ശ്രീമദ്വാല്മീകീയ രാമായണേ ബാലകാംഡമ് ।
അഥ സപ്തത്രിംശസ്സര്ഗഃ ।
തപ്യമാനേ തപോ ദേവേ ദേവാഃ സര്ഷിഗണാഃ പുരാ ।
സേനാപതിമഭീപ്സംതഃ പിതാമഹമുപാഗമന് ॥ 1 ॥
തതോഽബ്രുവന് സുരാസ്സർവേ ഭഗവംതം പിതാമഹമ് ।
പ്രണിപത്യ സുരാസ്സർവേ സേംദ്രാസ്സാഗ്നിപുരോഗമാഃ ॥ 2 ॥
യോ ന സ്സേനാപതിര്ദേവ ദത്തോ ഭഗവതാ പുരാ ।
തപഃ പരമമാസ്ഥായ തപ്യതേ സ്മ സഹോമയാ ॥ 3 ॥
യദത്രാനംതരം കാര്യം ലോകാനാം ഹിതകാമ്യയാ ।
സംവിധത്സ്വ വിധാനജ്ഞ ത്വം ഹി നഃ പരമാ ഗതിഃ ॥ 4 ॥
ദേവതാനാം വചശ്ശ്രുത്വാ സർവലോകപിതാമഹഃ ।
സാംത്വയന്മധുരൈർവാക്യൈസ്ത്രിദശാനിദമബ്രവീത് ॥ 5 ॥
ശൈല പുത്ര്യാ യദുക്തം തന്ന പ്രജാസ്യഥ പത്നിഷു ।
തസ്യാ വചനമക്ലിഷ്ടം സത്യമേതന്ന സംശയഃ ॥ 6 ॥
ഇയമാകാശഗാ ഗംഗാ യസ്യാം പുത്രം ഹുതാശനഃ ।
ജനയിഷ്യതി ദേവാനാം സേനാപതിമരിംദമമ് ॥ 7 ॥
ജ്യേഷ്ഠാ ശൈലേംദ്രദുഹിതാ മാനയിഷ്യതി തത്സുതമ് ।
ഉമായാസ്തദ്ബഹുമതം ഭവിഷ്യതി ന സംശയഃ ॥ 8 ॥
തച്ഛ്രുത്വാ വചനം തസ്യ കൃതാര്ഥാ രഘുനംദന ।
പ്രണിപത്യ സുരാസ്സർവേ പിതാമഹമപൂജയന് ॥ 9 ॥
തേ ഗത്വാ പർവതം രാമ കൈലാസം ധാതുമംഡിതമ് ।
അഗ്നിം നിയോജയാമാസുഃ പുത്രാര്ഥം സർവദേവതാഃ ॥ 10 ॥
ദേവകാര്യമിദം ദേവ സംവിധത്സ്വ ഹുതാശന ।
ശൈലപുത്ര്യാം മഹാതേജോ ഗംഗായാം തേജ ഉത്സൃജ ॥ 11 ॥
ദേവതാനാം പ്രതിജ്ഞായ ഗംഗാമഭ്യേത്യ പാവകഃ ।
ഗര്ഭം ധാരയ വൈ ദേവി ദേവതാനാമിദം പ്രിയമ് ॥ 12 ॥
തസ്യ തദ്വചനം ശ്രുത്വാ ദിവ്യം രൂപമധാരയത് ।
ദൃഷ്ട്വാ തന്മഹിമാനം സ സമംതാദവകീര്യത ॥ 13 ॥
സമംതതസ്തദാ ദേവീമഭ്യഷിംചത പാവകഃ ।
സർവസ്രോതാംസി പൂര്ണാനി ഗംഗായാ രഘുനംദന ॥ 14 ॥
തമുവാച തതോ ഗംഗാ സർവദേവപുരോഹിതമ് ।
അശക്താ ധാരണേ ദേവ തവ തേജ സ്സമുദ്ധതമ് ।
ദഹ്യമാനാഗ്നിനാ തേന സംപ്രവ്യഥിതചേതനാ ॥ 15 ॥
അഥാബ്രവീദിദം ഗംഗാം സർവദേവഹുതാശനഃ ।
ഇഹ ഹൈമവതീ പാദേ ഗര്ഭോഽയം സന്നിവേശ്യതാമ് ॥ 16 ॥
ശ്രുത്വാ ത്വഗ്നിവചോ ഗങഗാ തം ഗര്ഭമതിഭാസ്വരമ് ।
ഉത്സസര്ജ മഹാതേജ സ്സ്രോതോഭ്യോ ഹി തദാനഘ ॥ 17 ॥
യദസ്യാ നിര്ഗതം തസ്മാത്തപ്തജാംബൂനദപ്രഭമ് ।
കാംചനം ധരണീം പ്രാപ്തം ഹിരണ്യമമലം ശുഭമ് ॥ 18 ॥
താമ്രം കാര്ഷ്ണായസം ചൈവ തൈക്ഷ്ണ്യാദേവാഭ്യജായത ॥ 19 ॥
മലം തസ്യാഭവത്തത്ര ത്രപു സീസകമേവ ച ।
തദേതദ്ധരണീം പ്രാപ്യ നാനാധാതുരവര്ധത ॥ 20 ॥
നിക്ഷിപ്തമാത്രേ ഗര്ഭേ തു തേജോഭിരഭിരംജിതമ് ।
സർവം പർവതസന്നദ്ധം സൌവര്ണമഭവദ്വനമ് ॥ 21 ॥
ജാതരൂപമിതി ഖ്യാതം തദാ പ്രഭൃതി രാഘവ ।
സുവര്ണം പുരുഷവ്യാഘ്ര ഹുതാശനസമപ്രഭമ് ॥ 22 ॥
തൃണവൃക്ഷലതാഗുല്മം സർവം ഭവതി കാംചനമ് ।
തം കുമാരം തതോ ജാതം സേംദ്രാസ്സഹ മരുദ്ഗണാഃ ॥ 23 ॥
ക്ഷീരസംഭാവനാര്ഥായ കൃത്തികാസ്സമയോജന് ।
താഃ ക്ഷീരം ജാതമാത്രസ്യ കൃത്വാ സമയമുത്തമമ് ॥ 24 ॥
ദദുഃ പുത്രോഽയമസ്മാകം സർവാസാമിതി നിശ്ചിതാഃ ।
തതസ്തു ദേവതാ സ്സർവാഃ കാര്തികേയ ഇതി ബ്രുവന് ॥ 25 ॥
പുത്രസ്ത്രൈലോക്യവിഖ്യാതോ ഭവിഷ്യതി ന സംശയഃ ।
4 തേഷാം തദ്വചനം ശ്രുത്വാ സ്കന്നം ഗര്ഭപരിസ്രവേ ॥ 26 ॥
സ്നാപയന് പരയാ ലക്ഷ്മ്യാ ദീപ്യമാനം യഥാനലമ് ।
സ്കംദ ഇത്യബ്രുവന് ദേവാഃ സ്കന്നം ഗര്ഭപരിസ്രവാത് ॥ 27 ॥
കാര്തികേയം മഹാഭാഗം കാകുത്സ്ഥ ജ്വലനോപമമ് ।
പ്രാദുര്ഭൂതം തതഃ ക്ഷീരം കൃത്തികാനാമനുത്തമമ് ॥ 28 ॥
ഷണ്ണാം ഷഡാനനോ ഭൂത്വാ ജഗ്രാഹ സ്തനജം പയഃ ।
ഗൃഹീത്വാ ക്ഷീരമേകാഹ്നാ സുകുമാരവപുസ്തദാ ॥ 29 ॥
അജയത്സ്വേന വീര്യേണ ദൈത്യസേനാഗണാന് വിഭുഃ ।
സുരസേനാഗണപതിം തതസ്തമതുലദ്യുതിമ് ॥ 30 ॥
അഭ്യഷിംചന് സുരഗണാ സ്സമേത്യാഗ്നിപുരോഗമാഃ ।
ഏഷ തേ രാമ ഗംഗായാ വിസ്തരോഽഭിഹിതോ മയാ ॥ 31 ॥
കുമാരസംഭവശ്ചൈവ ധന്യഃ പുണ്യസ്തഥൈവ ച ।
ഭക്തശ്ച യഃ കാര്തികേയേ കാകുത്സ്ഥ ഭുവി മാനവഃ ।
ആയുഷ്മാന് പുത്രപൌത്രൈശ്ച സ്കംദസാലോക്യതാം വ്രജേത് ॥ 32 ॥
ഇത്യാര്ഷേ ശ്രീമദ്രാമായണേ വാല്മീകീയ ആദികാവ്യേ ബാലകാംഡേ സപ്തത്രിംശസ്സര്ഗഃ ॥
