ಶ್ರೀಮದ್ವಾಲ್ಮೀಕೀಯ ರಾಮಾಯಣೇ ಅಯೋಧ್ಯಾಕಾಣ್ಡಮ್ ।
ಅಥ ಚತುರ್ದಶಸ್ಸರ್ಗಃ ।
ಪುತ್ರಶೋಕಾರ್ದಿತಂ ಪಾಪಾ ವಿಸಞ್ಜ್ಞಂ ಪತಿತಂ ಭುವಿ ।
ವಿವೇಷ್ಟಮಾನಮುದ್ವೀಕ್ಷ್ಯ ಸೈಕ್ಷ್ವಾಕಮಿದಮಬ್ರವೀತ್ ॥ 1 ॥
ಪಾಪಂ ಕೃತ್ವೈವ ಕಿಮಿದಂ ಮಮ ಸಂಶ್ರುತ್ಯ ಸಂಶ್ರವಮ್ ।
ಶೇಷೇ ಕ್ಷಿತಿತಲೇ ಸನ್ನಃ ಸ್ಥಿತ್ಯಾಂ ಸ್ಥಾತುಂ ತ್ವಮರ್ಹಸಿ ॥ 2 ॥
ಆಹು ಸ್ಸತ್ಯಂ ಹಿ ಪರಮಂ ಧರ್ಮಂ ಧರ್ಮವಿದೋ ಜನಾಃ ।
ಸತ್ಯಮಾಶ್ರಿತ್ಯ ಹಿ ಮಯಾ ತ್ವಂ ಚ ಧರ್ಮಂ ಪ್ರಬೋಧಿತಃ ॥ 3 ॥
ಸಂಶ್ರುತ್ಯ ಶೈಬ್ಯಶ್ಶ್ಯೇನಾಯ ಸ್ವಾಂ ತನುಂ ಜಗತೀಪತಿಃ ।
ಪ್ರದಾಯ ಪಕ್ಷಿಣೇ ರಾಜ ನ್ಜಗಾಮ ಗತಿಮುತ್ತಮಾಮ್ ॥ 4 ॥
ತಥಾ ಹ್ಯಲರ್ಕಸ್ತೇಜಸ್ವೀ ಬ್ರಾಹ್ಮಣೇ ವೇದಪಾರಗೇ ।
ಯಾಚಮಾನೇ ಸ್ವಕೇ ನೇತ್ರೇ ಉದ್ಧೃತ್ಯಾವಿಮನಾ ದದೌ ॥ 5 ॥
ಸರಿತಾಂ ತು ಪತಿಸ್ಸ್ವಲ್ಪಾಂ ಮರ್ಯಾದಾಂ ಸತ್ಯಮನ್ವಿತಃ ।
ಸತ್ಯಾನುರೋಧಾತ್ಸಮಯೇ ಸ್ವಾಂ ವೇಲಾಂ ನಾತಿವರ್ತತೇ ॥ 6 ॥
ಸತ್ಯಮೇಕಪದಂ ಬ್ರಹ್ಮ ಸತ್ಯೇ ಧರ್ಮಃ ಪ್ರತಿಷ್ಟಿತಃ ।
ಸತ್ಯಮೇವಾಕ್ಷಯಾ ವೇದಾ ಸತ್ಯೇನೈವಾಪ್ಯತೇ ಸ್ಪರಮ್ ॥ 7 ॥
ಸತ್ಯಂ ಸಮನುವರ್ತಸ್ವ ಯದಿ ಧರ್ಮೇ ಧೃತಾ ಮತಿಃ ।
ಸಫಲಸ್ಸ ವರೋ ಮೇಽಸ್ತು ವರದೋ ಹ್ಯಸಿ ಸತ್ತಮ ॥ 8 ॥
ಧರ್ಮಸ್ಯೈಹಾಭಿಕಾಮಾರ್ಥಂ ಮಮ ಚೈವಾಭಿಚೋದನಾತ್ ।
ಪ್ರವ್ರಾಜಯ ಸುತಂ ರಾಮಂ ತ್ರಿಃಖಲು ತ್ವಾಂ ಬ್ರವೀಮ್ಯಹಮ್ ॥ 9 ॥
ಸಮಯಂ ಚ ಮಮಾರ್ಯೇಮಂ ಯದಿ ತ್ವಂ ನ ಕರಿಷ್ಯಸಿ ।
ಅಗ್ರತಸ್ತೇ ಪರಿತ್ಯಕ್ತಾ ಪರಿತ್ಯಕ್ಷ್ಯಾಮಿ ಜೀವಿತಮ್ ॥ 10 ॥
ಏವಂ ಪ್ರಚೋದಿತೋ ರಾಜಾ ಕೈಕೇಯ್ಯಾ ನಿರ್ವಿಶಙ್ಕಯಾ ।
ನಾಶಕತ್ಪಾಶಮುನ್ಮೋಕ್ತುಂ ಬಲಿರಿನ್ದ್ರಕೃತಂ ಯಥಾ ॥ 11 ॥
ಉದ್ಭ್ರಾನ್ತಹೃದಯಶ್ಚಾಪಿ ವಿವರ್ಣವದನೋಽಭವತ್ ।
ಸ ಧುರ್ಯೋವೈಪರಿಸ್ಪನ್ದನ್ಯುಗಚಕ್ರಾನ್ತರಂ ಯಥಾ ॥ 12 ॥
ವಿಹ್ವಲಾಭ್ಯಾಂ ಚ ನೇತ್ರಾಭ್ಯಾಮಪಶ್ಯನ್ನಿವ ಭೂಪತಿಃ ।
ಕೃಚ್ಛ್ರಾದ್ಧೈರ್ಯೇಣ ಸಂಸ್ತಭ್ಯ ಕೈಕೇಯೀಮಿದಮಬ್ರವೀತ್ ॥ 13 ॥
ಯಸ್ತೇ ಮನ್ತ್ರಕೃತಃ ಪಾಣಿರಗ್ನೌ ಪಾಪೇ ಮಯಾ ಧೃತಃ ।
ತಂ ತ್ಯಜಾಮಿ ಸ್ವಜಂ ಚೈವ ತವ ಪುತ್ರಂ ತ್ವಯಾ ಸಹ ॥ 14 ॥
ಪ್ರಯಾತಾ ರಜನೀ ದೇವಿ ಸೂರ್ಯಸ್ಯೋದಯನಮ್ಪ್ರತಿ ।
ಅಭಿಷೇಕಂ ಗುರುಜನಸ್ತ್ವರಯಿಷ್ಯತಿ ಮಾಂ ಧ್ರುವಮ್ ॥ 15 ॥
ರಾಮಾಭಿಷೇಕಸಮ್ಭಾರೈಸ್ತದರ್ಥಮುಪಕಲ್ಪಿತೈಃ ।
ರಾಮಃ ಕಾರಯಿತವ್ಯೋ ಮೇ ಮೃತಸ್ಯ ಸಲಿಲಕ್ರಿಯಾಮ್ ॥ 16 ॥
ತ್ವಯಾ ಸಪುತ್ರಯಾ ನೈವ ಕರ್ತವ್ಯಾ ಸಲಿಲಕ್ರಿಯಾ ।
ವ್ಯಾಹನ್ತಾಽಸ್ಯಶುಭಾಚಾರೇ ಯದಿ ರಾಮಾಭಿಷೇಚನಮ್ ॥ 17 ॥
ನ ಚ ಶಕ್ತೋಽಸ್ಮ್ಯಹಂ ದ್ರಷ್ಟುಂ ದೃಷ್ಟ್ವಾ ಪೂರ್ವಂ ತಥಾಸುಖಮ್ ।
ಹತಹರ್ಷಂ ನಿರಾನನ್ದಂ ಪುನರ್ಜನಮವಾಙ್ಮುಖಮ್ ॥ 18 ॥
ತಾಂ ತಥಾ ಬ್ರುವತಸ್ತಸ್ಯ ಭೂಮಿಪಸ್ಯ ಮಹಾತ್ಮನಃ ।
ಪ್ರಭಾತಾ ಶರ್ವರೀ ಪುಣ್ಯಾ ಚನ್ದ್ರನಕ್ಷತ್ರಶಾಲಿನೀ ॥ 19 ॥
ತತಃ ಪಾಪಸಮಾಚಾರಾ ಕೈಕೇಯೀ ಪಾರ್ಥಿವಂ ಪುನಃ ।
ಉವಾಚ ಪರುಷಂ ವಾಕ್ಯಂ ವಾಕ್ಯಜ್ಞಾ ರೋಷಮೂರ್ಛಿತಾ ॥ 20 ॥
ಕಿಮಿದಂ ಭಾಷಸೇ ರಾಜನ್ವಾಕ್ಯಂ ಗರರುಜೋಪಮಮ್ ।
ಆನಾಯಯಿತುಮಕ್ಲಿಷ್ಟಂ ಪುತ್ರಂ ರಾಮಮಿಹಾರ್ಹಸಿ ॥ 21 ॥
ಸ್ಥಾಪ್ಯ ರಾಜ್ಯೇ ಮಮ ಸುತಂ ಕೃತ್ವಾ ರಾಮಂ ವನೇಚರಮ್ ।
ನಿಸ್ಸಪತ್ನಾಂ ಚ ಮಾಂ ಕೃತ್ವಾ ಕೃತಕೃತ್ಯೋ ಭವಿಷ್ಯಸಿ ॥ 22 ॥
ಸ ನುನ್ನ ಇವ ತೀಕ್ಷ್ಣೇನ ಪ್ರತೋದೇನ ಹಯೋತ್ತಮಃ ।
ರಾಜಾ ಪ್ರಚೋದಿತೋಽಭೀಕ್ಷ್ಣಂ ಕೈಕೇಯೀಮಿದಮಬ್ರವೀತ್ ॥ 23 ॥
ಧರ್ಮಬನ್ಧೇನ ಬಧ್ದೋಽಸ್ಮಿ ನಷ್ಟಾ ಚ ಮಮ ಚೇತನಾ ।
ಜ್ಯೇಷ್ಠಂ ಪುತ್ರಂ ಪ್ರಿಯಂ ರಾಮಂ ದ್ರಷ್ಟುಮಿಚ್ಛಾಮಿ ಧಾರ್ಮಿಕಮ್ ॥ 24 ॥
ತತಃ ಪ್ರಭಾತಾಂ ರಜನೀಮುದಿತೇ ಚ ದಿವಾಕರೇ ।
ಪುಣ್ಯೇ ನಕ್ಷತ್ರಯೋಗೇ ಚ ಮುಹೂರ್ತೇ ಚ ಸಮಾಹಿತೇ ॥ 25 ॥
ವಸಿಷ್ಠೋ ಗುಣಸಮ್ಪನ್ನ ಶ್ಶಿಷ್ಯೈ ಪರಿವೃತಸ್ತದಾ ।
ಉಪಗೃಹ್ಯಾಶು ಸಮ್ಭಾರಾನ್ಪ್ರವಿವೇಶ ಪುರೋತ್ತಮಮ್ ॥ 26 ॥
ಸಿಕ್ತಸಮ್ಮಾರ್ಜಿತಪಥಾಂ ಪತಾಕೋತ್ತಮ ಭೂಷಿತಾಮ್ ।
ವಿಚಿತ್ರಕುಸುಮಾಕೀರ್ಣಾಂ ನಾನಾಸ್ರಗ್ಭಿರ್ವಿರಾಜಿತಾಮ್ ॥ 27 ॥
ಸಂಹೃಷ್ಟಮನುಜೋಪೇತಾಂ ಸಮೃದ್ಧವಿಪಣಾಪಣಾಮ್ ।
ಮಹೋತ್ಸವಸಮಾಕೀರ್ಣಾಂ ರಾಘವಾರ್ಥೇ ಸಮುತ್ಸುಕಾಮ್ ॥ 28 ॥
ಚನ್ದನಾಗರುಧೂಪೈಶ್ಚ ಸರ್ವತಃ ಪ್ರತಿಧೂಪಿತಾಮ್ ।
ತಾಂ ಪುರೀಂ ಸಮತಿಕ್ರಮ್ಯ ಪುರನ್ದರಪುರೋಪಮಾಮ್ ॥ 29 ॥
ದದರ್ಶಾನ್ತಃಪುರಶ್ರೇಷ್ಠಂ ನಾನಾದ್ವಿಜಗಣಾಯುತಮ್ ।
ಪೌರಜಾನಪದಾಕೀರ್ಣಂ ಬ್ರಾಹ್ಮಣೈರುಪಶೋಭಿತಮ್ ॥ 30 ॥
ಯಜ್ಞವಿದ್ಭಿ ಸ್ಸುಸಮ್ಪೂರ್ಣಂ ಸದಸ್ಯೈಃ ಪರಮದ್ವಿಜೈಃ ।
ತದನ್ತಃಪುರಮಾಸಾದ್ಯ ವ್ಯತಿಚಕ್ರಾಮ ತಂ ಜನಮ್ ॥ 31 ॥
ವಸಿಷ್ಠಃ ಪರಮಪ್ರೀತಃ ಪರಮರ್ಷಿರ್ವಿವೇಶ ಚ ।
ಸತ್ವಪಶ್ಯದ್ವಿನಿಷ್ಕ್ರಾನ್ತಂ ಸುಮನ್ತ್ರಂ ನಾಮ ಸಾರಥಿಮ್ ॥ 32 ॥
ದ್ವಾರೇ ಮನುಜಸಿಂಹಸ್ಯ ಸಚಿವಂ ಪ್ರಿಯದರ್ಶನಮ್ ।
ತಮುವಾಚ ಮಹಾತೇಜಾ ಸ್ಸೂತಪುತ್ರಂ ವಿಶಾರದಮ್ ॥ 33 ॥
ವಸಿಷ್ಠಃ ಕ್ಷಿಪ್ರಮಾಚಕ್ಷ್ವ ನೃಪತೇರ್ಮಾಮಿಹಾಗತಮ್ ।
ಇಮೇ ಗಙ್ಗೋದಕಘಟಾ ಸ್ಸಾಗರೇಭ್ಯಶ್ಚ ಕಾಞ್ಚನಾಃ ॥ 34 ॥
ಔದುಮ್ಬರಂ ಭದ್ರಪೀಠಮಭಿಷೇಕಾರ್ಥಮಾಗತಮ್ ।
ಸರ್ವಬೀಜಾನಿ ಗನ್ಧಾಶ್ಚ ರತ್ನಾನಿ ವಿವಿಧಾನಿ ಚ ॥ 35 ॥
ಕ್ಷೌದ್ರಂ ದಧಿ ಘೃತಂ ಲಾಜಾ ದರ್ಭಾಸ್ಸುಮನಸಃ ಪಯಃ ।
ಅಷ್ಟೌ ಚ ಕನ್ಯಾ ರುಚಿರಾ ಮತ್ತಶ್ಚ ವರವಾರಣಃ ॥ 36 ॥
ಚತುರಶ್ವೋ ರಥಶ್ಶ್ರೀಮಾನ್ನಿಸ್ತ್ರಿಂಶೋ ಧನುರುತ್ತಮಮ್ ।
ವಾಹನಂ ನರಸಂಯುಕ್ತಂ ಛತ್ರಂ ಚ ಶಶಿಸನ್ನಿಭಮ್ ॥ 37 ॥
ಶ್ವೇತೇ ಚ ವಾಲವ್ಯಜನೇ ಭೃಙ್ಗಾರುಶ್ಚ ಹಿರಣ್ಮಯಃ ।
ಹೇಮದಾಮಪಿನಧ್ದಶ್ಚ ಕಕುದ್ಮಾನ್ಪಾಣ್ಡುರೋ ವೃಷಃ ॥ 38 ॥
ಕೇಸರೀ ಚ ಚತುರ್ದಂಷ್ಟ್ರೋ ಹರಿಶ್ರೇಷ್ಠೋ ಮಹಾಬಲಃ ।
ಸಿಂಹಾಸನಂ ವ್ಯಾಘ್ರತನು ಸ್ಸಮಿದ್ಧಶ್ಚ ಹುತಾಶನಃ ॥ 39 ॥
ಸರ್ವವಾದಿತ್ರಸಙ್ಘಾಶ್ಚ ವೇಶ್ಯಾಶ್ಚಾಲಙ್ಕೃತಾ ಸ್ಸ್ತ್ರಯಃ ।
ಆಚಾರ್ಯಾ ಬ್ರಾಹ್ಮಣಾ ಗಾವಃ ಪುಣ್ಯಾಶ್ಚ ಮೃಗಪಕ್ಷಿಣಃ ॥ 40 ॥
ಪೌರಜಾನಪದಶ್ರೇಷ್ಠಾ ನೈಗಮಾಶ್ಚ ಗಣೈ ಸ್ಸಹ ।
ಏತೇ ಚಾನ್ಯೇ ಚ ಬಹವೋ ನೀಯಮಾನಾಃ ಪ್ರಿಯಂವದಾಃ ॥ 41 ॥
ಅಭಿಷೇಕಾಯ ರಾಮಸ್ಯ ಸಹ ತಿಷ್ಠನ್ತಿ ಪಾರ್ಥಿವೈಃ ।
ತ್ವರಯಸ್ವ ಮಹಾರಾಜಂ ಯಥಾ ಸಮುದಿತೇಽಹನಿ ॥ 42 ॥
ಪುಷ್ಯೇ ನಕ್ಷತ್ರಯೋಗೇ ಚ ರಾಮೋ ರಾಜ್ಯಮವಾಪ್ನುಯಾತ್ ।
ಇತಿ ತಸ್ಯ ವಚ ಶ್ಶ್ರುತ್ವಾ ಸೂತಪುತ್ರೋ ಮಹಾತ್ಮನಃ ॥ 43 ॥
ಸ್ತುವನ್ನೃಪತಿಶಾರ್ದೂಲಂ ಪ್ರವಿವೇಶ ನಿವೇಶನಮ್ ।
ತಂ ತು ಪೂರ್ವೋದಿತಂ ವೃಧ್ದಂ ದ್ವಾರಸ್ಥಾ ರಾಜ ಸಮ್ಮತಮ್ ॥ 44 ॥
ನ ಶೇಕುರಭಿಸಂರೋಧ್ದುಂ ರಾಜ್ಞಃ ಪ್ರಿಯಚಿಕೀರ್ಷವಃ ।
ಸ ಸಮೀಪಸ್ಥಿತೋ ರಾಜ್ಞಸ್ತಾಮವಸ್ಥಾಮಜಜ್ಞಿವಾನ್ ॥ 45 ॥
ವಾಗ್ಭಿಃ ಪರಮತುಷ್ಟಾಭಿರಭಿಷ್ಟೋತುಂ ಪ್ರಚಕ್ರಮೇ ।
ತತ ಸ್ಸೂತೋ ಯಥಾಕಾಲಂ ಪಾರ್ಥಿವಸ್ಯ ನಿವೇಶನೇ ॥ 46 ॥
ಸುಮನ್ತ್ರಃ ಪ್ರಾಞ್ಜಲಿರ್ಭೂತ್ವಾ ತುಷ್ಟಾವ ಜಗತೀಪತಿಮ್ ।
ಯಥಾ ನನ್ದತಿ ತೇಜಸ್ವೀ ಸಾಗರೋ ಭಾಸ್ಕರೋದಯೇ ॥ 47 ॥
ಪ್ರೀತಃ ಪ್ರೀತೇನ ಮನಸಾ ತಥಾಽನನ್ದಘನ ಸ್ಸ್ವತಃ ।
ಇನ್ದ್ರಮಸ್ಯಾಂ ತು ವೇಲಾಯಾಮಭಿತುಷ್ಟಾವ ಮಾತಲಿಃ ॥ 48 ॥
ಸೋಽಜಯದ್ದಾನವಾನ್ಸರ್ವಾಂಸ್ತಥಾ ತ್ವಾಂ ಬೋಧಯಾಮ್ಯಹಮ್ ।
ವೇದಾಸ್ಸಹಾಙ್ಗವಿದ್ಯಾಶ್ಚ ಯಥಾಹ್ಯಾತ್ಮಭುವಂ ವಿಭುಮ್ ॥ 49 ॥
ಬ್ರಹ್ಮಾಣಂ ಬೋಧಯನ್ತ್ಯದ್ಯ ತಥಾ ತ್ವಾಂ ಬೋಧಯಾಮ್ಯಹಮ್ ।
ಆದಿತ್ಯಸ್ಸಹ ಚನ್ದ್ರೇಣ ಯಥಾ ಭೂತಧರಾಂ ಶುಭಾಮ್ ॥ 50 ॥
ಬೋಧಯತ್ಯದ್ಯ ಪೃಥಿವೀಂ ತಥಾ ತ್ವಾಂ ಬೋಧಯಾಮ್ಯಹಮ್ ।
ಉತ್ತಿಷ್ಠಾಶು ಮಹಾರಾಜ ಕೃತಕೌತುಕಮಙ್ಗಲಃ ॥ 51 ॥
ವಿರಾಜಮಾನೋ ವಪುಷಾ ಮೇರೋರಿವ ದಿವಾಕರಃ ।
ಸೋಮಸೂರ್ಯೌ ಚ ಕಾಕುತ್ಸ್ಥ ಶಿವವೈಶ್ರವಣಾವಪಿ ॥ 52 ॥
ವರುಣಶ್ಚಾಗ್ನಿರಿನ್ದ್ರಶ್ಚ ವಿಜಯಂ ಪ್ರದಿಶನ್ತು ತೇ ।
ಗತಾ ಭಗವತೀ ರಾತ್ರಿಃ ಕೃತಂ ಕೃತ್ಯಮಿದಂ ತವ ॥ 53 ॥
ಬುದ್ಧ್ಯಸ್ವ ನೃಪಶಾರ್ದೂಲ ಕುರು ಕಾರ್ಯಮನನ್ತರಮ್ ।
ಉದತಿಷ್ಠತ ರಾಮಸ್ಯ ಸಮಗ್ರಮಭಿಷೇಚನಮ್ ॥ 54 ॥
ಪೌರಜಾನಾಪದೈಶ್ಚಾಪಿ ನೈಗಮೈಶ್ಚ ಕೃತಾಞ್ಜಲಿಃ ।
ಸ್ವಯಂ ವಶಿಷ್ಠೋ ಭಗವಾನ್ಬ್ರಾಹ್ಮಣೈ ಸ್ಸಹ ತಿಷ್ಠತಿ ॥ 55 ॥
ಕ್ಷಿಪ್ರಮಾಜ್ಞಾಪ್ಯತಾಂ ರಾಜನ್ರಾಘವಸ್ಯಾಭಿಷೇಚನಮ್ ।
ಯಥಾ ಹ್ಯಪಾಲಾಃ ಪಶವೋ ಯಥಾ ಸೇನಾ ಹ್ಯನಾಯಕಾ ॥ 56 ॥
ಯಥಾ ಚನ್ದ್ರಂ ವಿನಾ ರಾತ್ರಿರ್ಯಥಾ ಗಾವೋ ವಿನಾ ವೃಷಮ್ ।
ಏವಂ ಹಿ ಭವಿತಾ ರಾಷ್ಟ್ರಂ ಯತ್ರ ರಾಜಾ ನ ದೃಶ್ಯತೇ ॥ 57 ॥
ಇತಿ ತಸ್ಯ ವಚ ಶ್ಶೃತ್ವಾ ಸಾನ್ತ್ವಪೂರ್ವಮಿವಾರ್ಥವತ್ ।
ಅಭ್ಯಕೀರ್ಯತ ಶೋಕೇನ ಭೂಯ ಏವ ಮಹೀಪತಿಃ ॥ 58 ॥
ತತ ಸ್ಸರಾಜಾ ತಂ ಸೂತಂ ಸನ್ನಹರ್ಷ ಸ್ಸುತಂ ಪ್ರತಿ ।
ಶೋಕರಕ್ತೇಕ್ಷಣ ಶ್ಶ್ರೀಮಾನುದ್ವೀಕ್ಷ್ಯೋವಾಚ ಧಾರ್ಮಿಕಃ ॥ 59 ॥
ವಾಕ್ಯೈಸ್ತು ಖಲು ಮರ್ಮಾಣಿ ಮಮ ಭೂಯೋ ನಿಕೃನ್ತಸಿ ।
ಸುಮನ್ತ್ರಃ ಕರುಣಂ ಶ್ರುತ್ವಾ ದೃಷ್ಟ್ವಾ ದೀನಂ ಚ ಪಾರ್ಥಿವಮ್ ।
ಪ್ರಗೃಹೀತಾಞ್ಜಲಿಃ ಕಿಞ್ಚಿತ್ತಸ್ಮಾದ್ದೇಶಾದಪಾಕ್ರಮತ್ ॥ 60 ॥
ಯದಾ ವಕ್ತುಂ ಸ್ವಯಂ ದೈನ್ಯಾನ್ನ ಶಶಾಕ ಮಹೀಪತಿಃ ॥ 61 ॥
ತದಾ ಸುಮನ್ತ್ರಂ ಮನ್ತ್ರಜ್ಞಾ ಕೈಕೇಯೀ ಪ್ರತ್ಯುವಾಚ ಹ ।
ಸುಮನ್ತ್ರ ರಾಜಾ ರಜನೀಂ ರಾಮಹರ್ಷಸಮುತ್ಸುಕಃ ॥ 62 ॥
ಪ್ರಜಾಗರಪರಿಶ್ರಾನ್ತೋ ನಿದ್ರಾಯಾ ವಶಮುಪೇಯಿವಾನ್ ।
ತದ್ಗಚ್ಛ ತ್ವರಿತಂ ಸೂತ ರಾಜಪುತ್ರಂ ಯಶಸ್ವಿನಮ್ ॥ 63 ॥
ರಾಮಮಾನಯ ಭದ್ರಂ ತೇ ನಾತ್ರ ಕಾರ್ಯಾ ವಿಚಾರಣಾ ।
ಸ ಮನ್ಯಮಾನಃ ಕಲ್ಯಾಣಂ ಹೃದಯೇನ ನನನ್ದ ಚ ॥ 64 ॥
ನಿರ್ಜಗಾಮ ಚ ಸಮ್ಪ್ರೀತ್ಯಾ ತ್ವರಿತೋ ರಾಜಶಾಸನಾತ್ ।
ಸುಮನ್ತ್ರಶ್ಚಿನ್ತಯಾಮಾಸ ತ್ವರಿತಂ ಚೋದಿತಸ್ತಯಾ ॥ 65 ॥
ವ್ಯಕ್ತಂ ರಾಮೋಽಭಿಷೇಕಾರ್ಥಮಿಹಾಯಾಸ್ಯತಿ ಧರ್ಮವಿತ್ ।
ಇತಿ ಸೂತೋ ಮತಿಂ ಕೃತ್ವಾ ಹರ್ಷೇಣ ಮಹತಾಽಽವೃತಃ ॥ 66 ॥
ನಿರ್ಜಗಾಮ ಮಹಾಬಾಹೋ ರಾಘವಸ್ಯ ದಿದೃಕ್ಷಯಾ ।
ಸಾಗರಹ್ರದಸಙ್ಕಾಶಾತ್ಸುಮನ್ತ್ರೋಽನ್ತಃಪುರಾಚ್ಛುಭಾತ್ ॥ 67 ॥
ನಿಷ್ಕ್ರಮ್ಯ ಜನಸಮ್ಬಾಧಂ ದದರ್ಶ ದ್ವಾರಮಗ್ರತಃ ।
ತತಃ ಪುರಸ್ತಾತ್ಸಹಸಾ ವಿನಿರ್ಗತೋ ಮಹೀಪತೀನ್ದ್ವಾರಗತೋ ವಿಲೋಕಯನ್ ।
ದದರ್ಶ ಪೌರಾನ್ವಿವಿಧಾನ್ಮಹಾಧನಾ ನುಪಸ್ಥಿತಾನ್ದ್ವಾರಮುಪೇತ್ಯ ವಿಷ್ಠಿತಾನ್ ॥ 68 ॥
ಇತ್ಯಾರ್ಷೇ ಶ್ರೀಮದ್ರಾಮಾಯಣೇ ವಾಲ್ಮೀಕೀಯ ಆದಿಕಾವ್ಯೇ ಅಯೋಧ್ಯಾಕಾಣ್ಡೇ ಚತುರ್ದಶಸ್ಸರ್ಗಃ ॥
