শ্রীমদ্বাল্মীকীয় রামাযণে অয়োধ্য়াকাংডম্ ।
অথ সপ্তসপ্ততিতমস্সর্গঃ ।
ততো দশাহেঽতিগতে কৃতশৌচো নৃপাত্মজঃ ।
দ্বাদশেঽহনি সংপ্রাপ্তে শ্রাদ্ধকর্মাণ্যকারযত্ ॥ 1 ॥
ব্রাহ্মণেভ্য়ো দদৌ রত্নং ধনমন্নং চ পুষ্কলম্ ।
বাসাংসি চ মহার্হাণি রত্নানি বিবিধানি চ ॥ 2 ॥
বাস্তিকং বহু শুক্লং চ গাশ্চাপি শতশস্তথা ।
দাসীদাসং চ যানং চ বেশ্মানি সুমহাংতি চ ॥ 3 ॥
ব্রাহ্মণেভ্য়ো দদৌ পুত্রো রাজ্ঞস্তস্য়ৌর্ধ্বদৈহিকম্ ।
ততঃ প্রভাতসময়ে দিবসেঽথ ত্রয়োদশে ॥ 4 ॥
বিললাপ মহাবাহুর্ভরত শ্শোকমূর্ছিতঃ ।
শব্দাপিহিতকংঠস্তু শোধনার্থমুপাগতঃ ॥ 5 ॥
চিতামূলে পিতুর্বাক্যমিদমাহ সুদুঃখিতঃ ।
তাত যস্মিন্নিসৃষ্টোঽহং ত্বয়া ভ্রাতরি রাঘবে ॥ 6 ॥
তস্মিন্বনং প্রব্রজিতে শূন্য়ে ত্যক্তোঽস্ম্যহং ত্বয়া ।
যস্য়া গতিরনাথায়াঃ পুত্রঃ প্রবাজিতো বনম্ ।
তামংবাং তাত কৌসল্য়াং ত্যক্ত্বা ত্বং ক্ব গতো নৃপ ॥ 7 ॥
দৃষ্ট্বা ভস্মারুণং তচ্চ দগ্ধাস্থি স্থানমংডলম্ ॥ 8 ॥
পিতু শ্শরীরনির্বাণং নিষ্টনন্বিষসাদ সঃ ।
স তু দৃষ্ট্বা রুদন্ দীনঃ পপাত ধরণীতলে ॥ 9 ॥
উত্থাপ্যমানশ্শক্রস্য় যংত্রধ্বজ ইব চ্য়ুতঃ ।
অভিপেতুস্ততস্সর্বে তস্য়ামাত্য়াশ্শুচিব্রতম্ ॥ 10 ॥
অংতকালে নিপতিতং যয়াতিমৃষয়ো যথা ।
শত্রুঘ্ন শ্চাপি ভরতং দৃষ্ট্বা শোকং পরিপ্লুতঃ ॥ 11 ॥
বিসংজ্ঞো ন্যপতদ্ভূমৌ ভূমিপালমনুস্মরন্ ।
উন্মত্ত ইব নিশ্চেতা বিললাপ সুদুঃখিতঃ ॥ 12 ॥
স্মৃত্বা পিতুর্গুণাংগানি তানি তানি তথা তথা ।
মংথরাপ্রভবস্তীব্রঃ কৈকেয়ীগ্রাহসংকুলঃ ॥ 13 ॥
বরদানময়োঽক্ষোভ্য়োঽমংজযচ্ছোকসাগরঃ ।
সুকুমারং চ বালং চ সততং লালিতং ত্বয়া ॥ 14 ॥
ক্ব তাত ভরতং হিত্বা বিলপংতং গতো ভবান্ ।
ননু ভোজ্য়েষু পানেষু বস্ত্রেষ্বাভরণেষু চ ॥ 15 ॥
প্রবারযসি নস্সর্বান্ তন্নঃ কোঽন্য়ঃ করিষ্যতি ।
অবদারণকালে তু পৃথিবী নাবদীর্যতে ॥ 16 ॥
যা বিহীনা ত্বয়া রাজ্ঞা ধর্মজ্ঞেন মহাত্মনা ।
পিতরি স্বর্গমাপন্নে রামে চারণ্যমাশ্রিতে ॥ 17 ॥
কিং মে জীবিতসামর্থ্য়ং প্রবেক্ষ্য়ামি হুতাশনম্ ।
হীনো ভ্রাত্রা চ পিত্রা চ শূন্য়ামিক্ষ্বাকুপালিতাম্ ॥ 18 ॥
অয়োধ্য়াং ন প্রবেক্ষ্য়ামি প্রবেক্ষ্য়ামি তপোবনম্ ।
তয়োর্বিলপিতং শ্রুত্বা ব্যসনং চান্ববেক্ষ্য় তত্ ॥ 19 ॥
ভৃশমার্ততরা ভূযস্সর্বএবানুগামিনঃ ।
ততো বিষণ্ণৌ শ্রাংতৌ চ শত্রুঘ্নভরতাবুভৌ ॥ 20 ॥
ধরণ্য়াং সংব্যবেষ্টেতাং ভগ্নশৃংগাবিবর্ষভৌ ।
ততঃ প্রকৃতিমান্বৈদ্য়ঃ পিতুরেষাং পুরোহিতঃ ॥ 21 ॥
বসিষ্ঠো ভরতং বাক্যমুত্থাপ্য় তমুবাচ হ ।
ত্রয়োদশোঽয়ং দিবসঃ পিতুর্বৃত্তস্য় তে বিভো ॥ 22 ॥
সাবশেষাস্থিনিচয়ে কিমিহ ত্বং বিলংভসে ।
ত্রীণি দ্বংদ্বানি ভূতেষু প্রবৃত্তান্যবিশেষতঃ ॥ 23 ॥
তেষু চাপরিহার্য়েষু নৈবং ভবিতুমর্হসি ।
সুমংত্রশ্চাপি শত্রুঘ্নমুত্থাপ্য়াভিপ্রসাদ্য় চ ॥ 24 ॥
শ্রাবয়ামাস তত্ত্বজ্ঞ স্সর্বভূতভবাভবম্ ।
উত্থিতৌ চ নরব্য়াঘ্রৌ প্রকাশেতে যশস্বিনৌ ॥ 25 ॥
বর্ষাতপপরিক্লিনৌ পৃথগিংদ্রধ্বজাবিব ।
অশ্রূণি পরিমৃদ্নংতৌ রক্তাক্ষৌ দীনভাষিণৌ ।
অমাত্য়াস্ত্বরয়ংতি স্ম তনয়ৌ চাপরাঃ ক্রিয়াঃ ॥ 26 ॥
ইত্য়ার্ষে শ্রীমদ্রামাযণে বাল্মীকীয় আদিকাব্য়ে অয়োধ্য়াকাংডে সপ্তসপ্ততিতমস্সর্গঃ ॥
