ശ്രീമദ്വാല്മീകീയ രാമായണേ അയോധ്യാകാംഡമ് ।
അഥ സപ്തസപ്തതിതമസ്സര്ഗഃ ।
തതോ ദശാഹേഽതിഗതേ കൃതശൌചോ നൃപാത്മജഃ ।
ദ്വാദശേഽഹനി സംപ്രാപ്തേ ശ്രാദ്ധകര്മാണ്യകാരയത് ॥ 1 ॥
ബ്രാഹ്മണേഭ്യോ ദദൌ രത്നം ധനമന്നം ച പുഷ്കലമ് ।
വാസാംസി ച മഹാര്ഹാണി രത്നാനി വിവിധാനി ച ॥ 2 ॥
ബാസ്തികം ബഹു ശുക്ലം ച ഗാശ്ചാപി ശതശസ്തഥാ ।
ദാസീദാസം ച യാനം ച വേശ്മാനി സുമഹാംതി ച ॥ 3 ॥
ബ്രാഹ്മണേഭ്യോ ദദൌ പുത്രോ രാജ്ഞസ്തസ്യൌര്ധ്വദൈഹികമ് ।
തതഃ പ്രഭാതസമയേ ദിവസേഽഥ ത്രയോദശേ ॥ 4 ॥
വിലലാപ മഹാബാഹുര്ഭരത ശ്ശോകമൂര്ഛിതഃ ।
ശബ്ദാപിഹിതകംഠസ്തു ശോധനാര്ഥമുപാഗതഃ ॥ 5 ॥
ചിതാമൂലേ പിതുർവാക്യമിദമാഹ സുദുഃഖിതഃ ।
താത യസ്മിന്നിസൃഷ്ടോഽഹം ത്വയാ ഭ്രാതരി രാഘവേ ॥ 6 ॥
തസ്മിന്വനം പ്രവ്രജിതേ ശൂന്യേ ത്യക്തോഽസ്മ്യഹം ത്വയാ ।
യസ്യാ ഗതിരനാഥായാഃ പുത്രഃ പ്രവാജിതോ വനമ് ।
താമംബാം താത കൌസല്യാം ത്യക്ത്വാ ത്വം ക്വ ഗതോ നൃപ ॥ 7 ॥
ദൃഷ്ട്വാ ഭസ്മാരുണം തച്ച ദഗ്ധാസ്ഥി സ്ഥാനമംഡലമ് ॥ 8 ॥
പിതു ശ്ശരീരനിർവാണം നിഷ്ടനന്വിഷസാദ സഃ ।
സ തു ദൃഷ്ട്വാ രുദന് ദീനഃ പപാത ധരണീതലേ ॥ 9 ॥
ഉത്ഥാപ്യമാനശ്ശക്രസ്യ യംത്രധ്വജ ഇവ ച്യുതഃ ।
അഭിപേതുസ്തതസ്സർവേ തസ്യാമാത്യാശ്ശുചിവ്രതമ് ॥ 10 ॥
അംതകാലേ നിപതിതം യയാതിമൃഷയോ യഥാ ।
ശത്രുഘ്ന ശ്ചാപി ഭരതം ദൃഷ്ട്വാ ശോകം പരിപ്ലുതഃ ॥ 11 ॥
വിസംജ്ഞോ ന്യപതദ്ഭൂമൌ ഭൂമിപാലമനുസ്മരന് ।
ഉന്മത്ത ഇവ നിശ്ചേതാ വിലലാപ സുദുഃഖിതഃ ॥ 12 ॥
സ്മൃത്വാ പിതുര്ഗുണാംഗാനി താനി താനി തഥാ തഥാ ।
മംഥരാപ്രഭവസ്തീവ്രഃ കൈകേയീഗ്രാഹസംകുലഃ ॥ 13 ॥
വരദാനമയോഽക്ഷോഭ്യോഽമംജയച്ഛോകസാഗരഃ ।
സുകുമാരം ച ബാലം ച സതതം ലാലിതം ത്വയാ ॥ 14 ॥
ക്വ താത ഭരതം ഹിത്വാ വിലപംതം ഗതോ ഭവാന് ।
നനു ഭോജ്യേഷു പാനേഷു വസ്ത്രേഷ്വാഭരണേഷു ച ॥ 15 ॥
പ്രവാരയസി നസ്സർവാന് തന്നഃ കോഽന്യഃ കരിഷ്യതി ।
അവദാരണകാലേ തു പൃഥിവീ നാവദീര്യതേ ॥ 16 ॥
യാ വിഹീനാ ത്വയാ രാജ്ഞാ ധര്മജ്ഞേന മഹാത്മനാ ।
പിതരി സ്വര്ഗമാപന്നേ രാമേ ചാരണ്യമാശ്രിതേ ॥ 17 ॥
കിം മേ ജീവിതസാമര്ഥ്യം പ്രവേക്ഷ്യാമി ഹുതാശനമ് ।
ഹീനോ ഭ്രാത്രാ ച പിത്രാ ച ശൂന്യാമിക്ഷ്വാകുപാലിതാമ് ॥ 18 ॥
അയോധ്യാം ന പ്രവേക്ഷ്യാമി പ്രവേക്ഷ്യാമി തപോവനമ് ।
തയോർവിലപിതം ശ്രുത്വാ വ്യസനം ചാന്വവേക്ഷ്യ തത് ॥ 19 ॥
ഭൃശമാര്തതരാ ഭൂയസ്സർവഏവാനുഗാമിനഃ ।
തതോ വിഷണ്ണൌ ശ്രാംതൌ ച ശത്രുഘ്നഭരതാവുഭൌ ॥ 20 ॥
ധരണ്യാം സംവ്യവേഷ്ടേതാം ഭഗ്നശൃംഗാവിവര്ഷഭൌ ।
തതഃ പ്രകൃതിമാന്വൈദ്യഃ പിതുരേഷാം പുരോഹിതഃ ॥ 21 ॥
വസിഷ്ഠോ ഭരതം വാക്യമുത്ഥാപ്യ തമുവാച ഹ ।
ത്രയോദശോഽയം ദിവസഃ പിതുർവൃത്തസ്യ തേ വിഭോ ॥ 22 ॥
സാവശേഷാസ്ഥിനിചയേ കിമിഹ ത്വം വിലംഭസേ ।
ത്രീണി ദ്വംദ്വാനി ഭൂതേഷു പ്രവൃത്താന്യവിശേഷതഃ ॥ 23 ॥
തേഷു ചാപരിഹാര്യേഷു നൈവം ഭവിതുമര്ഹസി ।
സുമംത്രശ്ചാപി ശത്രുഘ്നമുത്ഥാപ്യാഭിപ്രസാദ്യ ച ॥ 24 ॥
ശ്രാവയാമാസ തത്ത്വജ്ഞ സ്സർവഭൂതഭവാഭവമ് ।
ഉത്ഥിതൌ ച നരവ്യാഘ്രൌ പ്രകാശേതേ യശസ്വിനൌ ॥ 25 ॥
വര്ഷാതപപരിക്ലിനൌ പൃഥഗിംദ്രധ്വജാവിവ ।
അശ്രൂണി പരിമൃദ്നംതൌ രക്താക്ഷൌ ദീനഭാഷിണൌ ।
അമാത്യാസ്ത്വരയംതി സ്മ തനയൌ ചാപരാഃ ക്രിയാഃ ॥ 26 ॥
ഇത്യാര്ഷേ ശ്രീമദ്രാമായണേ വാല്മീകീയ ആദികാവ്യേ അയോധ്യാകാംഡേ സപ്തസപ്തതിതമസ്സര്ഗഃ ॥
