ಶ್ರೀಮದ್ವಾಲ್ಮೀಕೀಯ ರಾಮಾಯಣೇ ಕಿಷ್ಕಿನ್ಧಾಕಾಣ್ಡಮ್ ।
ಅಥ ಪಞ್ಚಷಷ್ಟಿತಮಸ್ಸರ್ಗಃ ।
ಅಥಾಙ್ಗದವಚಶ್ಶ್ರುತ್ವಾ ತೇ ಸರ್ವೇ ವಾನರರ್ಷಭಾಃ ।
ಸ್ವಂ ಸ್ವಂ ಗತೌ ಸಮುತ್ಸಾಹಮೂಚುಸ್ತತ್ರ ಯಥಾಕ್ರಮಮ್ ॥ 1 ॥
ಗಜೋ ಗವಾಕ್ಷೋ ಗವಯಶ್ಶರಭೋ ಗನ್ಧಮಾದನಃ ।
ಮೈನ್ದಶ್ಚ ದ್ವಿವಿದಶ್ಚೈವ ಸುಷೇಣೋ ಜಾಮ್ಬವಾಂ ಸ್ತಥಾ ॥ 2 ॥
ಆಬಭಾಷೇ ಗಜಸ್ತತ್ರ ಪ್ಲವೇಯಂ ದಶಯೋಜನಮ್ ।
ಗವಾಕ್ಷೋ ಯೋಜನನಾನ್ಯಾಹ ಗಮಿಷ್ಯಾಮೀತಿ ವಿಂಶತಿಮ್ ॥ 3 ॥
ಗವಯೋ ವಾನರಸ್ತತ್ರ ವಾನರಾಂ ಸ್ತಾನುವಾಚ ಹ ।
ತ್ರಿಂಶತಂ ತು ಗಮಿಷ್ಯಾಮಿ ಯೋಜನಾನಾಂ ಪ್ಲವಙ್ಗಮಾಃ ॥ 4 ॥
ಶರಭಸ್ತಾನುವಾಚಾಥ ವಾನರಾನ್ ವಾನರರ್ಷಭಃ ।
ಚತ್ವಾರಿಂಶದ್ಗಮಿಷ್ಯಾಮಿ ಯೋಜನಾನಾಂ ಪ್ಲವಙ್ಗಮಾಃ ॥ 5 ॥
ವಾನರಸ್ತು ಮಹಾತೇಜಾ ಅಬ್ರವೀದ್ಗನ್ಧಮಾದನಃ ।
ಯೋಜನಾನಾಂ ಗಮಿಷ್ಯಾಮಿ ಪಞ್ಚಾಶತ್ತು ನ ಸಂಶಯಃ ॥ 6 ॥
ಮೈನ್ದಸ್ತು ವಾನರಸ್ತತ್ರ ವಾನರಾಂಸ್ತಾನುವಾಚ ಹ ।
ಯೋಜನಾನಾಂ ಪರಂ ಷಷ್ಟಿಮಹಂ ಪ್ಲವಿತುಮುತ್ಸಹೇ ॥ 7 ॥
ತತಸ್ತತ್ರ ಮಹಾತೇಜಾ ದ್ವಿವಿದಃ ಪ್ರತ್ಯಭಾಷತ ।
ಗಮಿಷ್ಯಾಮಿ ನ ಸನ್ದೇಹಸ್ಸಪ್ತತಿಂ ಯೋಜನಾನ್ಯಹಮ್ ॥ 8 ॥
ಸುಷೇಣಸ್ತು ಮಹಾತೇಜಾಃಪ್ರೋಕ್ತವಾನ್ಹರಿಸತ್ತಮಾನ್ ।
ಅಶೀತಿಂ ಯೋಜನಾನಾಂ ತು ಪ್ಲವೇಯಂ ಪ್ಲವಗೇಶ್ವರಾಃ ॥ 9 ॥
ತೇಷಾಂ ಕಥಯತಾಂ ತತ್ರ ಸರ್ವಾಂಸ್ತಾನನುಮಾನ್ಯ ಚ ।
ತತೋ ವೃದ್ಧತಮಸ್ತೇಷಾಂ ಜಾಮ್ಬವಾನ್ಪ್ರತ್ಯಭಾಷತ ॥ 10 ॥
ಪೂರ್ವಮಸ್ಮಾಕಮಪ್ಯಾಸೀತ್ಕಶ್ಚಿದ್ಗತಿಪರಾಕ್ರಮಃ ।
ತೇ ವಯಂ ವಯಸಃ ಪಾರಮನುಪ್ರಾಪ್ತಾಸ್ಸ್ಮ ಸಾಮ್ಪ್ರತಮ್ ॥ 11 ॥
ಕಿನ್ತು ನೈವಂ ಗತೇ ಶಕ್ಯಮಿದಂ ಕಾರ್ಯಮುಪೇಕ್ಷಿತುಮ್ ।
ಯದರ್ಥಂ ಕಪಿರಾಜಶ್ಚ ರಾಮಶ್ಚ ಕೃತನಿಶ್ಚಯೌ ॥ 12 ॥
ಸಾಮ್ಪ್ರತಂ ಕಾಲಭೇದೇನ ಯಾ ಗತಿಸ್ತಾಂ ನಿಬೋಧತ ।
ನವತಿಂ ಯೋಜನಾನಾಂ ತು ಗಮಿಷ್ಯಾಮಿ ನ ಸಂಶಯಃ ॥ 13 ॥
ತಾಂಶ್ಚ ಸರ್ವಾನ್ಹರಿಶ್ರೇಷ್ಠಾಞ್ಜಾಮ್ಬವಾನ್ಪುನರಬ್ರವೀತ್ ।
ನ ಖಲ್ವೇತಾವದೇವಾಸೀದ್ಗಮನೇ ಮೇ ಪರಾಕ್ರಮಃ ॥ 14 ॥
ಮಯಾ ಮಹಾಬಲೇಶ್ಚೈವ ಯಜ್ಞೇ ವಿಷ್ಣುಸ್ಸನಾತನಃ ।
ಪ್ರದಕ್ಷಿಣೀಕೃತಃ ಪೂರ್ವಂ ಕ್ರಮಮಾಣಸ್ತ್ರಿವಿಕ್ರಮಮ್ ॥ 15 ॥
ಸ ಇದಾನೀಮಹಂ ವೃದ್ಧಃ ಪ್ಲವನೇ ಮನ್ದವಿಕ್ರಮಃ ।
ಯೌವನೇ ಚ ತದಾಽಸೀನ್ಮೇ ಬಲಮಪ್ರತಿಮಂ ಪರೈಃ ॥ 16 ॥
ಸಮ್ಪ್ರತ್ಯೇತಾವತೀಂ ಶಕ್ತಿಂ ಗಮನೇ ತರ್ಕಯಾಮ್ಯಹಮ್ ।
ನೈತಾವತಾ ಹಿ ಸಂಸಿದ್ಧಿಃ ಕಾರ್ಯಸ್ಯಾಸ್ಯ ಭವಿಷ್ಯತಿ ॥ 17 ॥
ಅಥೋತ್ತರಮುದಾರಾರ್ಥಮಬ್ರವೀದಙ್ಗದಸ್ತದಾ ।
ಅನುಮಾನ್ಯ ತಥಾ ಪ್ರಾಜ್ಞೋ ಜಾಮ್ಬವನ್ತಂ ಮಹಾಕಪಿಮ್ ॥ 18 ॥
ಅಹಮೇತದ್ಗಮಿಷ್ಯಾಮಿ ಯೋಜನಾನಾಂ ಶತಂ ಮಹತ್ ।
ನಿವರ್ತನೇ ತು ಮೇ ಶಕ್ತಿಸ್ಸ್ಯಾನ್ನ ವೇತಿ ನ ನಿಶ್ಚಿತಮ್ ॥ 19 ॥
ತಮುವಾಚ ಹರಿಶ್ರೇಷ್ಠಂ ಜಾಮ್ಬವಾನ್ವಾಕ್ಯಕೋವಿದಃ ।
ಜ್ಞಾಯತೇ ಗಮನೇ ಶಕ್ತಿಸ್ತವ ಹರ್ಯೃಕ್ಷಸತ್ತಮ ॥ 20 ॥
ಕಾಮಂ ಶತಂ ಸಹಸ್ರಂ ವಾ ನ ಹ್ಯೇಷ ವಿಧಿರುಚ್ಯತೇ ।
ಯೋಜನಾನಾಂ ಭವಾನ್ ಶಕ್ತೋ ಗನ್ತುಂ ಪ್ರತಿನಿವರ್ತಿತುಮ್ ॥ 21 ॥
ನ ಹಿ ಪ್ರೇಷಯಿತಾ ತಾತ ಸ್ವಾಮೀ ಪ್ರೇಷ್ಯಃ ಕಥಞ್ಚನ ।
ಭವತಾಽಯಂ ಜನಸ್ಸರ್ವಃ ಪ್ರೇಷ್ಯಃ ಪ್ಲವಗಸತ್ತಮ ॥ 22 ॥
ಭವಾನ್ ಕಲತ್ರಂ ಅಸ್ಮಾಕಂ ಸ್ವಾಮಿ ಭಾವೇ ವ್ಯವಸ್ಥಿತಃ ।
ಸ್ವಾಮೀ ಕಲತ್ರಂ ಸೈನ್ಯಸ್ಯ ಗತಿಃ ಏಷಾ ಪರನ್ತಪ ॥ 23 ॥
ಅಪಿ ವೈ ಏತಸ್ಯ ಕಾರ್ಯಸ್ಯ ಭವಾನ್ ಮೂಲಂ ಅರಿಂ ದಮ ।
ತಸ್ಮಾತ್ ಕಲತ್ರವತ್ ತಾತ ಪ್ರತಿಪಾಲ್ಯಃ ಸದಾ ಭವಾನ್ ॥ 24 ॥
ಮೂಲಮರ್ಥಸ್ಯ ಸಂರಕ್ಷ್ಯಮೇಷ ಕಾರ್ಯವಿದಾಂ ನಯಃ ।
ಮೂಲೇ ಸತಿ ಹಿ ಸಿದ್ಧ್ಯನ್ತಿ ಗುಣಾ ಫಲೋ ಪುಷ್ಪೋದಯಾಃ ॥ 25 ॥
ತದ್ಭವಾನಸ್ಯ ಕಾರ್ಯಸ್ಯ ಸಾಧನೇ ಸತ್ಯವಿಕ್ರಮ ।
ಬುದ್ಧಿವಿಕ್ರಮಸಮ್ಪನ್ನೋ ಹೇತುರತ್ರ ಪರನ್ತಪ ॥ 26 ॥
ಗುರುಶ್ಚ ಗುರುಪುತ್ರಶ್ಚ ತ್ವಂ ಹಿ ನಃ ಕಪಿಸತ್ತಮ ।
ಭವನ್ತಮಾಶ್ರಿತ್ಯ ವಯಂ ಸಮರ್ಥಾ ಹ್ಯರ್ಥಸಾಧನೇ ॥ 27 ॥
ಉಕ್ತವಾಕ್ಯಂ ಮಹಾಪ್ರಾಜ್ಞಂ ಜಾಮ್ಬವನ್ತಂ ಮಹಾಕಪಿಃ ।
ಪ್ರತ್ಯುವಾಚೋತ್ತರಂ ವಾಕ್ಯಂ ವಾಲಿಸೂನುರಥಾಙ್ಗದಃ ॥ 28 ॥
ಯದಿ ನಾಹಂ ಗಮಿಷ್ಯಾಮಿ ನಾನ್ಯೋ ವಾನರಪುಙ್ಗವಃ ।
ಪುನಃ ಖಲ್ವಿದಮಸ್ಮಾಭಿಃ ಕಾರ್ಯಂ ಪ್ರಾಯೋಪವೇಶನಮ್ ॥ 29 ॥
ನ ಹ್ಯಕೃತ್ವಾ ಹರಿಪತೇಸ್ಸನ್ದೇಶಂ ತಸ್ಯ ಧೀಮತಃ ।
ತತ್ರಾಪಿ ಗತ್ವಾ ಪ್ರಾಣಾನಾಂ ಪಶ್ಯಾಮಿ ಪರಿರಕ್ಷಣಮ್ ॥ 30 ॥
ಸ ಹಿ ಪ್ರಸಾದೇ ಚಾತ್ಯರ್ಥಂ ಕೋಪೇ ಚ ಹರಿರೀಶ್ವರಃ ।
ಅತೀತ್ಯ ತಸ್ಯ ಸನ್ದೇಶಂ ವಿನಾಶೋ ಗಮನೇ ಭವೇತ್ ॥ 31 ॥
ತದ್ಯಥಾ ಹ್ಯಸ್ಯ ಕಾರ್ಯಸ್ಯ ನ ಭವತ್ಯನ್ಯಥಾ ಗತಿಃ ।
ತದ್ಭವಾನೇವ ದೃಷ್ಟಾರ್ಥಸ್ಸಞ್ಚಿನ್ತಯಿತು ಮರ್ಹತಿ ॥ 32 ॥
ಸೋಽಙ್ಗದೇನ ತದಾ ವೀರಃ ಪ್ರತ್ಯುಕ್ತಃ ಪ್ಲವಗರ್ಷಭಃ ।
ಜಾಮ್ಬವಾನುತ್ತರಂ ವಾಕ್ಯಂ ಪ್ರೋವಾಚೇದಂ ತತೋಽಙ್ಗದಮ್ ॥ 33 ॥
ಅಸ್ಯ ತೇ ವೀರ ಕಾರ್ಯಸ್ಯ ನ ಕಿಞ್ಚಿತ್ಪರಿಹೀಯತೇ ।
ಏಷ ಸಞ್ಚೋದಯಾಮ್ಯೇನಂ ಯಃ ಕಾರ್ಯಂ ಸಾಧಯಿಷ್ಯತಿ ॥ 34 ॥
ತತಃಪ್ರತೀತಂ ಪ್ಲವತಾಂವರಿಷ್ಠಂ ಏಕಾನ್ತಮಾಶ್ರಿತ್ಯ ಸುಸುಖೇಪವಿಷ್ಠಂ ಸಞ್ಚೋದಯಾಮಾಸ ಹರಿಪ್ರವೀರೋ ಹರಿಪ್ರವೀರಂ ಹನುಮನ್ತಮೇವ ॥ 35 ॥
ಇತ್ಯಾರ್ಷೇ ಶ್ರೀಮದ್ರಾಮಾಯಣೇ ವಾಲ್ಮೀಕೀಯ ಆದಿಕಾವ್ಯೇ ಕಿಷ್ಕಿನ್ಧಾಕಾಣ್ಡೇ ಪಞ್ಚಷಷ್ಟಿತಮಸ್ಸರ್ಗಃ ॥
