ಶ್ರೀಮದ್ವಾಲ್ಮೀಕೀಯ ರಾಮಾಯಣೇ ಯುದ್ಧಕಾಣ್ಡಮ್ ।
ಅಥ ದ್ವಿಚತ್ವಾರಿಂಶಸ್ಸರ್ಗಃ ।
ತತಸ್ತೇರಾಕ್ಷಸಾಸ್ತತ್ರಗತ್ವಾರಾವಣಮನ್ದಿರಮ್ ।
ನ್ಯವೇದಯನ್ಪುರೀಂರುದ್ಧಾಂರಾಮೇಣಸಹವಾನರೈಃ ॥ 1 ॥
ರುದ್ಧಾನ್ತುನಗರೀಂಶ್ರುತ್ವಾಜಾತಕ್ರೋಧೋನಿಶಾಚರಃ ।
ವಿಧಾನನ್ದ್ವಿಗುಣಂಶ್ರುತ್ವಾಪ್ರಾಸಾದಂಸೋಽಧ್ಯರೋಹತ ॥ 2 ॥
ಸದದರ್ಶಾವೃತಾಂಲಙ್ಕಾಂಸಶೈಲವನಕಾನನಾಮ್ ।
ಅಸಙ್ಖ್ಯೇಯೈರ್ಹರಿಗಣೈಃಸರ್ವತೋಯುದ್ಧಕಾಙ್ಕ್ಷಿಭಿಃ ॥ 3 ॥
ಸದೃಷ್ಟ್ವಾವಾನರೈಃಸರ್ವಾಂವಸುಧಾಙ್ಕವಲೀಕೃತಾಮ್ ।
ಕಥಙ್ಕ್ಷಪಯಿತವ್ಯಾಃಸ್ಯುರಿತಿಚಿನ್ತಾಪರೋಽಭವತ್ ॥ 4 ॥
ಸಚಿನ್ತಯಿತ್ವಾಸುಚಿರನ್ಧೈರ್ಯಮಾಲಮ್ಬ್ಯರಾವಣಃ ।
ರಾಘವಂಹರಿಯೂಥಾಂಶ್ಚದದರ್ಶಾಯತಲೋಚನಃ ॥ 5 ॥
ರಾಘವಃಸಹಸೈನ್ಯೇನಮುದಿತೋನಾಮಪುಪ್ಲುವೇ ।
ಲಙ್ಕಾನ್ದದರ್ಶಗುಪ್ತಾಂವೈಸರ್ವತೋರಾಕ್ಷಸೈರ್ವೃತಾಮ್ ॥ 6 ॥
ದೃಷ್ಟ್ವಾದಾಶರಥಿರ್ಲಙ್ಕಾಞ್ಚಿತ್ರಧ್ವಜಪತಾಕಿನೀಮ್ ।
ಜಗಾಮಸಹಸಾಸೀತಾನ್ದೂಯಮಾನೇನಚೇತಸಾ ॥ 7 ॥
ಅತ್ರಸಾಮೃಗಶಾವಾಕ್ಷೀಮತ್ಕೃತೇಜನಕಾತ್ಮಜಾ ।
ಪೀಡ್ಯತೇಶೋಕಸನ್ತಪ್ತಾಕೃಶಾಸ್ಥಣ್ಡಿಲಶಾಯಿನೀ ॥ 8 ॥
ಪೀಡ್ಯಮಾನಾಂಸಧರ್ಮಾತ್ಮಾವೈದೇಹೀಮನುಚಿನ್ತಯನ್ ।
ಕ್ಷಿಪ್ರಮಾಜ್ಞಾಪಯಾಮಾಸವಾನರಾನ್ದ್ವಿಷತಾಂವಧೇ ॥ 9 ॥
ಏವಮುಕ್ತೇತುವಚನೇರಾಮೇಣಾಕ್ಲಿಷ್ಟಕರ್ಮಣಾ ।
ಸಙ್ಘರ್ಷಮಾಣಾಃಪ್ಲವಗಾಃಸಿಮ್ಹನಾದೈರನಾದಯನ್ ॥ 10 ॥
ಶಿಖರೈರ್ವಿಕಿರಾಮೈನಾಂಲಙ್ಕಾಮ್ಮುಷ್ಟಿಭಿರೇವವಾ ।
ಇತಿಸ್ಮದಧಿರೇಸರ್ವೇಮನಾಂಸಿಹರಿಯೂಥಪಾಃ ॥ 11 ॥
ಉದ್ಯಮ್ಯಗಿರಿಶೃಙ್ಗಾಣಿಶಿಖರಾಣಿಮಹಾನ್ತಿಚ ।
ತರೂಂಶ್ಚೋತ್ಪಾಟ್ಯವಿವಿಧಾಂಸ್ತಿಷ್ಠನ್ತಿಹರಿಯೂಥಪಾಃ ॥ 12 ॥
ಪ್ರೇಕ್ಷತೋರಾಕ್ಷಸೇನ್ದ್ರಸ್ಯತಾನ್ಯನೀಕಾನಿಭಾಗಶಃ ।
ರಾಘವಪ್ರಿಯಕಾಮಾರ್ಥಂಲಙ್ಕಾಮಾರುರುಹುಸ್ತದಾ ॥ 13 ॥
ತೇತಾಮ್ರವಕ್ತ್ರಾಹೇಮಾಭಾರಾಮಾರ್ಥೇತ್ಯಕ್ತಜೀವಿತಾಃ ।
ಲಙ್ಕಾಮೇವಾಭ್ಯವರ್ತನ್ತಸಾಲತಾಲಶಿಲಾಯುಧಾಃ ॥ 14 ॥
ತೇದ್ರುಮೈಃಪರ್ವತಾಗ್ರೈಶ್ಚಮುಷ್ಟಿಭಿಶ್ಚಪ್ಲವಙ್ಗಮಾಃ ।
ಪ್ರಾಕಾರಾಗ್ರಾಣ್ಯರಣ್ಯಾನಿಮಮನ್ಥುಸ್ತೋರಣಾನಿಚ ॥ 15 ॥
ಪಾರಿಖಾಃಪೂರಯನ್ತಿಸ್ಮಪ್ರಸನ್ನಸಲಿಲಾಯುತಾಃ ।
ಪಾಂಸುಭಿಃಪರ್ವತಾಗ್ರೈಶ್ಚತೃಣೈಃಕಾಷ್ಠೈಶ್ಚವಾನರಾಃ ॥ 16 ॥
ತತಃಸಹಸ್ರಯೂಥಾಶ್ಚಕೋಟೀಯೂಥಾಶ್ಚವಾನರಾಃ ।
ಕೋಟೀಶತಯುತಾಶ್ಚಾನ್ಯೇಲಙ್ಕಾಮಾರುರುಹುಸ್ತದಾ ॥ 17 ॥
ಕಾಞ್ಚನಾನಿಪ್ರಮೃದ್ನನ್ತಸ್ತೋರಣಾನಿಪ್ಲವಙ್ಗಮಾಃ ।
ಕೈಲಾಸಶಿಖರಾಭಾನಿಗೋಪುರಾಣಿಪ್ರಮಥ್ಯಚ ॥ 18 ॥
ಆಪ್ಲವನ್ತಃಪ್ಲವನ್ತಶ್ಚಗರ್ಜನ್ತಶ್ಚಪ್ಲವಙ್ಗಮಾಃ ।
ಲಙ್ಕಾನ್ತಾಮಭಿಧಾವನ್ತಿಮಹಾವಾರಣಸನ್ನಿಭಾಃ ॥ 19 ॥
ಜಯತ್ಯತಿಬಲೋರಾಮೋಲಕ್ಷ್ಮಣಶ್ಚಮಹಾಬಲಃ ।
ರಾಜಾಜಯತಿಸುಗ್ರೀವೋರಾಘವೇಣಾಭಿಪಾಲಿತಃ ॥ 20 ॥
ಇತ್ಯೇವಙ್ಘೋಷಯನ್ತಶ್ಚಗರ್ಜನ್ತಶ್ಚಪ್ಲವಙ್ಗಮಾಃ ।
ಅಭ್ಯಧಾವನ್ತಲಙ್ಕಾಯಾಃಪ್ರಾಕಾರಙ್ಕಾಮರೂಪಿಣಃ ॥ 21 ॥
ವೀರಬಾಹುಃಸುಬಾಹುಶ್ಚನಲಶ್ಚವನಗೋಚರಃ ।
ನಿಪೀಡ್ಯೋಪನಿವಿಷ್ಟಾಸ್ತೇಪ್ರಾಕಾರಂಹರಿಯೂಥಪಾಃ ।
ಏತಸ್ಮಿನ್ನನ್ತರೇಚಕ್ರುಃಸ್ಕನ್ಧಾವಾರನಿವೇಶನಮ್ ॥ 22 ॥
ಪೂರ್ವದ್ವಾರನ್ತುಕುಮುದಃಕೋಟೀಭಿರ್ದಶಭಿರ್ವೃತಃ ।
ಆವೃತ್ಯಬಲವಾಂಸ್ತಸ್ಥೌಹರಿಭಿರ್ಜಿತಕಾಶಿಭಿಃ ॥ 23 ॥
ಸಾಹಾಯ್ಯಾರ್ಥನ್ತುತಸ್ಯೈವನಿವಿಷ್ಟಃಪ್ರಘಸೋಹರಿಃ ।
ಪನಸಶ್ಚಮಹಾಬಾಹುರ್ವಾನರೈರ್ಬಹುಭಿರ್ವೃತಃ ॥ 24 ॥
ದಕ್ಷಿಣನ್ದ್ವಾರಮಾಗಮ್ಯವೀರಃಶತಬಲಿಃಕಪಿಃ ।
ಆವೃತ್ಯಬಲವಾಂಸ್ತಸ್ಥೌವಿಂಶತ್ಯಾಕೋಟಿಭಿರ್ವೃತಃ ॥ 25 ॥
ಸುಷೇಣಃಪಶ್ಚಿಮದ್ವಾರಙ್ಗತಸ್ತಾರಾಪಿತಾಹರಿಃ ।
ಆವೃತ್ಯಬಲವಾಂಸ್ತಸ್ಥೌಷಷ್ಟಿಕೋಟಿಭಿರಾವೃತಃ ॥ 26 ॥
ಉತ್ತರನ್ದ್ವಾರಮಾಸಾದ್ಯರಾಮಃಸೌಮಿತ್ರಿಣಾಸಹ ।
ಆವೃತ್ಯಬಲವಾಂಸ್ತಸ್ಥೌಸುಗ್ರೀವಶ್ಚಹರೀಶ್ವರಃ ॥ 27 ॥
ಗೋಲಾಙ್ಗೂಲೋಮಹಾಕಾಯೋಗವಾಕ್ಷೋಭೀಮದರ್ಶನಃ ।
ವೃತಃಕೋಟ್ಯಾಮಹಾವೀರ್ಯಸ್ತಸ್ಥೌರಾಮಸ್ಯಪಾರ್ಶ್ವತಃ ॥ 28 ॥
ಋಕ್ಷಾಣಾಮ್ಭೀಮವೇಗಾನಾನ್ಧೂಮ್ರಃಶತ್ರುನಿಬರ್ಹಣಃ ।
ವೃತಃಕೋಟ್ಯಾಮಹಾವೀರ್ಯಸ್ತಸ್ಥೌರಾಮಸ್ಯಪಾರ್ಶ್ವತಃ ॥ 29 ॥
ಸನ್ನದ್ಧಸ್ತುಮಹಾವೀರ್ಯೋಗದಾಪಾಣಿರ್ವಿಭೀಷಣಃ ।
ವೃತೋಯಸ್ತೈಸ್ತುಸಚಿವೈಸ್ತಸ್ಥೌತತ್ರಮಹಾಬಲಃ ॥ 30 ॥
ಗಜೋಗವಾಕ್ಷೋಗವಯಃಶರಭೋಗನ್ಧಮಾದನಃ ।
ಸಮನ್ತಾತ್ಪರಿಧಾವನ್ತೋರರಕ್ಷುರ್ಹರಿವಾಹಿನೀಮ್ ॥ 31 ॥
ತತಃಕೋಪಪರೀತಾತ್ಮಾರಾವಣೋರಾಕ್ಷಸೇಶ್ವರಃ ।
ನಿರ್ಯಾಣಂಸರ್ವಸೈನ್ಯಾನಾನ್ದ್ರುತಮಾಜ್ಞಾಪಯತ್ತದಾ ॥ 32 ॥
ಏತಚ್ಛ್ರುತ್ವಾತತೋವಾಕ್ಯಂರಾವಣಸ್ಯಮುಖೋದ್ಗತಮ್ ।
ಸಹಸಾಭೀಮನಿರ್ಘೋಷಮುದ್ಘುಷ್ಟಂರಜನೀಚರೈಃ ॥ 33 ॥
ತತಃಪ್ರಚೋದಿತಾಭೇರ್ಯಶ್ಚನ್ದ್ರಪಾಣ್ಡರಪುಷ್ಕರಾಃ ।
ಹೇಮಕೋಣಾಹತಾಭೀಮಾರಾಕ್ಷಸಾನಾಂಸಮನ್ತತಃ ॥ 34 ॥
ವಿನೇದುಶ್ಚಮಹಾಘೋಷಾಃಶಙ್ಖಾಃಶತಸಹಸ್ರಶಃ ।
ರಾಕ್ಷಸಾನಾಂಸುಘೋರಾಣಾಮ್ಮುಖಮಾರುತಪೂರಿತಾಃ ॥ 35 ॥
ತೇಬಭುಃಶುಭನೀಲಾಙ್ಗಾಃಸಶಙ್ಖಾರಜನೀಚರಾಃ ।
ವಿದ್ಯುನ್ಮಣ್ಡಲಸನ್ನದ್ಧಾಃಸಬಲಾಕಾಇವಾಮ್ಬುದಾಃ ॥ 36 ॥
ನಿಷ್ಪತನ್ತಿತತಃಸೈನ್ಯಾಹೃಷ್ಟಾರಾವಣಚೋದಿತಾಃ ।
ಸಮಯೇಪೂರ್ಯಮಾಣಸ್ಯವೇಗಾಇವಮಹೋದಧೇಃ ॥ 37 ॥
ತತೋವಾನರಸೈನ್ಯೇನಮುಕ್ತೋನಾದಃಸಮನ್ತತಃ ।
ಮಲಯಃಪೂರಿತೋಯೇನಸಸಾನುಪ್ರಸ್ಥಕನ್ದರಃ ॥ 38 ॥
ಶಙ್ಖದುನ್ದುಭಿಸಙ್ಘುಷ್ಟಃಸಿಮ್ಹನಾದಸ್ತರಸ್ವಿನಾಮ್ ।
ಪೃಥಿವೀಞ್ಚಾನ್ತರಿಕ್ಷಞ್ಚಸಾಗರಞ್ಚೈವನಾದಯನ್ ॥ 39 ॥
ಗಜಾನಾಮ್ಬೃಂಹಿತೈಃಸಾರ್ಧಂಹಯಾನಾಂಹೇಷಿತೈರಪಿ ।
ರಥಾನಾನ್ನೇಮಿಘೋಷೈಶ್ಚರಕ್ಷಸಾಮ್ವದನಸ್ವನಃ ॥ 40 ॥
ಏತಸ್ಮಿನ್ನನ್ತರೇಘೋರಃಸಙ್ಗ್ರಾಮಃಸಮವರ್ತತ ।
ರಕ್ಷಸಾಂವಾನರಾಣಾಞ್ಚಯಥಾದೇವಾಸುರೇಪುರಾ ॥ 41 ॥
ತೇಗದಾಭಿಃಪ್ರದೀಪ್ತಾಭಿಃಶಕ್ತಿಶೂಲಪರಶ್ವಧೈಃ ।
ನಿಜಘ್ನುರ್ವಾನರಾನ್ಘೋರಾಃಕಥಯನ್ತಃಸ್ವವಿಕ್ರಮಾನ್ ॥ 42 ॥
ರಾಜನ್ ಜಯ ಜಯೇತ್ಯುಕ್ತ್ವಾ ಸ್ವಸ್ವನಾಮಕಥಾಂ ತತಃ ।
ರಾಕ್ಷಸಾಸ್ತ್ವಪರೇ ಭೀಮಾಃ ಪ್ರಾಕಾರಸ್ಥಾಮಹೀಂ ಗತಾನ್ ॥ 43 ॥
ತಥಾವೃಕ್ಷೈರ್ಮಹಾಕಾಯಾಃಪರ್ವತಾಗ್ರೈಶ್ಚವಾನರಾಃ ।
ನಿಜಘ್ನುಸ್ತಾನಿರಕ್ಷಾಂಸಿನಖೈರ್ದನ್ತೈಶ್ಚವೇಗಿತಾಃ ॥ 44 ॥
ರಾಕ್ಷಸಾಸ್ತ್ವಪರೇಭೀಮಾಃಪ್ರಾಕಾರಸ್ಥಾಮಹೀಗತಾನ್ ।
ಭಿನ್ದಿಪಾಲೈಶ್ಚಖಡ್ಗೈಶ್ಚಶೂಲೈಶ್ಚೈವವ್ಯದಾರಯನ್ ॥ 45 ॥
ವಾನರಾಶ್ಚಾಪಿಸಙ್ಕ್ರುದ್ಧಾಃಪ್ರಾಕಾರಸ್ಥಾನ್ಮಹೀಗತಾಃ ।
ರಾಕ್ಷಸಾನ್ಪಾತಯಾಮಾಸುಃಸಮಾಪ್ಲುತ್ಯಪ್ಲವಙ್ಗಮಾಃ ॥ 46 ॥
ಸಸಮ್ಪ್ರಹಾರಸ್ತುಮುಲೋಮಾಂಸಶೋಣಿತಕರ್ದಮಃ ।
ರಕ್ಷಸಾಂವಾನರಾಣಾಞ್ಚಸಮ್ಬಭೂವಾದ್ಭುತೋಪಮಾಃ ॥ 47 ॥
ಇತ್ಯಾರ್ಷೇ ಶ್ರೀಮದ್ರಾಮಾಯಣೇ ವಾಲ್ಮೀಕೀಯ ಆದಿಕಾವ್ಯೇ ಯುದ್ಧಕಾಣ್ಡೇ ದ್ವಿಚತ್ವಾರಿಂಶಸ್ಸರ್ಗಃ ॥
