ଶ୍ରୀମଦ୍ଵାଲ୍ମୀକୀୟ ରାମାୟଣେ ବାଲକାଂଡମ୍ ।
ଅଥ ସପ୍ତତ୍ରିଂଶସ୍ସର୍ଗଃ ।
ତପ୍ୟମାନେ ତପୋ ଦେଵେ ଦେଵାଃ ସର୍ଷିଗଣାଃ ପୁରା ।
ସେନାପତିମଭୀପ୍ସଂତଃ ପିତାମହମୁପାଗମନ୍ ॥ 1 ॥
ତତୋଽବ୍ରୁଵନ୍ ସୁରାସ୍ସର୍ଵେ ଭଗଵଂତଂ ପିତାମହମ୍ ।
ପ୍ରଣିପତ୍ୟ ସୁରାସ୍ସର୍ଵେ ସେଂଦ୍ରାସ୍ସାଗ୍ନିପୁରୋଗମାଃ ॥ 2 ॥
ୟୋ ନ ସ୍ସେନାପତିର୍ଦେଵ ଦତ୍ତୋ ଭଗଵତା ପୁରା ।
ତପଃ ପରମମାସ୍ଥାୟ ତପ୍ୟତେ ସ୍ମ ସହୋମୟା ॥ 3 ॥
ୟଦତ୍ରାନଂତରଂ କାର୍ୟଂ ଲୋକାନାଂ ହିତକାମ୍ୟୟା ।
ସଂଵିଧତ୍ସ୍ଵ ଵିଧାନଜ୍ଞ ତ୍ଵଂ ହି ନଃ ପରମା ଗତିଃ ॥ 4 ॥
ଦେଵତାନାଂ ଵଚଶ୍ଶ୍ରୁତ୍ଵା ସର୍ଵଲୋକପିତାମହଃ ।
ସାଂତ୍ଵୟନ୍ମଧୁରୈର୍ଵାକ୍ୟୈସ୍ତ୍ରିଦଶାନିଦମବ୍ରଵୀତ୍ ॥ 5 ॥
ଶୈଲ ପୁତ୍ର୍ୟା ୟଦୁକ୍ତଂ ତନ୍ନ ପ୍ରଜାସ୍ୟଥ ପତ୍ନିଷୁ ।
ତସ୍ୟା ଵଚନମକ୍ଲିଷ୍ଟଂ ସତ୍ୟମେତନ୍ନ ସଂଶୟଃ ॥ 6 ॥
ଇୟମାକାଶଗା ଗଂଗା ୟସ୍ୟାଂ ପୁତ୍ରଂ ହୁତାଶନଃ ।
ଜନୟିଷ୍ୟତି ଦେଵାନାଂ ସେନାପତିମରିଂଦମମ୍ ॥ 7 ॥
ଜ୍ୟେଷ୍ଠା ଶୈଲେଂଦ୍ରଦୁହିତା ମାନୟିଷ୍ୟତି ତତ୍ସୁତମ୍ ।
ଉମାୟାସ୍ତଦ୍ବହୁମତଂ ଭଵିଷ୍ୟତି ନ ସଂଶୟଃ ॥ 8 ॥
ତଚ୍ଛ୍ରୁତ୍ଵା ଵଚନଂ ତସ୍ୟ କୃତାର୍ଥା ରଘୁନଂଦନ ।
ପ୍ରଣିପତ୍ୟ ସୁରାସ୍ସର୍ଵେ ପିତାମହମପୂଜୟନ୍ ॥ 9 ॥
ତେ ଗତ୍ଵା ପର୍ଵତଂ ରାମ କୈଲାସଂ ଧାତୁମଂଡିତମ୍ ।
ଅଗ୍ନିଂ ନିୟୋଜୟାମାସୁଃ ପୁତ୍ରାର୍ଥଂ ସର୍ଵଦେଵତାଃ ॥ 10 ॥
ଦେଵକାର୍ୟମିଦଂ ଦେଵ ସଂଵିଧତ୍ସ୍ଵ ହୁତାଶନ ।
ଶୈଲପୁତ୍ର୍ୟାଂ ମହାତେଜୋ ଗଂଗାୟାଂ ତେଜ ଉତ୍ସୃଜ ॥ 11 ॥
ଦେଵତାନାଂ ପ୍ରତିଜ୍ଞାୟ ଗଂଗାମଭ୍ୟେତ୍ୟ ପାଵକଃ ।
ଗର୍ଭଂ ଧାରୟ ଵୈ ଦେଵି ଦେଵତାନାମିଦଂ ପ୍ରିୟମ୍ ॥ 12 ॥
ତସ୍ୟ ତଦ୍ଵଚନଂ ଶ୍ରୁତ୍ଵା ଦିଵ୍ୟଂ ରୂପମଧାରୟତ୍ ।
ଦୃଷ୍ଟ୍ଵା ତନ୍ମହିମାନଂ ସ ସମଂତାଦଵକୀର୍ୟତ ॥ 13 ॥
ସମଂତତସ୍ତଦା ଦେଵୀମଭ୍ୟଷିଂଚତ ପାଵକଃ ।
ସର୍ଵସ୍ରୋତାଂସି ପୂର୍ଣାନି ଗଂଗାୟା ରଘୁନଂଦନ ॥ 14 ॥
ତମୁଵାଚ ତତୋ ଗଂଗା ସର୍ଵଦେଵପୁରୋହିତମ୍ ।
ଅଶକ୍ତା ଧାରଣେ ଦେଵ ତଵ ତେଜ ସ୍ସମୁଦ୍ଧତମ୍ ।
ଦହ୍ୟମାନାଗ୍ନିନା ତେନ ସଂପ୍ରଵ୍ୟଥିତଚେତନା ॥ 15 ॥
ଅଥାବ୍ରଵୀଦିଦଂ ଗଂଗାଂ ସର୍ଵଦେଵହୁତାଶନଃ ।
ଇହ ହୈମଵତୀ ପାଦେ ଗର୍ଭୋଽୟଂ ସନ୍ନିଵେଶ୍ୟତାମ୍ ॥ 16 ॥
ଶ୍ରୁତ୍ଵା ତ୍ଵଗ୍ନିଵଚୋ ଗଙଗା ତଂ ଗର୍ଭମତିଭାସ୍ଵରମ୍ ।
ଉତ୍ସସର୍ଜ ମହାତେଜ ସ୍ସ୍ରୋତୋଭ୍ୟୋ ହି ତଦାନଘ ॥ 17 ॥
ୟଦସ୍ୟା ନିର୍ଗତଂ ତସ୍ମାତ୍ତପ୍ତଜାଂବୂନଦପ୍ରଭମ୍ ।
କାଂଚନଂ ଧରଣୀଂ ପ୍ରାପ୍ତଂ ହିରଣ୍ୟମମଲଂ ଶୁଭମ୍ ॥ 18 ॥
ତାମ୍ରଂ କାର୍ଷ୍ଣାୟସଂ ଚୈଵ ତୈକ୍ଷ୍ଣ୍ୟାଦେଵାଭ୍ୟଜାୟତ ॥ 19 ॥
ମଲଂ ତସ୍ୟାଭଵତ୍ତତ୍ର ତ୍ରପୁ ସୀସକମେଵ ଚ ।
ତଦେତଦ୍ଧରଣୀଂ ପ୍ରାପ୍ୟ ନାନାଧାତୁରଵର୍ଧତ ॥ 20 ॥
ନିକ୍ଷିପ୍ତମାତ୍ରେ ଗର୍ଭେ ତୁ ତେଜୋଭିରଭିରଂଜିତମ୍ ।
ସର୍ଵଂ ପର୍ଵତସନ୍ନଦ୍ଧଂ ସୌଵର୍ଣମଭଵଦ୍ଵନମ୍ ॥ 21 ॥
ଜାତରୂପମିତି ଖ୍ୟାତଂ ତଦା ପ୍ରଭୃତି ରାଘଵ ।
ସୁଵର୍ଣଂ ପୁରୁଷଵ୍ୟାଘ୍ର ହୁତାଶନସମପ୍ରଭମ୍ ॥ 22 ॥
ତୃଣଵୃକ୍ଷଲତାଗୁଲ୍ମଂ ସର୍ଵଂ ଭଵତି କାଂଚନମ୍ ।
ତଂ କୁମାରଂ ତତୋ ଜାତଂ ସେଂଦ୍ରାସ୍ସହ ମରୁଦ୍ଗଣାଃ ॥ 23 ॥
କ୍ଷୀରସଂଭାଵନାର୍ଥାୟ କୃତ୍ତିକାସ୍ସମୟୋଜନ୍ ।
ତାଃ କ୍ଷୀରଂ ଜାତମାତ୍ରସ୍ୟ କୃତ୍ଵା ସମୟମୁତ୍ତମମ୍ ॥ 24 ॥
ଦଦୁଃ ପୁତ୍ରୋଽୟମସ୍ମାକଂ ସର୍ଵାସାମିତି ନିଶ୍ଚିତାଃ ।
ତତସ୍ତୁ ଦେଵତା ସ୍ସର୍ଵାଃ କାର୍ତିକେୟ ଇତି ବ୍ରୁଵନ୍ ॥ 25 ॥
ପୁତ୍ରସ୍ତ୍ରୈଲୋକ୍ୟଵିଖ୍ୟାତୋ ଭଵିଷ୍ୟତି ନ ସଂଶୟଃ ।
4 ତେଷାଂ ତଦ୍ଵଚନଂ ଶ୍ରୁତ୍ଵା ସ୍କନ୍ନଂ ଗର୍ଭପରିସ୍ରଵେ ॥ 26 ॥
ସ୍ନାପୟନ୍ ପରୟା ଲକ୍ଷ୍ମ୍ୟା ଦୀପ୍ୟମାନଂ ୟଥାନଲମ୍ ।
ସ୍କଂଦ ଇତ୍ୟବ୍ରୁଵନ୍ ଦେଵାଃ ସ୍କନ୍ନଂ ଗର୍ଭପରିସ୍ରଵାତ୍ ॥ 27 ॥
କାର୍ତିକେୟଂ ମହାଭାଗଂ କାକୁତ୍ସ୍ଥ ଜ୍ଵଲନୋପମମ୍ ।
ପ୍ରାଦୁର୍ଭୂତଂ ତତଃ କ୍ଷୀରଂ କୃତ୍ତିକାନାମନୁତ୍ତମମ୍ ॥ 28 ॥
ଷଣ୍ଣାଂ ଷଡାନନୋ ଭୂତ୍ଵା ଜଗ୍ରାହ ସ୍ତନଜଂ ପୟଃ ।
ଗୃହୀତ୍ଵା କ୍ଷୀରମେକାହ୍ନା ସୁକୁମାରଵପୁସ୍ତଦା ॥ 29 ॥
ଅଜୟତ୍ସ୍ଵେନ ଵୀର୍ୟେଣ ଦୈତ୍ୟସେନାଗଣାନ୍ ଵିଭୁଃ ।
ସୁରସେନାଗଣପତିଂ ତତସ୍ତମତୁଲଦ୍ୟୁତିମ୍ ॥ 30 ॥
ଅଭ୍ୟଷିଂଚନ୍ ସୁରଗଣା ସ୍ସମେତ୍ୟାଗ୍ନିପୁରୋଗମାଃ ।
ଏଷ ତେ ରାମ ଗଂଗାୟା ଵିସ୍ତରୋଽଭିହିତୋ ମୟା ॥ 31 ॥
କୁମାରସଂଭଵଶ୍ଚୈଵ ଧନ୍ୟଃ ପୁଣ୍ୟସ୍ତଥୈଵ ଚ ।
ଭକ୍ତଶ୍ଚ ୟଃ କାର୍ତିକେୟେ କାକୁତ୍ସ୍ଥ ଭୁଵି ମାନଵଃ ।
ଆୟୁଷ୍ମାନ୍ ପୁତ୍ରପୌତ୍ରୈଶ୍ଚ ସ୍କଂଦସାଲୋକ୍ୟତାଂ ଵ୍ରଜେତ୍ ॥ 32 ॥
ଇତ୍ୟାର୍ଷେ ଶ୍ରୀମଦ୍ରାମାୟଣେ ଵାଲ୍ମୀକୀୟ ଆଦିକାଵ୍ୟେ ବାଲକାଂଡେ ସପ୍ତତ୍ରିଂଶସ୍ସର୍ଗଃ ॥
