ಶ್ರೀಮದ್ವಾಲ್ಮೀಕೀಯ ರಾಮಾಯಣೇ ಅಯೋಧ್ಯಾಕಾಣ್ಡಮ್ ।
ಅಥ ಅಷ್ಟಾಶೀತಿತಮಸ್ಸರ್ಗಃ ।
ತಚ್ಛ್ರುತ್ವಾ ನಿಪುಣಂ ಸರ್ವಂ ಭರತ ಸ್ಸಹ ಮನ್ತ್ರಿಭಿಃ ।
ಇಙ್ಗುದೀಮೂಲಮಾಗಮ್ಯ ರಾಮಶಯ್ಯಾಮವೇಕ್ಷ್ಯ ತಾಮ್ ॥ 1 ॥
ಅಬ್ರವೀಜ್ಜನನೀ ಸ್ಸರ್ವಾ ಇಹ ತೇನ ಮಹಾತ್ಮನಾ ।
ಶರ್ವರೀ ಶಯಿತಾ ಭೂಮಾವಿದಮಸ್ಯ ವಿಮರ್ದಿತಮ್ ॥ 2 ॥
ತಚ್ಛ್ರುತ್ವಾ ನಿಪುಣಂ ಸರ್ವಂ ಭರತ ಸ್ಸಹ ಮನ್ತ್ರಿಭಿಃ ।
ಇಙ್ಗುದೀಮೂಲಮಾಗಮ್ಯ ರಾಮಶಯ್ಯಾಮವೇಕ್ಷ್ಯ ತಾಮ್ ॥ 3 ॥
ಅಬ್ರವೀಜ್ಜನನೀ ಸ್ಸರ್ವಾ ಇಹ ತೇನ ಮಹಾತ್ಮನಾ ।
ಶರ್ವರೀ ಶಯಿತಾ ಭೂಮಾವಿದಮಸ್ಯ ವಿಮರ್ದಿತಮ್ ॥ 4 ॥
ಮಹಾಭಾಗಕುಲೀನೇನ ಮಹಾಭಾಗೇನ ಧೀಮತಾ ।
ಜಾತೋ ದಶರಥೇನೋರ್ವ್ಯಾಂ ನ ರಾಮಸ್ಸ್ವಪ್ತು ಮರ್ಹತಿ ॥ 5 ॥
ಅಜಿನೋತ್ತರಸಂಸ್ತೀರ್ಣೇ ವರಾಸ್ತರಣಸಞ್ಚಯೇ ।
ಶಯಿತ್ವಾ ಪುರುಷವ್ಯಾಘ್ರಃ ಕಥಂ ಶೇತೇ ಮಹೀತಲೇ ॥ 6 ॥
ಪ್ರಾಸಾದಾಗ್ರವಿಮಾನೇಷು ವಲಭೀಷು ಚ ಸರ್ವದಾ ।
ಹೈಮರಾಜತಭೌಮೇಷು ವರಾಸ್ತರಣಶಾಲಿಷು ॥ 7 ॥
ಪುಷ್ಪಸಞ್ಚಯಚಿತ್ರೇಷು ಚನ್ದನಾಗರುಗನ್ಧಿಷು ।
ಪಾಣ್ಡುರಾಭ್ರಪ್ರಕಾಶೇಷು ಶುಕಸಙ್ಘರೂತೇಷುಚ ॥ 8 ॥
ಪ್ರಾಸಾದವರವರ್ಯೇಷು ಶೀತವತ್ಸು ಸುಗನ್ಧಿಷು ।
ಉಷಿತ್ವಾಮೇರುಕಲ್ಪೇಷು ಕೃತಕಾಞ್ಚನ ಭಿತ್ತಿಷು ॥ 9 ॥
ಗೀತವಾದಿತ್ರನಿರ್ಘೋಷೈರ್ವರಾಭರಣನಿಸ್ಸ್ವನೈಃ ।
ಮೃದಙ್ಗವರಶಬ್ದೈಶ್ಚ ಸತತಂ ಪ್ರತಿಬೋಧಿತಃ ॥ 10 ॥
ವನ್ದಿಭಿರ್ವನ್ದಿತಃ ಕಾಲೇ ಬಹುಭಿ ಸ್ಸೂತಮಾಗಧೈಃ ।
ಗಾಥಾಭಿರನುರೂಪಾಭಿ ಸ್ಸ್ತುತಿಭಿಶ್ಚ ಪರನ್ತಪಃ ॥ 11 ॥
ಅಶ್ರದ್ಧೇಯಮಿದಂ ಲೋಕೇ ನ ಸತ್ಯಂ ಪ್ರತಿಭಾತಿ ಮಾ ।
ಮುಹ್ಯತೇ ಖಲು ಮೇ ಭಾವ ಸ್ಸ್ವಪ್ನೋಽಯಮಿತಿ ಮೇ ಮತಿಃ ॥ 12 ॥
ನ ನೂನಂ ದೈವತಂ ಕಿಞ್ಚಿತ್ಕಾಲೇನ ಬಲವತ್ತರಮ್ ।
ಯತ್ರ ದಾಶರಥೀ ರಾಮೋ ಭೂಮಾವೇವ ಶಯೀತ ಸಃ ॥ 13 ॥
ವಿದೇಹರಾಜಸ್ಯ ಸುತಾ ಸೀತಾ ಚ ಪ್ರಿಯದರ್ಶನಾ ।
ದಯಿತಾ ಶಯಿತಾ ಭೂಮೌ ಸ್ನುಷಾ ದಶರಥಸ್ಯ ಚ ॥ 14 ॥
ಇಯಂ ಶಯ್ಯಾ ಮಮ ಭ್ರಾತುರಿದಂ ಹಿ ಪರಿವರ್ತಿತಮ್ ।
ಸ್ಥಣ್ಡಿಲೇ ಕಠಿನೇ ಸರ್ವಂ ಗಾತ್ರೈ ರ್ವಿಮೃದಿತಂ ತೃಣಮ್ ॥ 15 ॥
ಮನ್ಯೇ ಸಾಭರಣಾ ಸುಪ್ತಾ ಸೀತಾಽಸ್ಮಿಞ್ಛಯನೋತ್ತಮೇ ।
ತತ್ರ ತತ್ರ ಹಿ ದೃಶ್ಯನ್ತೇ ಸಕ್ತಾಃ ಕನಕಬಿನ್ದವಃ ॥ 16 ॥
ಉತ್ತರೀಯಮಿಹಾಽಸಕ್ತಂ ಸುವ್ಯಕ್ತಂ ಸೀತಯಾ ತದಾ ।
ತಥಾ ಹ್ಯೇತೇ ಪ್ರಕಾಶನ್ತೇ ಸಕ್ತಾಃ ಕೌಶೇಯತನ್ತವಃ ॥ 17 ॥
ಮನ್ಯೇ ಭರ್ತು ಸ್ಸುಖಾ ಶಯ್ಯಾ ಯೇನ ಬಾಲಾ ತಪಸ್ವಿನೀ ।
ಸುಕುಮಾರೀ ಸತೀ ದುಃಖಂ ನ ಹಿ ವಿಜಾನಾತಿ ಮೈಥಿಲೀ ॥ 18 ॥
ಹಾ ಹನ್ತಾಽಸ್ಮಿ ನೃಶಂಸೋಽಹಂ ಯತ್ಸಭಾರ್ಯಃ ಕೃತೇ ಮಮ ।
ಈದೃಶೀಂ ರಾಘವಶ್ಶಯ್ಯಾಮಧಿಶೇತೇ ಹ್ಯನಾಥವತ್ ॥ 19 ॥
ಸಾರ್ವಭೌಮಕುಲೇ ಜಾತ ಸ್ಸರ್ವಲೋಕಸ್ಯ ಸಮ್ಮತಃ ।
ಸರ್ವಲೋಕಪ್ರಿಯಸ್ತ್ಯಕ್ತ್ವಾ ರಾಜ್ಯಂ ಸುಖಮನುತ್ತಮ್ ॥ 20 ॥
ಕಥಮಿನ್ದೀವರಶ್ಯಾಮೋ ರಕ್ತಾಕ್ಷಃ ಪ್ರಿಯದರ್ಶನಃ ।
ಸುಖಭಾಗೀ ನ ದುಃಖಾರ್ಹ ಶ್ಶಯಿತೋ ಭುವಿ ರಾಘವಃ ॥ 21 ॥
ಧನ್ಯಃ ಖಲು ಮಹಾಭಾಗೋ ಲಕ್ಷ್ಮಣ ಶ್ಶುಭಲಕ್ಷಣಃ ।
ಭ್ರಾತರಂ ವಿಷಮೇ ಕಾಲೇ ಯೋ ರಾಮಮನುವರ್ತತೇ ॥ 22 ॥
ಸಿದ್ಧಾರ್ಥಾ ಖಲು ವೈದೇಹೀ ಪತಿಂ ಯಾಽನುಗತಾ ವನಮ್ ।
ವಯಂ ಸಂಶಯಿತಾ ಸ್ಸರ್ವೇ ಹೀನಾಸ್ತೇನ ಮಹಾತ್ಮನಾ ॥ 23 ॥
ಆಕರ್ಣಧಾರಾ ಪೃಥಿವೀ ನೌಃ ಇವ ಪ್ರತಿಭಾತಿ ಮಾ ।
ಗತೇ ದಶರಥೇ ಸ್ವರ್ಗಂ ರಾಮೇ ಚಾರಣ್ಯಮಾಶ್ರಿತೇ ॥ 24 ॥
ನ ಚ ಪ್ರಾರ್ಥಯತೇ ಕಚ್ಚಿನ್ಮನಸಾಪಿ ವಸುನ್ಧರಾಮ್ ।
ವನೇಽಪಿ ವಸತಸ್ತಸ್ಯ ಬಾಹುವೀರ್ಯಾಭಿರಕ್ಷಿತಾಮ್ ॥ 25 ॥
ಶೂನ್ಯಸಂವರಣಾರಕ್ಷಾಮಯನ್ತ್ರಿತಹಯದ್ವಿಪಾಮ್ ।
ಅಪಾವೃತಪುರದ್ವಾರಾಂ ರಾಜಧಾನೀಮರಕ್ಷಿತಾಮ್ ॥ 26 ॥
ಅಪ್ರಹೃಷ್ಟಬಲಾಂ ಶೂನ್ಯಾಂ ವಿಷಮಸ್ಥಾಮನಾವೃತಾಮ್ ।
ಶತ್ರವೋ ನಾಭಿಮನ್ಯನ್ತೇ ಭಕ್ಷಾನ್ವಿಷಕೃತಾನಿವ ॥ 27 ॥
ಅದ್ಯಪ್ರಭೃತಿ ಭೂಮೌ ತು ಶಯಿಷ್ಯೇಽಹಂ ತೃಣೇಷು ವಾ ।
ಫಲಮೂಲಾಶನೋ ನಿತ್ಯಂ ಜಟಾಚೀರಾಣಿ ಧಾರಯನ್ ॥ 28 ॥
ತಸ್ಯಾರ್ಥಮುತ್ತರಂ ಕಾಲಂ ನಿವತ್ಸ್ಯಾಮಿ ಸುಖಂ ವನೇ ।
ತಂ ಪ್ರತಿಶ್ರವಮಾಮುಚ್ಯ ನಾಸ್ಯ ಮಿಥ್ಯಾ ಭವಿಷ್ಯತಿ ॥ 29 ॥
ವಸನ್ತಂ ಭ್ರಾತುರರ್ಥಾಯ ಶತ್ರುಘ್ನೋ ಮಾಽನುವತ್ಸ್ಯತಿ ।
ಲಕ್ಷ್ಮಣೇನ ಸಹತ್ವಾರ್ಯೋ ಹ್ಯಯೋಧ್ಯಾಂ ಪಾಲಯಿಷ್ಯತಿ ॥ 30 ॥
ಅಭಿಷೇಕ್ಷ್ಯನ್ತಿ ಕಾಕುತ್ಸ್ಥಮಯೋಧ್ಯಾಯಾಂ ದ್ವಿಜಾತಯಃ ।
ಅಪಿ ಮೇ ದೇವತಾಃ ಕುರ್ಯುರಿಮಂ ಸತ್ಯಂ ಮನೋರಥಮ್ ॥ 31 ॥
ಪ್ರಸಾದ್ಯಮಾನ ಶ್ಶಿರಸಾ ಮಯಾ ಸ್ವಯಂ ಬಹುಪ್ರಕಾರಂ ಯದಿ ನಾಭಿಪತ್ಸ್ಯತೇ ।
ತತೋಽನುವತ್ಸ್ಯಾಮಿ ಚಿರಾಯ ರಾಘವಂ ವನೇಚರನ್ನಾರ್ಹತಿ ಮಾಮುಪೇಕ್ಷಿತುಮ್ ॥ 32 ॥
ಇತ್ಯಾರ್ಷೇ ಶ್ರೀಮದ್ರಾಮಾಯಣೇ ವಾಲ್ಮೀಕೀಯ ಆದಿಕಾವ್ಯೇ ಅಯೋಧ್ಯಾಕಾಣ್ಡೇ ಅಷ್ಟಾಶೀತಿತಮಸ್ಸರ್ಗಃ ॥
