ଶ୍ରୀମଦ୍ଵାଲ୍ମୀକୀୟ ରାମାୟଣେ ବାଲକାଂଡମ୍ ।
ଅଥ ଅଷ୍ଟାଵିଂଶସ୍ସର୍ଗଃ ।
ପ୍ରତିଗୃହ୍ୟ ତତୋଽସ୍ତ୍ରାଣି ପ୍ରହୃଷ୍ଟଵଦନଶ୍ଶୁଚିଃ ।
ଗଚ୍ଛନ୍ନେଵ ଚ କାକୁତ୍ସ୍ଥୋ ଵିଶ୍ଵାମିତ୍ରମଥାବ୍ରଵୀତ୍ ॥ 1 ॥
ଗୃହୀତାସ୍ତ୍ରୋଽସ୍ମି ଭଗଵନ୍ ଦୁରାଧର୍ଷସ୍ସୁରୈରପି ।
ଅସ୍ତ୍ରାଣାଂ ତ୍ଵହମିଚ୍ଛାମି ସଂହାରଂ ମୁନିପୁଂଗଵ ॥ 2 ॥
ଏଵଂ ବ୍ରୁଵତି କାକୁତ୍ସ୍ଥେ ଵିଶ୍ଵାମିତ୍ରୋ ମହାମୁନିଃ ।
ସଂହାରଂ ଵ୍ୟାଜହାରାଥ ଧୃତିମାନ୍ ସୁଵ୍ରତଶ୍ଶୁଚିଃ ॥ 3 ॥
ସତ୍ୟଵଂତଂ ସତ୍ୟକୀର୍ତିଂ ଧୃଷ୍ଟଂ ରଭସମେଵ ଚ ।
ପ୍ରତିହାରତରଂ ନାମ ପରାଙ୍ମୁଖମଵାଙ୍ମୁଖମ୍ ॥ 4 ॥
ଲକ୍ଷାକ୍ଷଵିଷମୌ ଚୈଵ ଦୃଢନାଭସୁନାଭକୌ ।
ଦଶାକ୍ଷଶତଵକ୍ତ୍ରୌ ଚ ଦଶଶୀର୍ଷଶତୋଦରୌ ॥ 5 ॥
ପଦ୍ମନାଭମହାନାଭୌ ଦୁଂଦୁନାଭସୁନାଭକୌ ।
ଜ୍ୟୋତିଷଂ କୃଶନଂ ଚୈଵ ନୈରାଶ୍ୟଵିମଲାଵୁଭୌ ॥ 6 ॥
ୟୋଗଂଧରହରିଦ୍ରୌ ଚ ଦୈତ୍ୟପ୍ରଶମନୌତଥା ।
ସାର୍ଚିର୍ମାଲୀ ଧୃତିର୍ମାଲୀ ଵୃତ୍ତିମାନ୍ ରୁଚିରସ୍ତଥା ॥ 7 ॥
ପିତୃସୌମନସଂ ଚୈଵ ଵିଧୂତମକରାଵୁଭୌ ।
କରଵୀରକରଂ ଚୈଵ ଧନଧାନ୍ୟୌ ଚ ରାଘଵ ॥ 8 ॥
କାମରୂପଂ କାମରୁଚିଂ ମୋହମାଵରଣଂ ତଥା ।
ଜୃଂଭକଂ ସର୍ଵନାଭଂ ଚ ସଂତାନଵରଣୌ ତଥା ॥ 9 ॥
ଭୃଶାଶ୍ଵତନୟାନ୍ ରାମ ଭାସ୍ଵରାନ୍କାମରୂପିଣଃ ।
ପ୍ରତୀଚ୍ଛ ମମ ଭଦ୍ରଂ ତେ ପାତ୍ରଭୂତୋଽସି ରାଘଵ ॥ 10 ॥
ବାଢମିତ୍ୟେଵ କାକୁତ୍ସ୍ଥଃ ପ୍ରହୃଷ୍ଟେନାଂତାରାତ୍ମନା ।
ଦିଵ୍ୟଭାସ୍ଵରଦେହାଶ୍ଚ ମୂର୍ତିମଂତସ୍ସୁଖପ୍ରଦାଃ ॥ 11 ॥
କେଚିଦଂଗାରସଦୃଶାଃ କେଚିଦ୍ଧୂମୋପମାସ୍ତଥା ।
ଚଂଦ୍ରାର୍କସଦୃଶାଃ କେଚିତ୍ପ୍ରହ୍ଵାଂଜଲିପୁଟାସ୍ତଥା ॥ 12 ॥
ରାମଂ ପ୍ରାଂଜଲୟୋ ଭୂତ୍ଵାଽବ୍ରୁଵନ୍ ମଧୁରଭାଷିଣଃ ।
ଇମେ ସ୍ମ ନରଶାର୍ଦୂଲ ଶାଧି କିଂ କରଵାମ ତେ ॥ 13 ॥
ମାନସାଃ କାର୍ୟକାଲେଷୁ ସାହାୟ୍ୟଂ ମେ କରିଷ୍ୟଥ ।
ଗମ୍ୟତାମିତି ତାନାହ ୟଥେଷ୍ଟଂ ରଘୁନଂଦନଃ ॥ 14 ॥
ଅଥ ତେ ରାମମାମଂତ୍୍ୟ କୃତ୍ଵା ଚାପି ପ୍ରଦକ୍ଷିଣମ୍ ।
ଏଵମସ୍ତ୍ଵିତି କାକୁତ୍ସ୍ଥମୁକ୍ତ୍ଵାଜଗ୍ମୁର୍ୟଥାଽଗତମ୍ ॥ 15 ॥
ସ ଚ ତାନ୍ ରାଘଵୋ ଜ୍ଞାତ୍ଵା ଵିଶ୍ଵାମିତ୍ରଂ ମହାମୁନିମ୍ ।
ଗଚ୍ଛନ୍ନେଵାଥ ମଧୁରଂ ଶ୍ଲକ୍ଷ୍ଣଂ ଵଚନମବ୍ରଵୀତ୍ ॥ 16 ॥
କିନ୍ନ୍ଵେତନ୍ମେଘସଂକାଶଂ ପର୍ଵତସ୍ୟାଵିଦୂରତଃ ।
ଵୃକ୍ଷଷଂଡମିତୋ ଭାତି ପରଂ କୌତୂହଲଂ ହି ମେ ॥ 17 ॥
ଦର୍ଶନୀୟଂ ମୃଗାକୀର୍ଣଂ ମନୋରମମତୀଵ ଚ ।
ନାନାପ୍ରକାରୈଶ୍ଶକୁନୈର୍ଵଲ୍ଗୁନାଦୈରଲଂକୃତମ୍ ॥ 18 ॥
ନିସ୍ସୃତାଃ ସ୍ମ ମୁନିଶ୍ରେଷ୍ଠ କାଂତାରାଦ୍ରୋମହର୍ଷଣାତ୍ ।
ଅନୟା ତ୍ଵଵଗଚ୍ଛାମି ଦେଶସ୍ୟ ସୁଖଵତ୍ତୟା ॥ 19 ॥
ସର୍ଵଂ ମେ ଶଂସ ଭଗଵନ୍ କସ୍ୟାଶ୍ରମପଦଂ ତ୍ଵିଦମ୍ ।
ସଂପ୍ରାପ୍ତା ୟତ୍ର ତେ ପାପା ବ୍ରହ୍ମଘ୍ନା ଦୁଷ୍ଟଚାରିଣଃ ॥ 20 ॥
ତଵ ୟଜ୍ଞସ୍ୟ ଵିଘ୍ନାୟ ଦୁରାତ୍ମାନୋ ମହାମୁନେ ।
ଭଗଵନ୍ ତସ୍ୟ କୋ ଦେଶସ୍ସା ୟତ୍ର ତଵ ୟାଜ୍ଞିକୀ ॥ 21 ॥
ରକ୍ଷିତଵ୍ୟା କ୍ରିୟା ବ୍ରହ୍ମନ୍ମୟା ଵଧ୍ୟାଶ୍ଚ ରାକ୍ଷସାଃ ।
ଏତତ୍ସର୍ଵଂ ମୁନିଶ୍ରେଷ୍ଠ ଶ୍ରୋତୁମିଚ୍ଛାମ୍ୟହଂ ପ୍ରଭୋ ॥ 22 ॥
ଇତ୍ୟାର୍ଷେ ଶ୍ରୀମଦ୍ରାମାୟଣେ ଵାଲ୍ମୀକୀୟ ଆଦିକାଵ୍ୟେ ବାଲକାଂଡେ ଅଷ୍ଟାଵିଂଶସ୍ସର୍ଗଃ ॥
