ಶ್ರೀಮದ್ವಾಲ್ಮೀಕೀಯ ರಾಮಾಯಣೇ ಕಿಷ್ಕಿನ್ಧಾಕಾಣ್ಡಮ್ ।
ಅಥ ಚತ್ವಾರಿಂಶಸ್ಸರ್ಗಃ ।
ಅಥ ರಾಜಾ ಸಮೃದ್ಧಾರ್ಥಸ್ಸುಗ್ರೀವಃ ಪ್ಲವಗೇಶ್ವರಃ ।
ಉವಾಚ ನರಶಾರ್ದೂಲಂ ರಾಮಂ ಪರಬಲಾರ್ದನಮ್ ॥ 1 ॥
ಆಗತಾ ವಿನಿವಿಷ್ಟಾಶ್ಚ ಬಲಿನಃ ಕಾಮರೂಪಿಣಃ ।
ವಾನರಾ ವಾರಣೇನ್ದ್ರಭಾಃ ಯೇ ಮದ್ವಿಷಯವಾಸಿನಃ ॥ 2 ॥
ತ ಇಮೇ ಬಹುವಿಕ್ರಾನ್ತೈರ್ಹರಿಭಿರ್ಭೀಮವಿಕ್ರಮೈಃ ।
ಆಗತಾ ವಾನರಾ ಘೋರಾ ದೈತ್ಯದಾನವಸನ್ನಿಭಾಃ ॥ 3 ॥
ಖ್ಯಾತಕರ್ಮಾಪದಾನಾಶ್ಚ ಬಲವನ್ತೋ ಜಿತಕ್ಲಮಾಃ ।
ಪರಾಕ್ರಮೇಷು ವಿಖ್ಯಾತಾ ವ್ಯವಸಾಯೇಷು ಚೋತ್ತಮಾಃ ॥ 4 ॥
ಪೃಥಿವ್ಯಮ್ಬುಚರಾ ರಾಮ ನಾನಾನಗನಿವಾಸಿನಃ ।
ಕೋಟ್ಯಗ್ರಶ ಇಮೇ ಪ್ರಾಪ್ತಾ ವಾನರಾಸ್ತವ ಕಿಙ್ಕರಾಃ ॥ 5 ॥
ನಿದೇಶವರ್ತಿನಸ್ಸರ್ವೇ ಸರ್ವೇ ಗುರುಹಿತೇ ರತಾಃ ।
ಅಭಿಪ್ರೇತಮನುಷ್ಠಾತುಂ ತವ ಶಕ್ಷ್ಯನ್ತ್ಯರಿನ್ದಮ ॥ 6 ॥
ತ ಇಮೇ ಬಹುಸಾಹಸ್ರೈರನೀಕೈ ಭೀಮವಿಕ್ರಮೈಃ ।
ಆಗತಾ ವಾನರಾ ಘೋರಾ ದೈತ್ಯದಾನವಸನ್ನಿಭಾಃ ॥ 7 ॥
ಯನ್ಮನ್ಯಸೇ ನರವ್ಯಾಘ್ರ ಪ್ರಾಪ್ತಕಾಲಂ ತದುಚ್ಯತಾಮ್ ।
ತತ್ಸೈನ್ಯಂ ತ್ವದ್ವಶೇ ಯುಕ್ತಮಾಜ್ಞಾಪಯಿತುಮರ್ಹಸಿ ॥ 8 ॥
ಕಾಮಮೇಷಾಮಿದಂ ಕಾರ್ಯಂ ವಿದಿತಂ ಮಮ ತತ್ತ್ವತಃ ।
ತಥಾಪಿ ತು ಯಥಾತತ್ತ್ವಮಾಜ್ಞಾಪಯಿತುಮರ್ಹಸಿ ॥ 9 ॥
ಇತಿ ಬ್ರುವಾಣಂ ಸುಗ್ರೀವಂ ರಾಮೋ ದಶರಥಾತ್ಮಜಃ ।
ಬಾಹುಭ್ಯಾಂ ಸಮ್ಪರಿಷ್ವಜ್ಯ ಇದಂ ವಚನಮಬ್ರವೀತ್ ॥ 10 ॥
ಜ್ಞಾಯತಾಂ ಮಮ ವೈದೇಹೀ ಯದಿ ಜೀವತಿ ವಾ ನ ವಾ ।
ಸ ಚ ದೇಶೋ ಮಹಾಪ್ರಾಜ್ಞ ಯಸ್ಮಿನ್ವಸತಿ ರಾವಣಃ ॥ 11 ॥
ಅಧಿಗಮ್ಯ ತು ವೈದೇಹೀಂ ನಿಲಯಂ ರಾವಣಸ್ಯ ಚ ।
ಪ್ರಾಪ್ತಕಾಲಂ ವಿಧಾಸ್ಯಾಮಿ ತಸ್ಮಿನ್ಕಾಲೇ ಸಹ ತ್ವಯಾ ॥ 12 ॥
ನಾಹಮಸ್ಮಿನ್ ಪ್ರಭುಃ ಕಾರ್ಯೇ ವಾನರೇಶ ನ ಲಕ್ಷ್ಮಣಃ ।
ತ್ವಮಸ್ಯ ಹೇತುಃ ಕಾರ್ಯಸ್ಯ ಪ್ರಭುಶ್ಚ ಪ್ಲವಗೇಶ್ವರ ॥ 13 ॥
ತ್ವಮೇವಾಽಜ್ಞಾಪಯ ವಿಭೋ ಮಮ ಕಾರ್ಯವಿನಿಶ್ಚಯಮ್ ।
ತ್ವಂ ಹಿ ಜಾನಾಸಿ ಯತ್ಕಾರ್ಯಂ ಮಮ ವೀರ ನ ಸಂಶಯಃ ॥ 14 ॥
ಸುಹೃದ್ವಿತೀಯೋ ವಿಕ್ರಾನ್ತಃ ಪ್ರಾಜ್ಞಃ ಕಾಲವಿಶೇಷವಿತ್ ।
ಭವಾನಸ್ಮಧ್ದಿತೇ ಯುಕ್ತ ಸ್ಸುಕೃತಾರ್ಥೋಽರ್ಥವಿತ್ತಮಃ ॥ 15 ॥
ಏವಮುಕ್ತಸ್ತು ಸುಗ್ರೀವೋ ವಿನತಂ ನಾಮ ಯೂಥಪಮ್ ।
ಅಬ್ರವೀದ್ರಾಮಸಾನ್ನಿಧ್ಯೇ ಲಕ್ಷ್ಮಣಸ್ಯ ಚ ಧೀಮತಃ ॥ 16 ॥
ಶೈಲಾಭಂ ಮೇಘನಿರ್ಘೋಷಮೂರ್ಜಿತಂ ಪ್ಲವಗೇಶ್ವರಃ ।
ಸೋಮಸೂರ್ಯಾತ್ಮಜೈ ಸ್ಸಾರ್ಧಂ ವಾನರೈರ್ವಾನರೋತ್ತಮ ॥ 17 ॥
ದೇಶಕಾಲನಯೈರ್ಯುಕ್ತಃ ಕಾರ್ಯಾ ಕಾರ್ಯವಿನಿಶ್ಚಯೇ ।
ವೃತಶ್ಶತಸಹಶ್ರೇಣ ವಾನರಾಣಾಂ ತರಸ್ವಿನಾಮ್ ॥ 18 ॥
ಅಧಿಗಚ್ಛ ದಿಶಂ ಪೂರ್ವಾಂ ಸಶೈಲವನಕಾನನಾಮ್ ।
ತತ್ರ ಸೀತಾಂ ಚ ವೈದೇಹೀಂ ನಿಲಯಂ ರಾವಣಸ್ಯ ಚ ॥ 19 ॥
ಮಾರ್ಗಧ್ವಂ ಗಿರಿಶೃಙ್ಗೇಷು ವನೇಷು ಚ ನದೀಷು ಚ ।
ನದೀಂ ಭಾಗೀರಥೀಂ ರಮ್ಯಾಂ ಸರಯೂಂ ಕೌಶಿಕೀಂ ತಥಾ ॥ 20 ॥
ಕಾಲಿನ್ದೀಂ ಯಮುನಾಂ ರಮ್ಯಾಂ ಯಾಮುನಂ ಚ ಮಹಾಗಿರಿಮ್ ।
ಸರಸ್ವತೀಂ ಚ ಸಿನ್ಧುಂ ಚ ಶೋಣಂ ಮಣಿನಿಭೋದಕಮ್ ॥ 21 ॥
ಮಹೀಂ ಕಾಲಮಹೀಂ ಚೈವ ಶೈಲಕಾನನಶೋಭಿತಾಮ್ ।
ಬ್ರಹ್ಮಮಾಲಾನ್ವಿದೇಹಾಂಶ್ಚ ಮಾಲವಾನ್ಕಾಲಿಕೋಸಲಾನ್ ॥ 22 ॥
ಮಾಗಧಾಂಶ್ಚ ಮಹಾಗ್ರಾಮಾನ್ಪುಣ್ಡ್ರಾನ್ನ್ವಙ್ಗಾಂ ಸ್ತಥೈವ ಚ ।
ಪತ್ತನಂ ಕೋಶಕಾರಾಣಾಂ ಭೂಮಿಂ ಚ ರಜತಾಕರಾಮ್ ॥ 23 ॥
ಸರ್ವಮೇತದ್ವಿಚೇತವ್ಯಂ ಮೃಗಯದ್ಭಿಸ್ತತಸ್ತತಃ ।
ರಾಮಸ್ಯ ದಯಿತಾಂ ಭಾರ್ಯಾಂ ಸೀತಾಂ ದಶರಥಸ್ನುಷಾಮ್ ॥ 24 ॥
ಸಮುದ್ರಮವಗಾಢಾಂಶ್ಚ ಪರ್ವತಾನ್ಪತ್ತನಾನಿ ಚ ।
ಮನ್ದರಸ್ಯ ಚ ಯೇ ಕೋಟಿಂ ಸಂಶ್ರಿತಾಃ ಕೇಚಿದಾಯತಾಮ್ ॥ 25 ॥
ಕರ್ಣಪ್ರಾವರಣಾಶ್ಚೈವ ತಥಾ ಚಾಪ್ಯೋಷ್ಠಕರ್ಣಕಾಃ ।
ಘೋರಲೋಹಮುಖಾಶ್ಚೈವ ಜವನಾಶ್ಚೈಕಪಾದಕಾಃ ॥ 26 ॥
ಅಕ್ಷಯಾ ಬಲವನ್ತಶ್ಚ ಪುರುಷಾಃ ಪುರುಷಾದಕಾಃ ।
ಕಿರಾತಾಃ ಕರ್ಣ ಚೂಡಾಶ್ಚ ಹೇಮಾಙ್ಗಾಃ ಪ್ರಿಯದರ್ಶನಾಃ ॥ 27 ॥
ಆಮಮೀನಾಶನಾಸ್ತತ್ರ ಕಿರಾತಾ ದ್ವೀಪವಾಸಿನಃ ।
ಅನ್ತರ್ಜಲಚರಾ ಘೋರಾ ನರವ್ಯಾಘ್ರಾ ಇತಿ ಶೃತಾಃ ॥ 28 ॥
ಏತೇಷಾಮಾಶ್ರಯಾಸ್ಸರ್ವೇ ವಿಚೇಯಾಃ ಕಾವನೌಕಸಃ ।
ಗಿರಿಭಿರ್ಯೇ ಚ ಗಮ್ಯನ್ತೇ ಪ್ಲವನೇನ ಪ್ಲವೇನ ಚ ॥ 29 ॥
ರತ್ನವನ್ತಂ ಯವದ್ವೀಪಂ ಸಪ್ತರಾಜ್ಯೋಪಶೋಭಿತಮ್ ।
ಸುವರ್ಣರೂಪ್ಯಕಂ ಚೈವ ಸುವರ್ಣಾಕರಮಣ್ಡಿತಮ್ ॥ 30 ॥
ಯವದ್ವೀಪಮತಿಕ್ರಮ್ಯ ಶಿಶಿರೋ ನಾಮ ಪರ್ವತಃ ।
ದಿವಂ ಸ್ಪೃಶತಿ ಶೃಙ್ಗೇಣ ದೇವದಾನವಸೇವಿತಃ ॥ 31 ॥
ಏತೇಷಾಂ ಗಿರಿದುರ್ಗೇಷು ಪ್ರಪಾತೇಷು ವನೇಷು ಚ ।
ಮಾರ್ಗಧ್ವಂ ಸಹಿತಾಸ್ಸರ್ವೇ ರಾಮಪತ್ನೀಂ ಯಶಸ್ವಿನೀಮ್ ॥ 32 ॥
ತತೋ ರಕ್ತಜಲಂ ಶೋಣಮಗಾಧಂ ಶೀಘ್ರಗಾಮಿನಮ್ ।
ಗತ್ವಾ ಪಾರಂ ಸಮುದ್ರಸ್ಯ ಸಿದ್ಧಚಾರಣಸೇವಿತಮ್ ॥ 33 ॥
ತಸ್ಯ ತೀರ್ಥೇಷು ರಮ್ಯೇಷು ವಿಚಿತ್ರೇಷು ವನೇಷು ಚ ।
ರಾವಣ ಸ್ಸಹ ವೈದೇಹ್ಯಾ ಮಾರ್ಗಿತವ್ಯಸ್ತತಸ್ತತಃ ॥ 34 ॥
ತತ ಸ್ಸಮುದ್ರದ್ವೀಪಾಂಶ್ಚ ಸುಭೀಮಾನ್ದ್ರಷ್ಟುಮರ್ಹಥ ।
ಊರ್ಮಿಮನ್ತಂ ಸಮುದ್ರಂ ಚ ಕ್ರೋಶನ್ತಮನಿಲೋದ್ಧತಮ್ ॥ 35 ॥
ತತ್ರಾಸುರಾ ಮಹಾಕಾಯಾಶ್ಛಾಯಾಂ ಗೃಹ್ಣನ್ತಿ ನಿತ್ಯಶಃ ।
ಬ್ರಹ್ಮಣಾ ಸಮನುಜ್ಞಾತಾ ದೀರ್ಘಕಾಲಂ ಬುಭುಕ್ಷಿತಾಃ ॥ 36 ॥
ತಂ ಕಾಲಮೇಘಪ್ರತಿಮಂ ಮಹೋರಗನಿಷೇವಿತಮ್ ।
ಅಭಿಗಮ್ಯ ಮಹಾನಾದಂ ತೀರ್ಥೇನೈವ ಮಹೋದಧಿಮ್ ॥ 37 ॥
ತತೋ ರಕ್ತಜಲಂ ಭೀಮಂ ಲೋಹಿತಂ ನಾಮ ಸಾಗರಮ್ ।
ಗತ್ವಾ ಪ್ರೇಕ್ಷ್ಯಥ ತಾಂ ಚೈವ ಬೃಹತೀಂ ಕೂಟಶಾಲ್ಮಲೀಮ್ ॥ 38 ॥
ಗೃಹಂ ಚ ವೈನತೇಯಸ್ಯ ನಾನಾರತ್ನವಿಭೂಷಿತಮ್ ।
ತತ್ರ ಕೈಲಾಸಸಙ್ಕಾಶಂ ವಿಹಿತಂ ವಿಶ್ವಕರ್ಮಣಾ ॥ 39 ॥
ತತ್ರ ಶೈಲನಿಭಾ ಭೀಮಾ ಮನ್ದೇಹಾ ನಾಮ ರಾಕ್ಷಸಾಃ ।
ಶೈಲಶೃಙ್ಗೇಷು ಲಮ್ಬನ್ತೇ ನಾನಾರೂಪಾ ಭಯಾವಹಾಃ ॥ 40 ॥
ತೇ ಪತನ್ತಿ ಜಲೇ ನಿತ್ಯಂ ಸೂರ್ಯಸ್ಯೋದಯನಂ ಪ್ರತಿ ।
ನಿಹತಾ ಬ್ರಹ್ಮತೇಜೋಭಿರಹನ್ಯಹನಿ ರಾಕ್ಷಸಾಃ ॥ 41 ॥
ಅಭಿತಪ್ತಾಶ್ಚ ಸೂರ್ಯೇಣ ಲಮ್ಬನ್ತೇ ಸ್ಮ ಪುನಃ ಪುನಃ ।
ತತಃ ಪಾಣ್ಡುರಮೇಘಾಭಂ ಕ್ಷೀರೋದಂ ನಾಮ ಸಾಗರಮ್ ॥ 42 ॥
ಗತ್ವಾ ದ್ರಕ್ಷ್ಯಥ ದುರ್ಧರ್ಷಾ ಮುಕ್ತಾಹಾರಮಿವೋರ್ಮಿಭಿಃ ।
ತಸ್ಯ ಮಧ್ಯೇ ಮಹಾನ್ ಶ್ವೇತೋ ಋಷಭೋ ನಾಮ ಪರ್ವತಃ ॥ 43 ॥
ದಿವ್ಯಗನ್ಧೈಃ ಕುಸುಮಿತೈ ರಾಜಿತೈಶ್ಚ ನಗೈರ್ವೃತಃ ।
ಸರಶ್ಚ ರಾಜತೈಃ ಪದ್ಮೈರ್ಜ್ವಲಿತೈರ್ಹೇಮಕೇಸರೈಃ ॥ 44 ॥
ನಾಮ್ನಾ ಸುದರ್ಶನಂ ನಾಮ ರಾಜಹಂಸೈಸ್ಸಮಾಕುಲಮ್ ।
ವಿಬುಧಾಶ್ಚಾರಣಾ ಯಕ್ಷಾಃ ಕಿನ್ನರಾಶ್ಚಾಪ್ಸರೋಗಣಾಃ ॥ 45 ॥
ಹೃಷ್ಟಾಸ್ಸಮಭಿಗಚ್ಛನ್ತಿ ನಲಿನೀಂ ತಾಂ ರಿರಂಸವಃ ।
ಕ್ಷೀರೋದಂ ಸಮತಿಕ್ರಮ್ಯ ತದಾ ದ್ರಕ್ಷ್ಯಥ ವಾನರಾಃ ॥ 46 ॥
ಜಲೋದಂ ಸಾಗರಂ ಶೀಘ್ರಂ ಸರ್ವಭೂತಭಯಾವಹಮ್ ।
ತತ್ರ ತತ್ಕೋಪಜಂ ತೇಜಃ ಕೃತಂ ಹಯಮುಖಂ ಮಹತ್ ॥ 47 ॥
ಅಸ್ಯಾಹುಸ್ತನ್ಮಹಾವೇಗಮೋದನಂ ಸಚರಾಚರಮ್ ।
ತತ್ರ ವಿಕ್ರೋಶತಾಂ ನಾದೋ ಭೂತಾನಾಂ ಸಾಗರೌಕಸಾಮ್ ॥ 48 ॥
ಶ್ರೂಯತೇ ಚ ಸಮರ್ಥಾನಾಂ ದೃಷ್ಟ್ವಾ ತದ್ಬಡಬಾಮುಖಮ್ ।
ಸ್ವಾದೂದಸ್ಯೋತ್ತರೇ ದೇಶೇ ಯೋಜನಾನಿ ತ್ರಯೋದಶ ॥ 49 ॥
ಜಾತರೂಪಶಿಲೋ ನಾಮ ಮಹಾನ್ಕನಕಪರ್ವತಃ ।
ತತ್ರ ಚನ್ದ್ರಪ್ರತೀಕಾಶಂ ಪನ್ನಗಂ ಧರಣೀಧರಮ್ ॥ 50 ॥
ಪದ್ಮಪತ್ರವಿಶಾಲಾಕ್ಷಂ ತತೋ ದ್ರಕ್ಷ್ಯಥ ವಾನರಾಃ ।
ಆಸೀನಂ ಪರ್ವತಸ್ಯಾಗ್ರೇ ಸರ್ವಭೂತನಮಸ್ಕೃತಮ್ ॥ 51 ॥
ಸಹಸ್ರಶಿರಸಂ ದೇವಮನನ್ತಂ ನೀಲವಾಸಸಮ್ ।
ತ್ರಿಶಿರಾಃ ಕಾಞ್ಚನಃ ಕೇತುಸ್ತಾಲಸ್ತಸ್ಯ ಮಹಾತ್ಮನಃ ॥ 52 ॥
ಸ್ಥಾಪಿತಃ ಪರ್ವತಸ್ಯಾಗ್ರೇ ವಿರಾಜತಿ ಸವೇದಿಕಃ ।
ಪೂರ್ವಸ್ಯಾಂ ದಿಶಿ ನಿರ್ಮಾಣಂ ಕೃತಂ ತತ್ ತ್ರಿದಶೇಶ್ವರೈಃ ॥ 53 ॥
ತತಃ ಪರಂ ಹೇಮಮಯ ಶ್ಶ್ರೀಮಾನುದಯಪರ್ವತಃ ।
ತಸ್ಯ ಕೋಟಿರ್ದಿವಂ ಸ್ಪೃಷ್ಟ್ವಾ ಶತಯೋಜನಮಾಯತಾ ॥ 54 ॥
ಜಾತರೂಪಮಯೀ ದಿವ್ಯಾ ವಿರಾಜತಿ ಸವೇದಿಕಾ ।
ಸಾಲೈಸ್ತಾಲೈಸ್ತಮಾಲೈಶ್ಚ ಕರ್ಣಿಕಾರೈಶ್ಚ ಪುಷ್ಪಿತೈಃ ॥ 55 ॥
ಜಾತರೂಪಮಯೈರ್ದಿವ್ಯೈ ಶ್ಶೋಭತೇ ಸೂರ್ಯಸನ್ನಿಭೈಃ ।
ತತ್ರ ಯೋಜನವಿಸ್ತಾರಮುಚ್ಛ್ರಿತಂ ದಶಯೋಜನಮ್ ॥ 56 ॥
ಶೃಙ್ಗಂ ಸೌಮನಸಂ ನಾಮ ಜಾತರೂಪಮಯಂ ಧ್ರುವಮ್ ।
ತತ್ರಪೂರ್ವಂ ಪದಂ ಕೃತ್ವಾ ಪುರಾ ವಿಷ್ಣುಸ್ತ್ರಿವಿಕ್ರಮೇ ॥ 57 ॥
ದ್ವಿತೀಯಂ ಶಿಖರೇ ಮೇರೋಶ್ಚಕಾರ ಪುರುಷೋತ್ತಮಃ ।
ತ್ತರೇಣ ಪರಿಕ್ರಮ್ಯ ಜಮ್ಬೂದ್ವೀಪಂ ದಿವಾಕರಃ ॥ 58 ॥
ದೃಶ್ಯೋ ಭವತಿ ಭೂಯಿಷ್ಠಂ ಶಿಖರಂ ತನ್ಮಹೋಚ್ಛ್ರಯಮ್ ।
ತತ್ರ ವೈಖಾನಸಾ ನಾಮ ವಾಲಖಿಲ್ಯಾ ಮಹರ್ಷಯಃ ॥ 59 ॥
ಪ್ರಕಾಶಮಾನಾ ದೃಶ್ಯನ್ತೇ ಸೂರ್ಯವರ್ಣಾಸ್ತಪಸ್ವಿನಃ ।
ಅಯಂ ಸುದರ್ಶನೋ ದ್ವೀಪಃ ಪುರೋ ಯಸ್ಯ ಪ್ರಕಾಶತೇ ॥ 60 ॥
ಯಸ್ಮಿಂ ಸ್ತೇಜಶ್ಚ ಚಕ್ಷುಶ್ಚ ಸರ್ವಪ್ರಾಣಭೃತಾಮಪಿ ।
ಶೈಲಸ್ಯ ತಸ್ಯ ಶೃಙ್ಗೇಷು ಕನ್ದರೇಷು ವನೇಷು ಚ ॥ 61 ॥
ರಾವಣಸ್ಸಹ ವೈದೇಹ್ಯಾ ಮಾರ್ಗಿತವ್ಯಸ್ತತಸ್ತತಃ ।
ಕಾಞ್ಚನಸ್ಯ ಚ ಶೈಲಸ್ಯ ಸೂರ್ಯಸ್ಯ ಚ ಮಹಾತ್ಮನಃ ॥ 62 ॥
ಆವಿಷ್ಟಾ ತೇಜಸಾ ಸನ್ಧ್ಯಾ ಪೂರ್ವಾ ರಕ್ತಾ ಪ್ರಕಾಶತೇ ।
ಪೂರ್ವಮೇತತ್ಕೃತಂ ದ್ವಾರಂ ಪೃಥಿವ್ಯಾ ಭುವನಸ್ಯ ಚ ॥ 63 ॥
ಸೂರ್ಯಸ್ಯೋದಯನಂ ಚೈವ ಪರ್ವಾ ಹ್ಯೇಷಾ ದಿಗುಚ್ಯತೇ ।
ತಸ್ಯ ಶೈಲಸ್ಯ ಪೃಷ್ಠೇಷು ನಿರ್ಝರೇಷು ಗುಹಾಸು ಚ ॥ 64 ॥
ರಾವಣ ಸ್ಸಹ ವೈದೇಹ್ಯಾ ಮಾರ್ಗಿತವ್ಯಸ್ತತಸ್ತತಃ ।
ತತಃ ಪರಮಗಮ್ಯಾ ಸ್ಯಾದ್ದಿಕ್ಪೂರ್ವಾ ತ್ರಿದಶಾವೃತಾ ॥ 65 ॥
ರಹಿತಾ ಚನ್ದ್ರಸೂರ್ಯಾಭ್ಯಾಮದೃಶ್ಯಾ ತಿಮಿರಾವೃತಾ ।
ಶೈಲೇಷು ತೇಷು ಸರ್ವೇಷು ಕನ್ದರೇಷು ವನೇಷು ಚ ॥ 66 ॥
ಯೇ ಚ ನೋಕ್ತಾ ಮಯಾ ದೇಶಾ ವಿಚೇಯಾ ತೇಷು ಜಾನಕೀ ।
ಏತಾವದ್ವಾನರೈಶ್ಶಕ್ಯಂ ಗನ್ತುಂ ವಾನರಪುಙ್ಗವಾಃ ॥ 67 ॥
ಅಭಾಸ್ಕರಮಮರ್ಯಾದಂ ನ ಜಾನೀಮಸ್ತತಃ ಪರಮ್ ।
ಅಧಿಗಮ್ಯ ತು ವೈದೇಹೀಂ ನಿಲಯಂ ರಾವಣಸ್ಯ ಚ ॥ 68 ॥
ಮಾಸೇ ಪೂರ್ಣೇ ನಿವರ್ತಧ್ವಮುದಯಂ ಪ್ರಾಪ್ಯ ಪರ್ವತಮ್ ।
ಊರ್ಧ್ವಂ ಮಾಸಾನ್ನ ವಸ್ತವ್ಯಂ ವಸನ್ವಧ್ಯೋ ಭವೇನ್ಮಮ ॥ 69 ॥
ಸಿದ್ಧಾರ್ಥಾಸ್ಸನ್ನಿವರ್ತಧ್ವಮಧಿಗಮ್ಯ ತು ಮೈಥಿಲೀಮ್ ।
ಮಹೇನ್ದ್ರಕಾನ್ತಾಂ ವನಷಣ್ಡಮಣ್ಡಿತಾಂ ದಿಶಂ ಚರಿತ್ವಾ ನಿಪುಣೇನ ವಾನರಾಃ ।
ಅವಾಪ್ಯ ಸೀತಾಂ ರಘುವಂಶಜಪ್ರಿಯಾಂ ತತೋ ನಿವೃತ್ತಾಸ್ಸುಖಿನೋ ಭವಿಷ್ಯಥ ॥ 70 ॥
ಇತ್ಯಾರ್ಷೇ ಶ್ರೀಮದ್ರಾಮಾಯಣೇ ವಾಲ್ಮೀಕೀಯ ಆದಿಕಾವ್ಯೇ ಕಿಷ್ಕಿನ್ಧಾಕಾಣ್ಡೇ ಚತ್ವಾರಿಂಶಸ್ಸರ್ಗಃ ॥
