ଶ୍ରୀମଦ୍ଵାଲ୍ମୀକୀୟ ରାମାୟଣେ ଅୟୋଧ୍ୟାକାଂଡମ୍ ।
ଅଥ ସପ୍ତସପ୍ତତିତମସ୍ସର୍ଗଃ ।
ତତୋ ଦଶାହେଽତିଗତେ କୃତଶୌଚୋ ନୃପାତ୍ମଜଃ ।
ଦ୍ଵାଦଶେଽହନି ସଂପ୍ରାପ୍ତେ ଶ୍ରାଦ୍ଧକର୍ମାଣ୍ୟକାରୟତ୍ ॥ 1 ॥
ବ୍ରାହ୍ମଣେଭ୍ୟୋ ଦଦୌ ରତ୍ନଂ ଧନମନ୍ନଂ ଚ ପୁଷ୍କଲମ୍ ।
ଵାସାଂସି ଚ ମହାର୍ହାଣି ରତ୍ନାନି ଵିଵିଧାନି ଚ ॥ 2 ॥
ବାସ୍ତିକଂ ବହୁ ଶୁକ୍ଲଂ ଚ ଗାଶ୍ଚାପି ଶତଶସ୍ତଥା ।
ଦାସୀଦାସଂ ଚ ୟାନଂ ଚ ଵେଶ୍ମାନି ସୁମହାଂତି ଚ ॥ 3 ॥
ବ୍ରାହ୍ମଣେଭ୍ୟୋ ଦଦୌ ପୁତ୍ରୋ ରାଜ୍ଞସ୍ତସ୍ୟୌର୍ଧ୍ଵଦୈହିକମ୍ ।
ତତଃ ପ୍ରଭାତସମୟେ ଦିଵସେଽଥ ତ୍ରୟୋଦଶେ ॥ 4 ॥
ଵିଲଲାପ ମହାବାହୁର୍ଭରତ ଶ୍ଶୋକମୂର୍ଛିତଃ ।
ଶବ୍ଦାପିହିତକଂଠସ୍ତୁ ଶୋଧନାର୍ଥମୁପାଗତଃ ॥ 5 ॥
ଚିତାମୂଲେ ପିତୁର୍ଵାକ୍ୟମିଦମାହ ସୁଦୁଃଖିତଃ ।
ତାତ ୟସ୍ମିନ୍ନିସୃଷ୍ଟୋଽହଂ ତ୍ଵୟା ଭ୍ରାତରି ରାଘଵେ ॥ 6 ॥
ତସ୍ମିନ୍ଵନଂ ପ୍ରଵ୍ରଜିତେ ଶୂନ୍ୟେ ତ୍ୟକ୍ତୋଽସ୍ମ୍ୟହଂ ତ୍ଵୟା ।
ୟସ୍ୟା ଗତିରନାଥାୟାଃ ପୁତ୍ରଃ ପ୍ରଵାଜିତୋ ଵନମ୍ ।
ତାମଂବାଂ ତାତ କୌସଲ୍ୟାଂ ତ୍ୟକ୍ତ୍ଵା ତ୍ଵଂ କ୍ଵ ଗତୋ ନୃପ ॥ 7 ॥
ଦୃଷ୍ଟ୍ଵା ଭସ୍ମାରୁଣଂ ତଚ୍ଚ ଦଗ୍ଧାସ୍ଥି ସ୍ଥାନମଂଡଲମ୍ ॥ 8 ॥
ପିତୁ ଶ୍ଶରୀରନିର୍ଵାଣଂ ନିଷ୍ଟନନ୍ଵିଷସାଦ ସଃ ।
ସ ତୁ ଦୃଷ୍ଟ୍ଵା ରୁଦନ୍ ଦୀନଃ ପପାତ ଧରଣୀତଲେ ॥ 9 ॥
ଉତ୍ଥାପ୍ୟମାନଶ୍ଶକ୍ରସ୍ୟ ୟଂତ୍ରଧ୍ଵଜ ଇଵ ଚ୍ୟୁତଃ ।
ଅଭିପେତୁସ୍ତତସ୍ସର୍ଵେ ତସ୍ୟାମାତ୍ୟାଶ୍ଶୁଚିଵ୍ରତମ୍ ॥ 10 ॥
ଅଂତକାଲେ ନିପତିତଂ ୟୟାତିମୃଷୟୋ ୟଥା ।
ଶତ୍ରୁଘ୍ନ ଶ୍ଚାପି ଭରତଂ ଦୃଷ୍ଟ୍ଵା ଶୋକଂ ପରିପ୍ଲୁତଃ ॥ 11 ॥
ଵିସଂଜ୍ଞୋ ନ୍ୟପତଦ୍ଭୂମୌ ଭୂମିପାଲମନୁସ୍ମରନ୍ ।
ଉନ୍ମତ୍ତ ଇଵ ନିଶ୍ଚେତା ଵିଲଲାପ ସୁଦୁଃଖିତଃ ॥ 12 ॥
ସ୍ମୃତ୍ଵା ପିତୁର୍ଗୁଣାଂଗାନି ତାନି ତାନି ତଥା ତଥା ।
ମଂଥରାପ୍ରଭଵସ୍ତୀଵ୍ରଃ କୈକେୟୀଗ୍ରାହସଂକୁଲଃ ॥ 13 ॥
ଵରଦାନମୟୋଽକ୍ଷୋଭ୍ୟୋଽମଂଜୟଚ୍ଛୋକସାଗରଃ ।
ସୁକୁମାରଂ ଚ ବାଲଂ ଚ ସତତଂ ଲାଲିତଂ ତ୍ଵୟା ॥ 14 ॥
କ୍ଵ ତାତ ଭରତଂ ହିତ୍ଵା ଵିଲପଂତଂ ଗତୋ ଭଵାନ୍ ।
ନନୁ ଭୋଜ୍ୟେଷୁ ପାନେଷୁ ଵସ୍ତ୍ରେଷ୍ଵାଭରଣେଷୁ ଚ ॥ 15 ॥
ପ୍ରଵାରୟସି ନସ୍ସର୍ଵାନ୍ ତନ୍ନଃ କୋଽନ୍ୟଃ କରିଷ୍ୟତି ।
ଅଵଦାରଣକାଲେ ତୁ ପୃଥିଵୀ ନାଵଦୀର୍ୟତେ ॥ 16 ॥
ୟା ଵିହୀନା ତ୍ଵୟା ରାଜ୍ଞା ଧର୍ମଜ୍ଞେନ ମହାତ୍ମନା ।
ପିତରି ସ୍ଵର୍ଗମାପନ୍ନେ ରାମେ ଚାରଣ୍ୟମାଶ୍ରିତେ ॥ 17 ॥
କିଂ ମେ ଜୀଵିତସାମର୍ଥ୍ୟଂ ପ୍ରଵେକ୍ଷ୍ୟାମି ହୁତାଶନମ୍ ।
ହୀନୋ ଭ୍ରାତ୍ରା ଚ ପିତ୍ରା ଚ ଶୂନ୍ୟାମିକ୍ଷ୍ଵାକୁପାଲିତାମ୍ ॥ 18 ॥
ଅୟୋଧ୍ୟାଂ ନ ପ୍ରଵେକ୍ଷ୍ୟାମି ପ୍ରଵେକ୍ଷ୍ୟାମି ତପୋଵନମ୍ ।
ତୟୋର୍ଵିଲପିତଂ ଶ୍ରୁତ୍ଵା ଵ୍ୟସନଂ ଚାନ୍ଵଵେକ୍ଷ୍ୟ ତତ୍ ॥ 19 ॥
ଭୃଶମାର୍ତତରା ଭୂୟସ୍ସର୍ଵଏଵାନୁଗାମିନଃ ।
ତତୋ ଵିଷଣ୍ଣୌ ଶ୍ରାଂତୌ ଚ ଶତ୍ରୁଘ୍ନଭରତାଵୁଭୌ ॥ 20 ॥
ଧରଣ୍ୟାଂ ସଂଵ୍ୟଵେଷ୍ଟେତାଂ ଭଗ୍ନଶୃଂଗାଵିଵର୍ଷଭୌ ।
ତତଃ ପ୍ରକୃତିମାନ୍ଵୈଦ୍ୟଃ ପିତୁରେଷାଂ ପୁରୋହିତଃ ॥ 21 ॥
ଵସିଷ୍ଠୋ ଭରତଂ ଵାକ୍ୟମୁତ୍ଥାପ୍ୟ ତମୁଵାଚ ହ ।
ତ୍ରୟୋଦଶୋଽୟଂ ଦିଵସଃ ପିତୁର୍ଵୃତ୍ତସ୍ୟ ତେ ଵିଭୋ ॥ 22 ॥
ସାଵଶେଷାସ୍ଥିନିଚୟେ କିମିହ ତ୍ଵଂ ଵିଲଂଭସେ ।
ତ୍ରୀଣି ଦ୍ଵଂଦ୍ଵାନି ଭୂତେଷୁ ପ୍ରଵୃତ୍ତାନ୍ୟଵିଶେଷତଃ ॥ 23 ॥
ତେଷୁ ଚାପରିହାର୍ୟେଷୁ ନୈଵଂ ଭଵିତୁମର୍ହସି ।
ସୁମଂତ୍ରଶ୍ଚାପି ଶତ୍ରୁଘ୍ନମୁତ୍ଥାପ୍ୟାଭିପ୍ରସାଦ୍ୟ ଚ ॥ 24 ॥
ଶ୍ରାଵୟାମାସ ତତ୍ତ୍ଵଜ୍ଞ ସ୍ସର୍ଵଭୂତଭଵାଭଵମ୍ ।
ଉତ୍ଥିତୌ ଚ ନରଵ୍ୟାଘ୍ରୌ ପ୍ରକାଶେତେ ୟଶସ୍ଵିନୌ ॥ 25 ॥
ଵର୍ଷାତପପରିକ୍ଲିନୌ ପୃଥଗିଂଦ୍ରଧ୍ଵଜାଵିଵ ।
ଅଶ୍ରୂଣି ପରିମୃଦ୍ନଂତୌ ରକ୍ତାକ୍ଷୌ ଦୀନଭାଷିଣୌ ।
ଅମାତ୍ୟାସ୍ତ୍ଵରୟଂତି ସ୍ମ ତନୟୌ ଚାପରାଃ କ୍ରିୟାଃ ॥ 26 ॥
ଇତ୍ୟାର୍ଷେ ଶ୍ରୀମଦ୍ରାମାୟଣେ ଵାଲ୍ମୀକୀୟ ଆଦିକାଵ୍ୟେ ଅୟୋଧ୍ୟାକାଂଡେ ସପ୍ତସପ୍ତତିତମସ୍ସର୍ଗଃ ॥
