𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌬𑌾𑌲𑌕𑌾𑌂𑌡𑌮𑍍 ।
𑌅𑌥 𑌅𑌷𑍍𑌟𑌾𑌵𑌿𑌂𑌶𑌸𑍍𑌸𑌰𑍍𑌗𑌃 ।
𑌪𑍍𑌰𑌤𑌿𑌗𑍃𑌹𑍍𑌯 𑌤𑌤𑍋𑌽𑌸𑍍𑌤𑍍𑌰𑌾𑌣𑌿 𑌪𑍍𑌰𑌹𑍃𑌷𑍍𑌟𑌵𑌦𑌨𑌶𑍍𑌶𑍁𑌚𑌿𑌃 ।
𑌗𑌚𑍍𑌛𑌨𑍍𑌨𑍇𑌵 𑌚 𑌕𑌾𑌕𑍁𑌤𑍍𑌸𑍍𑌥𑍋 𑌵𑌿𑌶𑍍𑌵𑌾𑌮𑌿𑌤𑍍𑌰𑌮𑌥𑌾𑌬𑍍𑌰𑌵𑍀𑌤𑍍 ॥ 1 ॥
𑌗𑍃𑌹𑍀𑌤𑌾𑌸𑍍𑌤𑍍𑌰𑍋𑌽𑌸𑍍𑌮𑌿 𑌭𑌗𑌵𑌨𑍍 𑌦𑍁𑌰𑌾𑌧𑌰𑍍𑌷𑌸𑍍𑌸𑍁𑌰𑍈𑌰𑌪𑌿 ।
𑌅𑌸𑍍𑌤𑍍𑌰𑌾𑌣𑌾𑌂 𑌤𑍍𑌵𑌹𑌮𑌿𑌚𑍍𑌛𑌾𑌮𑌿 𑌸𑌂𑌹𑌾𑌰𑌂 𑌮𑍁𑌨𑌿𑌪𑍁𑌂𑌗𑌵 ॥ 2 ॥
𑌏𑌵𑌂 𑌬𑍍𑌰𑍁𑌵𑌤𑌿 𑌕𑌾𑌕𑍁𑌤𑍍𑌸𑍍𑌥𑍇 𑌵𑌿𑌶𑍍𑌵𑌾𑌮𑌿𑌤𑍍𑌰𑍋 𑌮𑌹𑌾𑌮𑍁𑌨𑌿𑌃 ।
𑌸𑌂𑌹𑌾𑌰𑌂 𑌵𑍍𑌯𑌾𑌜𑌹𑌾𑌰𑌾𑌥 𑌧𑍃𑌤𑌿𑌮𑌾𑌨𑍍 𑌸𑍁𑌵𑍍𑌰𑌤𑌶𑍍𑌶𑍁𑌚𑌿𑌃 ॥ 3 ॥
𑌸𑌤𑍍𑌯𑌵𑌂𑌤𑌂 𑌸𑌤𑍍𑌯𑌕𑍀𑌰𑍍𑌤𑌿𑌂 𑌧𑍃𑌷𑍍𑌟𑌂 𑌰𑌭𑌸𑌮𑍇𑌵 𑌚 ।
𑌪𑍍𑌰𑌤𑌿𑌹𑌾𑌰𑌤𑌰𑌂 𑌨𑌾𑌮 𑌪𑌰𑌾𑌙𑍍𑌮𑍁𑌖𑌮𑌵𑌾𑌙𑍍𑌮𑍁𑌖𑌮𑍍 ॥ 4 ॥
𑌲𑌕𑍍𑌷𑌾𑌕𑍍𑌷𑌵𑌿𑌷𑌮𑍌 𑌚𑍈𑌵 𑌦𑍃𑌢𑌨𑌾𑌭𑌸𑍁𑌨𑌾𑌭𑌕𑍌 ।
𑌦𑌶𑌾𑌕𑍍𑌷𑌶𑌤𑌵𑌕𑍍𑌤𑍍𑌰𑍌 𑌚 𑌦𑌶𑌶𑍀𑌰𑍍𑌷𑌶𑌤𑍋𑌦𑌰𑍌 ॥ 5 ॥
𑌪𑌦𑍍𑌮𑌨𑌾𑌭𑌮𑌹𑌾𑌨𑌾𑌭𑍌 𑌦𑍁𑌂𑌦𑍁𑌨𑌾𑌭𑌸𑍁𑌨𑌾𑌭𑌕𑍌 ।
𑌜𑍍𑌯𑍋𑌤𑌿𑌷𑌂 𑌕𑍃𑌶𑌨𑌂 𑌚𑍈𑌵 𑌨𑍈𑌰𑌾𑌶𑍍𑌯𑌵𑌿𑌮𑌲𑌾𑌵𑍁𑌭𑍌 ॥ 6 ॥
𑌯𑍋𑌗𑌂𑌧𑌰𑌹𑌰𑌿𑌦𑍍𑌰𑍌 𑌚 𑌦𑍈𑌤𑍍𑌯𑌪𑍍𑌰𑌶𑌮𑌨𑍌𑌤𑌥𑌾 ।
𑌸𑌾𑌰𑍍𑌚𑌿𑌰𑍍𑌮𑌾𑌲𑍀 𑌧𑍃𑌤𑌿𑌰𑍍𑌮𑌾𑌲𑍀 𑌵𑍃𑌤𑍍𑌤𑌿𑌮𑌾𑌨𑍍 𑌰𑍁𑌚𑌿𑌰𑌸𑍍𑌤𑌥𑌾 ॥ ॥
𑌪𑌿𑌤𑍃𑌸𑍌𑌮𑌨𑌸𑌂 𑌚𑍈𑌵 𑌵𑌿𑌧𑍂𑌤𑌮𑌕𑌰𑌾𑌵𑍁𑌭𑍌 ।
𑌕𑌰𑌵𑍀𑌰𑌕𑌰𑌂 𑌚𑍈𑌵 𑌧𑌨𑌧𑌾𑌨𑍍𑌯𑍌 𑌚 𑌰𑌾𑌘𑌵 ॥ ॥
𑌕𑌾𑌮𑌰𑍂𑌪𑌂 𑌕𑌾𑌮𑌰𑍁𑌚𑌿𑌂 𑌮𑍋𑌹𑌮𑌾𑌵𑌰𑌣𑌂 𑌤𑌥𑌾 ।
𑌜𑍃𑌂𑌭𑌕𑌂 𑌸𑌰𑍍𑌵𑌨𑌾𑌭𑌂 𑌚 𑌸𑌂𑌤𑌾𑌨𑌵𑌰𑌣𑍌 𑌤𑌥𑌾 ॥ ॥
𑌭𑍃𑌶𑌾𑌶𑍍𑌵𑌤𑌨𑌯𑌾𑌨𑍍 𑌰𑌾𑌮 𑌭𑌾𑌸𑍍𑌵𑌰𑌾𑌨𑍍𑌕𑌾𑌮𑌰𑍂𑌪𑌿𑌣𑌃 ।
𑌪𑍍𑌰𑌤𑍀𑌚𑍍𑌛 𑌮𑌮 𑌭𑌦𑍍𑌰𑌂 𑌤𑍇 𑌪𑌾𑌤𑍍𑌰𑌭𑍂𑌤𑍋𑌽𑌸𑌿 𑌰𑌾𑌘𑌵 ॥ 10 ॥
𑌬𑌾𑌢𑌮𑌿𑌤𑍍𑌯𑍇𑌵 𑌕𑌾𑌕𑍁𑌤𑍍𑌸𑍍𑌥𑌃 𑌪𑍍𑌰𑌹𑍃𑌷𑍍𑌟𑍇𑌨𑌾𑌂𑌤𑌾𑌰𑌾𑌤𑍍𑌮𑌨𑌾 ।
𑌦𑌿𑌵𑍍𑌯𑌭𑌾𑌸𑍍𑌵𑌰𑌦𑍇𑌹𑌾𑌶𑍍𑌚 𑌮𑍂𑌰𑍍𑌤𑌿𑌮𑌂𑌤𑌸𑍍𑌸𑍁𑌖𑌪𑍍𑌰𑌦𑌾𑌃 ॥ 11 ॥
𑌕𑍇𑌚𑌿𑌦𑌂𑌗𑌾𑌰𑌸𑌦𑍃𑌶𑌾𑌃 𑌕𑍇𑌚𑌿𑌦𑍍𑌧𑍂𑌮𑍋𑌪𑌮𑌾𑌸𑍍𑌤𑌥𑌾 ।
𑌚𑌂𑌦𑍍𑌰𑌾𑌰𑍍𑌕𑌸𑌦𑍃𑌶𑌾𑌃 𑌕𑍇𑌚𑌿𑌤𑍍𑌪𑍍𑌰𑌹𑍍𑌵𑌾𑌂𑌜𑌲𑌿𑌪𑍁𑌟𑌾𑌸𑍍𑌤𑌥𑌾 ॥ 12 ॥
𑌰𑌾𑌮𑌂 𑌪𑍍𑌰𑌾𑌂𑌜𑌲𑌯𑍋 𑌭𑍂𑌤𑍍𑌵𑌾𑌽𑌬𑍍𑌰𑍁𑌵𑌨𑍍 𑌮𑌧𑍁𑌰𑌭𑌾𑌷𑌿𑌣𑌃 ।
𑌇𑌮𑍇 𑌸𑍍𑌮 𑌨𑌰𑌶𑌾𑌰𑍍𑌦𑍂𑌲 𑌶𑌾𑌧𑌿 𑌕𑌿𑌂 𑌕𑌰𑌵𑌾𑌮 𑌤𑍇 ॥ 13 ॥
𑌮𑌾𑌨𑌸𑌾𑌃 𑌕𑌾𑌰𑍍𑌯𑌕𑌾𑌲𑍇𑌷𑍁 𑌸𑌾𑌹𑌾𑌯𑍍𑌯𑌂 𑌮𑍇 𑌕𑌰𑌿𑌷𑍍𑌯𑌥 ।
𑌗𑌮𑍍𑌯𑌤𑌾𑌮𑌿𑌤𑌿 𑌤𑌾𑌨𑌾𑌹 𑌯𑌥𑍇𑌷𑍍𑌟𑌂 𑌰𑌘𑍁𑌨𑌂𑌦𑌨𑌃 ॥ 14 ॥
𑌅𑌥 𑌤𑍇 𑌰𑌾𑌮𑌮𑌾𑌮𑌂𑌤𑍍𑍍𑌯 𑌕𑍃𑌤𑍍𑌵𑌾 𑌚𑌾𑌪𑌿 𑌪𑍍𑌰𑌦𑌕𑍍𑌷𑌿𑌣𑌮𑍍 ।
𑌏𑌵𑌮𑌸𑍍𑌤𑍍𑌵𑌿𑌤𑌿 𑌕𑌾𑌕𑍁𑌤𑍍𑌸𑍍𑌥𑌮𑍁𑌕𑍍𑌤𑍍𑌵𑌾𑌜𑌗𑍍𑌮𑍁𑌰𑍍𑌯𑌥𑌾𑌽𑌗𑌤𑌮𑍍 ॥ 15 ॥
𑌸 𑌚 𑌤𑌾𑌨𑍍 𑌰𑌾𑌘𑌵𑍋 𑌜𑍍𑌞𑌾𑌤𑍍𑌵𑌾 𑌵𑌿𑌶𑍍𑌵𑌾𑌮𑌿𑌤𑍍𑌰𑌂 𑌮𑌹𑌾𑌮𑍁𑌨𑌿𑌮𑍍 ।
𑌗𑌚𑍍𑌛𑌨𑍍𑌨𑍇𑌵𑌾𑌥 𑌮𑌧𑍁𑌰𑌂 𑌶𑍍𑌲𑌕𑍍𑌷𑍍𑌣𑌂 𑌵𑌚𑌨𑌮𑌬𑍍𑌰𑌵𑍀𑌤𑍍 ॥ 16 ॥
𑌕𑌿𑌨𑍍𑌨𑍍𑌵𑍇𑌤𑌨𑍍𑌮𑍇𑌘𑌸𑌂𑌕𑌾𑌶𑌂 𑌪𑌰𑍍𑌵𑌤𑌸𑍍𑌯𑌾𑌵𑌿𑌦𑍂𑌰𑌤𑌃 ।
𑌵𑍃𑌕𑍍𑌷𑌷𑌂𑌡𑌮𑌿𑌤𑍋 𑌭𑌾𑌤𑌿 𑌪𑌰𑌂 𑌕𑍌𑌤𑍂𑌹𑌲𑌂 𑌹𑌿 𑌮𑍇 ॥ 1 ॥
𑌦𑌰𑍍𑌶𑌨𑍀𑌯𑌂 𑌮𑍃𑌗𑌾𑌕𑍀𑌰𑍍𑌣𑌂 𑌮𑌨𑍋𑌰𑌮𑌮𑌤𑍀𑌵 𑌚 ।
𑌨𑌾𑌨𑌾𑌪𑍍𑌰𑌕𑌾𑌰𑍈𑌶𑍍𑌶𑌕𑍁𑌨𑍈𑌰𑍍𑌵𑌲𑍍𑌗𑍁𑌨𑌾𑌦𑍈𑌰𑌲𑌂𑌕𑍃𑌤𑌮𑍍 ॥ 1 ॥
𑌨𑌿𑌸𑍍𑌸𑍃𑌤𑌾𑌃 𑌸𑍍𑌮 𑌮𑍁𑌨𑌿𑌶𑍍𑌰𑍇𑌷𑍍𑌠 𑌕𑌾𑌂𑌤𑌾𑌰𑌾𑌦𑍍𑌰𑍋𑌮𑌹𑌰𑍍𑌷𑌣𑌾𑌤𑍍 ।
𑌅𑌨𑌯𑌾 𑌤𑍍𑌵𑌵𑌗𑌚𑍍𑌛𑌾𑌮𑌿 𑌦𑍇𑌶𑌸𑍍𑌯 𑌸𑍁𑌖𑌵𑌤𑍍𑌤𑌯𑌾 ॥ 1 ॥
𑌸𑌰𑍍𑌵𑌂 𑌮𑍇 𑌶𑌂𑌸 𑌭𑌗𑌵𑌨𑍍 𑌕𑌸𑍍𑌯𑌾𑌶𑍍𑌰𑌮𑌪𑌦𑌂 𑌤𑍍𑌵𑌿𑌦𑌮𑍍 ।
𑌸𑌂𑌪𑍍𑌰𑌾𑌪𑍍𑌤𑌾 𑌯𑌤𑍍𑌰 𑌤𑍇 𑌪𑌾𑌪𑌾 𑌬𑍍𑌰𑌹𑍍𑌮𑌘𑍍𑌨𑌾 𑌦𑍁𑌷𑍍𑌟𑌚𑌾𑌰𑌿𑌣𑌃 ॥ 20 ॥
𑌤𑌵 𑌯𑌜𑍍𑌞𑌸𑍍𑌯 𑌵𑌿𑌘𑍍𑌨𑌾𑌯 𑌦𑍁𑌰𑌾𑌤𑍍𑌮𑌾𑌨𑍋 𑌮𑌹𑌾𑌮𑍁𑌨𑍇 ।
𑌭𑌗𑌵𑌨𑍍 𑌤𑌸𑍍𑌯 𑌕𑍋 𑌦𑍇𑌶𑌸𑍍𑌸𑌾 𑌯𑌤𑍍𑌰 𑌤𑌵 𑌯𑌾𑌜𑍍𑌞𑌿𑌕𑍀 ॥ 21 ॥
𑌰𑌕𑍍𑌷𑌿𑌤𑌵𑍍𑌯𑌾 𑌕𑍍𑌰𑌿𑌯𑌾 𑌬𑍍𑌰𑌹𑍍𑌮𑌨𑍍𑌮𑌯𑌾 𑌵𑌧𑍍𑌯𑌾𑌶𑍍𑌚 𑌰𑌾𑌕𑍍𑌷𑌸𑌾𑌃 ।
𑌏𑌤𑌤𑍍𑌸𑌰𑍍𑌵𑌂 𑌮𑍁𑌨𑌿𑌶𑍍𑌰𑍇𑌷𑍍𑌠 𑌶𑍍𑌰𑍋𑌤𑍁𑌮𑌿𑌚𑍍𑌛𑌾𑌮𑍍𑌯𑌹𑌂 𑌪𑍍𑌰𑌭𑍋 ॥ 22 ॥
𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌬𑌾𑌲𑌕𑌾𑌂𑌡𑍇 𑌅𑌷𑍍𑌟𑌾𑌵𑌿𑌂𑌶𑌸𑍍𑌸𑌰𑍍𑌗𑌃 ॥
