃ ।
ආයුෂ්මාන් පුත්රපෞත්රෛශ්ච ස්කංදසාලෝක්යතාං ව්රජේත් ॥ 32 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ බාලකාංඩේ සප්තත්රිංශස්සර්ගඃ ॥
