શ્રીમદ્વાલ્મીકીય રામાયણે બાલકાંડમ્ ।
અથ અષ્ટાવિંશસ્સર્ગઃ ।
પ્રતિગૃહ્ય તતોઽસ્ત્રાણિ પ્રહૃષ્ટવદનશ્શુચિઃ ।
ગચ્છન્નેવ ચ કાકુત્સ્થો વિશ્વામિત્રમથાબ્રવીત્ ॥ 1 ॥
ગૃહીતાસ્ત્રોઽસ્મિ ભગવન્ દુરાધર્ષસ્સુરૈરપિ ।
અસ્ત્રાણાં ત્વહમિચ્છામિ સંહારં મુનિપુંગવ ॥ 2 ॥
એવં બ્રુવતિ કાકુત્સ્થે વિશ્વામિત્રો મહામુનિઃ ।
સંહારં વ્યાજહારાથ ધૃતિમાન્ સુવ્રતશ્શુચિઃ ॥ 3 ॥
સત્યવંતં સત્યકીર્તિં ધૃષ્ટં રભસમેવ ચ ।
પ્રતિહારતરં નામ પરાઙ્મુખમવાઙ્મુખમ્ ॥ 4 ॥
લક્ષાક્ષવિષમૌ ચૈવ દૃઢનાભસુનાભકૌ ।
દશાક્ષશતવક્ત્રૌ ચ દશશીર્ષશતોદરૌ ॥ 5 ॥
પદ્મનાભમહાનાભૌ દુંદુનાભસુનાભકૌ ।
જ્યોતિષં કૃશનં ચૈવ નૈરાશ્યવિમલાવુભૌ ॥ 6 ॥
યોગંધરહરિદ્રૌ ચ દૈત્યપ્રશમનૌતથા ।
સાર્ચિર્માલી ધૃતિર્માલી વૃત્તિમાન્ રુચિરસ્તથા ॥ 7 ॥
પિતૃસૌમનસં ચૈવ વિધૂતમકરાવુભૌ ।
કરવીરકરં ચૈવ ધનધાન્યૌ ચ રાઘવ ॥ 8 ॥
કામરૂપં કામરુચિં મોહમાવરણં તથા ।
જૃંભકં સર્વનાભં ચ સંતાનવરણૌ તથા ॥ 9 ॥
ભૃશાશ્વતનયાન્ રામ ભાસ્વરાન્કામરૂપિણઃ ।
પ્રતીચ્છ મમ ભદ્રં તે પાત્રભૂતોઽસિ રાઘવ ॥ 10 ॥
બાઢમિત્યેવ કાકુત્સ્થઃ પ્રહૃષ્ટેનાંતારાત્મના ।
દિવ્યભાસ્વરદેહાશ્ચ મૂર્તિમંતસ્સુખપ્રદાઃ ॥ 11 ॥
કેચિદંગારસદૃશાઃ કેચિદ્ધૂમોપમાસ્તથા ।
ચંદ્રાર્કસદૃશાઃ કેચિત્પ્રહ્વાંજલિપુટાસ્તથા ॥ 12 ॥
રામં પ્રાંજલયો ભૂત્વાઽબ્રુવન્ મધુરભાષિણઃ ।
ઇમે સ્મ નરશાર્દૂલ શાધિ કિં કરવામ તે ॥ 13 ॥
માનસાઃ કાર્યકાલેષુ સાહાય્યં મે કરિષ્યથ ।
ગમ્યતામિતિ તાનાહ યથેષ્ટં રઘુનંદનઃ ॥ 14 ॥
અથ તે રામમામંત્્ય કૃત્વા ચાપિ પ્રદક્ષિણમ્ ।
એવમસ્ત્વિતિ કાકુત્સ્થમુક્ત્વાજગ્મુર્યથાઽગતમ્ ॥ 15 ॥
સ ચ તાન્ રાઘવો જ્ઞાત્વા વિશ્વામિત્રં મહામુનિમ્ ।
ગચ્છન્નેવાથ મધુરં શ્લક્ષ્ણં વચનમબ્રવીત્ ॥ 16 ॥
કિન્ન્વેતન્મેઘસંકાશં પર્વતસ્યાવિદૂરતઃ ।
વૃક્ષષંડમિતો ભાતિ પરં કૌતૂહલં હિ મે ॥ 17 ॥
દર્શનીયં મૃગાકીર્ણં મનોરમમતીવ ચ ।
નાનાપ્રકારૈશ્શકુનૈર્વલ્ગુનાદૈરલંકૃતમ્ ॥ 18 ॥
નિસ્સૃતાઃ સ્મ મુનિશ્રેષ્ઠ કાંતારાદ્રોમહર્ષણાત્ ।
અનયા ત્વવગચ્છામિ દેશસ્ય સુખવત્તયા ॥ 19 ॥
સર્વં મે શંસ ભગવન્ કસ્યાશ્રમપદં ત્વિદમ્ ।
સંપ્રાપ્તા યત્ર તે પાપા બ્રહ્મઘ્ના દુષ્ટચારિણઃ ॥ 20 ॥
તવ યજ્ઞસ્ય વિઘ્નાય દુરાત્માનો મહામુને ।
ભગવન્ તસ્ય કો દેશસ્સા યત્ર તવ યાજ્ઞિકી ॥ 21 ॥
રક્ષિતવ્યા ક્રિયા બ્રહ્મન્મયા વધ્યાશ્ચ રાક્ષસાઃ ।
એતત્સર્વં મુનિશ્રેષ્ઠ શ્રોતુમિચ્છામ્યહં પ્રભો ॥ 22 ॥
ઇત્યાર્ષે શ્રીમદ્રામાયણે વાલ્મીકીય આદિકાવ્યે બાલકાંડે અષ્ટાવિંશસ્સર્ગઃ ॥
