ಶ್ರೀಮದ್ವಾಲ್ಮೀಕೀಯ ರಾಮಾಯಣೇ ಕಿಷ್ಕಿನ್ಧಾಕಾಣ್ಡಮ್ ।
ಅಥ ಷಟ್ಚತ್ವಾರಿಂಶಸ್ಸರ್ಗಃ ।
ಗತೇಷು ವಾನರೇನ್ದ್ರೇಷು ರಾಮಸ್ಸುಗ್ರೀವಮಬ್ರವೀತ್ ।
ಕಥಂ ಭವಾನ್ವಿಜಾನೀತೇ ಸರ್ವಂ ವೈ ಮಣ್ಡಲಂ ಭುವಃ ॥ 1 ॥
ಸುಗ್ರೀವಸ್ತು ತತೋ ರಾಮಮುವಾಚ ಪ್ರಣತಾತ್ಮವಾನ್ ।
ಶ್ರೂಯತಾಂ ಸರ್ವಮಾಖ್ಯಾಸ್ಯೇ ವಿಸ್ತರೇಣ ನರರ್ಷಭ ॥ 2 ॥
ಯದಾ ತು ದುನ್ದುಭಿಂ ನಾಮ ದಾನವಂ ಮಹಿಷಾಕೃತಿಮ್ ।
ಪರಿಕಾಲಯತೇ ವಾಲೀ ಮಲಯಂ ಪ್ರತಿ ಪರ್ವತಮ್ ॥ 3 ॥
ತದಾ ವಿವೇಶ ಮಹಿಷೋ ಮಲಯಸ್ಯ ಗುಹಾಂ ಪ್ರತಿ ।
ವಿವೇಶ ವಾಲೀ ತತ್ರಾಪಿ ಮಲಯಂ ತಜ್ಜಿಘಾಂಸಯಾ ॥ 4 ॥
ತತೋಽಹಂ ತತ್ರ ನಿಕ್ಷಿಪ್ತೋ ಗುಹಾದ್ವಾರಿ ವಿನೀತವತ್ ।
ನ ಚ ನಿಷ್ಕ್ರಾಮತೇ ವಾಲೀ ತದಾ ಸಂವತ್ಸರೇ ಗತೇ ॥ 5 ॥
ತತಃ ಕ್ಷತಜವೇಗೇನ ಆಪುಪೂರೇ ತದಾ ಬಿಲಮ್ ।
ತದಹಂ ವಿಸ್ಮಿತೋ ದೃಷ್ಟ್ವಾ ಭ್ರಾತೃಶೋಕವಿಷಾರ್ದಿತಃ ॥ 6 ॥
ಅಥಾಽಹಂ ಕೃತಬುದ್ಧಿಸ್ತು ಸುವ್ಯಕ್ತಂ ನಿಹತೋ ಗುರುಃ ।
ಶಿಲಾ ಪರ್ವತಸಙ್ಕಾಶಾ ಬಿಲದ್ವಾರಿ ಮಯಾ ಕೃತಾ ॥ 7 ॥
ಅಶಕ್ನುವ ನ್ನಿಷ್ಕ್ರಮಿತುಂ ಮಹಿಷೋ ವಿನಶೇದಿತಿ ।
ತತೋಽಹಮಾಗಾಂ ಕಿಷ್ಕಿನ್ಧಾಂ ನಿರಾಶಸ್ತಸ್ಯ ಜೀವಿತೇ ॥ 8 ॥
ರಾಜ್ಯಂ ಚ ಸುಮಹತ್ಪ್ರಾಪ್ಯ ತಾರಯಾ ರುಮಯಾ ಸಹ ।
ಮಿತ್ರೈಶ್ಚ ಸಹಿತಸ್ತತ್ರ ವಸಾಮಿ ವಿಗತಜ್ವರಃ ॥ 9 ॥
ಆಜಗಾಮ ತತೋ ವಾಲೀ ಹತ್ವಾ ತಂ ದಾನವರ್ಷಭಮ್ ।
ತತೋಽಹಮದದಾಂ ರಾಜ್ಯಂ ಗೌರವಾದ್ಭಯಯನ್ತ್ರಿತಃ ॥ 10 ॥
ಸ ಮಾಂ ಜಿಘಾಂಸುರ್ದುಷ್ಟಾತ್ಮಾ ವಾಲೀ ಪ್ರವ್ಯಥಿತೇನ್ದ್ರಿಯಃ ।
ಪರಿಕಾಲಯತೇ ಕ್ರೋಧಾದ್ಧಾವನ್ತಂ ಸಚಿವೈಸ್ಸಹ ॥ 11 ॥
ತತೋಽಹಂ ವಾಲಿನಾ ತೇನ ಸಾಽನುಬದ್ಧಃ ಪ್ರಧಾವಿತಃ ।
ನದೀಶ್ಚ ವಿವಿಧಾಃ ಪಶ್ಯನ್ವನಾನಿ ನಗರಾಣಿ ಚ ॥ 12 ॥
ಆದರ್ಶತಲಸಙ್ಕಾಶಾ ತತೋ ವೈ ಪೃಥಿವೀ ಮಯಾ ।
ಅಲಾತಚಕ್ರಪ್ರತಿಮಾ ದೃಷ್ಟಾ ಗೋಷ್ಪದವತ್ತದಾ ॥ 13 ॥
ಪೂರ್ವಾಂ ದಿಶಂ ತತೋ ಗತ್ವಾ ಪಶ್ಯಾಮಿ ವಿವಿಧಾನ್ ದ್ರುಮಾನ್ ।
ಪರ್ವತನ್ಶ್ಚ ನದೀ ರಮ್ಯಾಸ್ಸರಾಂಸಿ ವಿವಿಧಾನಿ ಚ ॥ 14 ॥
ಉದಯಂ ತತ್ರ ಪಶ್ಯಾಮಿ ಪರ್ವತಂ ಧಾತುಮಣ್ಡಿತಮ್ ।
ಕ್ಷೀರೋದಂ ಸಾಗರಂ ಚೈವ ನಿತ್ಯಮಪ್ಸರಸಾಲಯಮ್ ॥ 15 ॥
ಪರಿಕಾಲಯಮಾನಸ್ತು ವಾಲಿನಾಽಭಿದ್ರುತ ಸ್ತದಾ ।
ಪುನರಾವೃತ್ಯ ಸಹಸಾ ಪ್ರಸ್ಥಿತೋಽಹಂ ತದಾ ವಿಭೋ ॥ 16 ॥
ಪುನರಾವರ್ತಮಾನಸ್ತು ವಾಲಿನಾಽಭಿದ್ರುತೋದ್ರುತಮ್ ।
ದಿಶಸ್ತಸ್ಯಾಸ್ತತೋ ಭೂಯಃ ಪ್ರಸ್ಥಿತೋ ದಕ್ಷಿಣಾಂ ದಿಶಮ್ ।
ವಿನ್ಧ್ಯಪಾದಪಸಙ್ಕೀರ್ಣಾಂ ಚನ್ದನದ್ರುಮಶೋಭಿತಾಮ್ ॥ 17 ॥
ದ್ರುಮಶೈಲಾಂಸ್ತತಃ ಪಶ್ಯನ್ಭೂಯೋ ದಕ್ಷಿಣತೋಽಪರಾಮ್ ।
ಪಶ್ಚಿಮಾಂ ಚ ದಿಶಂ ಪ್ರಾಪ್ತಾ ವಾಲಿನಾ ಸಮಭಿದ್ರುತಃ ॥ 18 ॥
ಸಮ್ಪಶ್ಯನ್ವಿವಿಧಾನ್ದೇಶಾನಸ್ತಂ ಚ ಗಿರಿಸತ್ತಮಮ್ ।
ಪ್ರಾಪ್ಯ ಚಾಸ್ತಂ ಗಿರಿಶ್ರೇಷ್ಠಮುತ್ತರಾಂ ಸಮ್ಪ್ರಧಾವಿತಃ ॥ 19 ॥
ಹಿಮವನ್ತಂ ಚ ಮೇರುಂ ಚ ಸಮುದ್ರಂ ಚ ತಥೋತ್ತರಮ್ ।
ಯದಾ ನ ವಿನ್ದಂ ಶರಣಂ ವಾಲಿನಾ ಸಮಭಿದ್ರುತಃ ॥ 20 ॥
ತದಾ ಮಾಂ ಬುದ್ಧಿಸಮ್ಪನ್ನೋ ಹನೂಮಾನ್ವಾಕ್ಯಮಬ್ರವೀತ್ ।
ಇದಾನೀಂ ಮೇ ಸ್ಮೃತಂ ರಾಜನ್ಯಥಾ ವಾಲೀ ಹರೀಶ್ವರಃ ॥ 21 ॥
ಮತಙ್ಗೇನ ತದಾ ಶಪ್ತೋ ಹ್ಯಸ್ಮಿನ್ನಾಶ್ರಮಮಣ್ಡಲೇ ।
ಪ್ರವಿಶೇದ್ಯದಿ ವೈ ವಾಲೀ ಮೂರ್ಧಾಽಸ್ಯ ಶತಧಾ ಭವೇತ್ ॥ 22 ॥
ತತ್ರ ವಾಸಸ್ಸುಖೋಽಸ್ಮಾಕಂ ನಿರುದ್ವಿಗ್ನೋ ಭವಿಷ್ಯತಿ ।
ತತಃ ಪರ್ವತಮಾಸಾದ್ಯ ಋಷ್ಯಮೂಕಂ ನೃಪಾತ್ಮಜ ॥ 23 ॥
ನ ವಿವೇಶ ತದಾ ವಾಲೀ ಮತಙ್ಗಸ್ಯ ಭಯಾತ್ತದಾ ।
ಏವಂ ಮಯಾ ತದಾ ರಾಜನ್ಪ್ರತ್ಯಕ್ಷಮುಪಲಕ್ಷಿತಮ್ ॥ 24 ॥
ಇತ್ಯಾರ್ಷೇ ಶ್ರೀಮದ್ರಾಮಾಯಣೇ ವಾಲ್ಮೀಕೀಯ ಆದಿಕಾವ್ಯೇ ಕಿಷ್ಕಿನ್ಧಾಕಾಣ್ಡೇ ಷಟ್ಚತ್ವಾರಿಂಶಸ್ಸರ್ಗಃ ॥
