ಶ್ರೀಮದ್ವಾಲ್ಮೀಕೀಯ ರಾಮಾಯಣೇ ಯುದ್ಧಕಾಣ್ಡಮ್ ।
ಅಥ ಅಷ್ಟಮಸ್ಸರ್ಗಃ ।
ತತೋನೀಲಾಮ್ಬುದನಿಭಃ ಪ್ರಹಸ್ತೋನಾಮರಾಕ್ಷಸಃ ।
ಅಬ್ರವೀತ್ಪ್ರಾಞ್ಜಲಿರ್ವಾಕ್ಯಂಶೂರಸ್ಸೇನಾಪತಿಸ್ತದಾ ॥ 1 ॥
ದೇವದಾನವಗನ್ಧರ್ವಾಃಪಿಶಾಚಪತಗೋರಗಾಃ ।
ನತ್ವಾನ್ಧರ್ಷಯಿತುಂಶಕ್ಯಾಃಕಿಮ್ಪುನರ್ವಾನರಾರಣೇ ॥ 2 ॥
ಸರ್ವೇಪ್ರಮತ್ತಾವಿಶ್ವಸ್ತಾವಞ್ಚಿತಾಸ್ಸ್ಮಹನೂಮತಾ ।
ನಹಿಮೇಜೀವತೋಗಚ್ಛೇಜ್ಜೀವನ್ ಸವನಗೋಚರಃ ॥ 3 ॥
ಸರ್ವಾಂಸಾಗರಪರ್ಯನ್ತಾಂಸಶೈಲವನಕಾನನಾಮ್ ।
ಕರೋಮ್ಯವಾನರಾಮ್ಭೂಮಿಮಾಜ್ಞಾಪಯತುಮಾಮ್ಭವಾನ್ ॥ 4 ॥
ರಕ್ಷಾಞ್ಚೈವವಿಧಾಸ್ಯಾಮಿವಾನರಾದ್ರಜನೀಚರ ।
ನಾಗಮಿಷ್ಯತಿತೇದುಃಖಙ್ಕಿಞ್ಚಿದಾತ್ಮಾಪರಾಧಜಮ್ ॥ 5 ॥
ಅಬ್ರವೀಚ್ಚಸುಸಙ್ಕೃದ್ಧೋದುರ್ಮುಖೋನಾಮರಾಕ್ಷಸಃ ।
ಇದನ್ನಕ್ಷಮಣೀಯಂಹಿಸರ್ವೇಷಾನ್ನಃಪ್ರಧರ್ಷಣಮ್ ॥ 6 ॥
ಅಯಮ್ಪರಿಭವೋಭೂಯಃಪುರಸ್ಯಾನ್ತಃಪುರಸ್ಯಚ ।
ಶ್ರೀಮತೋರಾಕ್ಷಸೇನ್ದ್ರಸ್ಯವಾನರೇಣಪ್ರಧರ್ಷಣಮ್ ॥ 7 ॥
ಅಸ್ಮಿನ್ ಮುಹೂರ್ತೇಗತ್ವೈಕೋನಿವರ್ತಿಷ್ಯಾಮಿವಾನರಾನ್ ।
ಪ್ರವಿಷ್ಟಾನ್ ಸಾಗರಮ್ಭೀಮಮಮ್ಬರಂವಾರಸಾತಲಮ್ ॥ 8 ॥
ತತೋಽಬ್ರವೀತ್ಸುಸಙ್ಕೃದ್ಧೋವಜ್ರದಂಷ್ಟ್ರೋಮಹಾಬಲಃ ।
ಪ್ರಗೃಹ್ಯಪರಿಘಙ್ಘೋರಮ್ಮಾಂಸಶೋಣಿತರೂಷಿತಮ್ ॥ 9 ॥
ಕಿಂವೋಹನುಮತಾಕಾರ್ಯಙ್ಕೃಪಣೇನತಪಸ್ವಿನಾ ।
ರಾಮೇತಿಷ್ಠತಿದುರ್ಧರ್ಷೇಸಸುಗ್ರೀವೇಽಪಿಸಲಕ್ಷ್ಮಣೇ ॥ 10 ॥
ಅದ್ಯರಾಮಂಸಸುಗ್ರೀವಮ್ಪರಿಘೇಣಸಲಕ್ಷ್ಮಣಮ್ ।
ಆಗಮಿಷ್ಯಾಮಿಹತ್ವೈಕೋವಿಕ್ಷೋಭ್ಯಹರಿವಾಹಿನೀಮ್ ॥ 11 ॥
ಇದಮ್ಮಮಾಪರಂವಾಕ್ಯಂಶೃಣುರಾಜನ್ ಯದೀಚ್ಛಸಿ ।
ಉಪಾಯಕುಶಲೋಹ್ಯೇವಜಯೇಚ್ಛತ್ರೂನತನ್ದ್ರಿತಃ ॥ 12 ॥
ಕಾಮರೂಪಧರಾಶ್ಶೂರಾಸ್ಸುಭೀಮಾಭೀಮದರ್ಶನಾಃ ।
ರಾಕ್ಷಸಾವೈಸಹಸ್ರಾಣಿರಾಕ್ಷಸಾಧಿಪನಿಶ್ಚಿತಾಃ ॥ 13 ॥
ಕಾಕುತ್ಸ್ಥಮುಪಸಙ್ಗಮ್ಯಬಿಭ್ರತೋಮಾನುಷಂವಪುಃ ।
ಸರ್ವೇಹ್ಯಸಮ್ಭ್ರಮಾಭೂತ್ವಾಬ್ರುವನ್ತುರಘುಸತ್ತಮಮ್ ॥ 14 ॥
ಪ್ರೇಷಿತಾಭರತೇನೈವಭ್ರಾತ್ರಾತವಯವೀಯಸಾ ।
ಸಹಿಸೇನಾಂಸಮುತ್ಥಾಪ್ಯಕ್ಷಿಪ್ರಮೇವೋಪಯಾಸ್ಯತಿ ॥ 15 ॥
ತತೋವಯಮಿತಸ್ತೂರ್ಣಂಶೂಲಶಕ್ತಿಗದಾಧರಾಃ ।
ಚಾಪಬಾಣಾಸಿಹಸ್ತಾಶ್ಚತ್ವರಿತಾಸ್ತತ್ರಯಾಮಹೇ ॥ 16 ॥
ಆಕಾಶೇಗಣಶಸ್ಥ್ಸಿತ್ವಾಹತ್ವಾತಾಂಹರಿವಾಹಿನೀಮ್ ।
ಅಶ್ಮಶಸ್ತ್ರಮಹಾವೃಷ್ಟ್ಯಾಪ್ರಾಪಯಾಮಯಮಕ್ಷಯಮ್ ॥ 17 ॥
ಏವಞ್ಚೇದುಪಸರ್ಪೇತಾಮನಯಂರಾಮಲಕ್ಷ್ಮಣೌ ।
ಅವಶ್ಯಮಪನೀತೇನಜಹತಾಮೇವಜೀವಿತಮ್ ॥ 18 ॥
ಕೌಮ್ಭಕರ್ಣಿಸ್ತತೋವೀರೋನಿಕುಮ್ಭೋನಾಮವೀರ್ಯವಾನ್ ।
ಅಬ್ರವೀತ್ಪರಮಕ್ರುದ್ಧೋರಾವಣಂಲೋಕರಾವಣಮ್ ॥ 19 ॥
ಸರ್ವೇಭವನ್ತಸ್ತಿಷ್ಠನ್ತುಮಹಾರಾಜೇನಸಙ್ಗತಾಃ ।
ಅಹಮೇಕೋಹನಿಷ್ಯಾಮಿರಾಘವಂಸಹಲಕ್ಷ್ಮಣಮ್ ॥ 20 ॥
ಸುಗ್ರೀವಞ್ಚಹನೂಮನ್ತಂಸರ್ವಾನ್ನೇವಚವಾನರಾನ್ ।
ತತೋವಜ್ರಹನುರ್ನಾಮರಾಕ್ಷಸಃಪರ್ವತೋಪಮಃ ॥ 21 ॥
ಕ್ರುದ್ಧಃ ಪರಿಲಿಹನ್ಸೃಕ್ಕಾಞ್ಜಿಹ್ವಯಾವಾಕ್ಯಮಬ್ರವೀತ್ ।
ಸ್ವೈರಙ್ಕುರ್ವನ್ತುಕರ್ಮಾಣಿಭವನ್ತೋವಿಗತಜ್ವರಾಃ ॥ 22 ॥
ಏಕೋಽಹಮ್ಭಕ್ಷಯಿಷ್ಯಾಮಿತಾಂಸರ್ವಾಂಹರಿಯೂಥಪಾನ್ ।
ಸ್ವಸ್ಥಾಃಕ್ರೀಡನ್ತುನಿಶ್ಚಿನ್ತಾಃಪಿಬನ್ತುಮಧುವಾರುಣೀಮ್ ॥ 23 ॥
ಅಹಮೇಕೋವಧಿಷ್ಯಾಮಿಸುಗ್ರೀವಂಸಹಲಕ್ಷ್ಮಣಮ್ ।
ಸಾಙ್ಗದಞ್ಚಹನೂಮನ್ತಂರಾಮಞ್ಚರಣಕುಞ್ಜರಮ್ ॥ 24 ॥
ಇತ್ಯಾರ್ಷೇ ಶ್ರೀಮದ್ರಾಮಾಯಣೇ ವಾಲ್ಮೀಕೀಯ ಆದಿಕಾವ್ಯೇ ಯುದ್ಧಕಾಣ್ಡೇ ಅಷ್ಟಮಸ್ಸರ್ಗಃ ॥
