𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌅𑌯𑍋𑌧𑍍𑌯𑌾𑌕𑌾𑌂𑌡𑌮𑍍 ।
𑌅𑌥 𑌸𑌪𑍍𑌤𑌸𑌪𑍍𑌤𑌤𑌿𑌤𑌮𑌸𑍍𑌸𑌰𑍍𑌗𑌃 ।
𑌤𑌤𑍋 𑌦𑌶𑌾𑌹𑍇𑌽𑌤𑌿𑌗𑌤𑍇 𑌕𑍃𑌤𑌶𑍌𑌚𑍋 𑌨𑍃𑌪𑌾𑌤𑍍𑌮𑌜𑌃 ।
𑌦𑍍𑌵𑌾𑌦𑌶𑍇𑌽𑌹𑌨𑌿 𑌸𑌂𑌪𑍍𑌰𑌾𑌪𑍍𑌤𑍇 𑌶𑍍𑌰𑌾𑌦𑍍𑌧𑌕𑌰𑍍𑌮𑌾𑌣𑍍𑌯𑌕𑌾𑌰𑌯𑌤𑍍 ॥ 1 ॥
𑌬𑍍𑌰𑌾𑌹𑍍𑌮𑌣𑍇𑌭𑍍𑌯𑍋 𑌦𑌦𑍌 𑌰𑌤𑍍𑌨𑌂 𑌧𑌨𑌮𑌨𑍍𑌨𑌂 𑌚 𑌪𑍁𑌷𑍍𑌕𑌲𑌮𑍍 ।
𑌵𑌾𑌸𑌾𑌂𑌸𑌿 𑌚 𑌮𑌹𑌾𑌰𑍍𑌹𑌾𑌣𑌿 𑌰𑌤𑍍𑌨𑌾𑌨𑌿 𑌵𑌿𑌵𑌿𑌧𑌾𑌨𑌿 𑌚 ॥ 2 ॥
𑌬𑌾𑌸𑍍𑌤𑌿𑌕𑌂 𑌬𑌹𑍁 𑌶𑍁𑌕𑍍𑌲𑌂 𑌚 𑌗𑌾𑌶𑍍𑌚𑌾𑌪𑌿 𑌶𑌤𑌶𑌸𑍍𑌤𑌥𑌾 ।
𑌦𑌾𑌸𑍀𑌦𑌾𑌸𑌂 𑌚 𑌯𑌾𑌨𑌂 𑌚 𑌵𑍇𑌶𑍍𑌮𑌾𑌨𑌿 𑌸𑍁𑌮𑌹𑌾𑌂𑌤𑌿 𑌚 ॥ 3 ॥
𑌬𑍍𑌰𑌾𑌹𑍍𑌮𑌣𑍇𑌭𑍍𑌯𑍋 𑌦𑌦𑍌 𑌪𑍁𑌤𑍍𑌰𑍋 𑌰𑌾𑌜𑍍𑌞𑌸𑍍𑌤𑌸𑍍𑌯𑍌𑌰𑍍𑌧𑍍𑌵𑌦𑍈𑌹𑌿𑌕𑌮𑍍 ।
𑌤𑌤𑌃 𑌪𑍍𑌰𑌭𑌾𑌤𑌸𑌮𑌯𑍇 𑌦𑌿𑌵𑌸𑍇𑌽𑌥 𑌤𑍍𑌰𑌯𑍋𑌦𑌶𑍇 ॥ 4 ॥
𑌵𑌿𑌲𑌲𑌾𑌪 𑌮𑌹𑌾𑌬𑌾𑌹𑍁𑌰𑍍𑌭𑌰𑌤 𑌶𑍍𑌶𑍋𑌕𑌮𑍂𑌰𑍍𑌛𑌿𑌤𑌃 ।
𑌶𑌬𑍍𑌦𑌾𑌪𑌿𑌹𑌿𑌤𑌕𑌂𑌠𑌸𑍍𑌤𑍁 𑌶𑍋𑌧𑌨𑌾𑌰𑍍𑌥𑌮𑍁𑌪𑌾𑌗𑌤𑌃 ॥ 5 ॥
𑌚𑌿𑌤𑌾𑌮𑍂𑌲𑍇 𑌪𑌿𑌤𑍁𑌰𑍍𑌵𑌾𑌕𑍍𑌯𑌮𑌿𑌦𑌮𑌾𑌹 𑌸𑍁𑌦𑍁𑌃𑌖𑌿𑌤𑌃 ।
𑌤𑌾𑌤 𑌯𑌸𑍍𑌮𑌿𑌨𑍍𑌨𑌿𑌸𑍃𑌷𑍍𑌟𑍋𑌽𑌹𑌂 𑌤𑍍𑌵𑌯𑌾 𑌭𑍍𑌰𑌾𑌤𑌰𑌿 𑌰𑌾𑌘𑌵𑍇 ॥ 6 ॥
𑌤𑌸𑍍𑌮𑌿𑌨𑍍𑌵𑌨𑌂 𑌪𑍍𑌰𑌵𑍍𑌰𑌜𑌿𑌤𑍇 𑌶𑍂𑌨𑍍𑌯𑍇 𑌤𑍍𑌯𑌕𑍍𑌤𑍋𑌽𑌸𑍍𑌮𑍍𑌯𑌹𑌂 𑌤𑍍𑌵𑌯𑌾 ।
𑌯𑌸𑍍𑌯𑌾 𑌗𑌤𑌿𑌰𑌨𑌾𑌥𑌾𑌯𑌾𑌃 𑌪𑍁𑌤𑍍𑌰𑌃 𑌪𑍍𑌰𑌵𑌾𑌜𑌿𑌤𑍋 𑌵𑌨𑌮𑍍 ।
𑌤𑌾𑌮𑌂𑌬𑌾𑌂 𑌤𑌾𑌤 𑌕𑍌𑌸𑌲𑍍𑌯𑌾𑌂 𑌤𑍍𑌯𑌕𑍍𑌤𑍍𑌵𑌾 𑌤𑍍𑌵𑌂 𑌕𑍍𑌵 𑌗𑌤𑍋 𑌨𑍃𑌪 ॥ ॥
𑌦𑍃𑌷𑍍𑌟𑍍𑌵𑌾 𑌭𑌸𑍍𑌮𑌾𑌰𑍁𑌣𑌂 𑌤𑌚𑍍𑌚 𑌦𑌗𑍍𑌧𑌾𑌸𑍍𑌥𑌿 𑌸𑍍𑌥𑌾𑌨𑌮𑌂𑌡𑌲𑌮𑍍 ॥ ॥
𑌪𑌿𑌤𑍁 𑌶𑍍𑌶𑌰𑍀𑌰𑌨𑌿𑌰𑍍𑌵𑌾𑌣𑌂 𑌨𑌿𑌷𑍍𑌟𑌨𑌨𑍍𑌵𑌿𑌷𑌸𑌾𑌦 𑌸𑌃 ।
𑌸 𑌤𑍁 𑌦𑍃𑌷𑍍𑌟𑍍𑌵𑌾 𑌰𑍁𑌦𑌨𑍍 𑌦𑍀𑌨𑌃 𑌪𑌪𑌾𑌤 𑌧𑌰𑌣𑍀𑌤𑌲𑍇 ॥ ॥
𑌉𑌤𑍍𑌥𑌾𑌪𑍍𑌯𑌮𑌾𑌨𑌶𑍍𑌶𑌕𑍍𑌰𑌸𑍍𑌯 𑌯𑌂𑌤𑍍𑌰𑌧𑍍𑌵𑌜 𑌇𑌵 𑌚𑍍𑌯𑍁𑌤𑌃 ।
𑌅𑌭𑌿𑌪𑍇𑌤𑍁𑌸𑍍𑌤𑌤𑌸𑍍𑌸𑌰𑍍𑌵𑍇 𑌤𑌸𑍍𑌯𑌾𑌮𑌾𑌤𑍍𑌯𑌾𑌶𑍍𑌶𑍁𑌚𑌿𑌵𑍍𑌰𑌤𑌮𑍍 ॥ 10 ॥
𑌅𑌂𑌤𑌕𑌾𑌲𑍇 𑌨𑌿𑌪𑌤𑌿𑌤𑌂 𑌯𑌯𑌾𑌤𑌿𑌮𑍃𑌷𑌯𑍋 𑌯𑌥𑌾 ।
𑌶𑌤𑍍𑌰𑍁𑌘𑍍𑌨 𑌶𑍍𑌚𑌾𑌪𑌿 𑌭𑌰𑌤𑌂 𑌦𑍃𑌷𑍍𑌟𑍍𑌵𑌾 𑌶𑍋𑌕𑌂 𑌪𑌰𑌿𑌪𑍍𑌲𑍁𑌤𑌃 ॥ 11 ॥
𑌵𑌿𑌸𑌂𑌜𑍍𑌞𑍋 𑌨𑍍𑌯𑌪𑌤𑌦𑍍𑌭𑍂𑌮𑍌 𑌭𑍂𑌮𑌿𑌪𑌾𑌲𑌮𑌨𑍁𑌸𑍍𑌮𑌰𑌨𑍍 ।
𑌉𑌨𑍍𑌮𑌤𑍍𑌤 𑌇𑌵 𑌨𑌿𑌶𑍍𑌚𑍇𑌤𑌾 𑌵𑌿𑌲𑌲𑌾𑌪 𑌸𑍁𑌦𑍁𑌃𑌖𑌿𑌤𑌃 ॥ 12 ॥
𑌸𑍍𑌮𑍃𑌤𑍍𑌵𑌾 𑌪𑌿𑌤𑍁𑌰𑍍𑌗𑍁𑌣𑌾𑌂𑌗𑌾𑌨𑌿 𑌤𑌾𑌨𑌿 𑌤𑌾𑌨𑌿 𑌤𑌥𑌾 𑌤𑌥𑌾 ।
𑌮𑌂𑌥𑌰𑌾𑌪𑍍𑌰𑌭𑌵𑌸𑍍𑌤𑍀𑌵𑍍𑌰𑌃 𑌕𑍈𑌕𑍇𑌯𑍀𑌗𑍍𑌰𑌾𑌹𑌸𑌂𑌕𑍁𑌲𑌃 ॥ 13 ॥
𑌵𑌰𑌦𑌾𑌨𑌮𑌯𑍋𑌽𑌕𑍍𑌷𑍋𑌭𑍍𑌯𑍋𑌽𑌮𑌂𑌜𑌯𑌚𑍍𑌛𑍋𑌕𑌸𑌾𑌗𑌰𑌃 ।
𑌸𑍁𑌕𑍁𑌮𑌾𑌰𑌂 𑌚 𑌬𑌾𑌲𑌂 𑌚 𑌸𑌤𑌤𑌂 𑌲𑌾𑌲𑌿𑌤𑌂 𑌤𑍍𑌵𑌯𑌾 ॥ 14 ॥
𑌕𑍍𑌵 𑌤𑌾𑌤 𑌭𑌰𑌤𑌂 𑌹𑌿𑌤𑍍𑌵𑌾 𑌵𑌿𑌲𑌪𑌂𑌤𑌂 𑌗𑌤𑍋 𑌭𑌵𑌾𑌨𑍍 ।
𑌨𑌨𑍁 𑌭𑍋𑌜𑍍𑌯𑍇𑌷𑍁 𑌪𑌾𑌨𑍇𑌷𑍁 𑌵𑌸𑍍𑌤𑍍𑌰𑍇𑌷𑍍𑌵𑌾𑌭𑌰𑌣𑍇𑌷𑍁 𑌚 ॥ 15 ॥
𑌪𑍍𑌰𑌵𑌾𑌰𑌯𑌸𑌿 𑌨𑌸𑍍𑌸𑌰𑍍𑌵𑌾𑌨𑍍 𑌤𑌨𑍍𑌨𑌃 𑌕𑍋𑌽𑌨𑍍𑌯𑌃 𑌕𑌰𑌿𑌷𑍍𑌯𑌤𑌿 ।
𑌅𑌵𑌦𑌾𑌰𑌣𑌕𑌾𑌲𑍇 𑌤𑍁 𑌪𑍃𑌥𑌿𑌵𑍀 𑌨𑌾𑌵𑌦𑍀𑌰𑍍𑌯𑌤𑍇 ॥ 16 ॥
𑌯𑌾 𑌵𑌿𑌹𑍀𑌨𑌾 𑌤𑍍𑌵𑌯𑌾 𑌰𑌾𑌜𑍍𑌞𑌾 𑌧𑌰𑍍𑌮𑌜𑍍𑌞𑍇𑌨 𑌮𑌹𑌾𑌤𑍍𑌮𑌨𑌾 ।
𑌪𑌿𑌤𑌰𑌿 𑌸𑍍𑌵𑌰𑍍𑌗𑌮𑌾𑌪𑌨𑍍𑌨𑍇 𑌰𑌾𑌮𑍇 𑌚𑌾𑌰𑌣𑍍𑌯𑌮𑌾𑌶𑍍𑌰𑌿𑌤𑍇 ॥ 1 ॥
𑌕𑌿𑌂 𑌮𑍇 𑌜𑍀𑌵𑌿𑌤𑌸𑌾𑌮𑌰𑍍𑌥𑍍𑌯𑌂 𑌪𑍍𑌰𑌵𑍇𑌕𑍍𑌷𑍍𑌯𑌾𑌮𑌿 𑌹𑍁𑌤𑌾𑌶𑌨𑌮𑍍 ।
𑌹𑍀𑌨𑍋 𑌭𑍍𑌰𑌾𑌤𑍍𑌰𑌾 𑌚 𑌪𑌿𑌤𑍍𑌰𑌾 𑌚 𑌶𑍂𑌨𑍍𑌯𑌾𑌮𑌿𑌕𑍍𑌷𑍍𑌵𑌾𑌕𑍁𑌪𑌾𑌲𑌿𑌤𑌾𑌮𑍍 ॥ 1 ॥
𑌅𑌯𑍋𑌧𑍍𑌯𑌾𑌂 𑌨 𑌪𑍍𑌰𑌵𑍇𑌕𑍍𑌷𑍍𑌯𑌾𑌮𑌿 𑌪𑍍𑌰𑌵𑍇𑌕𑍍𑌷𑍍𑌯𑌾𑌮𑌿 𑌤𑌪𑍋𑌵𑌨𑌮𑍍 ।
𑌤𑌯𑍋𑌰𑍍𑌵𑌿𑌲𑌪𑌿𑌤𑌂 𑌶𑍍𑌰𑍁𑌤𑍍𑌵𑌾 𑌵𑍍𑌯𑌸𑌨𑌂 𑌚𑌾𑌨𑍍𑌵𑌵𑍇𑌕𑍍𑌷𑍍𑌯 𑌤𑌤𑍍 ॥ 1 ॥
𑌭𑍃𑌶𑌮𑌾𑌰𑍍𑌤𑌤𑌰𑌾 𑌭𑍂𑌯𑌸𑍍𑌸𑌰𑍍𑌵𑌏𑌵𑌾𑌨𑍁𑌗𑌾𑌮𑌿𑌨𑌃 ।
𑌤𑌤𑍋 𑌵𑌿𑌷𑌣𑍍𑌣𑍌 𑌶𑍍𑌰𑌾𑌂𑌤𑍌 𑌚 𑌶𑌤𑍍𑌰𑍁𑌘𑍍𑌨𑌭𑌰𑌤𑌾𑌵𑍁𑌭𑍌 ॥ 20 ॥
𑌧𑌰𑌣𑍍𑌯𑌾𑌂 𑌸𑌂𑌵𑍍𑌯𑌵𑍇𑌷𑍍𑌟𑍇𑌤𑌾𑌂 𑌭𑌗𑍍𑌨𑌶𑍃𑌂𑌗𑌾𑌵𑌿𑌵𑌰𑍍𑌷𑌭𑍌 ।
𑌤𑌤𑌃 𑌪𑍍𑌰𑌕𑍃𑌤𑌿𑌮𑌾𑌨𑍍𑌵𑍈𑌦𑍍𑌯𑌃 𑌪𑌿𑌤𑍁𑌰𑍇𑌷𑌾𑌂 𑌪𑍁𑌰𑍋𑌹𑌿𑌤𑌃 ॥ 21 ॥
𑌵𑌸𑌿𑌷𑍍𑌠𑍋 𑌭𑌰𑌤𑌂 𑌵𑌾𑌕𑍍𑌯𑌮𑍁𑌤𑍍𑌥𑌾𑌪𑍍𑌯 𑌤𑌮𑍁𑌵𑌾𑌚 𑌹 ।
𑌤𑍍𑌰𑌯𑍋𑌦𑌶𑍋𑌽𑌯𑌂 𑌦𑌿𑌵𑌸𑌃 𑌪𑌿𑌤𑍁𑌰𑍍𑌵𑍃𑌤𑍍𑌤𑌸𑍍𑌯 𑌤𑍇 𑌵𑌿𑌭𑍋 ॥ 22 ॥
𑌸𑌾𑌵𑌶𑍇𑌷𑌾𑌸𑍍𑌥𑌿𑌨𑌿𑌚𑌯𑍇 𑌕𑌿𑌮𑌿𑌹 𑌤𑍍𑌵𑌂 𑌵𑌿𑌲𑌂𑌭𑌸𑍇 ।
𑌤𑍍𑌰𑍀𑌣𑌿 𑌦𑍍𑌵𑌂𑌦𑍍𑌵𑌾𑌨𑌿 𑌭𑍂𑌤𑍇𑌷𑍁 𑌪𑍍𑌰𑌵𑍃𑌤𑍍𑌤𑌾𑌨𑍍𑌯𑌵𑌿𑌶𑍇𑌷𑌤𑌃 ॥ 23 ॥
𑌤𑍇𑌷𑍁 𑌚𑌾𑌪𑌰𑌿𑌹𑌾𑌰𑍍𑌯𑍇𑌷𑍁 𑌨𑍈𑌵𑌂 𑌭𑌵𑌿𑌤𑍁𑌮𑌰𑍍𑌹𑌸𑌿 ।
𑌸𑍁𑌮𑌂𑌤𑍍𑌰𑌶𑍍𑌚𑌾𑌪𑌿 𑌶𑌤𑍍𑌰𑍁𑌘𑍍𑌨𑌮𑍁𑌤𑍍𑌥𑌾𑌪𑍍𑌯𑌾𑌭𑌿𑌪𑍍𑌰𑌸𑌾𑌦𑍍𑌯 𑌚 ॥ 24 ॥
𑌶𑍍𑌰𑌾𑌵𑌯𑌾𑌮𑌾𑌸 𑌤𑌤𑍍𑌤𑍍𑌵𑌜𑍍𑌞 𑌸𑍍𑌸𑌰𑍍𑌵𑌭𑍂𑌤𑌭𑌵𑌾𑌭𑌵𑌮𑍍 ।
𑌉𑌤𑍍𑌥𑌿𑌤𑍌 𑌚 𑌨𑌰𑌵𑍍𑌯𑌾𑌘𑍍𑌰𑍌 𑌪𑍍𑌰𑌕𑌾𑌶𑍇𑌤𑍇 𑌯𑌶𑌸𑍍𑌵𑌿𑌨𑍌 ॥ 25 ॥
𑌵𑌰𑍍𑌷𑌾𑌤𑌪𑌪𑌰𑌿𑌕𑍍𑌲𑌿𑌨𑍌 𑌪𑍃𑌥𑌗𑌿𑌂𑌦𑍍𑌰𑌧𑍍𑌵𑌜𑌾𑌵𑌿𑌵 ।
𑌅𑌶𑍍𑌰𑍂𑌣𑌿 𑌪𑌰𑌿𑌮𑍃𑌦𑍍𑌨𑌂𑌤𑍌 𑌰𑌕𑍍𑌤𑌾𑌕𑍍𑌷𑍌 𑌦𑍀𑌨𑌭𑌾𑌷𑌿𑌣𑍌 ।
𑌅𑌮𑌾𑌤𑍍𑌯𑌾𑌸𑍍𑌤𑍍𑌵𑌰𑌯𑌂𑌤𑌿 𑌸𑍍𑌮 𑌤𑌨𑌯𑍌 𑌚𑌾𑌪𑌰𑌾𑌃 𑌕𑍍𑌰𑌿𑌯𑌾𑌃 ॥ 26 ॥
𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌅𑌯𑍋𑌧𑍍𑌯𑌾𑌕𑌾𑌂𑌡𑍇 𑌸𑌪𑍍𑌤𑌸𑌪𑍍𑌤𑌤𑌿𑌤𑌮𑌸𑍍𑌸𑌰𑍍𑌗𑌃 ॥
