ಶ್ರೀಮದ್ವಾಲ್ಮೀಕೀಯ ರಾಮಾಯಣೇ ಅಯೋಧ್ಯಾಕಾಣ್ಡಮ್ ।
ಅಥ ಸಪ್ತಸಪ್ತತಿತಮಸ್ಸರ್ಗಃ ।
ತತೋ ದಶಾಹೇಽತಿಗತೇ ಕೃತಶೌಚೋ ನೃಪಾತ್ಮಜಃ ।
ದ್ವಾದಶೇಽಹನಿ ಸಮ್ಪ್ರಾಪ್ತೇ ಶ್ರಾದ್ಧಕರ್ಮಾಣ್ಯಕಾರಯತ್ ॥ 1 ॥
ಬ್ರಾಹ್ಮಣೇಭ್ಯೋ ದದೌ ರತ್ನಂ ಧನಮನ್ನಂ ಚ ಪುಷ್ಕಲಮ್ ।
ವಾಸಾಂಸಿ ಚ ಮಹಾರ್ಹಾಣಿ ರತ್ನಾನಿ ವಿವಿಧಾನಿ ಚ ॥ 2 ॥
ಬಾಸ್ತಿಕಂ ಬಹು ಶುಕ್ಲಂ ಚ ಗಾಶ್ಚಾಪಿ ಶತಶಸ್ತಥಾ ।
ದಾಸೀದಾಸಂ ಚ ಯಾನಂ ಚ ವೇಶ್ಮಾನಿ ಸುಮಹಾನ್ತಿ ಚ ॥ 3 ॥
ಬ್ರಾಹ್ಮಣೇಭ್ಯೋ ದದೌ ಪುತ್ರೋ ರಾಜ್ಞಸ್ತಸ್ಯೌರ್ಧ್ವದೈಹಿಕಮ್ ।
ತತಃ ಪ್ರಭಾತಸಮಯೇ ದಿವಸೇಽಥ ತ್ರಯೋದಶೇ ॥ 4 ॥
ವಿಲಲಾಪ ಮಹಾಬಾಹುರ್ಭರತ ಶ್ಶೋಕಮೂರ್ಛಿತಃ ।
ಶಬ್ದಾಪಿಹಿತಕಣ್ಠಸ್ತು ಶೋಧನಾರ್ಥಮುಪಾಗತಃ ॥ 5 ॥
ಚಿತಾಮೂಲೇ ಪಿತುರ್ವಾಕ್ಯಮಿದಮಾಹ ಸುದುಃಖಿತಃ ।
ತಾತ ಯಸ್ಮಿನ್ನಿಸೃಷ್ಟೋಽಹಂ ತ್ವಯಾ ಭ್ರಾತರಿ ರಾಘವೇ ॥ 6 ॥
ತಸ್ಮಿನ್ವನಂ ಪ್ರವ್ರಜಿತೇ ಶೂನ್ಯೇ ತ್ಯಕ್ತೋಽಸ್ಮ್ಯಹಂ ತ್ವಯಾ ।
ಯಸ್ಯಾ ಗತಿರನಾಥಾಯಾಃ ಪುತ್ರಃ ಪ್ರವಾಜಿತೋ ವನಮ್ ।
ತಾಮಮ್ಬಾಂ ತಾತ ಕೌಸಲ್ಯಾಂ ತ್ಯಕ್ತ್ವಾ ತ್ವಂ ಕ್ವ ಗತೋ ನೃಪ ॥ 7 ॥
ದೃಷ್ಟ್ವಾ ಭಸ್ಮಾರುಣಂ ತಚ್ಚ ದಗ್ಧಾಸ್ಥಿ ಸ್ಥಾನಮಣ್ಡಲಮ್ ॥ 8 ॥
ಪಿತು ಶ್ಶರೀರನಿರ್ವಾಣಂ ನಿಷ್ಟನನ್ವಿಷಸಾದ ಸಃ ।
ಸ ತು ದೃಷ್ಟ್ವಾ ರುದನ್ ದೀನಃ ಪಪಾತ ಧರಣೀತಲೇ ॥ 9 ॥
ಉತ್ಥಾಪ್ಯಮಾನಶ್ಶಕ್ರಸ್ಯ ಯನ್ತ್ರಧ್ವಜ ಇವ ಚ್ಯುತಃ ।
ಅಭಿಪೇತುಸ್ತತಸ್ಸರ್ವೇ ತಸ್ಯಾಮಾತ್ಯಾಶ್ಶುಚಿವ್ರತಮ್ ॥ 10 ॥
ಅನ್ತಕಾಲೇ ನಿಪತಿತಂ ಯಯಾತಿಮೃಷಯೋ ಯಥಾ ।
ಶತ್ರುಘ್ನ ಶ್ಚಾಪಿ ಭರತಂ ದೃಷ್ಟ್ವಾ ಶೋಕಂ ಪರಿಪ್ಲುತಃ ॥ 11 ॥
ವಿಸಞ್ಜ್ಞೋ ನ್ಯಪತದ್ಭೂಮೌ ಭೂಮಿಪಾಲಮನುಸ್ಮರನ್ ।
ಉನ್ಮತ್ತ ಇವ ನಿಶ್ಚೇತಾ ವಿಲಲಾಪ ಸುದುಃಖಿತಃ ॥ 12 ॥
ಸ್ಮೃತ್ವಾ ಪಿತುರ್ಗುಣಾಙ್ಗಾನಿ ತಾನಿ ತಾನಿ ತಥಾ ತಥಾ ।
ಮನ್ಥರಾಪ್ರಭವಸ್ತೀವ್ರಃ ಕೈಕೇಯೀಗ್ರಾಹಸಙ್ಕುಲಃ ॥ 13 ॥
ವರದಾನಮಯೋಽಕ್ಷೋಭ್ಯೋಽಮಞ್ಜಯಚ್ಛೋಕಸಾಗರಃ ।
ಸುಕುಮಾರಂ ಚ ಬಾಲಂ ಚ ಸತತಂ ಲಾಲಿತಂ ತ್ವಯಾ ॥ 14 ॥
ಕ್ವ ತಾತ ಭರತಂ ಹಿತ್ವಾ ವಿಲಪನ್ತಂ ಗತೋ ಭವಾನ್ ।
ನನು ಭೋಜ್ಯೇಷು ಪಾನೇಷು ವಸ್ತ್ರೇಷ್ವಾಭರಣೇಷು ಚ ॥ 15 ॥
ಪ್ರವಾರಯಸಿ ನಸ್ಸರ್ವಾನ್ ತನ್ನಃ ಕೋಽನ್ಯಃ ಕರಿಷ್ಯತಿ ।
ಅವದಾರಣಕಾಲೇ ತು ಪೃಥಿವೀ ನಾವದೀರ್ಯತೇ ॥ 16 ॥
ಯಾ ವಿಹೀನಾ ತ್ವಯಾ ರಾಜ್ಞಾ ಧರ್ಮಜ್ಞೇನ ಮಹಾತ್ಮನಾ ।
ಪಿತರಿ ಸ್ವರ್ಗಮಾಪನ್ನೇ ರಾಮೇ ಚಾರಣ್ಯಮಾಶ್ರಿತೇ ॥ 17 ॥
ಕಿಂ ಮೇ ಜೀವಿತಸಾಮರ್ಥ್ಯಂ ಪ್ರವೇಕ್ಷ್ಯಾಮಿ ಹುತಾಶನಮ್ ।
ಹೀನೋ ಭ್ರಾತ್ರಾ ಚ ಪಿತ್ರಾ ಚ ಶೂನ್ಯಾಮಿಕ್ಷ್ವಾಕುಪಾಲಿತಾಮ್ ॥ 18 ॥
ಅಯೋಧ್ಯಾಂ ನ ಪ್ರವೇಕ್ಷ್ಯಾಮಿ ಪ್ರವೇಕ್ಷ್ಯಾಮಿ ತಪೋವನಮ್ ।
ತಯೋರ್ವಿಲಪಿತಂ ಶ್ರುತ್ವಾ ವ್ಯಸನಂ ಚಾನ್ವವೇಕ್ಷ್ಯ ತತ್ ॥ 19 ॥
ಭೃಶಮಾರ್ತತರಾ ಭೂಯಸ್ಸರ್ವಏವಾನುಗಾಮಿನಃ ।
ತತೋ ವಿಷಣ್ಣೌ ಶ್ರಾನ್ತೌ ಚ ಶತ್ರುಘ್ನಭರತಾವುಭೌ ॥ 20 ॥
ಧರಣ್ಯಾಂ ಸಂವ್ಯವೇಷ್ಟೇತಾಂ ಭಗ್ನಶೃಙ್ಗಾವಿವರ್ಷಭೌ ।
ತತಃ ಪ್ರಕೃತಿಮಾನ್ವೈದ್ಯಃ ಪಿತುರೇಷಾಂ ಪುರೋಹಿತಃ ॥ 21 ॥
ವಸಿಷ್ಠೋ ಭರತಂ ವಾಕ್ಯಮುತ್ಥಾಪ್ಯ ತಮುವಾಚ ಹ ।
ತ್ರಯೋದಶೋಽಯಂ ದಿವಸಃ ಪಿತುರ್ವೃತ್ತಸ್ಯ ತೇ ವಿಭೋ ॥ 22 ॥
ಸಾವಶೇಷಾಸ್ಥಿನಿಚಯೇ ಕಿಮಿಹ ತ್ವಂ ವಿಲಮ್ಭಸೇ ।
ತ್ರೀಣಿ ದ್ವನ್ದ್ವಾನಿ ಭೂತೇಷು ಪ್ರವೃತ್ತಾನ್ಯವಿಶೇಷತಃ ॥ 23 ॥
ತೇಷು ಚಾಪರಿಹಾರ್ಯೇಷು ನೈವಂ ಭವಿತುಮರ್ಹಸಿ ।
ಸುಮನ್ತ್ರಶ್ಚಾಪಿ ಶತ್ರುಘ್ನಮುತ್ಥಾಪ್ಯಾಭಿಪ್ರಸಾದ್ಯ ಚ ॥ 24 ॥
ಶ್ರಾವಯಾಮಾಸ ತತ್ತ್ವಜ್ಞ ಸ್ಸರ್ವಭೂತಭವಾಭವಮ್ ।
ಉತ್ಥಿತೌ ಚ ನರವ್ಯಾಘ್ರೌ ಪ್ರಕಾಶೇತೇ ಯಶಸ್ವಿನೌ ॥ 25 ॥
ವರ್ಷಾತಪಪರಿಕ್ಲಿನೌ ಪೃಥಗಿನ್ದ್ರಧ್ವಜಾವಿವ ।
ಅಶ್ರೂಣಿ ಪರಿಮೃದ್ನನ್ತೌ ರಕ್ತಾಕ್ಷೌ ದೀನಭಾಷಿಣೌ ।
ಅಮಾತ್ಯಾಸ್ತ್ವರಯನ್ತಿ ಸ್ಮ ತನಯೌ ಚಾಪರಾಃ ಕ್ರಿಯಾಃ ॥ 26 ॥
ಇತ್ಯಾರ್ಷೇ ಶ್ರೀಮದ್ರಾಮಾಯಣೇ ವಾಲ್ಮೀಕೀಯ ಆದಿಕಾವ್ಯೇ ಅಯೋಧ್ಯಾಕಾಣ್ಡೇ ಸಪ್ತಸಪ್ತತಿತಮಸ್ಸರ್ಗಃ ॥
