śrīmadvālmīkīya rāmāyaṇē bālakāṇḍam ।
atha aṣṭāviṃśassargaḥ ।
pratigṛhya tatō'strāṇi prahṛṣṭavadanaśśuchiḥ ।
gachChannēva cha kākutsthō viśvāmitramathābravīt ॥ 1 ॥
gṛhītāstrō'smi bhagavan durādharṣassurairapi ।
astrāṇāṃ tvahamichChāmi saṃhāraṃ munipuṅgava ॥ 2 ॥
ēvaṃ bruvati kākutsthē viśvāmitrō mahāmuniḥ ।
saṃhāraṃ vyājahārātha dhṛtimān suvrataśśuchiḥ ॥ 3 ॥
satyavantaṃ satyakīrtiṃ dhṛṣṭaṃ rabhasamēva cha ।
pratihārataraṃ nāma parāṅmukhamavāṅmukham ॥ 4 ॥
lakṣākṣaviṣamau chaiva dṛḍhanābhasunābhakau ।
daśākṣaśatavaktrau cha daśaśīrṣaśatōdarau ॥ 5 ॥
padmanābhamahānābhau dundunābhasunābhakau ।
jyōtiṣaṃ kṛśanaṃ chaiva nairāśyavimalāvubhau ॥ 6 ॥
yōgandharaharidrau cha daityapraśamanautathā ।
sārchirmālī dhṛtirmālī vṛttimān ruchirastathā ॥ 7 ॥
pitṛsaumanasaṃ chaiva vidhūtamakarāvubhau ।
karavīrakaraṃ chaiva dhanadhānyau cha rāghava ॥ 8 ॥
kāmarūpaṃ kāmaruchiṃ mōhamāvaraṇaṃ tathā ।
jṛmbhakaṃ sarvanābhaṃ cha santānavaraṇau tathā ॥ 9 ॥
bhṛśāśvatanayān rāma bhāsvarānkāmarūpiṇaḥ ।
pratīchCha mama bhadraṃ tē pātrabhūtō'si rāghava ॥ 10 ॥
bāḍhamityēva kākutsthaḥ prahṛṣṭēnāntārātmanā ।
divyabhāsvaradēhāścha mūrtimantassukhapradāḥ ॥ 11 ॥
kēchidaṅgārasadṛśāḥ kēchiddhūmōpamāstathā ।
chandrārkasadṛśāḥ kēchitprahvāñjalipuṭāstathā ॥ 12 ॥
rāmaṃ prāñjalayō bhūtvā'bruvan madhurabhāṣiṇaḥ ।
imē sma naraśārdūla śādhi kiṃ karavāma tē ॥ 13 ॥
mānasāḥ kāryakālēṣu sāhāyyaṃ mē kariṣyatha ।
gamyatāmiti tānāha yathēṣṭaṃ raghunandanaḥ ॥ 14 ॥
atha tē rāmamāmantRya kṛtvā chāpi pradakṣiṇam ।
ēvamastviti kākutsthamuktvājagmuryathā'gatam ॥ 15 ॥
sa cha tān rāghavō jñātvā viśvāmitraṃ mahāmunim ।
gachChannēvātha madhuraṃ ślakṣṇaṃ vachanamabravīt ॥ 16 ॥
kinnvētanmēghasaṅkāśaṃ parvatasyāvidūrataḥ ।
vṛkṣaṣaṇḍamitō bhāti paraṃ kautūhalaṃ hi mē ॥ 17 ॥
darśanīyaṃ mṛgākīrṇaṃ manōramamatīva cha ।
nānāprakāraiśśakunairvalgunādairalaṅkṛtam ॥ 18 ॥
nissṛtāḥ sma muniśrēṣṭha kāntārādrōmaharṣaṇāt ।
anayā tvavagachChāmi dēśasya sukhavattayā ॥ 19 ॥
sarvaṃ mē śaṃsa bhagavan kasyāśramapadaṃ tvidam ।
samprāptā yatra tē pāpā brahmaghnā duṣṭachāriṇaḥ ॥ 20 ॥
tava yajñasya vighnāya durātmānō mahāmunē ।
bhagavan tasya kō dēśassā yatra tava yājñikī ॥ 21 ॥
rakṣitavyā kriyā brahmanmayā vadhyāścha rākṣasāḥ ।
ētatsarvaṃ muniśrēṣṭha śrōtumichChāmyahaṃ prabhō ॥ 22 ॥
ityārṣē śrīmadrāmāyaṇē vālmīkīya ādikāvyē bālakāṇḍē aṣṭāviṃśassargaḥ ॥
