ಶ್ರೀಮದ್ವಾಲ್ಮೀಕೀಯ ರಾಮಾಯಣೇ ಬಾಲಕಾಣ್ಡಮ್ ।
ಅಥ ಅಷ್ಟಾವಿಂಶಸ್ಸರ್ಗಃ ।
ಪ್ರತಿಗೃಹ್ಯ ತತೋಽಸ್ತ್ರಾಣಿ ಪ್ರಹೃಷ್ಟವದನಶ್ಶುಚಿಃ ।
ಗಚ್ಛನ್ನೇವ ಚ ಕಾಕುತ್ಸ್ಥೋ ವಿಶ್ವಾಮಿತ್ರಮಥಾಬ್ರವೀತ್ ॥ 1 ॥
ಗೃಹೀತಾಸ್ತ್ರೋಽಸ್ಮಿ ಭಗವನ್ ದುರಾಧರ್ಷಸ್ಸುರೈರಪಿ ।
ಅಸ್ತ್ರಾಣಾಂ ತ್ವಹಮಿಚ್ಛಾಮಿ ಸಂಹಾರಂ ಮುನಿಪುಙ್ಗವ ॥ 2 ॥
ಏವಂ ಬ್ರುವತಿ ಕಾಕುತ್ಸ್ಥೇ ವಿಶ್ವಾಮಿತ್ರೋ ಮಹಾಮುನಿಃ ।
ಸಂಹಾರಂ ವ್ಯಾಜಹಾರಾಥ ಧೃತಿಮಾನ್ ಸುವ್ರತಶ್ಶುಚಿಃ ॥ 3 ॥
ಸತ್ಯವನ್ತಂ ಸತ್ಯಕೀರ್ತಿಂ ಧೃಷ್ಟಂ ರಭಸಮೇವ ಚ ।
ಪ್ರತಿಹಾರತರಂ ನಾಮ ಪರಾಙ್ಮುಖಮವಾಙ್ಮುಖಮ್ ॥ 4 ॥
ಲಕ್ಷಾಕ್ಷವಿಷಮೌ ಚೈವ ದೃಢನಾಭಸುನಾಭಕೌ ।
ದಶಾಕ್ಷಶತವಕ್ತ್ರೌ ಚ ದಶಶೀರ್ಷಶತೋದರೌ ॥ 5 ॥
ಪದ್ಮನಾಭಮಹಾನಾಭೌ ದುನ್ದುನಾಭಸುನಾಭಕೌ ।
ಜ್ಯೋತಿಷಂ ಕೃಶನಂ ಚೈವ ನೈರಾಶ್ಯವಿಮಲಾವುಭೌ ॥ 6 ॥
ಯೋಗನ್ಧರಹರಿದ್ರೌ ಚ ದೈತ್ಯಪ್ರಶಮನೌತಥಾ ।
ಸಾರ್ಚಿರ್ಮಾಲೀ ಧೃತಿರ್ಮಾಲೀ ವೃತ್ತಿಮಾನ್ ರುಚಿರಸ್ತಥಾ ॥ 7 ॥
ಪಿತೃಸೌಮನಸಂ ಚೈವ ವಿಧೂತಮಕರಾವುಭೌ ।
ಕರವೀರಕರಂ ಚೈವ ಧನಧಾನ್ಯೌ ಚ ರಾಘವ ॥ 8 ॥
ಕಾಮರೂಪಂ ಕಾಮರುಚಿಂ ಮೋಹಮಾವರಣಂ ತಥಾ ।
ಜೃಮ್ಭಕಂ ಸರ್ವನಾಭಂ ಚ ಸನ್ತಾನವರಣೌ ತಥಾ ॥ 9 ॥
ಭೃಶಾಶ್ವತನಯಾನ್ ರಾಮ ಭಾಸ್ವರಾನ್ಕಾಮರೂಪಿಣಃ ।
ಪ್ರತೀಚ್ಛ ಮಮ ಭದ್ರಂ ತೇ ಪಾತ್ರಭೂತೋಽಸಿ ರಾಘವ ॥ 10 ॥
ಬಾಢಮಿತ್ಯೇವ ಕಾಕುತ್ಸ್ಥಃ ಪ್ರಹೃಷ್ಟೇನಾನ್ತಾರಾತ್ಮನಾ ।
ದಿವ್ಯಭಾಸ್ವರದೇಹಾಶ್ಚ ಮೂರ್ತಿಮನ್ತಸ್ಸುಖಪ್ರದಾಃ ॥ 11 ॥
ಕೇಚಿದಙ್ಗಾರಸದೃಶಾಃ ಕೇಚಿದ್ಧೂಮೋಪಮಾಸ್ತಥಾ ।
ಚನ್ದ್ರಾರ್ಕಸದೃಶಾಃ ಕೇಚಿತ್ಪ್ರಹ್ವಾಞ್ಜಲಿಪುಟಾಸ್ತಥಾ ॥ 12 ॥
ರಾಮಂ ಪ್ರಾಞ್ಜಲಯೋ ಭೂತ್ವಾಽಬ್ರುವನ್ ಮಧುರಭಾಷಿಣಃ ।
ಇಮೇ ಸ್ಮ ನರಶಾರ್ದೂಲ ಶಾಧಿ ಕಿಂ ಕರವಾಮ ತೇ ॥ 13 ॥
ಮಾನಸಾಃ ಕಾರ್ಯಕಾಲೇಷು ಸಾಹಾಯ್ಯಂ ಮೇ ಕರಿಷ್ಯಥ ।
ಗಮ್ಯತಾಮಿತಿ ತಾನಾಹ ಯಥೇಷ್ಟಂ ರಘುನನ್ದನಃ ॥ 14 ॥
ಅಥ ತೇ ರಾಮಮಾಮನ್ತ್ಱ್ಯ ಕೃತ್ವಾ ಚಾಪಿ ಪ್ರದಕ್ಷಿಣಮ್ ।
ಏವಮಸ್ತ್ವಿತಿ ಕಾಕುತ್ಸ್ಥಮುಕ್ತ್ವಾಜಗ್ಮುರ್ಯಥಾಽಗತಮ್ ॥ 15 ॥
ಸ ಚ ತಾನ್ ರಾಘವೋ ಜ್ಞಾತ್ವಾ ವಿಶ್ವಾಮಿತ್ರಂ ಮಹಾಮುನಿಮ್ ।
ಗಚ್ಛನ್ನೇವಾಥ ಮಧುರಂ ಶ್ಲಕ್ಷ್ಣಂ ವಚನಮಬ್ರವೀತ್ ॥ 16 ॥
ಕಿನ್ನ್ವೇತನ್ಮೇಘಸಙ್ಕಾಶಂ ಪರ್ವತಸ್ಯಾವಿದೂರತಃ ।
ವೃಕ್ಷಷಣ್ಡಮಿತೋ ಭಾತಿ ಪರಂ ಕೌತೂಹಲಂ ಹಿ ಮೇ ॥ 17 ॥
ದರ್ಶನೀಯಂ ಮೃಗಾಕೀರ್ಣಂ ಮನೋರಮಮತೀವ ಚ ।
ನಾನಾಪ್ರಕಾರೈಶ್ಶಕುನೈರ್ವಲ್ಗುನಾದೈರಲಙ್ಕೃತಮ್ ॥ 18 ॥
ನಿಸ್ಸೃತಾಃ ಸ್ಮ ಮುನಿಶ್ರೇಷ್ಠ ಕಾನ್ತಾರಾದ್ರೋಮಹರ್ಷಣಾತ್ ।
ಅನಯಾ ತ್ವವಗಚ್ಛಾಮಿ ದೇಶಸ್ಯ ಸುಖವತ್ತಯಾ ॥ 19 ॥
ಸರ್ವಂ ಮೇ ಶಂಸ ಭಗವನ್ ಕಸ್ಯಾಶ್ರಮಪದಂ ತ್ವಿದಮ್ ।
ಸಮ್ಪ್ರಾಪ್ತಾ ಯತ್ರ ತೇ ಪಾಪಾ ಬ್ರಹ್ಮಘ್ನಾ ದುಷ್ಟಚಾರಿಣಃ ॥ 20 ॥
ತವ ಯಜ್ಞಸ್ಯ ವಿಘ್ನಾಯ ದುರಾತ್ಮಾನೋ ಮಹಾಮುನೇ ।
ಭಗವನ್ ತಸ್ಯ ಕೋ ದೇಶಸ್ಸಾ ಯತ್ರ ತವ ಯಾಜ್ಞಿಕೀ ॥ 21 ॥
ರಕ್ಷಿತವ್ಯಾ ಕ್ರಿಯಾ ಬ್ರಹ್ಮನ್ಮಯಾ ವಧ್ಯಾಶ್ಚ ರಾಕ್ಷಸಾಃ ।
ಏತತ್ಸರ್ವಂ ಮುನಿಶ್ರೇಷ್ಠ ಶ್ರೋತುಮಿಚ್ಛಾಮ್ಯಹಂ ಪ್ರಭೋ ॥ 22 ॥
ಇತ್ಯಾರ್ಷೇ ಶ್ರೀಮದ್ರಾಮಾಯಣೇ ವಾಲ್ಮೀಕೀಯ ಆದಿಕಾವ್ಯೇ ಬಾಲಕಾಣ್ಡೇ ಅಷ್ಟಾವಿಂಶಸ್ಸರ್ಗಃ ॥
