ಶ್ರೀಮದ್ವಾಲ್ಮೀಕೀಯ ರಾಮಾಯಣೇ ಅಯೋಧ್ಯಾಕಾಣ್ಡಮ್ ।
ಅಥ ಸಪ್ತದಶಸ್ಸರ್ಗಃ ।
ಸ ರಾಮೋ ರಥಮಾಸ್ಥಾಯ ಸಮ್ಪ್ರಹೃಷ್ಟಸುಹೃಜ್ಜನಃ ।
ಪತಾಕಾಧ್ವಜಸಮ್ಪನ್ನಂ ಮಹಾರ್ಹಾಗರುಧೂಪಿತಮ್ ॥ 1 ॥
ಅಪಶ್ಯನ್ನಗರಂ ಶ್ರೀಮಾನ್ನಾನಾಜನಸಮಾಕುಲಮ್ ।
ಸ ಗೃಹೈರಭ್ರಸಙ್ಕಾಶೈಃ ಪಾಣ್ಡುರೈರುಪಶೋಭಿತಮ್ ॥ 2 ॥
ರಾಜಮಾರ್ಗಂ ಯಯೌ ರಾಮೋ ಮಧ್ಯೇನಾಗರುಧೂಪಿತಮ್ ।
ಚನ್ದನಾನಾಂ ಚ ಮುಖ್ಯಾನಾಮಗರೂಣಾಂ ಚ ಸಞ್ಚಯೈಃ ॥ 3 ॥
ಉತ್ತಮಾನಾಂ ಚ ಗನ್ಧಾನಾಂ ಕ್ಷೌಮಕೋಶಾಮ್ಬರಸ್ಯ ಚ ।
ಅವಿದ್ಧಾಭಿಶ್ಚ ಮುಕ್ತಾಭಿರುತ್ತಮೈಸ್ಸ್ಫಾಟಿಕೈರಪಿ ॥ 4 ॥
ಶೋಭಮಾನಮಸಮ್ಬಾಧೈಸ್ತಂ ರಾಜಪಥಮುತ್ತಮಮ್ ।
ಸಂವೃತಂ ವಿವಿಧೈಃಪುಷ್ಪೈರ್ಭಕ್ಷ್ಯೈರುಚ್ಚಾವಚೈರಪಿ ॥ 5 ॥
ದದರ್ಶ ತಂ ರಾಜಪಥಂ ದಿವಿ ದೇವಪಥಂ ಯಥಾ ।
ದಧ್ಯಕ್ಷತಹವಿರ್ಲಾಜೈರ್ಧೂಪೈರಗರುಚನ್ದನೈಃ ॥ 6 ॥
ನಾನಾಮಾಲ್ಯೋಪಗನ್ಧೈಶ್ಚ ಸದಾಽಭ್ಯರ್ಚಿತಚತ್ವರಮ್ ।
ಅಶೀರ್ವಾದಾನ್ಬಹೂನ್ ಶೃಣ್ವನ್ಸುಹೃದ್ಭಿಸ್ಸಮುದೀರಿತಾನ್ ॥ 7 ॥
ಯಥಾರ್ಹಂ ಚಾಪಿ ಸಮ್ಪೂಜ್ಯ ಸರ್ವಾನೇವ ನರಾನ್ಯಯೌ ।
ಪಿತಾಮಹೈರಾಚರಿತಂ ತಥೈವ ಪ್ರಪಿತಾಮಹೈಃ ॥ 8 ॥
ಅದ್ಯೋಪಾದಾಯ ತಂ ಮಾರ್ಗಮಭಿಷಿಕ್ತೋಽನುಪಾಲಯ ।
ಯಥಾಸ್ಮ ಪೋಷಿತಾಃ ಪಿತ್ರಾ ಯಥಾ ಸರ್ವೈಃ ಪಿತಾಮಹೈಃ ॥ 9 ॥
ತತಸ್ಸುಖತರಂ ರಾಮೇ ವತ್ಸ್ಯಾಮಸ್ಸತಿ ರಾಜನಿ ।
ಅಲಮದ್ಯ ಹಿ ಭುಕ್ತೇನ ಪರಮಾರ್ಥೈರಲಂ ಚ ನಃ ॥ 10 ॥
ಯದಿ ಪಶ್ಯಾಮ ನಿರ್ಯಾನ್ತಂ ರಾಮಂ ರಾಜ್ಯೇ ಪ್ರತಿಷ್ಠಿತಮ್ ।
ಅತೋ ಹಿ ನಃ ಪ್ರಿಯತರಂ ನಾನ್ಯತ್ಕಿಞ್ಚಿದ್ಭವಿಷ್ಯತಿ ॥ 11 ॥
ಯಥಾಽಭಿಷೇಕೋ ರಾಮಸ್ಯ ರಾಜ್ಯೇನಾಮಿತತೇಜಸಃ ।
ಏತಾಶ್ಚಾನ್ಯಾಶ್ಚ ಸುಹೃದಾಮುದಾಸೀನಃ ಕಥಾಶ್ಶುಭಾಃ ॥ 12 ॥
ಆತ್ಮಸಮ್ಪೂಜನೀಶ್ಶೃಣ್ವನ್ಯಯೌ ರಾಮೋ ಮಹಾಪಥಮ್ ।
ನ ಹಿ ತಸ್ಮಾನ್ಮನಃ ಕಶ್ಚಿಚ್ಚಕ್ಷುಷೀ ವಾ ನರೋತ್ತಮಾತ್ ॥ 13 ॥
ನರ ಶ್ಶಕ್ನೋತ್ಯಪಾಕ್ರಷ್ಟುಮತಿಕ್ರಾನ್ತೇಽಪಿ ರಾಘವೇ ।
ಯಶ್ಚ ರಾಮಂ ನ ಪಶ್ಯೇತ್ತು ಯಂ ಚ ರಾಮೋ ನ ಪಶ್ಯತಿ ॥ 14 ॥
ನಿನ್ದಿತ ಸ್ಸರ್ವಲ್ಲೋಕೇಷು ಸ್ವಾತ್ಮಾಽಪ್ಯೇನಂ ವಿಗರ್ಹತೇ ।
ಸರ್ವೇಷು ಹಿ ಸ ಧರ್ಮಾತ್ಮಾ ವರ್ಣಾನಾಂ ಕುರುತೇ ದಯಾಮ್ ॥ 15 ॥
ಚತುರ್ಣಾಂ ಹಿ ವಯಃ ಸ್ಥಾನಾಂ ತೇನ ತೇ ತಮನುವ್ರತಾಃ ।
ಚತುಷ್ಪಥಾನ್ದೇವಪಥಾಂಶ್ಚೈತ್ಯಾನ್ಯಾಯತನಾನಿ ಚ ॥ 16 ॥
ಪ್ರದಕ್ಷಿಣಂ ಪರಿಹರನ್ ಜಗಾಮ ನೃಪತೇ ಸ್ಸುತಃ ।
ಸ ರಾಜಕುಲಮಾಸಾದ್ಯ ಮೇಘಸಙ್ಘೋಪಮೈ ಶ್ಶುಭೈಃ ॥ 17 ॥
ಪ್ರಾಸಾದಶೃಙ್ಗೈರ್ವಿವಿಧೈಃಕೈಲಾಸ ಶಿಖರೋಪಮೈಃ ।
ಆವಾರಯದ್ಭಿರ್ಗಗನಂ ವಿಮಾನೈರಿವ ಪಾಣ್ಡುರೈಃ ॥ 18 ॥
ವರ್ಧಮಾನಗೃಹೈಶ್ಚಾಪಿ ರತ್ನಜಾಲಪರಿಷ್ಕೃತೈಃ ।
ತತ್ಪೃಥಿವ್ಯಾಂ ಗೃಹವರಂ ಮಹೇನ್ದ್ರಸದನೋಪಮಮ್ ॥ 19 ॥
ರಾಜಪುತ್ರಃ ಪಿತುರ್ವೇಶ್ಮ ಪ್ರವಿವೇಶ ಶ್ರಿಯಾ ಜ್ವಲನ್ ।
ಸ ಕಕ್ಷ್ಯಾ ಧನ್ವಿಭಿರ್ಗುಪ್ತಾಸ್ತಿಸ್ರೋಽತಿಕ್ರಮ್ಯ ವಾಜಿಭಿಃ ॥ 20 ॥
ಪದಾತಿರಪರೇ ಕಕ್ಷ್ಯೇ ದ್ವೇ ಜಗಾಮ ನರೋತ್ತಮಃ ।
ಸ ಸರ್ವಾ ಸ್ಸಮತಿಕ್ರಮ್ಯ ಕಕ್ಷ್ಯಾ ದಶರಥಾತ್ಮಜಃ ।
ಸನ್ನಿವರ್ತ್ಯ ಜನಂ ಸರ್ವಂ ಶುದ್ಧಾನ್ತಃ ಪುರಮಭ್ಯಗಾತ್ ॥ 21 ॥
ತಸ್ಮಿನ್ ಪ್ರವಿಷ್ಟೇ ಪಿತುರನ್ತಿಕಂ ತದಾ ಜನ ಸ್ಸ ಸರ್ವೋ ಮುದಿತೋ ನೃಪಾತ್ಮಜೇ ।
ಪ್ರತೀಕ್ಷತೇ ತಸ್ಯ ಪುನಃ ಸ್ಮ ನಿರ್ಗಮಂ ಯಥೋದಯಂ ಚನ್ದ್ರಮಸಸ್ಸರಿತ್ಪತಿಃ ॥ 22 ॥
ಇತ್ಯಾರ್ಷೇ ಶ್ರೀಮದ್ರಾಮಾಯಣೇ ವಾಲ್ಮೀಕೀಯ ಆದಿಕಾವ್ಯೇ ಅಯೋಧ್ಯಾಕಾಣ್ಡೇ ಸಪ್ತದಶಸ್ಸರ್ಗಃ ॥
