ಶ್ರೀಮದ್ವಾಲ್ಮೀಕೀಯ ರಾಮಾಯಣೇ ಯುದ್ಧಕಾಣ್ಡಮ್ ।
ಅಥ ಅಷ್ಟಾಶೀತಿತಮಸ್ಸರ್ಗಃ ।
ವಿಭೀಷಣವಚ್ಶ್ರುತ್ವಾರಾವಣಿಃಕ್ರೋಧಮೂರ್ಛಿತಃ ।
ಅಬ್ರವೀತ್ಪರುಷಂವಾಕ್ಯಂವೇಗೇನಾಭ್ಯುತ್ಪಪಾತ ಚ ॥ 1 ॥
ಉದ್ಯತಾಯುಧನಿಸ್ತ್ರಿಂಶೋರಥೇಸುಸಮಲಙ್ಕೃತೇ ।
ಕಾಲಾಶ್ವಯುಕ್ತೇಮಹತಿಸ್ಥಿತಃಕಾಲಾನ್ತಕೋಪಮಃ ॥ 2 ॥
ಮಹಾಪ್ರಮಾಣಮುದ್ಯಮ್ಯವಿಪುಲಂವೇಗವದ್ಧೃಢಮ್ ।
ಧನುರ್ಬೀಮಮ್ಪರಾಮೃಶ್ಯಶರಾಂಶ್ಚಾಮಿತ್ರನಾಶನಾನ್ ॥ 3 ॥
ತನ್ದದರ್ಶಮಹೇಷ್ವಾಸೋರಥಸ್ಥಸ್ಸಮಲಙ್ಕೃತಃ ।
ಅಲಙ್ಕೃತಮಮಿತ್ರಘ್ನೋರಾಘವಸ್ಯಾನುಜಮ್ಬಲೀ ॥ 4 ॥
ಹನುಮತ್ಪೃಷ್ಠರೂಢಮುದಸ್ಥರವಿಪ್ರಭಮ್ ।
ಉವಾಚೈನಂಸಮಾರಬ್ಧಃ ಸೌಮಿತ್ರಿಂಸವಿಭೀಷಣಮ್ ॥ 5 ॥
ತಾಂಶ್ಚವಾನರಶಾರ್ದೂಲಾನ್ ಪಶ್ಯಧ್ವಮ್ಮೇಪರಾಕ್ರಮಮ್ ।
ಅದ್ಯಮತ್ಕಾರ್ಮುಕೋತ್ಸೃಷ್ಟಂಶರವರ್ಷನ್ದುರಾಸದಮ್ ॥ 6 ॥
ಮುಕ್ತಂವರ್ಷಮಿವಾಕಾಶೇವಾರಯಿಷ್ಯಥಸಂಯುಗೇ ।
ಅದ್ಯವೋಮಾಮಕಾಬಾಣಾಮಹಾಕಾರ್ಮುನಿಸ್ಸೃತಾಃ ॥ 7 ॥
ವಿಧಮಿಷ್ಯನ್ತಿಗಾತ್ರಾಣಿತೂಲರಾಶಿಮಿವಾನಲಃ ।
ತೀಕ್ಷಣಸಾಯಕನಿರ್ಭನ್ನಾನ್ಶೂಲಶಕ್ತ್ಯೃಷ್ಟಿತೋಮರೈಃ ॥ 8 ॥
ಅದ್ಯವೋಗಮಯಿಷ್ಯಾಮಿಸರ್ವಾನೇನಯಮಕ್ಷಯಮ್ ।
ಕ್ಷಿಪತಶ್ಶರವರ್ಷಾಣಿಕ್ಷಿಪ್ರಹಸ್ತಸ್ಯಸಮ್ಯುಗೇ ॥ 9 ॥
ಜೀಮೂತಸ್ಯೇನನದತಃಕಃಸ್ಥಾಸ್ಯತಿಮಮಾಗ್ರತಃ ।
ರಾತ್ರಿಯುದ್ಧೇಮಯಾಪೂರ್ವಂವಜ್ರಾಶನಿಸಮೈಃಶರೈಃ ॥ 10 ॥
ಶಾಯಿತೌಸ್ಥೋಮಯಾಭೂಮೌವಿಸಞ್ಜ್ಞೌಸಪುರಸ್ಸರೌ ।
ಸ್ಮೃತಿರ್ನತೇಽಸ್ತಿವಾಮನ್ಯೇವ್ಯಕ್ತಂವಾಯಮಸಾದನಮ್ ॥ 11 ॥
ಆಶೀವಿಷಮಿವಕ್ರುದ್ಧಂಯನ್ಮಾಂಯೋದ್ಧುವ್ಯವತ್ಥಿತಃ ।
ತಚ್ಛ್ರುತ್ವಾರಾಕ್ಷಸೇನ್ದ್ರಸ್ಯಗರ್ಜಿತಂಲಕ್ಷ್ಮಣಸ್ತದಾ ॥ 12 ॥
ಅಭೀತವದನಃಕ್ರುದ್ಧೋರಾವಣಿಂವಾಕ್ಯಮಬ್ರವೀತ್ ।
ಉಕ್ತಶ್ಚದುರ್ಗಮಃಪಾರಃಕಾರ್ಯಾಣಾಂರಾಕ್ಷಸತ್ವಯಾ ॥ 13 ॥
ಕಾರ್ಯಾಣಾಙ್ಕರ್ಮಣಾಮ್ಪಾರಂಯೋಗಚ್ಛತಿ ಸ ಬುದ್ಧಿಮಾನ್ ।
ಸತ್ವಮರ್ಥಸ್ಯಹೀನಾರ್ಥೋದುರವಾಸಸ್ಯಕೇನಚಿತ್ ॥ 14 ॥
ವಾಚಾವ್ಯಾಹೃತ್ಯಜಾನೀಷೇಕೃತಾರ್ಥೋಽಸ್ಮೀತಿದುರ್ಮತೇ ।
ಅನ್ತರ್ಧಾನಗತೇನಾಜೌಯಸ್ತ್ವಯಾಚರಿತಸ್ತದಾ ॥ 15 ॥
ತಸ್ಕರಾಚರಿತೋಮಾರ್ಗಃನೈಷವೀರನಿಷೇವಿತಃ ।
ಯಥಾಬಾಣಪಥಮ್ಪ್ರಾಪ್ಯಸ್ಥಿತೋಽಹನ್ತವರಾಕ್ಷಸ ॥ 16 ॥
ದರ್ಶಯಸ್ವಾದ್ಯತತ್ತೇಜೋವಾಚಾತ್ವಙ್ಕಿಂವಿಕತ್ಥಸೇ ।
ಏವಮುಕ್ತೋಧನುರ್ಭೀಮಮ್ಪರಾಮೃಶ್ಯಮಹಾಬಲಃ ॥ 17 ॥
ಸಸರ್ಜನಿಶಿತಾನ್ಬಾಣಾನಿನ್ದ್ರಜಿತ್ಸಮಿತಿಞ್ಜಯಃ ।
ತೇನಿಸೃಷ್ಟಾಮಹಾವೇಗಾಃಶರಾಃಸರ್ಪವಿಷೋಪಮಾಃ ॥ 18 ॥
ಸಮ್ಪ್ರಾಪ್ಯಲಕ್ಷ್ಮಣಮ್ಪೇತುಃಶ್ವಸನ್ತೈವಪನ್ನಗಾಃ ।
ರೈರತಿಮಹಾವೇಗೈರ್ವೇಗವಾನ್ರಾವಣಾತ್ಮಜಃ ॥ 19 ॥
ಸೌಮಿತ್ರಿಮಿನ್ದ್ರಜಿದ್ಯುದ್ಧೇವಿವ್ಯಾಧಶುಭಲಕ್ಷಣಮ್ ।
ಸಶರೈರತಿವಿದ್ಧಾಙ್ಗೋರುಧಿರೇಣಸಮುಕ್ಷಿತಃ ॥ 20 ॥
ಶುಶುಭೇಲಕ್ಷ್ಮಣಃಶ್ರೀಮಾನ್ವಿಧೂಮೈವಪಾವಕಃ ।
ಇನ್ದ್ರಜಿತ್ತ್ವಾತ್ಮನಃಕರ್ಮಪ್ರಸಮೀಕ್ಷ್ಯಾಧಿಗಮ್ಯ ಚ ॥ 21 ॥
ವಿನದ್ಯಸುಮಹಾನಾದಮಿದಂವಚನಮಬ್ರವೀತ್ ।
ಪತ್ರಿಣಃಶಿತಧಾರಾಸ್ತೇಕರಾಮತ್ಕಾರ್ಮುಕಚ್ಯುತಾಃ ॥ 22 ॥
ಆದಾಸ್ಯನ್ತೇಽದ್ಯಸೌಮಿತ್ರೇಜೀವಿತಞ್ಜೀವಿತಾನ್ತಕಾಃ ।
ಅದ್ಯಗೋಮಾಯುಸಙ್ಘಾಶ್ಚಶ್ಯೇನಸಙ್ಘಾಶ್ಚಲಕ್ಷ್ಮಣ ॥ 23 ॥
ಗೃಧ್ರಾಶ್ಚನಿಪತನ್ತುತ್ವಾಙ್ಗತಾಸುನ್ನಿಹತಮ್ಮಯಾ ।
ಕ್ಷತ್ರಬನ್ಧುಂಸದಾನಾರ್ಯಂರಾಮಃಪರಮದುರ್ಮತಿಃ ॥ 24 ॥
ಭಕ್ತಮ್ಭ್ರಾತರಮದ್ಯೈವತ್ವಾನ್ದ್ರಕ್ಷ್ಯತಿಹತಮ್ಮಯಾ ।
ವಿಶಸ್ತಕವಚಮ್ಭೂಮೌವ್ಯಪವಿದ್ಧಶರಾಸಸನಮ್ ॥ 25 ॥
ಹೃತೋತ್ತಮಾಙ್ಗಂಸೌಮಿತ್ರತ್ವಾಮದ್ಯನಿಹತಮ್ಮಯಾ ।
ಇತಿಬ್ರುವಾಣಂಸಙ್ಕೃದ್ಧಃ ಪರುಷಂರಾವಣಾತ್ಮಜಮ್ ॥ 26 ॥
ಹೇತುಮದ್ವಾಕ್ಯಮತ್ಯರ್ಥಂಲಕ್ಷ್ಮಣಃಪ್ರತ್ಯುವಾಚ ಹ ।
ವಾಗ್ಬಲನ್ತ್ಯಜದುರ್ಬುದ್ಧೇಕ್ರೂರಕರ್ಮಾಸಿರಾಕ್ಷಸ ॥ 27 ॥
ಅಥಕಸ್ಮಾದ್ವದಸ್ಯೇತತ್ಸಮ್ಪಾದಯಸುಕರ್ಮಣಾ ।
ಕೃತ್ವಾಕತ್ಥಸೇಕರ್ಮಕಿಮರ್ಥಮಿಹರಾಕ್ಷಸ ॥ 28 ॥
ಕುರುತತ್ಕರ್ಮಯೇನಾಹಂಶ್ರದ್ಧಧ್ಯಾನ್ತವಕತ್ಥನಮ್ ।
ಅನುಕ್ತ್ವಾಪರುಷಂವಾಕ್ಯಙ್ಕಿಞ್ಚಿದಪ್ಯನವಕ್ಷಿಪನ್ ॥ 29 ॥
ಅವಿಕತ್ಥನ್ವಧಿಷ್ಯಾಮಿತ್ವಾಮ್ಪಶ್ಯಪುರುಷಾಧಮ ।
ಇತ್ಯುಕ್ತ್ವಾಪಞ್ಚನಾರಾಚಾನಾಕರ್ಣಾಪೂರಿತಾನ್ ಶಿತಾನ್ ॥ 30 ॥
ನಿಜಘಾನಮಹಾವೇಗಾಲ್ಲಕ್ಷ್ಮಣೋರಾಕ್ಷಸೋರಸಿ ।
ಸುಪತ್ರವಾಜಿತಾಬಾಣಾಜ್ವಲಿತಾಇವಪನ್ನಗಾಃ ॥ 31 ॥
ನೈರೃತೋರಸ್ಯಭಾಸನ್ತಸವಿತೂರಶ್ಮಯೋಯಥಾ ।
ಸಃಶರೈರಾಹತಸ್ತೇನಸರೋಷೋರಾವಣಾತ್ಮಜಃ ॥ 32 ॥
ಸುಪ್ರಯುಕ್ತೈಸ್ತ್ರಿಭಿರ್ಭಾಣೈಃಪ್ರತಿವಿವ್ಯಾಧಲಕ್ಷ್ಮಣಮ್ ।
ಸಃಬಭೂವಮಹಾಭೀಮೋನರರಾಕ್ಷಸಸಿಂಹಯೋಃ ॥ 33 ॥
ವಿಮರ್ದಸ್ತುಮುಲೋಯುದ್ಧೇಪರಸ್ಪರಜಯೈಷಿಣೋಃ ।
ಉಭೌಹಿಬಲಸಮ್ಪನ್ನಾವುಭೌವಿಕ್ರಮಶಾಲಿನೌ ॥ 34 ॥
ಉಭೌಪರಮದುರ್ಜ್ಞೇಯಾವತುಲ್ಯಬಲತೇಜಸೌ ।
ಯುಯುಧಾತೇತದಾವೀರೌಗ್ರಹಾವಿವನಭೋಗತೌ ॥ 35 ॥
ಬಲವೃತ್ರಾವಿವಾಭೀತೌಯುಧಿತೌದುಷ್ಪ್ರಧರ್ಷಣೌ ।
ಯುಯುಧಾತೇಮಹಾತ್ಮಾನೌತದಾಕೇಸರಿಣಾವಿವ ॥ 36 ॥
ಬಹೂನವಸೃಜನ್ತೌಹಿಮಾರ್ಗಣೌಘಾನವಸ್ಥಿತೌ ।
ನರರಾಕ್ಷಸಸಿಮ್ಹೋತೌಪ್ರಹೃಷ್ಟಾವಭ್ಯಯುಧ್ಯತಾಮ್ ॥ 37 ॥
ಇತ್ಯಾರ್ಷೇ ಶ್ರೀಮದ್ರಾಮಾಯಣೇ ವಾಲ್ಮೀಕೀಯ ಆದಿಕಾವ್ಯೇ ಯುದ್ಧಕಾಣ್ಡೇ ಅಷ್ಟಾಶೀತಿತಮಸ್ಸರ್ಗಃ ॥
