శ్రీమద్వాల్మీకీయ రామాయణే బాలకాండమ్ ।
అథ అష్టావింశస్సర్గః ।
ప్రతిగృహ్య తతోఽస్త్రాణి ప్రహృష్టవదనశ్శుచిః ।
గచ్ఛన్నేవ చ కాకుత్స్థో విశ్వామిత్రమథాబ్రవీత్ ॥ 1 ॥
గృహీతాస్త్రోఽస్మి భగవన్ దురాధర్షస్సురైరపి ।
అస్త్రాణాం త్వహమిచ్ఛామి సంహారం మునిపుంగవ ॥ 2 ॥
ఏవం బ్రువతి కాకుత్స్థే విశ్వామిత్రో మహామునిః ।
సంహారం వ్యాజహారాథ ధృతిమాన్ సువ్రతశ్శుచిః ॥ 3 ॥
సత్యవంతం సత్యకీర్తిం ధృష్టం రభసమేవ చ ।
ప్రతిహారతరం నామ పరాఙ్ముఖమవాఙ్ముఖమ్ ॥ 4 ॥
లక్షాక్షవిషమౌ చైవ దృఢనాభసునాభకౌ ।
దశాక్షశతవక్త్రౌ చ దశశీర్షశతోదరౌ ॥ 5 ॥
పద్మనాభమహానాభౌ దుందునాభసునాభకౌ ।
జ్యోతిషం కృశనం చైవ నైరాశ్యవిమలావుభౌ ॥ 6 ॥
యోగంధరహరిద్రౌ చ దైత్యప్రశమనౌతథా ।
సార్చిర్మాలీ ధృతిర్మాలీ వృత్తిమాన్ రుచిరస్తథా ॥ 7 ॥
పితృసౌమనసం చైవ విధూతమకరావుభౌ ।
కరవీరకరం చైవ ధనధాన్యౌ చ రాఘవ ॥ 8 ॥
కామరూపం కామరుచిం మోహమావరణం తథా ।
జృంభకం సర్వనాభం చ సంతానవరణౌ తథా ॥ 9 ॥
భృశాశ్వతనయాన్ రామ భాస్వరాన్కామరూపిణః ।
ప్రతీచ్ఛ మమ భద్రం తే పాత్రభూతోఽసి రాఘవ ॥ 10 ॥
బాఢమిత్యేవ కాకుత్స్థః ప్రహృష్టేనాంతారాత్మనా ।
దివ్యభాస్వరదేహాశ్చ మూర్తిమంతస్సుఖప్రదాః ॥ 11 ॥
కేచిదంగారసదృశాః కేచిద్ధూమోపమాస్తథా ।
చంద్రార్కసదృశాః కేచిత్ప్రహ్వాంజలిపుటాస్తథా ॥ 12 ॥
రామం ప్రాంజలయో భూత్వాఽబ్రువన్ మధురభాషిణః ।
ఇమే స్మ నరశార్దూల శాధి కిం కరవామ తే ॥ 13 ॥
మానసాః కార్యకాలేషు సాహాయ్యం మే కరిష్యథ ।
గమ్యతామితి తానాహ యథేష్టం రఘునందనః ॥ 14 ॥
అథ తే రామమామంత్ఱ్య కృత్వా చాపి ప్రదక్షిణమ్ ।
ఏవమస్త్వితి కాకుత్స్థముక్త్వాజగ్ముర్యథాఽగతమ్ ॥ 15 ॥
స చ తాన్ రాఘవో జ్ఞాత్వా విశ్వామిత్రం మహామునిమ్ ।
గచ్ఛన్నేవాథ మధురం శ్లక్ష్ణం వచనమబ్రవీత్ ॥ 16 ॥
కిన్న్వేతన్మేఘసంకాశం పర్వతస్యావిదూరతః ।
వృక్షషండమితో భాతి పరం కౌతూహలం హి మే ॥ 17 ॥
దర్శనీయం మృగాకీర్ణం మనోరమమతీవ చ ।
నానాప్రకారైశ్శకునైర్వల్గునాదైరలంకృతమ్ ॥ 18 ॥
నిస్సృతాః స్మ మునిశ్రేష్ఠ కాంతారాద్రోమహర్షణాత్ ।
అనయా త్వవగచ్ఛామి దేశస్య సుఖవత్తయా ॥ 19 ॥
సర్వం మే శంస భగవన్ కస్యాశ్రమపదం త్విదమ్ ।
సంప్రాప్తా యత్ర తే పాపా బ్రహ్మఘ్నా దుష్టచారిణః ॥ 20 ॥
తవ యజ్ఞస్య విఘ్నాయ దురాత్మానో మహామునే ।
భగవన్ తస్య కో దేశస్సా యత్ర తవ యాజ్ఞికీ ॥ 21 ॥
రక్షితవ్యా క్రియా బ్రహ్మన్మయా వధ్యాశ్చ రాక్షసాః ।
ఏతత్సర్వం మునిశ్రేష్ఠ శ్రోతుమిచ్ఛామ్యహం ప్రభో ॥ 22 ॥
ఇత్యార్షే శ్రీమద్రామాయణే వాల్మీకీయ ఆదికావ్యే బాలకాండే అష్టావింశస్సర్గః ॥
