ಶ್ರೀಮದ್ವಾಲ್ಮೀಕೀಯ ರಾಮಾಯಣೇ ಯುದ್ಧಕಾಣ್ಡಮ್ ।
ಅಥ ಏಕೋನತ್ರಿಂಶಸ್ಸರ್ಗಃ ।
ಶುಕೇನತುಸಮಾಖ್ಯಾತಾನ್ದೃಷ್ಟ್ವಾಸಹರಿಯೂಥಪಾನ್ ।
ಸಮೀಪಸ್ಥಞ್ಚರಾಮಸ್ಯಭ್ರಾತರಂಸ್ವಂವಿಭೀಷಣಮ್ ॥ 1 ॥
ಲಕ್ಷ್ಮಣಞ್ಚಮಹಾವೀರ್ಯಮ್ಭುಜಂರಾಮಸ್ಯದಕ್ಷಿಣಮ್ ।
ಸರ್ವವಾನರರಾಜಞ್ಚಸುಗ್ರೀವಮ್ಭೀಮವಿಕ್ರಮಮ್ ॥ 2 ॥
ಅಙ್ಗದಞ್ಚಾಪಿಬಲಿನಂವಜ್ರಹಸ್ತಾತ್ಮಜಾತ್ಮಜಮ್ ।
ಹನೂಮನ್ತಞ್ಚವಿಕ್ರಾನ್ತಞ್ಜಾಮ್ಬವನ್ತಞ್ಚದುರ್ಜಯಮ್ ॥ 3 ॥
ಸುಷೇಣಙ್ಕುಮುದನ್ನೀಲನ್ನಲಞ್ಚಪ್ಲವಗರ್ಷಭಮ್ ।
ಗಜಙ್ಗವಾಕ್ಷಂಶರಭಮ್ಮೈನ್ದಞ್ಚದ್ವಿವಿದನ್ತಥಾ ॥ 4 ॥
ಕಿಞ್ಚಿದಾವಿಗ್ನಹೃದಯೋಜಾತಕ್ರೋಧಶ್ಚರಾವಣಃ ।
ಭರ್ತ್ಸಯಾಮಾಸತೌವೀರೌಕಥಾನ್ತೇಶುಕಸಾರಣೌ ॥ 5 ॥
ಅಧೋಮುಖೌತೌಪ್ರಣತಾವಬ್ರವೀಚ್ಛುಕಸಾರಣೌ ।
ರೋಷಗದ್ಗದಯಾವಾಚಾಸಂರಬ್ಧಮ್ಪರುಷಂವಚಃ ॥ 6 ॥
ನತಾವತ್ಸದೃಶನ್ನಾಮಸಚಿವೈರುಪಜೀವಿಭಿಃ ।
ವಿಪ್ರಿಯನ್ನೃಪತೇರ್ವಕ್ತುನ್ನಿಗ್ರಹೇಪ್ರಗ್ರಹೇಪ್ರಭೋಃ ॥ 7 ॥
ರಿಪೂಣಾಮ್ಪ್ರತಿಕೂಲಾನಾಂಯುದ್ಧಾರ್ಥಮಭಿವರ್ತತಾಮ್ ।
ಉಭಾಭ್ಯಾಂಸದೃಶನ್ನಾಮವಕ್ತುಮಪ್ರಸ್ತವೇಸ್ತವಮ್ ॥ 8 ॥
ಆಚಾರ್ಯಾಗುರವೋವೃದ್ಧಾವೃಥಾವಾಮ್ಪರ್ಯುಪಾಸಿತಾಃ ।
ಸಾರಂಯದ್ರಾಜಶಾಸ್ತ್ರಾಣಾಮನುಜೀವ್ಯನ್ನಗೃಹ್ಯತೇ ॥ 9 ॥
ಗೃಹೀತೋವಾನವಿಜ್ಞಾತೋಭಾರೋಽಜ್ಞಾನಸ್ಯವಾಹ್ಯತೇ ।
ಈದೃಶೈಃ ಸಚಿವೈರ್ಯುಕ್ತೋಮೂರ್ಖೈರ್ದಿಷ್ಟ್ಯಧರಾಮ್ಯಹಮ್ ॥ 10 ॥
ಕಿನ್ನುಮೃತ್ಯೋರ್ಭಯನ್ನಾಸ್ತಿವಕ್ತುಮ್ಮಾಮ್ಪರುಷಂವಚಃ ।
ಯಸ್ಯಮೇಶಾಸತೋಜಿಹ್ವಾಪ್ರಯಚ್ಛತಿಶುಭಾಶುಭಮ್ ॥ 11 ॥
ಅಪ್ಯೇವದಹನಂಸ್ಪೃಷ್ಟವಾವನೇತಿಷ್ಠನ್ತಿಪಾದಪಾಃ ।
ರಾಜದೋಷಪರಾಮೃಷ್ಟಾಸ್ತಿಷ್ಠನ್ತೇನಾಪರಾಧಿನಃ ॥ 12 ॥
ಹನ್ಯಾಮಹನ್ತ್ವಿಮೌಪಾಪೌಶತ್ರುಪಕ್ಷಪ್ರಶಂಸಕೌ ।
ಯದಿಪೂರ್ವೋಪಕಾರೈಸ್ತುನಕ್ರೋಧೋಮೃದುತಾಂವ್ರಜೇತ್ ॥ 13 ॥
ಅಪಧ್ವಂಸತ ಗಚ್ಚಧ್ವಂ ಸಮ್ನಿಕರ್ಷಾದ್ ಇತೋ ಮಮ ।
ನ ಹಿ ವಾಂ ಹನ್ತುಂ ಇಚ್ಚಾಮಿ ಸ್ಮರನ್ನ್ ಉಪಕೃತಾನಿ ವಾಮ್ ॥ 14 ॥
ಹತಾವ್ ಏವ ಕೃತಘ್ನೌ ತೌ ಮಯಿ ಸ್ನೇಹ ಪರಾನ್ ಮುಖೌ ।
ಏವಂ ಉಕ್ತೌ ತು ಸವ್ರೀಡೌ ತಾವ್ ಉಭೌ ಶುಕ ಸಾರಣೌ ॥ 15 ॥
ಅಬ್ರವೀತ್ಸದಶಗ್ರೀವಃ ಸಮೀಪಸ್ಥಮ್ಮಹೋದರಮ್ ।
ಉಪಸ್ತಾಪಯಮೇಶೀಘ್ರಞ್ಚಾರಾನ್ನೀತಿವಿಶಾರದಾನ್ ॥ 16 ॥
ಮಹೋದರಸ್ತಥೋಕ್ತಸ್ತುಶೀಘ್ರಮಾಜ್ಞಾಪಯಚ್ಚರಾನ್ ॥ 17 ॥
ತತಶ್ಚಾರಾಸ್ಸನ್ತ್ವರಿತಾಃಪ್ರಾಪ್ತಾಃಪಾರ್ಥಿವಶಾಸನಾತ್ ।
ಉಪಸ್ಥಿತಾಃಪ್ರಾಞ್ಜಲಯೋವರ್ಧಯಿತ್ವಾಜಯಶಿಷಾಃ ॥ 18 ॥
ತಾನಬ್ರವೀತ್ತತೋವಾಕ್ಯಂರಾವಣೋರಾಕ್ಷಸಾಧಿಪಃ ।
ಚಾರಾನ್ಪ್ರತ್ಯಾಯಿತಾನ್ ಶೂರಾನ್ಭಕ್ತಾನ್ವಿಗತಸಾಧ್ವಸಾನ್ ॥ 19 ॥
ಇತೋಗಚ್ಛತರಾಮಸ್ಯವ್ಯವಸಾಯಮ್ಪರೀಕ್ಷಥ ।
ಮನ್ತ್ರಿಷ್ವಭ್ಯನ್ತರಾಯೇಽಸ್ಯಪ್ರೀತ್ಯಾತೇನಸಮಾಗತಾಃ ॥ 20 ॥
ಕಥಂಸ್ವಪಿತಿಜಾಗರ್ತಿಕಿಮನ್ಯಚ್ಚಕರಿಷ್ಯತಿ ।
ವಿಜ್ಞಾಯನಿಪುಣಂಸರ್ವಮಾಗನ್ತವ್ಯಮಶೇಷತಃ ॥ 21 ॥
ಚಾರೇಣವಿದಿತಶ್ಶತ್ರುಃಪಣ್ಡಿತೈರ್ವಸುಧಾಧಿಪೈಃ ।
ಯುದ್ಧೇಸ್ವಲ್ಪೇನಯತ್ನೇನಸಮಾಸಾದ್ಯನಿರಸ್ಯತೇ ॥ 22 ॥
ಚಾರಾಸ್ತುತೇತಥೇತ್ಯುಕ್ತ್ವಾಪ್ರಹೃಷ್ಟಾರಾಕ್ಷಸೇಶ್ವರಮ್ ।
ಶಾರ್ದೂಲಮಗ್ರತಃಕೃತ್ವಾತತಶ್ಚಕ್ರುಃಪ್ರದಕ್ಷಿಣಮ್ ॥ 23 ॥
ತತಸ್ತೇತಮ್ಮಹಾತ್ಮಾನಞ್ಚಾರಾರಾಕ್ಷಸಸತ್ತಮಮ್ ।
ಕೃತ್ವಾಪ್ರದಕ್ಷಿಣಞ್ಜಗ್ಮುರ್ಯತ್ರರಾಮಸ್ಸಲಕ್ಷ್ಮಣಃ ॥ 24 ॥
ತೇಸುವೇಲಸ್ಯಶೈಲಸ್ಯಸಮೀಪೇರಾಮಲಕ್ಷ್ಮಣೌ ।
ಪ್ರಚ್ಛನ್ನಾದದೃಶುರ್ಗತ್ವಾಸಸುಗ್ರೀವವಿಭೀಷಣೌ ॥ 25 ॥
ಪ್ರೇಕ್ಷಮಾಣಾಶ್ಚಮೂನ್ತಾನ್ತುಬಭೂವುರ್ಭಯವಿಕ್ಲಬಾಃ ।
ತೇತುಧರ್ಮಾತ್ಮನಾದೃಷ್ಟಾರಾಕ್ಷಸೇನ್ದ್ರೇಣರಾಕ್ಷಸಾ ॥ 26 ॥
ವಿಭೀಷಣೇನತತ್ರಸ್ಥಾನಿಗೃಹೀತಾಯದೃಚ್ಛಯಾ ।
ಶಾರ್ದೂಲೋಗ್ರಾಹಿತಸ್ತ್ವೇಕಃಪಾಪೋಽಯಮಿತಿರಾಕ್ಷಸಃ ॥ 27 ॥
ಮೋಚಿತಸ್ಸೋಽಪಿರಾಮೇಣವಧ್ಯಮಾನಃಪ್ಲವಙ್ಗಮೈಃ ।
ಅನೃಶಂಸ್ಯೇನರಾಮೇಣಮೋಚಿತಾರಾಕ್ಷಸಾಃಪರೇ ॥ 28 ॥
ವಾನರೈರರ್ದಿತಾಸ್ತೇತುವಿಕ್ರಾನ್ತೈರ್ಲಘುವಿಕ್ರಮೈಃ ।
ಪುನರ್ಲಙ್ಕಾಮನುಪ್ರಾಪ್ತಾಶ್ವಸನ್ತೋನಷ್ಟಚೇತಸಃ ॥ 29 ॥
ತತೋದಶಗ್ರೀವಮುಪಸ್ಥಿತಾಸ್ತೇಚಾರಾಬಹಿರ್ನಿತ್ಯಚರಾನಿಶಾಚರಾಃ ।
ಗಿರೇಸ್ಸುವೇಲಸ್ಯಸಮೀಪವಾಸಿನನ್ನ್ಯವೇದಯನ್ಭೀಮಬಲಮ್ಮಹಾಬಲಾಃ ॥ 30 ॥
ಇತ್ಯಾರ್ಷೇ ಶ್ರೀಮದ್ರಾಮಾಯಣೇ ವಾಲ್ಮೀಕೀಯ ಆದಿಕಾವ್ಯೇ ಯುದ್ಧಕಾಣ್ಡೇ ಏಕೋನತ್ರಿಂಶಸ್ಸರ್ಗಃ ॥
