ಶ್ರೀಮದ್ವಾಲ್ಮೀಕೀಯ ರಾಮಾಯಣೇ ಬಾಲಕಾಣ್ಡಮ್ ।
ಅಥ ನವಮಸ್ಸರ್ಗಃ ।
ಏತಚ್ಛ್ರುತ್ವಾ ರಹಸ್ಸೂತೋ ರಾಜಾನಮಿದಮಬ್ರವೀತ್ ।
ಋತ್ವಿಗ್ಭಿರುಪದಿಷ್ಟೋಽಯಂ ಪುರಾವೃತ್ತೋ ಮಯಾ ಶ್ರುತಃ ॥ 1 ॥
ಸನತ್ಕುಮಾರೋ ಭಗವಾನ್ಪೂರ್ವಂ ಕಥಿತವಾನ್ಕಥಾಮ್ ।
ಋಷೀಣಾಂ ಸನ್ನಿಧೌ ರಾಜನ್ ತವ ಪುತ್ರಾಗಮಂ ಪ್ರತಿ ॥ 2 ॥
ಕಾಶ್ಯಪಸ್ಯತು ಪುತ್ರೋಽಸ್ತಿ ವಿಭಣ್ಡಕ ಇತಿ ಶ್ರುತಃ ।
ಋಷ್ಯಶೃಙ್ಗ ಇತಿ ಖ್ಯಾತಸ್ತಸ್ಯ ಪುತ್ರೋ ಭವಿಷ್ಯತಿ ॥ 3 ॥
ಸ ವನೇ ನಿತ್ಯಸಂವೃದ್ಧೋ ಮುನಿರ್ವನಚರಸ್ಸದಾ ।
ನಾನ್ಯಂ ಜಾನಾತಿ ವಿಪ್ರೇನ್ದ್ರೋ ನಿತ್ಯಂ ಪಿತ್ರನುವರ್ತನಾತ್ ॥ 4 ॥
ದ್ವೈವಿಧ್ಯಂ ಬ್ರಹ್ಮಚರ್ಯಸ್ಯ ಭವಿಷ್ಯತಿ ಮಹಾತ್ಮನಃ ।
ಲೋಕೇಷು ಪ್ರಥಿತಂ ರಾಜನ್ವಿಪ್ರೈಶ್ಚ ಕಥಿತಂ ಸದಾ ॥ 5 ॥
ತಸ್ಯೈವಂ ವರ್ತಮಾನಸ್ಯ ಕಾಲಸ್ಸಮಭಿವರ್ತತ ।
ಅಗ್ನಿಂ ಶುಶ್ರೂಷಮಾಣಸ್ಯ ಪಿತರಂ ಚ ಯಶಸ್ವಿನಮ್ ॥ 6 ॥
ಏತಸ್ಮಿನ್ನೇವ ಕಾಲೇ ತು ರೋಮಪಾದಃ ಪ್ರತಾಪವಾನ್ ।
ಅಙ್ಗೇಷು ಪ್ರಥಿತೋ ರಾಜಾ ಭವಿಷ್ಯತಿ ಮಹಾಬಲಃ ॥ 7 ॥
ತಸ್ಯ ವ್ಯತಿಕ್ರಮಾದ್ರಾಜ್ಞೋ ಭವಿಷ್ಯತಿ ಸುದಾರುಣಾ ।
ಅನಾವೃಷ್ಟಿಸ್ಸುಘೋರಾ ವೈ ಸರ್ವಭೂತಭಯಾವಹಾ ॥ 8 ॥
ಅನಾವೃಷ್ಟ್ಯಾಂ ತು ವೃತ್ತಾಯಾಂ ರಾಜಾ ದುಃಖಸಮನ್ವಿತಃ ।
ಬ್ರಾಹ್ಮಣಾನ್ಶ್ರುತವೃದ್ಧಾಂಶ್ಚ ಸಮಾನೀಯ ಪ್ರವಕ್ಷ್ಯತಿ ॥ 9 ॥
ಭವನ್ತಶ್ಶ್ರುತಧರ್ಮಾಣೋ ಲೋಕಚಾರಿತ್ರವೇದಿನಃ ।
ಸಮಾದಿಶನ್ತು ನಿಯಮಂ ಪ್ರಾಯಶ್ಚಿತ್ತಂ ಯಥಾ ಭವೇತ್ ॥ 10 ॥
ವಕ್ಷ್ಯನ್ತಿ ತೇ ಮಹೀಪಾಲಂ ಬ್ರಾಹ್ಮಣಾ ವೇದಪಾರಗಾಃ ।
ವಿಭಣ್ಡಕಸುತಂ ರಾಜನ್ಸರ್ವೋಪಾಯೈರಿಹಾನಯ ॥ 11 ॥
ಆನಾಯ್ಯ ಚ ಮಹೀಪಾಲ ಋಶ್ಯಶೃಙ್ಗಂ ಸುಸತ್ಕೃತಮ್ ।
ಪ್ರಯಚ್ಛ ಕನ್ಯಾಂ ಶಾನ್ತಾಂ ವೈ ವಿಧಿನಾ ಸುಸಮಾಹಿತಃ ॥ 12 ॥
ತೇಷಾಂ ತು ವಚನಂ ಶ್ರುತ್ವಾ ರಾಜಾ ಚಿನ್ತಾಂ ಪ್ರಪತ್ಸ್ಯತೇ ।
ಕೇನೋಪಾಯೇನ ವೈ ಶಕ್ಯ ಇಹಾನೇತುಂ ಸ ವೀರ್ಯವಾನ್ ॥ 13 ॥
ತತೋ ರಾಜಾ ವಿನಿಶ್ಚಿತ್ಯ ಸಹ ಮನ್ತ್ರಿಭಿರಾತ್ಮವಾನ್ ।
ಪುರೋಹಿತಮಮಾತ್ಯಾಂಶ್ಚ ತತಃ ಪ್ರೇಷ್ಯತಿ ಸತ್ಕೃತಾನ್ ॥ 14 ॥
ತೇ ತು ರಾಜ್ಞೋ ವಚಶ್ಶ್ರುಶೃತ್ವಾ ವ್ಯಥಿತಾ ವಿನತಾನನಾಃ ।
ನ ಗಚ್ಛೇಮ ಋಷೇರ್ಭೀತಾ ಅನುನೇಷ್ಯನ್ತಿ ತಂ ನೃಪಮ್ ॥ 15 ॥
ವಕ್ಷ್ಯನ್ತಿ ಚಿನ್ತಯಿತ್ವಾ ತೇ ತಸ್ಯೋಪಾಯಾಂಶ್ಚ ತತ್ಕ್ಷಮಾನ್ ।
ಆನೇಷ್ಯಾಮೋ ವಯಂ ವಿಪ್ರಂ ನ ಚ ದೋಷೋ ಭವಿಷ್ಯತಿ ॥ 16 ॥
ಏವಮಙ್ಗಾಧಿಪೇನೈವ ಗಣಿಕಾಭಿಃ ಋಷೇಸ್ಸುತಃ ।
ಆನೀತೋಽವರ್ಷಯದ್ದೇವಶ್ಶಾನ್ತಾ ಚಾಸ್ಮೈ ಪ್ರದೀಯತೇ ॥ 17 ॥
ಋಶ್ಯಶೃಙ್ಗಸ್ತು ಜಾಮಾತಾ ಪುತ್ರಾಂಸ್ತವ ವಿಧಾಸ್ಯತಿ ।
ಸನತ್ಕುಮಾರಕಥಿತಮೇತಾವದ್ವ್ಯಾಹೃತಂ ಮಯಾ ॥ 18 ॥
ಅಥ ಹೃಷ್ಟೋ ದಶರಥಸ್ಸುಮನ್ತ್ರಂ ಪ್ರತ್ಯಭಾಷತ ।
ಯಥರ್ಶ್ಯಶೃಙ್ಗಸ್ತ್ವಾನೀತೋ ವಿಸ್ತರೇಣ ತ್ವಯೋಚ್ಯತಾಮ್ ॥ 19 ॥
ಇತ್ಯಾರ್ಷೇ ಶ್ರೀಮದ್ರಾಮಾಯಣೇ ವಾಲ್ಮೀಕೀಯ ಆದಿಕಾವ್ಯೇ ಬಾಲಕಾಣ್ಡೇ ನವಮಸ್ಸರ್ಗಃ ॥
