ಶ್ರೀಮದ್ವಾಲ್ಮೀಕೀಯ ರಾಮಾಯಣೇ ಕಿಷ್ಕಿನ್ಧಾಕಾಣ್ಡಮ್ ।
ಅಥ ಸಪ್ತಷಷ್ಟಿತಮಸ್ಸರ್ಗಃ ।
ತಂ ದೃಷ್ಟ್ವಾ ಜೃಮ್ಭಮಾಣಂ ತೇ ಕ್ರಮಿತುಂ ಶತಯೋಜನಮ್ ।
ವೀರ್ಯೇಣಾಪೂರ್ಯಮಾಣಂ ಚ ಸಹಸಾ ವಾನರೋತ್ತಮಮ್ ॥ 1 ॥
ಸಹಸಾ ಶೋಕಮುತ್ಸೃಜ್ಯ ಪ್ರಹರ್ಷೇಣ ಸಮನ್ವಿತಾಃ ।
ವಿನೇದುಸ್ತುಷ್ಟುವುಶ್ಚಾಪಿ ಹನೂಮನ್ತಂ ಮಹಾಬಲಮ್ ॥ 2 ॥
ಪ್ರಹೃಷ್ಟಾ ವಿಸ್ಮಿತಾಶ್ಚೈವ ವೀಕ್ಷನ್ತೇ ಸ್ಮ ಸಮನ್ತತಃ ।
ತ್ರಿವಿಕ್ರಮಕೃತೋತ್ಸಾಹಂ ನಾರಾಯಣಮಿವ ಪ್ರಜಾಃ ॥ 3 ॥
ಸಂಸ್ತೂಯಮಾನೋ ಹನುಮಾನ್ವ್ಯವರ್ಧತ ಮಹಾಬಲಃ ।
ಸಮಾವಿಧ್ಯ ಚ ಲಾಙ್ಗೂಲಂ ಹರ್ಷಾದ್ಬಲಮುಪೇಯಿವಾನ್ ॥ 4 ॥
ತಸ್ಯ ಸಂಸ್ತೂಯಮಾನಸ್ಯ ಸರ್ವೈರ್ವಾನರಪುಙ್ಗವೈಃ ।
ತೇಜಸಾಪೂರ್ಯಮಾಣಸ್ಯ ರೂಪಮಾಸೀದನುತ್ತಮಮ್ ॥ 5 ॥
ಯಥಾ ವಿಜೃಮ್ಭತೇ ಸಿಂಹೋ ವಿವೃದ್ಧೋ ಗಿರಿಗಹ್ವರೇ ।
ಮಾರುತಸ್ಯೌರಸಃ ಪುತ್ರಸ್ತಥಾ ಸಮ್ಪ್ರತಿ ಜೃಮ್ಭತೇ ॥ 6 ॥
ಅಶೋಭತ ಮುಖಂ ತಸ್ಯ ಜೃಮ್ಭಮಾಣಸ್ಯ ಧೀಮತಃ ।
ಅಮ್ಬರೀಷಮಿವಾಽದೀಪ್ತಂ ವಿಧೂಮ ಇವ ಪಾವಕಃ ॥ 7 ॥
ಹರೀಣಾಮುತ್ಥಿತೋ ಮಧ್ಯಾತ್ಸಮ್ಪ್ರಹೃಷ್ಟತನೂರುಹಃ ।
ಅಭಿವಾದ್ಯ ಹರೀನ್ವೃದ್ಧಾನ್ಹನುಮಾನಿದಮಬ್ರವೀತ್ ॥ 8 ॥
ಅರುಜತ್ಸರ್ವತಾಗ್ರಾಣಿ ಹುತಾಶನಸಖೋಽನಿಲಃ ।
ಬಲವಾನಪ್ರಮೇಯಶ್ಚ ವಾಯುರಾಕಾಶಗೋಚರಃ ॥ 9 ॥
ತಸ್ಯಾಹಂ ಶೀಘ್ರವೇಗಸ್ಯ ಶೀಘ್ರಗಸ್ಯ ಮಹಾತ್ಮನಃ ।
ಮಾರುತಸ್ಯೌರಸಃ ಪುತ್ರಃ ಪ್ಲವನೇನಾಸ್ಮಿ ತತ್ಸಮಃ ॥ 10 ॥
ಉತ್ಸಹೇಯಂ ಹಿ ವಿಸ್ತೀರ್ಣಮಾಲಿಖನ್ತಮಿವಾಮ್ಬರಮ್ ।
ಮೇರುಂ ಗಿರಿಮಸಙ್ಗೇನ ಪರಿಗನ್ತುಂ ಸಹಸ್ರಶಃ ॥ 11 ॥
ಬಾಹುವೇಗಪ್ರಣುನ್ನೇನ ಸಾಗರೇಣಾಹಮುತ್ಸಹೇ ।
ಸಮಾಪ್ಲಾವಯಿತುಂ ಲೋಕಂ ಸಪರ್ವತನದೀಹ್ರದಮ್ ॥ 12 ॥
ಮಮೋರುಜಙ್ಘಾವೇಗೇನ ಭವಿಷ್ಯತಿ ಸಮುತ್ಥಿತಃ ।
ಸಮ್ಮೂರ್ಚ್ಛಿತಮಹಾಗ್ರಾಹಸ್ಸಮುದ್ರೋ ವರುಣಾಲಯಃ ॥ 13 ॥
ಪನ್ನಗಾಶನಮಾಕಾಶೇ ಪತನ್ತಂ ಪಕ್ಷಿಸೇವಿತೇ ।
ವೈನತೇಯಮಹಂ ಶಕ್ತಃ ಪರಿಗನ್ತುಂ ಸಹಸ್ರಶಃ ॥ 14 ॥
ಉದಯಾತ್ಪ್ರಸ್ಥಿತಂ ವಾಪಿ ಜ್ವಲನ್ತಂ ರಶ್ಮಿಮಾಲಿನಮ್ ।
ಅನಸ್ತಮಿತಮಾದಿತ್ಯಮಭಿಗನ್ತುಂ ಸಮುತ್ಸಹೇ ॥ 15 ॥
ತತೋ ಭೂಮಿಮಸಂಸ್ಪೃಶ್ಯ ಪುನರಾಗನ್ತುಮುತ್ಸಹೇ ।
ಪ್ರವೇಗೇನೈವ ಮಹತಾ ಭೀಮೇನ ಪ್ಲವಗರ್ಷಭಾಃ ॥ 16 ॥
ಉತ್ಸಹೇಯಮತಿಕ್ರಾನ್ತುಂ ಸರ್ವಾನಾಕಾಶಗೋಚರಾನ್ ।
ಸಾಗರಂ ಕ್ಷೋಭಯಿಷ್ಯಾಮಿ ದಾರಯಿಷ್ಯಾಮಿ ಮೇದಿನೀಮ್ ॥ 17 ॥
ಪರ್ವತಾಂಶ್ಚೂರ್ಣಯಿಷ್ಯಾಮಿ ಪ್ಲವಮಾನಃ ಪ್ಲವಙ್ಗಮಾಃ ।
ಹರಿಷ್ಯಾಮ್ಯೂರುವೇಗೇನ ಪ್ಲವಮಾನೋ ಮಹಾರ್ಣವಮ್ ॥ 18 ॥
ಲತಾನಾಂ ವಿವಿಧಂ ಪುಷ್ಪಂ ಪಾದಪಾನಾಂ ಚ ಸರ್ವಶಃ ।
ಅನುಯಾಸ್ಯನ್ತಿ ಮಾಮದ್ಯ ಪ್ಲವಮಾನಂ ವಿಹಾಯಸಾ ॥ 19 ॥
ಭವಿಷ್ಯತಿ ಹಿ ಮೇ ಪನ್ಥಾಸ್ಸ್ವಾತೇಃ ಪನ್ಥಾ ಇವಾಮ್ಬರೇ ।
ಚರನ್ತಂ ಘೋರಮಾಕಾಶಮುತ್ಪತಿಷ್ಯನ್ತಮೇವ ವಾ ॥ 20 ॥
ದ್ರಕ್ಷ್ಯನ್ತಿ ನಿಪತಿಷ್ಯನ್ತಂ ಚ ಸರ್ವಭೂತಾನಿ ವಾನರಾಃ ।
ಮಹಾಮೇರುಪ್ರತೀಕಾಶಂ ಮಾಂ ದ್ರಕ್ಷ್ಯಥ ವಾನರಾಃ ॥ 21 ॥
ದಿವಮಾವೃತ್ಯ ಗಚ್ಛನ್ತಂ ಗ್ರಸಮಾನಮಿವಾಮ್ಬರಮ್ ।
ವಿಧಮಿಷ್ಯಾಮಿ ಜೀಮೂತಾನ್ಕಮ್ಪಯಿಷ್ಯಾಮಿ ಪರ್ವತಾನ್ ॥ 22 ॥
ಸಾಗರಂ ಶೋಷಯಿಷ್ಯಾಮಿ ಪ್ಲವಮಾನಸ್ಸಮಾಹಿತಃ ।
ವೈನತೇಯಸ್ಯ ಯಾ ಶಕ್ತಿರ್ಮಮ ಸಾ ಮಾರುತಸ್ಯ ವಾ ॥ 23 ॥
ಋತೇ ಸುಪರ್ಣರಾಜಾನಂ ಮಾರುತಂ ವಾ ಮಹಾಜವಮ್ ।
ನ ತದ್ಭೂತಂ ಪ್ರಪಶ್ಯಾಮಿ ಯನ್ಮಾಂ ಪ್ಲುತಮನುವ್ರಜೇತ್ ॥ 24 ॥
ನಿಮೇಷಾನ್ತರಮಾತ್ರೇಣ ನಿರಾಲಮ್ಬನಮಮ್ಬರಮ್ ।
ಸಹಸಾ ನಿಪತಿಷ್ಯಾಮಿ ಘನಾದ್ವಿದ್ಯುದಿವೋತ್ಥಿತಾ ॥ 25 ॥
ಭವಿಷ್ಯತಿ ಹಿ ಮೇ ರೂಪಂ ಪ್ಲವಮಾನಸ್ಯ ಸಾಗರೇ ।
ವಿಷ್ಣೋರ್ವಿಕ್ರಮಮಾಣಸ್ಯ ಪುರಾ ತ್ರೀನ್ವಿಕ್ರಮಾನಿವ ॥ 26 ॥
ಬುದ್ಧ್ಯಾ ಚಾಹಂ ಪ್ರಪಶ್ಯಾಮಿ ಮನಶ್ಚೇಷ್ಟಾ ಚ ಮೇ ತಥಾ ।
ಅಹಂ ದ್ರಕ್ಷ್ಯಾಮಿ ವೈದೇಹೀಂ ಪ್ರಮೋದಧ್ವಂ ಪ್ಲವಙ್ಗಮಾಃ ॥ 27 ॥
ಮಾರುತಸ್ಯ ಸಮೋ ವೇಗೇ ಗರುಡಸ್ಯ ಸಮೋ ಜವೇ ।
ಅಯುತಂ ಯೋಜನಾನಾಂ ತು ಗಮಿಷ್ಯಾಮೀತಿ ಮೇ ಮತಿಃ ॥ 28 ॥
ವಾಸವಸ್ಯ ಸವಜ್ರಸ್ಯ ಬ್ರಹ್ಮಣೋ ವಾ ಸ್ವಯಮ್ಭುವಃ ।
ವಿಕ್ರಮ್ಯ ಸಹಸಾ ಹಸ್ತಾದಮೃತಂ ತದಿಹಾನಯೇ ॥ 29 ॥
ಲಙ್ಕಾಂ ವಾಪಿ ಸಮುತ್ಕ್ಷಿಪ್ಯ ಗಚ್ಛೇಯಮಿತಿ ಮೇ ಮತಿಃ ।
ತಮೇವಂ ವಾನರಶ್ರೇಷ್ಠಂ ಗರ್ಜನ್ತಮಮಿತೌಜಸಮ್ ॥ 30 ॥
ಪ್ರಹೃಷ್ಟಾ ಹರಯಸ್ತತ್ರ ಸಮುದೈಕ್ಷನ್ತ ವಿಸ್ಮಿತಾಃ ।
ತಸ್ಯ ತದ್ವಚನಂ ಶ್ರುತ್ವಾ ಜ್ಞಾತೀನಾಂ ಶೋಕನಾಶನಮ್ ॥ 31 ॥
ಉವಾಚ ಪರಿಸಂಹೃಷ್ಟೋ ಜಾಮ್ಬವಾನ್ಹರಿಸತ್ತಮಃ ।
ವೀರ ಕೇಸರಿಣಃ ಪುತ್ರ ಹನುಮಾನ್ಮಾರುತಾತ್ಮಜ ॥ 32 ॥
ಜ್ಞಾತೀನಾಂ ವಿಪುಲಶ್ಶೋಕಸ್ತ್ವಯಾ ತಾತ ಪ್ರಣಾಶಿತಃ ।
ತವ ಕಲ್ಯಾಣರುಚಯಃ ಕಪಿಮುಖ್ಯಾಸ್ಸಮಾಗತಾಃ ॥ 33 ॥
ಮಙ್ಗಲಂ ಕಾರ್ಯಸಿದ್ಧ್ಯರ್ಥಂ ಕರಿಷ್ಯನ್ತಿ ಸಮಾಹಿತಾಃ ।
ಋಷೀಣಾಂ ಚ ಪ್ರಸಾದೇನ ಕಪಿವೃದ್ಧಮತೇನ ಚ ॥ 34 ॥
ಗುರೂಣಾಂ ಚ ಪ್ರಸಾದೇನ ಪ್ಲವಸ್ವ ತ್ವಂ ಮಹಾರ್ಣವಮ್ ।
ಸ್ಥಾಸ್ಯಾಮಶ್ಚೈಕಪಾದೇನ ಯಾವದಾಗಮನಂ ತವ ॥ 35 ॥
ತ್ವದ್ಗತಾನಿ ಚ ಸರ್ವೇಷಾಂ ಜೀವನಾನಿ ವನೌಕಸಾಮ್ ।
ತತಸ್ತು ಹರಿಶಾರ್ದೂಲಸ್ತಾನುವಾಚ ವನೌಕಸಃ ॥ 36 ॥
ನೇಯಂ ಮಮ ಮಹೀ ವೇಗಂ ಲಙ್ಘನೇ ಧಾರಯಿಷ್ಯತಿ ।
ಏತಾನೀಹ ನಗಸ್ಯಾಸ್ಯ ಶಿಲಾಸಙ್ಕಟಶಾಲಿನಃ ॥ 37 ॥
ಶಿಖರಾಣಿ ಮಹೇನ್ದ್ರಸ್ಯ ಸ್ಥಿರಾಣಿ ಸುಮಹಾನ್ತಿ ಚ ।
ಏಷು ವೇಗಂ ಕರಿಷ್ಯಾಮಿ ಮಹೇನ್ದ್ರಶಿಖರೇಷ್ವಹಮ್ ॥ 38 ॥
ನಾನಾದ್ರುಮವಿಕೀರ್ಣೇಷು ಧಾತುನಿಷ್ಯನ್ದಶೋಭಿಷು ।
ಏತಾನಿ ಮಮ ನಿಷ್ಪೇಷಂ ಪಾದಯೋಃ ಪ್ಲವತಾಂ ವರಾಃ ॥ 39 ॥
ಪ್ಲವತೋ ಧಾರಯಿಷ್ಯನ್ತಿ ಯೋಜನಾನಾಮಿತಶ್ಶತಮ್ ।
ತತಸ್ತಂ ಮಾರುತಪ್ರಖ್ಯಸ್ಸಹರಿರ್ಮಾರುತಾತ್ಮಜಃ ॥ 40 ॥
ಆರುರೋಹ ನಗಶ್ರೇಷ್ಠಂ ಮಹೇನ್ದ್ರಮರಿಮರ್ದನಃ ।
ವೃತಂ ನಾನಾವಿಧೈಃ ವೃಕ್ಷೈರ್ಮೃಗಸೇವಿತಶಾದ್ವಲಮ್ ॥ 41 ॥
ಲತಾಕುಸುಮಸಮ್ಬಾಧಂ ನಿತ್ಯಪುಷ್ಪಫಲದ್ರುಮಮ್ ।
ಸಿಂಹಶಾರ್ದೂಲಚರಿತಂ ಮತ್ತಮಾತಙ್ಗಸೇವಿತಮ್ ॥ 42 ॥
ಮತ್ತದ್ವಿಜಗಣೋದ್ಘುಷ್ಟಂ ಸಲಿಲೋತ್ಪೀಡಸಙ್ಕುಲಮ್ ।
ಮಹದ್ಭಿರುಚ್ಛ್ರಿತಂ ಶೃಙ್ಗೈರ್ಮಹೇನ್ದ್ರಂ ಸ ಮಹಾಬಲಃ ॥ 43 ॥
ವಿಚಚಾರ ಹರಿಶ್ರೇಷ್ಠೋ ಮಹೇನ್ದ್ರಸಮವಿಕ್ರಮಃ ।
ಪಾದಾಭ್ಯಾಂ ಪೀಡಿತಸ್ತೇನ ಮಹಾಶೈಲೋ ಮಹಾತ್ಮನಾ ॥ 44 ॥
ರರಾಜ ಸಿಂಹಾಭಿಹತೋ ಮಹಾನ್ಮತ್ತ ಇವ ದ್ವಿಪಃ ।
ಮುಮೋಚ ಸಲಿಲೋತ್ಪೀಡಾನ್ವಿಪ್ರಕೀರ್ಣಶಿಲೋಚ್ಚಯಃ ॥ 45 ॥
ವಿತ್ರಸ್ತಮೃಗಮಾತಙ್ಗಃ ಪ್ರಕಮ್ಪಿತಮಹಾದ್ರುಮಃ ।
ನಾನಾಗನ್ಧರ್ವಮಿಥುನೈಃ ಪಾನಸಂಸರ್ಗಕರ್ಕಶೈಃ ॥ 46 ॥
ಉತ್ಪತದ್ಭಿಶ್ಚ ವಿಹಗೈರ್ವಿದ್ಯಾಧರಗಣೈರಪಿ ।
ತ್ಯಜ್ಯಮಾನಮಹಾಸಾನುಸ್ಸನ್ನಿಲೀನಮಹೋರಗಃ ॥ 47 ॥
ಚಲಶೃಙ್ಗಶಿಲೋದ್ಘಾತಸ್ತದಾಽಭೂತ್ಸ ಮಹಾಗಿರಿಃ ।
ನಿಶ್ಶ್ವಸದ್ಭಿಸ್ತದಾಽರ್ತೈಸ್ತು ಭುಜಙ್ಗೈರರ್ಧನಿಃಸೃತೈಃ ॥ 48 ॥
ಸಪತಾಕ ಇವಾಭಾತಿ ಸ ತದಾ ಧರಣೀಧರಃ ।
ಋಷಿಭಿಸ್ತ್ರಾಸಸಮ್ಭ್ರಾನ್ತೈಸ್ತ್ಯಜ್ಯಮಾನಃ ಶಿಲೋಚ್ಚಯಃ ॥ 49 ॥
ಸೀದನ್ಮಹತಿ ಕಾನ್ತಾರೇ ಸಾರ್ಥಹೀನ ಇವಾಧ್ವಗಃ ।
ಸವೇಗವಾನ್ ವೇಗಸಮಾಹಿತಾತ್ಮಾ ಹರಿಪ್ರವೀರಃ ಪರವೀರಹನ್ತಾ ।
ಮನಸ್ಸಮಾಧಾಯ ಮಹಾನುಭಾವೋ ಜಗಾಮ ಲಙ್ಕಾಂ ಮನಸಾ ಮನಸ್ವೀ ॥ 50 ॥
ಇತ್ಯಾರ್ಷೇ ಶ್ರೀಮದ್ರಾಮಾಯಣೇ ವಾಲ್ಮೀಕೀಯ ಆದಿಕಾವ್ಯೇ ಕಿಷ್ಕಿನ್ಧಾಕಾಣ್ಡೇ ಸಪ್ತಷಷ್ಟಿತಮಸ್ಸರ್ಗಃ ॥
