ಶ್ರೀಮದ್ವಾಲ್ಮೀಕೀಯ ರಾಮಾಯಣೇ ಸುನ್ದರಕಾಣ್ಡಮ್ ।
ಅಥ ನವಮಸ್ಸರ್ಗಃ ।
ತಸ್ಯಾಲಯವರಿಷ್ಠಸ್ಯ ಮಧ್ಯೇ ವಿಪುಲಮಾಯತಮ್ ।
ದದರ್ಶ ಭವನಶ್ರೇಷ್ಠಂ ಹನುಮಾನ್ಮಾರುತಾತ್ಮಜಃ ॥ 1 ॥
ಅರ್ಧಯೋಜನವಿಸ್ತೀರ್ಣಮಾಯತಂ ಯೋಜನಂ ಹಿ ತತ್ ।
ಭವನಂ ರಾಕ್ಷಸೇನ್ದ್ರಸ್ಯ ಬಹುಪ್ರಾಸಾದಸಙ್ಕುಲಮ್ ॥ 2 ॥
ಮಾರ್ಗಮಾಣಸ್ತು ವೈದೇಹೀಂ ಸೀತಾಮಾಯತಲೋಚನಾಮ್ ।
ಸರ್ವತಃ ಪರಿಚಕ್ರಾಮ ಹನೂಮಾನರಿಸೂದನಃ ॥ 3 ॥
ಉತ್ತಮಂ ರಾಕ್ಷಸಾವಾಸಂ ಹನುಮಾನವಲೋಕಯನ್ ।
ಆಸಸಾದಾಥ ಲಕ್ಷ್ಮೀವಾನ್ ರಾಕ್ಷಸೇನ್ದ್ರನಿವೇಶನಮ್ ॥ 4 ॥
ಚತುರ್ವಿಷಾಣೈರ್ದ್ವಿರದೈಸ್ತ್ರಿವಿಷಾಣೈಸ್ತಥೈವ ಚ ।
ಪರಿಕ್ಷಿಪ್ತಮಸಮ್ಬಾಧಂ ರಕ್ಷ್ಯಮಾಣಮುದಾಯುಧೈಃ ॥ 5 ॥
ರಾಕ್ಷಸೀಭಿಶ್ಚ ಪತ್ನೀಭೀ ರಾವಣಸ್ಯ ನಿವೇಶನಮ್ ।
ಆಹೃತಾಭಿಶ್ಚ ವಿಕ್ರಮ್ಯ ರಾಜಕನ್ಯಾಭಿರಾವೃತಮ್ ॥ 6 ॥
ತನ್ನಕ್ರಮಕರಾಕೀರ್ಣಂ ತಿಮಿಙ್ಗಿಲಝಷಾಕುಲಮ್ ।
ವಾಯುವೇಗಸಮಾಧೂತಂ ಪನ್ನಗೈರಿವ ಸಾಗರಮ್ ॥ 7 ॥
ಯಾ ಹಿ ವೈಶ್ರವಣೇ ಲಕ್ಷ್ಮೀರ್ಯಾ ಚೇನ್ದ್ರೇ ಹರಿವಾಹನೇ ।
ಸಾ ರಾವಣಗೃಹೇ ಸರ್ವಾ ನಿತ್ಯಮೇವಾನಪಾಯಿನೀ ॥ 8 ॥
ಯಾ ಚ ರಾಜ್ಞಃ ಕುಬೇರಸ್ಯ ಯಮಸ್ಯ ವರುಣಸ್ಯ ಚ ।
ತಾದೃಶೀ ತದ್ವಿಶಿಷ್ಟಾ ವಾ ಋದ್ಧೀ ರಕ್ಷೋಗೃಹೇಷ್ವಿಹ ॥ 9 ॥
ತಸ್ಯ ಹರ್ಮ್ಯಸ್ಯ ಮಧ್ಯಸ್ಥಂ ವೇಶ್ಮ ಚಾನ್ಯತ್ಸುನಿರ್ಮಿತಮ್ ।
ಬಹುನಿರ್ಯೂಹಸಙ್ಕೀರ್ಣಂ ದದರ್ಶ ಪವನಾತ್ಮಜಃ ॥ 10 ॥
ಬ್ರಹ್ಮಣೋಽರ್ಥೇ ಕೃತಂ ದಿವ್ಯಂ ದಿವಿ ಯದ್ವಿಶ್ವಕರ್ಮಣಾ ।
ವಿಮಾನಂ ಪುಷ್ಪಕಂ ನಾಮ ಸರ್ವರತ್ನವಿಭೂಷಿತಮ್ ॥ 11 ॥
ಪರೇಣ ತಪಸಾ ಲೇಭೇ ಯತ್ಕುಬೇರಃ ಪಿತಾಮಹಾತ್ ।
ಕುಬೇರಮೋಜಸಾ ಜಿತ್ವಾ ಲೇಭೇ ತದ್ರಾಕ್ಷಸೇಶ್ವರಃ ॥ 12 ॥
ಈಹಾಮೃಗಸಮಾಯುಕ್ತ್ತೈಃ ಕಾರ್ತಸ್ವರಹಿರಮಣ್ಮಯೈಃ ।
ಸುಕೃತೈರಾಚಿತಂ ಸ್ತಮ್ಭೈಃ ಪ್ರದೀಪ್ತಮಿವ ಚ ಶ್ರಿಯಾ ॥ 13 ॥
ಮೇರುಮನ್ದರಸಙ್ಕಾಶೈರುಲ್ಲಿಖದ್ಭಿರಿವಾಮ್ಬರಮ್ ।
ಕೂಟಾಗಾರೈಶ್ಶುಭಾಕಾರೈಸ್ಸರ್ವತಸ್ಸಮಲಙ್ಕೃತಮ್ ॥ 14 ॥
ಜ್ವಲನಾರ್ಕಪ್ರತೀಕಾಶಂ ಸುಕೃತಂ ವಿಶ್ವಕರ್ಮಣಾ ।
ಹೇಮಸೋಪಾನಸಂಯುಕ್ತಂ ಚಾರುಪ್ರವರವೇದಿಕಮ್ ॥ 15 ॥
ಜಾಲವಾತಾಯನೈರ್ಯುಕ್ತಂ ಕಾಞ್ಚನೈಃ ಸ್ಸ್ಫಾಟಿಕೈರಪಿ ।
ಇನ್ದ್ರನೀಲಮಹಾನೀಲಮಣಿಪ್ರವರವೇದಿಕಮ್ ॥ 16 ॥
ವಿದ್ರುಮೇಣ ವಿಚಿತ್ರೇಣ ಮಣಿಭಿಶ್ಚ ಮಹಾಘನೈಃ ।
ನಿಸ್ತುಲಾಭಿಶ್ಚ ಮುಕ್ತಾಭಿಸ್ತಲೇನಾಭಿವಿರಾಜಿತಮ್ ॥ 17 ॥
ಚನ್ದನೇನ ಚ ರಕ್ತೇನ ತಪನೀಯನಿಭೇನ ಚ ।
ಸುಪುಣ್ಯಗನ್ಧಿನಾ ಯುಕ್ತಮಾದಿತ್ಯತರುಣೋಪಮಮ್ ॥ 18 ॥
ಕೂಟಾಗಾರೈರ್ವರಾಕಾರೈರ್ವಿವಿಧೈಸ್ಸಮಲಙ್ಕೃತಮ್ ।
ವಿಮಾನಂ ಪುಷ್ಪಕಂ ದಿವ್ಯಮಾರುರೋಹ ಮಹಾಕಪಿಃ ॥ 19 ॥
ತತ್ರಸ್ಥಸ್ಸ ತದಾ ಗನ್ಧಂ ಪಾನಭಕ್ಷ್ಯಾನ್ನಸಮ್ಭವಮ್ ।
ದಿವ್ಯಂ ಸಮ್ಮೂರ್ಛಿತಂ ಜಿಘ್ರದ್ರೂಪವನ್ತಮಿವಾನಿಲಮ್ ॥ 20 ॥
ಸ ಗನ್ಧಸ್ತಂ ಮಹಾಸತ್ತ್ವಂ ಬನ್ಧುರ್ಬನ್ಧುಮಿವೋತ್ತಮಮ್ ।
ಇತ ಏಹೀತ್ಯುವಾಚೇನ ತತ್ರ ಯತ್ರ ಸ ರಾವಣಃ ॥ 21 ॥
ತತಸ್ತಾಂ ಪ್ರಸ್ಥಿತಶ್ಶಾಲಾಂ ದದರ್ಶ ಮಹತೀಂ ಶುಭಾಮ್ ।
ರಾವಣಸ್ಯ ಮನಃ ಕಾನ್ತಾಂ ಕಾನ್ತಾಮಿವ ವರಸ್ತ್ರಿಯಮ್ ॥ 22 ॥
ಮಣಿಸೋಪಾನವಿಕೃತಾಂ ಹೇಮಜಾಲವಿಭೂಷಿತಾಮ್ ।
ಸ್ಫಾಟಿಕೈರಾವೃತತಲಾಂ ದನ್ತಾನ್ತರಿತರೂಪಿಕಾಮ್ ॥ 23 ॥
ಮುಕ್ತಾಭಿಶ್ಚ ಪ್ರವಾಲೈಶ್ಚ ರೂಪ್ಯಚಾಮೀಕರೈರಪಿ ।
ವಿಭೂಷಿತಾಂ ಮಣಿಸ್ತಮ್ಭೈಸ್ಸುಬಹುಸ್ತಮ್ಭಭೂಷಿತಾಮ್ ॥ 24 ॥
ನಮ್ರೈರೃಜುಭಿರತ್ಯುಚ್ಚೈಸ್ಸಮನ್ತಾತ್ಸುವಿಭೂಷಿತೈಃ ।
ಸ್ತಮ್ಭೈಃ ಪಕ್ಷೈರಿವಾತ್ಯುಚ್ಚೈರ್ದಿವಂ ಸಮ್ಪ್ರಸ್ಥಿತಾಮಿವ ॥ 25 ॥
ಮಹತ್ಯಾ ಕುಥಯಾಸ್ತೀರ್ಣಾಂ ಪೃಥಿವೀಲಕ್ಷಣಾಙ್ಕಯಾ ।
ಪೃಥಿವೀಮಿವ ವಿಸ್ತೀರ್ಣಾಂ ಸರಾಷ್ಟ್ರಗೃಹಮಾಲಿನೀಮ್ ॥ 26 ॥
ನಾದಿತಾಂ ಮತ್ತವಿಹಗೈರ್ದಿವ್ಯಗನ್ಧಾಧಿವಾಸಿತಾಮ್ ।
ಪರಾರ್ಧ್ಯಾಸ್ತರಣೋಪೇತಾಂ ರಕ್ಷೋಧಿಪನಿಷೇವಿತಾಮ್ ॥ 27 ॥
ಧೂಮ್ರಾಮಗರುಧೂಪೇನ ವಿಮಲಾಂ ಹಂಸಪಾಣ್ಡುರಾಮ್ ।
ಚಿತ್ರಾಂ ಪುಷ್ಪೋಪಹಾರೇಣ ಕಲ್ಮಾಷೀಮಿವ ಸುಪ್ರಭಾಮ್ ॥ 28 ॥
ಮನಸ್ಸಂಹ್ಲಾದಜನನೀಂ ವರ್ಣಸ್ಯಾಪಿ ಪ್ರಸಾದಿನೀಮ್ ।
ತಾಂ ಶೋಕನಾಶಿನೀಂ ದಿವ್ಯಾಂ ಶ್ರಿಯಃ ಸಞ್ಜನನೀಮಿವ ॥ 29 ॥
ಇನ್ದ್ರಿಯಾಣೀನ್ದ್ರಿಯಾರ್ಥೈಸ್ತು ಪಞ್ಚ ಪಞ್ಚಭಿರುತ್ತಮೈಃ ।
ತರ್ಪಯಾಮಾಸ ಮಾತೇವ ತದಾ ರಾವಣಪಾಲಿತಾ ॥ 30 ॥
ಸ್ವರ್ಗೋಽಯಂ ದೇವಲೋಕೋಽಯಮಿನ್ದ್ರಸ್ಯೇಯಂ ಪುರೀ ಭವೇತ್ ।
ಸಿದ್ಧಿರ್ವೇಯಂ ಪರಾ ಹಿ ಸ್ಯಾದಿತ್ಯಮನ್ಯತ ಮಾರುತಿಃ ॥ 31 ॥
ಪ್ರಧ್ಯಾಯತ ಇವಾಪಶ್ಯತ್ಪ್ರದೀಪಾಂಸ್ತತ್ರ ಕಾಞ್ಚನಾನ್ ।
ಧೂರ್ತಾನಿವ ಮಹಾಧೂತೈರ್ದೇವನೇನ ಪರಾಜಿತಾನ್ ॥ 32 ॥
ದೀಪಾನಾಂ ಚ ಪ್ರಕಾಶೇನ ತೇಜಸಾ ರಾವಣಸ್ಯ ಚ ।
ಅರ್ಚಿರ್ಭಿರ್ಭೂಷಣಾನಾಂ ಚ ಪ್ರದೀಪ್ತೇತ್ಯಭ್ಯಮನ್ಯತ ॥ 33 ॥
ತತೋಽಪಶ್ಯತ್ಕುಥಾಽಽಸೀನಂ ನಾನಾವರಾಯಮ್ಬರಸ್ರಜಮ್ ।
ಸಹಸ್ರಂ ವರನಾರೀಣಾಂ ನಾನಾವೇಷವಿಭೂಷಿತಮ್ ॥ 34 ॥
ಪರಿವೃತ್ತೇಽರ್ಧರಾತ್ರೇ ತು ಪಾನನಿದ್ರಾವಶಂ ಗತಮ್ ।
ಕ್ರೀಡಿತ್ವೋಪರತಂ ರಾತ್ರೌ ಸುಷ್ವಾಪ ಬಲವತ್ತದಾ ॥ 35 ॥
ತತ್ಪ್ರಸುಪ್ತಂ ವಿರುರುಚೇ ನಿಶ್ಶಬ್ದಾನ್ತರಭೂಷಣಮ್ ।
ನಿಃಶಬ್ದಹಂಸಭ್ರಮರಂ ಯಥಾ ಪದ್ಮವನಂ ಮಹತ್ ॥ 36 ॥
ತಾಸಾಂ ಸಂವೃತದನ್ತಾನಿ ಮೀಲಿತಾಕ್ಷೀಣಿ ಮಾರುತಿಃ ।
ಅಪಶ್ಯತ್ಪದ್ಮಗನ್ಧೀನಿ ವದನಾನಿ ಸುಯೋಷಿತಾಮ್ ॥ 37 ॥
ಪ್ರಬುದ್ಧಾನೀವ ಪದ್ಮಾನಿ ತಾಸಾಂ ಭೂತ್ವಾ ಕ್ಷಪಾಕ್ಷಯೇ ।
ಪುನಸ್ಸಂವೃತಪತ್ರಾಣಿ ರಾತ್ರಾವಿವ ಬಭುಸ್ತದಾ ॥ 38 ॥
ಇಮಾನಿ ಮುಖಪದ್ಮಾನಿ ನಿಯತಂ ಮತ್ತಷಟ್ಪದಾಃ ।
ಅಮ್ಬುಜಾನೀವ ಫುಲ್ಲಾನಿ ಪ್ರಾರ್ಥಯನ್ತಿ ಪುನಃ ಪುನಃ ॥ 39 ॥
ಇತಿ ಚಾಮನ್ಯತ ಶ್ರೀಮಾನುಪಪತ್ತ್ಯಾ ಮಹಾಕಪಿಃ ।
ಮೇನೇ ಹಿ ಗುಣತಸ್ತಾನಿ ಸಮಾನಿ ಸಲಿಲೋದ್ಭವೈಃ ॥ 40 ॥
ಸಾ ತಸ್ಯ ಶುಶುಭೇ ಶಾಲಾ ತಾಭಿಸ್ತ್ರೀಭಿರ್ವಿರಾಜಿತಾ ।
ಶಾರದೀವ ಪ್ರಸನ್ನಾ ದ್ಯೌಸ್ತಾರಾಭಿರಭಿಶೋಭಿತಾ ॥ 41 ॥
ಸ ಚ ತಾಭಿಃ ಪರಿವೃತಶ್ಶುಶುಭೇ ರಾಕ್ಷಸಾಧಿಪಃ ।
ಯಥಾ ಹ್ಯುಡುಪತಿಶ್ಶೀಮಾಂಸ್ತಾರಾಭಿರಭಿಸಂವೃತಃ ॥ 42 ॥
ಯಾಶ್ಚ್ಯವನ್ತೇಽಮ್ಬರಾತ್ತಾರಾಃ ಪುಣ್ಯಶೇಷಸಮಾವೃತಾಃ ।
ಇಮಾಸ್ತಾಸ್ಸಙ್ಗತಾಃ ಕೃತ್ಸ್ನಾ ಇತಿ ಮೇನೇ ಹರಿಸ್ತದಾ ॥ 43 ॥
ತಾರಾಣಾಮಿವ ಸುವ್ಯಕ್ತಂ ಮಹತೀನಾಂ ಶುಭಾರ್ಚಿಷಾಮ್ ।
ಪ್ರಭಾವರ್ಣಪ್ರಸಾದಾಶ್ಚ ವಿರೇಜುಸ್ತತ್ರ ಯೋಷಿತಾಮ್ ॥ 44 ॥
ವ್ಯಾವೃತ್ತಗುರುಪೀನಸ್ರಕ್ಪ್ರಕೀರ್ಣವರಭೂಷಣಾಃ ।
ಪಾನವ್ಯಾಯಾಮಕಾಲೇಷು ನಿದ್ರಾಪಹೃತಚೇತಸಃ ॥ 45 ॥
ವ್ಯಾವೃತ್ತತಿಲಕಾಃ ಕಾಶ್ಚಿತ್ಕಾಶ್ಚಿದುದ್ಭ್ರನ್ತನೂಪುರಾಃ ।
ಪಾರ್ಶ್ವೇ ಗಲಿತಹಾರಾಶ್ಚ ಕಾಶ್ಚಿತ್ಪರಮಯೋಷಿತಃ ॥ 46 ॥
ಮುಕ್ತಾಹಾರಾಽವೃತಾಶ್ಚಾನ್ಯಾಃ ಕಾಶ್ಚಿದ್ವಿಸ್ರಸ್ತವಾಸಸಃ ।
ವ್ಯಾವಿದ್ಧರಶನಾದಾಮಾಃ ಕಿಶೋರ್ಯ ಇವ ವಾಹಿತಾಃ ॥ 47 ॥
ಸುಕುಣ್ಡಲಧರಾಶ್ಚಾನ್ಯಾ ವಿಚ್ಛಿನ್ನಮೃದಿತಸ್ರಜಃ ।
ಗಜೇನ್ದ್ರಮೃದಿತಾಃ ಫುಲ್ಲಾ ಲತಾ ಇವ ಮಹಾವನೇ ॥ 48 ॥
ಚನ್ದ್ರಾಂಶುಕಿರಣಾಭಾಶ್ಚ ಹಾರಾಃ ಕಾಸಾಞ್ಚಿದುತ್ಕಟಾಃ ।
ಹಂಸಾ ಇವ ಬಭುಸ್ಸುಪ್ತಾಃ ಸ್ತನಮಧ್ಯೇಷು ಯೋಷಿತಾಮ್ ॥ 49 ॥
ಅಪರಾಸಾಂ ಚ ವೈಡೂರ್ಯಾಃ ಕಾದಮ್ಬಾ ಇವ ಪಕ್ಷಿಣಃ ।
ಹೇಮಸೂತ್ರಾಣಿ ಚಾನ್ಯಾಸಾಂ ಚಕ್ರವಾಕಾ ಇವಾಭವನ್ ॥ 50 ॥
ಹಂಸಕಾರಣ್ಡವಾಕೀರ್ಣಾಶ್ಚಕ್ರವಾಕೋಪಶೋಭಿತಾಃ ।
ಆಪಗಾ ಇವ ತಾ ರೇಜುರ್ಜಘನೈಃ ಪುಲಿನೈರಿವ ॥ 51 ॥
ಕಿಙ್ಕಿಣೀಜಾಲಸಙ್ಕೋಶಾಸ್ತಾ ಹೈಮವಿಪುಲಾಮ್ಬುಜಾಃ ।
ಭಾವಗ್ರಾಹಾ ಯಶಸ್ತೀರಾಃ ಸುಪ್ತಾ ನದ್ಯ ಇವಾಽಽಬಭುಃ ॥ 52 ॥
ಮೃದುಷ್ವಙ್ಗೇಷು ಕಾಸಾಞ್ಚಿತ್ಕುಚಾಗ್ರೇಷು ಚ ಸಂಸ್ಥಿತಾಃ ।
ಬಭುರ್ವರ್ಭೂಷಣಾನೀವ ಶುಭಾ ಭೂಷಣರಾಜಯಃ ॥ 53 ॥
ಅಂಶುಕಾನ್ತಾಶ್ಚ ಕಾಸಾಞ್ಚಿನ್ಮುಖಮಾರುತಕಮ್ಪಿತಾಃ ।
ಉಪರ್ಯುಪರಿ ವಕ್ತ್ರಾಣಾಂ ವ್ಯಾಧೂಯನ್ತೇ ಪುನಃ ಪುನಃ ॥ 54 ॥
ತಾಃ ಪತಾಕಾ ಇವೋದ್ಧೂತಾಃ ಪತ್ನೀನಾಂ ರುಚಿರಪ್ರಭಾಃ ।
ನಾನಾವರ್ಣಸುವರ್ಣಾನಾಂ ವಕ್ತ್ರಮೂಲೇಷು ರೇಜಿರೇ ॥ 55 ॥
ವವಲ್ಗುಶ್ಚಾತ್ರ ಕಾಸಾಞ್ಚಿತ್ಕುಣ್ಡಲಾನಿ ಶುಭಾರ್ಚಿಷಾಮ್ ।
ಮುಖಮಾರುತಸಂಸರ್ಗಾನ್ಮನ್ದಂ ಮನ್ದಂ ಸುಯೋಷಿತಾಮ್ ॥ 56 ॥
ಶರ್ಕರಾಽಸವಗನ್ಧೈಶ್ಚ ಪ್ರಕೃತ್ಯಾ ಸುರಭಿಃ ಸುಖಃ ।
ತಾಸಾಂ ವದನನಿಶ್ವಾಸಸ್ಸಿಷೇವೇ ರಾವಣಂ ತದಾ ॥ 57 ॥
ರಾವಣಾನನಶಙ್ಕಾಶ್ಚ ಕಾಶ್ಚಿದ್ರಾವಣಯೋಷಿತಃ ।
ಮುಖಾನಿ ಸ್ಮ ಸಪತ್ನೀನಾಮುಪಾಜಿಘ್ರನ್ಪುನಃ ಪುನಃ ॥ 58 ॥
ಅತ್ಯರ್ಥಂ ಸಕ್ತಮನಸೋ ರಾವಣೇ ತಾ ವರಸ್ತ್ರಿಯಃ ।
ಅಸ್ವತನ್ತ್ರಾಃ ಸಪತ್ನೀನಾಂ ಪ್ರಿಯಮೇವಾಽಚರಂಸ್ತದಾ ॥ 59 ॥
ಬಾಹೂನುಪನಿಧಾಯಾನ್ಯಾಃ ಪಾರಿಹಾರ್ಯವಿಭೂಷಿತಾನ್ ।
ಅಂಶುಕಾನಿ ಚ ರಮ್ಯಾಣಿ ಪ್ರಮದಾಸ್ತತ್ರ ಶಿಶ್ಯಿರೇ ॥ 60 ॥
ಅನ್ಯಾ ವಕ್ಷಸಿ ಚಾನ್ಯಸ್ಯಾಸ್ತಸ್ಯಾಃ ಕಾಚಿತ್ಪುನರ್ಭುಜಮ್ ।
ಅಪರಾ ತ್ವಙ್ಕಮನ್ಯಸ್ಯಾಸ್ತಸ್ಯಾಶ್ಚಾಪ್ಯಪರಾ ಭುಜೌ ॥ 61 ॥
ಊರುಪಾರ್ಶ್ವಕಟೀಪೃಷ್ಠಮನ್ಯೋನ್ಯಸ್ಯ ಸಮಾಶ್ರಿತಾಃ ।
ಪರಸ್ಪರನಿವಿಷ್ಟಾಙ್ಗ್ಯೋ ಮದಸ್ನೇಹವಶಾನುಗಾಃ ॥ 62 ॥
ಅನ್ಯೋನ್ಯಭುಜಸೂತ್ರೇಣ ಸ್ತ್ರೀಮಾಲಾ ಗ್ರಥಿತಾ ಹಿ ಸಾ ।
ಮಾಲೇವ ಗ್ರಥಿತಾ ಸೂತ್ರೇ ಶುಶುಭೇ ಮತ್ತಷಟ್ಪದಾ ॥ 63 ॥
ಲತಾನಾಂ ಮಾಧವೇ ಮಾಸಿ ಫುಲ್ಲಾನಾಂ ವಾಯುಸೇವನಾತ್ ।
ಅನ್ಯೋನ್ಯ ಮಾಲಾಗ್ರಥಿತಂ ಸಂಸಕ್ತಕುಸುಮೋಚ್ಚಯಮ್ ॥ 64 ॥
ವ್ಯತಿವೇಷ್ಟಿತಸುಸ್ಕನ್ಧಮನ್ಯೋನ್ಯಭ್ರಮರಾಕುಲಮ್ ।
ಆಸೀದ್ವನಮಿವೋದ್ಧೂತಂ ಸ್ತ್ರೀವನಂ ರಾವಣಸ್ಯ ತತ್ ॥ 65 ॥
ಉಚಿತೇಷ್ವಪಿ ಸುವ್ಯಕ್ತಂ ನ ತಾಸಾಂ ಯೋಷಿತಾಂ ತದಾ ।
ವಿವೇಕಃ ಶಕ್ಯ ಆಧಾತುಂ ಭೂಷಣಾಙ್ಗಾಮ್ಬರಸ್ರಜಾಮ್ ॥ 66 ॥
ರಾವಣೇ ಸುಖಸಂವಿಷ್ಟೇ ತಾಸ್ತ್ರಿಯೋ ವಿವಿಧಪ್ರಭಾಃ ।
ಜ್ವಲನ್ತಃ ಕಾಞ್ಚನಾ ದೀಪಾಃ ಪ್ರೈಕ್ಷನ್ತಾನಿಮಿಷಾ ಇವ ॥ 67 ॥
ರಾಜರ್ಷಿಪಿತೃದೈತ್ಯಾನಾಂ ಗನ್ಧರ್ವಾಣಾಂ ಚ ಯೋಷಿತಃ ।
ರಾಕ್ಷಸಾನಾಂ ಚ ಯಾಃ ಕನ್ಯಾಸ್ತಸ್ಯ ಕಾಮವಶಂ ಗತಾಃ ॥ 68 ॥
ಯುದ್ಧಕಾಮೇನ ತಾಃ ಸರ್ವಾ ರಾವಣೇನ ಹೃತಾಃ ಸ್ತ್ರಿಯಃ ।
ಸಮದಾ ಮದನೇನೈವ ಮೋಹಿತಾಃ ಕಾಶ್ಚಿದಾಗತಾಃ ॥ 69 ॥
ನ ತತ್ರ ಕಾಚಿತ್ಪ್ರಮದಾ ಪ್ರಸಹ್ಯ ವೀರ್ಯೋಪಪನ್ನೇನ ಗುಣೇನ ಲಬ್ಧಾ ।
ನ ಚಾನ್ಯಕಾಮಾಪಿ ನ ಚಾನ್ಯಪೂರ್ವಾ ವಿನಾ ವರಾರ್ಹಾಂ ಜನಕಾತ್ಮಜಾಂ ತಾಮ್ ॥ 70 ॥
ನ ಚಾಕುಲೀನಾ ನ ಚ ಹೀನರೂಪಾ ನಾದಕ್ಷಿಣಾ ನಾನುಪಚಾರಯುಕ್ತಾ ।
ಭಾರ್ಯಾಭವತ್ತಸ್ಯ ನ ಹೀನಸತ್ತ್ವಾ ನ ಚಾಪಿ ಕಾನ್ತಸ್ಯ ನ ಕಾಮನೀಯಾ ॥ 71 ॥
ಬಭೂವ ಬುದ್ಧಿಸ್ತು ಹರೀಶ್ವರಸ್ಯ ಯದೀದೃಶೀ ರಾಘವಧರ್ಮಪತ್ನೀ ।
ಇಮಾ ಯಥಾ ರಾಕ್ಷಸರಾಜಭಾರ್ಯಾಃ ಸುಜಾತಮಸ್ಯೇತಿ ಹಿ ಸಾಧುಬುದ್ಧೇಃ ॥ 72 ॥
ಪುನಶ್ಚ ಸೋಽಚಿನ್ತಯಾದಾತ್ತರೂಪೋ ಧ್ರುವಂ ವಿಶಿಷ್ಟಾ ಗುಣತೋ ಹಿ ಸೀತಾ ।
ಅಥಾಯಮಸ್ಯಾಂ ಕೃತವಾನ್ಮಹಾತ್ಮಾ ಲಙ್ಕೇಶ್ವರಃ ಕಷ್ಟಮನಾರ್ಯಕರ್ಮ ॥ 73 ॥
ಇತ್ಯಾರ್ಷೇ ಶ್ರೀಮದ್ರಾಮಾಯಣೇ ವಾಲ್ಮೀಕೀಯ ಆದಿಕಾವ್ಯೇ ಸುನ್ದರಕಾಣ್ಡೇ ನವಮಸ್ಸರ್ಗಃ ॥
