ಶ್ರೀಮದ್ವಾಲ್ಮೀಕೀಯ ರಾಮಾಯಣೇ ಕಿಷ್ಕಿನ್ಧಾಕಾಣ್ಡಮ್ ।
ಅಥ ಏಕೋನಷಷ್ಟಿತಮಸ್ಸರ್ಗಃ ।
ತತಸ್ತದಮೃತಾಸ್ವಾದಂ ಗೃಧ್ರರಾಜೇನ ಭಾಷಿತಮ್ ।
ನಿಶಮ್ಯ ಮುದಿತಾ ಹೃಷ್ಟಾಸ್ತೇ ವಚಃ ಪ್ಲವಗರ್ಷಭಾಃ ॥ 1 ॥
ಜಾಮ್ಬವಾನ್ ವಾನರಶ್ರೇಷ್ಠಸ್ಸಹ ಸರ್ವೈಃ ಪ್ಲವಙ್ಗಮೈಃ ।
ಭೂತಲಾತ್ಸಹಸೋತ್ಥಾಯ ಗೃಧ್ರರಾಜಾನಮಬ್ರವೀತ್ ॥ 2 ॥
ಕ್ವ ಸೀತಾ ಕೇನ ವಾ ದೃಷ್ಟಾ ಕೋ ವಾ ಹರತಿ ಮೈಥಿಲೀಮ್ ।
ತದಾಖ್ಯಾತು ಭವಾತ್ಸರ್ವಂ ಗತಿರ್ಭವ ವನೌಕಸಾಮ್ ॥ 3 ॥
ಕೋ ದಾಶರಥಿ ಬಾಣಾನಾಂ ವಜ್ರವೇಗನಿಪಾತಿನಾಮ್ ।
ಸ್ವಯಂ ಲಕ್ಷ್ಮಣಮುಕ್ತಾನಾಂ ನ ಚಿನ್ತಯತಿ ವಿಕ್ರಮಮ್ ॥ 4 ॥
ಸ ಹರೀನ್ಪ್ರೀತಿಸಂಯುಕ್ತಾನ್ಸೀತಾಶ್ರುತಿಸಮಾಹಿತಾನ್ ।
ಪುನರಾಶ್ವಸಯನ್ಪ್ರೀತಃ ಇದಂ ವಚನಮಬ್ರವೀತ್ ॥ 5 ॥
ಶ್ರೂಯತಾಮಿಹ ವೈದೇಹ್ಯಾ ಯಥಾ ಮೇ ಹರಣಂ ಶ್ರುತಮ್ ।
ಯೇನ ಚಾಪಿ ಮಮಾಽಖ್ಯಾತಂ ಯತ್ರ ವಾಯತಲೋಚನಾ ॥ 6 ॥
ಅಹಮಸ್ಮಿನ್ಗಿರೌ ದುರ್ಗೇ ಬಹುಯೋಜನಮಾಯತೇ ।
ಚಿರಾನ್ನಿಪತಿತೋ ವೃದ್ಧಃ ಕ್ಷೀಣಪ್ರಾಣಪರಾಕ್ರಮಃ ॥ 7 ॥
ತಂ ಮಾಮೇವಂ ಗತಂ ಪುತ್ರಸ್ಸುಪಾರ್ಶ್ವೋನಾಮ ನಾಮತಃ ।
ಆಹಾರೇಣ ಯಥಾಕಾಲಂ ಬಿಭರ್ತಿ ಪತತಾಂ ವರಃ ॥ 8 ॥
ತೀಕ್ಷ್ಣಕಾಮಾಸ್ತು ಗನ್ಧರ್ವಾಸ್ತೀಕ್ಷ್ಣಕೋಪಾ ಭುಜಙ್ಗಮಾಃ ।
ಮೃಗಾಣಾಂ ತು ಭಯಂ ತೀಕ್ಷ್ಣಂ ತತಸ್ತೀಕ್ಷ್ಣಕ್ಷುಧಾ ವಯಮ್ ॥ 9 ॥
ಸ ಕದಾಚಿತ್ಕ್ಷುಧಾರ್ತಸ್ಯ ಮಮಾಹಾರಾಭಿಕಾಙ್ಕ್ಷಿಣಃ ।
ಗತಸೂರ್ಯೇಽಹನಿ ಪ್ರಾಪ್ತೋ ಮಮ ಪುತ್ರೋ ಹ್ಯನಾಮಿಷಃ ॥ 10 ॥
ಸ ಮಾಮಾಹಾರಸಂರೋಧಾತ್ಪೀಡಿತಂ ಪ್ರೀತಿವರ್ಧನಃ ।
ಅನುಮಾನ್ಯ ಯಥಾತತ್ತ್ವಮಿದಂ ವಚನಮಬ್ರವೀತ್ ॥ 11 ॥
ಅಹಂ ತಾತ ಯಥಾಕಾಲಮಾಮಿಷಾರ್ಥೀ ಖಮಾಪ್ಲುತಃ ।
ಮಹೇನ್ದ್ರಸ್ಯ ಗಿರೇರ್ದ್ವಾರಮಾವೃತ್ಯ ಸುಸಮಾಸ್ಥಿತಃ ॥ 12 ॥
ತತ್ರ ಸತ್ತ್ವಸಹಸ್ರಾಣಾಂ ಸಾಗರಾನ್ತರಚಾರಿಣಾಮ್ ।
ಪನ್ಥಾನಮೇಕೋಽಧ್ಯವಸಂ ಸನ್ನಿರೋದ್ಧುಮವಾಙ್ಮುಖಃ ॥ 13 ॥
ತತ್ರ ಕಶ್ಚಿನ್ಮಯಾ ದೃಷ್ಟ ಸ್ಸೂರ್ಯೋದಯಸಮಪ್ರಭಾಮ್ ।
ಸ್ತ್ರಿಯಮಾದಾಯ ಗಚ್ಛನ್ವೈ ಭಿನ್ನಾಞ್ಜನಚಯಪ್ರಭಃ ॥ 14 ॥
ಸೋಽಹಮಭ್ಯವಹಾರಾರ್ಥೀ ತೌ ದೃಷ್ಟ್ವಾ ಕೃತನಿಶ್ಚಯಃ ।
ತೇನ ಸಾಮ್ನಾ ವಿನೀತೇನ ಪನ್ಥಾನಮಭಿಯಾಚಿತಃ ॥ 15 ॥
ನ ಹಿ ಸಾಮೋಪಪನ್ನಾನಾಂ ಪ್ರಹರ್ತಾ ವಿದ್ಯತೇ ಕ್ವಚಿತ್ ।
ನೀಚೇಷ್ವಪಿ ಜನಃ ಕಶ್ಚಿತ್ಕಿಮಙ್ಗ ಬತ ಮದ್ವಿಧಃ ॥ 16 ॥
ಸ ಯಾತಸ್ತೇಜಸಾ ವ್ಯೋಮ ಸಙ್ಕ್ಷಿಪನ್ನಿವ ವೇಗತಃ ।
ಅಥಾಽಹಂ ಖೇಚರೈರ್ಭೂತೈರಭಿಗಮ್ಯ ಸಭಾಜಿತಃ ॥ 17 ॥
ದಿಷ್ಟ್ಯಾ ಜೀವತಿ ಸೀತ ಇತಿ ಹಿ ಅಬ್ರುವನ್ ಮಾಂ ಮಹರ್ಷಯಃ ।
ಕಥಞ್ಚಿತ್ ಸ ಕಲತ್ರಃ ಅಸೌ ಗತಃ ತೇ ಸ್ವಸ್ತಿ ಅಸಂಶಯಮ್ ॥ 18 ॥
ಏವ ಮುಕ್ತಸ್ತತೋಽಹಂ ತೈಸ್ಸಿದ್ಧೈಃ ಪರಮಶೋಭನೈಃ ।
ಸ ಚ ಮೇ ರಾವಣೋ ರಾಜಾ ರಕ್ಷಸಾಂ ಪ್ರತಿವೇದಿತಃ ॥ 19 ॥
ಹರನ್ದಾಶರಥೇರ್ಭಾರ್ಯಾಂ ರಾಮಸ್ಯ ಜನಕಾತ್ಮಜಾಮ್ ।
ಭ್ರಷ್ಟಾಭರಣಕೌಶೇಯಾಂ ಶೋಕವೇಗಪರಾಜಿತಾಮ್ ॥ 20 ॥
ರಾಮಲಕ್ಷ್ಮಣಯೋರ್ನಾಮ ಕ್ರೋಶನ್ತೀಂ ಮುಕ್ತಮೂರ್ಧಜಾಮ್ ।
ಏಷ ಕಾಲಾತ್ಯಯಸ್ತಾವದಿತಿ ಕಾಲವಿದಾಂ ವರಃ ॥ 21 ॥
ಏತಮರ್ಥಂ ಸಮಗ್ರಂ ಮೇ ಸುಪಾರ್ಶ್ವಃ ಪ್ರತ್ಯವೇದಯತ್ ।
ತಚ್ಛೃತ್ವಾಽಪಿ ಹಿ ಮೇ ಬುದ್ಧಿರ್ನಾಸೀತ್ಕಾಚಿತ್ಪರಾಕ್ರಮೇ ॥ 22 ॥
ಅಪಕ್ಷೋ ಹಿ ಕಥಂ ಪಕ್ಷೀ ಕರ್ಮ ಕಿಞ್ಚಿದುಪಕ್ರಮೇ ।
ಯತ್ತು ಶಕ್ಯಂ ಮಯಾ ಕರ್ತುಂ ವಾಗ್ಬುದ್ಧಿಗುಣವರ್ತಿನಾ ॥ 23 ॥
ಶ್ರೂಯತಾಂ ತತ್ಪ್ರವಕ್ಷ್ಯಾಮಿ ಭವತಾಂ ಪೌರುಷಾಶ್ರಯಮ್ ।
ವಾಙ್ಮತಿಭ್ಯಾಂ ತು ಸರ್ವೇಷಾಂ ಕರಿಷ್ಯಾಮಿ ಪ್ರಿಯಂ ಹಿ ವಃ ॥ 24 ॥
ಯದ್ಧಿ ದಾಶರಥೇಃ ಕಾರ್ಯಂ ಮಮ ತನ್ನಾತ್ರ ಸಂಶಯಃ ।
ತೇ ಭವನ್ತೋ ಮತಿಶ್ರೇಷ್ಠಾ ಬಲವನ್ತೋ ಮನಸ್ವಿನಃ ॥ 25 ॥
ಪ್ರೇಷಿತಾಃ ಕಪಿರಾಜೇನ ದೇವೈರಪಿ ದುರಾಸದಾಃ ।
ರಾಮಲಕ್ಷ್ಮಣಬಾಣಾಶ್ಚ ನಿಶಿತಾಃ ಕಙ್ಕಪತ್ರಿಣಃ ॥ 26 ॥
ತ್ರಯಾಣಾಮಪಿ ಲೋಕಾನಾಂ ಪರ್ಯಾಪ್ತಾಸ್ತ್ರಾಣನಿಗ್ರಹೇ ।
ಕಾಮಂ ಖಲು ದಶಗ್ರೀವ ಸ್ತೇಜೋಬಲಸಮನ್ವಿತಃ ॥ 27 ॥
ಭವತಾಂ ತು ಸಮರ್ಥಾನಾಂ ನ ಕಿಞ್ಚಿದಪಿ ದುಷ್ಕರಮ್ ।
ತದಲಂ ಕಾಲಸಙ್ಗೇನ ಕ್ರಿಯತಾಂ ಬುದ್ಧಿನಿಶ್ಚಯಃ ॥ 28 ॥
ಇತ್ಯಾರ್ಷೇ ಶ್ರೀಮದ್ರಾಮಾಯಣೇ ವಾಲ್ಮೀಕೀಯ ಆದಿಕಾವ್ಯೇ ಕಿಷ್ಕಿನ್ಧಾಕಾಣ್ಡೇ ಏಕೋನಷಷ್ಟಿತಮಸ್ಸರ್ಗಃ ॥
